Акълова 10

10 къаьм

Сулайбан авараглис кицийа

1Сулайбанис кицийа:

ЦӀодорабли оьжди або рази о̄с,

аьнтабли оьжди ийос йакӀо кӀокӀолца.

2Гьаьрамабли хазинали хайир нилӀаъас,

ритӀухълъила хеллиъис тиса муьвахолча.

3Муъмилла БетӀергьалли нуко-ахъаба̄л мейаъас,

лъаькъейа сукӀол йатӀийо жо Гьолцо нилӀаъас.

4КӀаъабла ко̄да̄ аьдам мискиндокӀца,

йикье-йа̄ькьецала ко̄да̄ бечед о̄с.

5Азодо муькъо-бох йокӀолцас сукӀо цӀодораб оьжо гей,

муькъо йуьгьчалаъ утӀна эчейо нуькучӀ ахъца.

6Муъмин-сукӀола къаьмкьа баркат мокъос,

лъаькъейа сукӀола йажла̄ъ зулмо муцона бахъца.

7Муъмин-сукӀо акӀкьа оᵸкъолда баркат гулца,

лъаькъейа сукӀос ца̄на йугъос.

8Аᵸкъилабли кӀетӀо амро йакӀо йоᵸкъонна къабул бо̄с,

амма аьнтаб балагьлиъ кези ахъца.

9ЙакӀо йаᵸцона уьᵸхо-аьᵸхейал гьицӀал жо гаьъа,

чикейо гьино гьакӀийо охна эжеш.

10ЦӀодоло йакӀона йохна гьаьй йаькьелло сукӀо пашманлъи йоᵸкъолца,

йакӀиъ йуцечӀе аьйиб бегалла аьдамла рекъеллиъ бейажеш

11Муъмилла̄ла сикӀаъас маулхӀаят#10:11 МаулхӀаят (араб.) – чӀаголъилас лъи. гӯс,

лъаькъейа сукӀола йаьжла̄ъ зулмо муцона бахъца

12Тушманлъила кьаллиъ бейажеш,

рокьила къацӀцӀа̄ мунагьла йуᵸвацос.

13ЦӀодораблила сикӀаъ аᵸкъиллъи йиᵸхъос,

лъай гаьчча̄л михъа̄ъ баькьелал цӀицӀо михъос.

14Аᵸкъилаблила йакӀи илмо-лъай цӀуми бо̄с,

аьбдаллила сикӀа пасалъи кьодо кьисас.

15Бечедаблис боцӀи-ризкъи – вагьли йахъца гьолцос билӀа̄ хъала,

амма мискин-сукӀо гьинила язихлъила угъолца.

16Муъмиллила бетӀербахъила гьолцол чӀаголъи ницца,

лъаькъейа сукӀол йиᵸхъова хайирли гьули тамбигьлиъ эжеш.

17Малъзи йо̄йо аьᵸдалаъ йеᵸгьцас сукӀо чӀаго гьихлъос,

кантӀизи о̄йолъи къабул йоваъцала сукӀос гьино кьичӀеш.

18Тушманлъи йакӀиъ йуᵸцова сукӀос сикӀаъ отӀола̄лъи йахъца,

миц богьна икълашецас сукӀона аьбдал ахъца.

19Йаьже тели ниса̄цо мунагь бахъечӀе гьихлъаъас,

гьинила сикӀакьа раьгьай гуллона цӀодораб сукӀо ахъца.

20Муъмиллис сикӀаъас миц йаᵸцойо окко-меседлъийо гей,

лъаькъейа сукӀос йакӀо къимат гаьччо йахъца.

21Муъмиллила сикӀа лади сукӀо кикзи о̄с,

аьбдалла гьидес аᵸкъло йоькькьа бахъийахъа бувагъос.

22БетӀергьаллила баркатли бечед бовагьца,

баркат гаьгьийа сукӀол ургъелна къарилъина йикъаъас.

23Аьбдал чикейа аьмалликьа цӀилӀос,

аᵸкъил цӀодорлъилакьа рази ахъца.

24Лъаькъейа сукӀокьа гьичӀеголцас жо гьинкьазу кьодо йоᵸкъос,

муъмин-сукӀол йатӀийосинаб йиᵸхъос.

25Йукъо залӀо йикьелъ, лъаькъейо сукӀо гьолълъо окчина эжеш,

муъмин-сукӀолӀо нисода илӀакъона эчеш.

26Сила̄л къанцӀалъийо, гьаьйда̄л хъолъийо жо гей

кӀаъаб сукӀо сийоди жойлагъой муьгъалӀ э̄ᵸйолъи.

27БетӀергьаллихъа гьичӀейас оьмро бихалолъца,

лъаькъейа сукӀоба̄с оьмро маьшелъца.

28Муъмин-сукӀос кул бахъийоназу рохел-разилъи йоᵸкъос,

лъаькъейа сукӀос кул аьдада бахъца.

29БетӀергьаллис гьино – гьули гей йакӀо йаᵸцова сукӀос билӀа̄ хъала,

кешлъи йогьцалас гьули чӀодан гей.

30Муъмин-сукӀо гьаᵸкъкъана хих тӀотӀна экаъас,

лъаькъейо сукӀона мицакьа кьодо гьихлъаъас.

31Муъмин-сукӀола сикӀаъас аᵸкъиллъи гӯс,

йатӀеэш жо нисоцас миц буьчӀна тӀуцца.

32Муъмиллила сикӀал йикъеш йакӀил йаццас йаьже нисал,

лъаькъейа сукӀола сикӀа къацӀцӀо къаьмлӀийода̄ гулца.

Currently Selected:

Акълова 10: KapPROLUK

Highlight

Copy

Want to have your highlights saved across all your devices? Sign up or sign in

Learn More About Анкълова, Лука