Лука 1
1
1-НЭ ЕДЗЫГЪУЭ
Мы тхылъыр щӀэстхар
1Ди пащхьэм щекӀуэкӀа Ӏуэхухэм я хъыбар ятхыжыным цӀыху куэд хэтащ. 2Абыхэм ятхар а Ӏуэхухэм щӀэдзапӀэм къыщегъэжьауэ зи нэкӀэ зылъэгъуахэмрэ Тхьэм и псалъэхэм хуэлажьэхэмрэ къызэрытхуаӀуэтэжам тетщ. 3Аращи, сэри мы къэхъукъащӀэ Ӏуэху псори я щӀэдзапӀэм къыщегъэжьауэ сыхуэсакъыурэ згъэунэхуа нэужь, уэ, щӀыхь зыхуэфащэ Феофил,#1:3 Феофил – Лука мы тхылъыр зыхуитхыр аращ, еплъ Апостол. 1:1. Феофил Мэссихь теухуа хъыбарыфӀым щыгъуазэ тхьэмадэ гуэрт. Феофил и хъыбар афӀэкӀа диӀэкъым. зэкӀэлъыкӀуэу пхуэстхын мурад сщӀащ, 4уэ узыхурагъэджа Ӏуэхухэм япэжыгъэр пщӀэн щхьэкӀэ.
ЦӀыхухэр зыумэхъ Иуан къызэралъхунур ДжэбрэӀил мелыӀычым зэрыжиӀар
5Иудей хэкум#1:5 Иудей хэкур – Палестинэ къэрал псор арщ. и пащтыхь Ирод#1:5 пащтыхь Ирод – «Ирод Иныр» арщ. Еплъ Маттэ 2:1. и тетыгъуэм Зэчрей зи цӀэ дин пашэ гуэр щыӀащ. Ар АвиекӀэ зэджэ дин пашэ гупым яхэтт. И щхьэгъусэ Елизавет Хьэрун къытехъукӀахэм ящыщащ. 6Тхьэуэ Зиусхьэным дежкӀэ щыпкъагъэ ягу илъу, абы и унафэхэмрэ и хабзэхэмрэ тету, щӀагъэкъуэншэн лъэпкъ ямылэжьу псэурт тӀури. 7Бын яӀакъым, Елизавет фыз мылъхуэт, тӀури ныбжькӀэ хэкӀуэтати.
8Зэчрей зыхэт дин пашэ гупыр Тхьэм и унэшхуэм щылэжьэну пӀалъэр къыщысым, Зэчрей Тхьэм и пащхьэм дин пашэу Ӏуэху щищӀэрт. 9Дин пашэхэм я хабзэм тету пхъэидзэ щащӀым, Зиусхьэным и унэшхуэм щӀыхьэу, мэ ӀэфӀ къызыпих удзыр Тхьэм щхьэкӀэ игъэсыну Зэчрейм къылъысащ. 10Удзыр щагъэсын хуей сыхьэтыр къыщысым, Зэчрейм удзыр игъэсыху, Тхьэм и унэшхуэм и пщӀантӀэм Тхьэ щелъэӀуащ цӀыху псори.
11Удз гъэсыпӀэм ижьырабгъумкӀэ Зиусхьэным и мелыӀыч гуэр Зэчрейм къыщыхуэхутащ. 12Ар щилъагъум, Зэчрей къащтэри, шынагъуэшхуэм зэщӀиубыдащ. 13МелыӀычым абы къыжриӀащ:
– Умышынэ, Зэчрей. Уи лъэӀур Тхьэм зэхихащ. Уи щхьэгъусэ Елизавет къуэ къыпхуилъхунущ, абы цӀэуэ Иуан фӀэпщынущ. 14Абы гуфӀэгъуэшхуэрэ насыпышхуэрэ къыпхудэкӀуэнущ, ар къызэралъхуам щхьэкӀэ цӀыху куэд гуфӀэнущ. 15Тхьэуэ Зиусхьэным дежкӀэ ар цӀыхушхуэ хъунущ, санэрэ зыгъэудэфэн фадэрэ ефэнукъым икӀи и анэм и ныбэм щилъам щыщӀэдзауэ Тхьэм и Псэ ЛъапӀэр и гум куууэ хыхьэнущ. 16Израил цӀыху куэд Зиусхьэну я Тхьэм и гъуэгу къытригъэхьэжынущ. 17Тхьэм и Псэ ЛъапӀэр Иляс бегъымбарым#1:17 Иляс бегъымбарыр – еплъ Малахие бегъымбарым и тхылъым 4:5-6. игу зэрилъам хуэдэу, абыи игу илъу, Иляс лъэкӀыныгъэ зэриӀам хуэдэу лъэкӀыныгъэ иӀэу, Зиусхьэныр къэкӀуэн и пэкӀэ ар къэкӀуэнущ. Адэхэмрэ къуэхэмрэ ягухэр фӀы зэхуищӀыжынущ, Тхьэм емыдаӀуэхэри щыпкъагъэ зигу илъ цӀыхухэм я гъуэгу тригъэхьэнущ. Зиусхьэным хуэфащэ лъэпкъ хъун щхьэкӀэ, абы Израил лъэпкъыр игъэхьэзырынущ.
18– Ар зэрыпэжыр дауэ къызэрысщӀэнур? – еупщӀащ Зэчрей мелыӀычым. – Сэ лӀыжь сыхъуащ, си щхьэгъусэм и ныбжьри хэкӀуэтащ.
19– Тхьэм и пащхьэм ит ДжэбрэӀил мелыӀычыр сэращ, – къыжриӀащ мелыӀычым. – Мы хъыбарыфӀыр ныбжесӀэн щхьэкӀэ, сынопсэлъэну Тхьэм сыкъигъэкӀуащ. 20Аращи, си псалъэхэр уи фӀэщ зэрымыхъуам щхьэкӀэ, а бжесӀа Ӏуэхухэр къэхъуху, умыпсэлъэфу, бзагуэу ущытынущ. ПӀалъэр къыщыскӀэ, ахэр къэхъун хуейщ.
21Зэчрей Тхьэм и унэшхуэм къызэрыщӀэмыкӀыжыр ягъэщӀагъуэу, цӀыхухэр абы пэплъащ апщӀондэху. 22Зэчрей Тхьэм и унэшхуэм къыщыщӀэкӀыжым, цӀыхухэм епсэлъэн хузэфӀэкӀакъым. Тхьэм и унэшхуэм зыгуэр абы къызэрыщыхуэлъэгъуар къагурыӀуащ цӀыхухэм. Зыхуейр ӀэпэтэрмэшкӀэ къагуригъаӀуэу, Зэчрей бзагуэ хъуащ. 23Тхьэм и унэшхуэм Ӏуэху щищӀэн щыхуей махуэхэр блэкӀа нэужь, Зэчрей и унэм игъэзэжащ. 24И щхьэгъусэ Елизавет лъэщыджэ хъуащ куэд мыщӀэу, цӀыхухэм мазитхукӀи къахыхьакъым. 25«Зиусхьэным мыр сэ къысхуищӀащ», жиӀащ абы. «Мы махуэхэм абы и нэфӀ къысщыхуэри, си мыгъуагъэр цӀыхухэм я пащхьэм щыстрихащ».
Хьисэ къызэралъхунур ДжэбрэӀил мелыӀычым Мэрием къызэрыжриӀар
26Елизавет мазихкӀэ лъэщыджауэ, Тхьэм и мелыӀыч ДжэбрэӀил Галилей хэкум#1:26 Галилей хэкур – еплъ Маттэ 2:22. щыщ Назарет къалэм#1:26 Назарет къалэр – еплъ Маттэ 2:23. къигъэкӀуащ. 27Ар къызыхуигъэкӀуар Мэрием зи цӀэ хъыджэбз гуэрщ. Исуф зи цӀэу Даут пащтыхьым къытехъукӀа цӀыхухэм ящыщ лӀым а Мэрием къишэну къыхихауэ щытащ. 28Мэрием здэщыӀэм къакӀуэри, мелыӀычым жиӀащ:
– ГуфӀэ уэ, Тхьэм и нэфӀ зыщыхуар. Зиусхьэныр уи гъусэщ.
29МелыӀычым жиӀам Мэрием хуабжьу къигъэгузэващ икӀи а фӀэхъус псалъэу къыжриӀам къикӀым егупсысащ.
30– Умышынэ, Мэрием, – къыжриӀащ мелыӀычым абы, – Тхьэм и нэфӀ къыпщыхуащ. 31Уэ лъэщыджэ ухъунурэ къуэ къэплъхунущ. Абы цӀэуэ фӀэпщынур Хьисэщ. 32Ар цӀыхушхуэ хъунущ, Тхьэуэ Лъагэм и КъуэкӀэ еджэнущ. И адэшхуэ Даут и тахътэр Зиусхьэну Тхьэм абы къритынущ. 33МыкӀуэдыжын тепщэныгъэ Екъуб и лъэпкъым хуиӀэнущ абы. И тепщэныгъэшхуэм зэи кӀэ иӀэнукъым.
34– Ар дауэ зэрыхъунур? – еупщӀащ Мэрием мэлэӀычым. – Сэ сыхъыджэбздэсщ.
35– Тхьэм и Псэ ЛъапӀэр къыпхуехынущ, Тхьэуэ Лъагэм и лъэкӀыныгъэри уи гъусэнущ, – къыжриӀащ мелыӀычым абы. – Аращи, щӀалэ лъапӀэу къалъхунум Тхьэм и КъуэкӀэ еджэнущ. 36Мис, уи благъэ Елизавету фызмылъхуэщ жыхуаӀэу щытар и жьыщхьэ лъэщыджэ хъуащ икӀи мазэ еханэм итщ; 37Тхьэм хузэфӀэмыкӀын Ӏуэху зыри щыӀэкъым.
38– Мис, сэ Зиусхьэным сриӀуэхутхьэбзащӀэщ, – жиӀащ Мэрием. – Уэ зэрыжыпӀам тету къыздрехъу.
Мэрием къигъанэри, мелыӀычыр ежьэжащ итӀанэ.
Мэрием Елизавет деж зэрыкӀуар
39А махуэхэм Мэрием зигъэхьэзырри, Ӏуащхьэлъэ хэкум щыщу ИудэкӀэ зэджэ унагъуэ лъэпкъыр зыдэс жылэ гуэрым пӀащӀэу кӀуащ. 40А жылэм щынэсым, Зэчрей и унэм щӀыхьэри, Мэрием Елизавет фӀэхъус ирихащ. 41Елизавет Мэрием и фӀэхъус псалъэр щызэхихым, и ныбэм илъ сабийр хъеящ. Тхьэм и Псэ ЛъапӀэр Елизавет игу куууэ хыхьэри, 42Елизавет макъ лъагэкӀэ жиӀащ:
– ЦӀыхубз псоми нэхърэ Тхьэм и нэфӀ уэ нэхъ къыпщыхуащ, уи пкъым къыхэкӀыну сабийми Тхьэм и нэфӀ къыщыхуащ. 43Сэ сыхэт, си Зиусхьэным и анэр си деж къэкӀуэну? 44Уи фӀэхъус псалъэр щызэхэсхым, си ныбэм илъ сабийм гуфӀэгъуэшхуэкӀэ зыкъигъэхъеящ. 45Зиусхьэным къыжриӀар къехъулӀэнкӀэ зи фӀэщ хъуар гъуэгу махуэ теуващ!
Мэрием Зиусхьэным фӀыщӀэшхуэ зэрыхуищӀар
46Мэрием жиӀащ итӀанэ:
«Зиусхьэным и инагъым гурэ псэкӀэ
фӀыщӀэшхуэ хузощӀ.
47СымыкӀуэду сыкъезыгъэл Тхьэм ину
сыщогуфӀыкӀ,
48и пщылӀ тхьэмыщкӀэм
Зиусхьэныр нэфӀкӀэ къеплъащ.
Мис, нобэ щыщӀэдзауэ лъэхъэнэ псоми
я цӀыхухэм сэ гъуэгу махуэ сытеувауэ жаӀэнущ,
49сыту жыпӀэмэ ЛъэкӀыныгъэшхуэ
ЗиӀэм Ӏуэху телъыджэхэр къысхуищӀащ.
Абы и цӀэращ лъапӀэр.
50Тхьэм езым и фӀэлӀыкӀыр зи гум илъ
цӀыхухэм гущӀэгъу яхуещӀ,
адэм къыщыщӀэдзауэ и къуэм нэсу.
51Ӏуэху телъыджэхэр и ӀэкӀэ зэфӀигъэкӀащ.
Зи гум пагагъэ илъхэр зэбгрихуащ.
52Тепщэныгъэ зиӀэхэр я тахътэхэм къридзыхащ,
зи гум пагагъэ имылъхэр къиӀэтащ.
53ХуэмыщӀахэм тыгъэфӀхэр яритащ,
ауэ бейхэр ӀэнэщӀу къигъэнащ.
54-55Езым и пщылӀ Израил лъэпкъым кӀэлъоплъ.
Ди адэшхуэхэр зэригъэгугъам тету,
Ибрэхьимрэ абы къытехъукӀа цӀыхухэмрэ
гущӀэгъу яхуищӀыну игу илъ зэпытщ».
56Елизавет деж мазищкӀэ щыӀа нэужь, Мэрием и унэм игъэзэжащ.
УмэхъакӀуэ Иуан къызэралъхуар
57И лъхуэгъуэ махуэр къэсри, Елизавет къуэ къыхуэхъуащ. 58Елизавет Зиусхьэным гущӀэгъушхуэ къызэрыхуищӀар щызэхахым, абы и гъунэгъухэмрэ и благъэхэмрэ дэгуфӀащ.
59Сабийр сунэт* ящӀыну цӀыхухэр еянэ махуэм щызэхуэсым, абы и адэ Зэчрей и цӀэр фӀащыжын я гугъащ. 60Ауэ сабийм и анэм яхуидакъым.
– Хьэуэ, Иуанщ абы фӀэтщынур, – жиӀащ.
61– Апхуэдэ цӀэ зиӀэ уэ уи благъэхэм зыри яхэткъым, – къыжраӀащ абыхэм.
62Сабийм и адэм ӀэпэтэрмэшкӀэ еупщӀащ абы цӀэуэ фӀищыну зыхуеймкӀэ. 63Зытетхыхьын гуэр къахьыну ягуригъэӀуащ адэм. Ар къахьа нэужь, тритхащ: «Абы цӀэуэ иӀэнур Иуанщ».
Ар псоми ягъэщӀэгъуащ. 64Арыххэу, Зэчрей и бзэгур хъейщ, и бзэр къиутӀыпщыжри, Тхьэм фӀыщӀэ хуищӀурэ псалъэу щӀидзащ. 65Ӏэгъуэблагъэм щыпсэу псори шынагъуэшхуэм хэхуащ икӀи Иудей Ӏуащхьэлъэ хэкум дэнэкӀи мы Ӏуэху псори щызэлъащӀысащ. 66А Ӏуэхухэр зэхэзыха псоми я гум ахэр ираубыдауэ жаӀэрт: «Мы сабийр сыт зэрыхъунур?» Сыт щхьэкӀэ жыпӀэмэ Зиусхьэным и нэфӀ абы къыщыхуат.
Тхьэм Зэчрей игу кърилъхьа псалъэхэр къызэрыжиӀар
67Тхьэм и Псэ ЛъапӀэр а сабийм и адэ Зэчрей игу кууэу хыхьэри, мы псалъэхэр къыжригъэӀащ:
68«Зиусхьэну Израил и Тхьэм
щӀыхьышхуэр ейщ, сыт щхьэкӀэ жыпӀэмэ
езым и лъэпкъ Израил нэфӀкӀэ къеплъри,
щхьэхуитыныгъэ къритащ.
69Тхьэм и ӀуэхутхьэбзащӀэ Даут пащтыхьым
къытехъукӀа цӀыхухэм ящыщу
лъэкӀыныгъэшхуэ зиӀэу, дымыкӀуэду
дыкъезыгъэлынур къытхуигъэкӀуащ,
70пасэрей зэманым къыщыщӀэдзауэ абы и бегъымбар
лъапӀэхэм ягу кърилъхьэу,
зэрыжригъэӀауэ щытам тету.
71Абы ди бийхэм дащихъумэурэ,
дымыкӀуэду дыкъригъэлынущ,
ди жагъуэгъухэми дакъыӀэщӀихыжынущ.
72Апхуэдэу Тхьэм ди адэшхуэхэм
гущӀэгъушхуэ къахуещӀ,
зэгурыӀуэныгъэ лъапӀэу езымрэ
ди адэшхуэу Ибрэхьимрэ я зэхуакум
псалъэ быдэкӀэ къыдилъхьари егъэзащӀэ.
73А псалъэ быдэр мыращ:
74Дэ ди бийхэм дакъыӀэщӀихыжынущ икӀи
шынагъуэ дигу имылъу езым дыхуэлэжьэн
тлъигъэкӀынущ,
75езым и пащхьэм
гукъабзагъэрэ щыпкъагъэрэ игъащӀэкӀэ щыдиӀэу».
76ИтӀанэ Зэчрей къыпищащ:
«Уэ, си щӀалэ, Тхьэуэ Лъагэм и бегъымбаркӀэ
къоджэнущ,
Зиусхьэным и гъуэгу хуэбгъэпсыну
езым и пэ къихуэу укӀуэнущи.
77Уэ Зиусхьэным и лъэпкъым ебгъэщӀэнущ
я гуэныхьхэр зэрахуигъэгъумкӀэ
ахэр мыкӀуэду къызэрыригъэлыр.
78Ди Тхьэм и гущӀэгъур инщ.
Дыгъэ къыкъуэкӀым хуэдэу,
ар уафэм къикӀынурэ къытхуэкӀуэнущ,
79лӀэныгъэм и шынагъуэм хэтхэмрэ
кӀыфӀыгъэм хэтхэмрэ ятепсэн икӀи
мамырыгъэ гъуэгум дытригъэхьэн щхьэкӀэ».
80Сабийр къэхъури, игукӀи и псэкӀи зиужьащ. Израил цӀыхухэм я пащхьэм къыщихьэну махуэм нэсыху, губгъуэ нэщӀым исащ ар.
Currently Selected:
Лука 1: KbdNTGP2017
Highlight
Share
Copy
Want to have your highlights saved across all your devices? Sign up or sign in
© Библиер зэдзэкӀыным елжь Институт, 1993, 2007, 2011, 2017
