Jon 13

Jisòs su wulu jùmtìbàmsu wunsu

1À ndùku mô shyəma tuku yu ma yə, Yə Daŋa chyalani, ma Jisòs hì khə na yu ti kpen shyəma yi lo a mbye afân, ma yi yen a Bì wî a ngwùŋ. Wù hì kôŋà ghɨt a wuna ghe ghɨ ndùku mô a mbyî, faŋ hì kôŋà kə yi kôŋ ghɨna shyəma wù de mbyi yinâ.

2Ghɨ kolo a hì mô a leŋ a yu kolô te ghɨna yə, a mô ni ma deblì ti fo kwâktìnì ha Judàs Ìskaliyòt wâ Samùn, na wù bəkli Jisòs. 3Jisòs hì khə kə nâ na Bì ti fo jyaka ha wûn a tô mwə̀ mù jɨ̀m, khə na yi lo a Yènfù a ngwùŋ mô hi kaha yèn. 4Wù lôtì wu lùk wu yənu chwok nju se wù tì wafa, tam bàtàli, 5sef mòlû a kaŋ a sona wùna hì sô wulu jùmtìbàmsu wunsu atɨ̂n, yâhà nì bàtàli ye wù tì tama yâ, 6ben tan ha Bità, wù ki buf ha wun na, “A wò jìsà na wò khɨŋa kə nâ hi sò wulu mu a Bâ?”

7Jisòs jis ha wun na, “Wò yena khɨle wijə gha ye mu nè chîn, biyani mô hi bè yen a khɨlî.”

8Bità tunhî jis na, “Wò bè sô wijə wulu mu tuk wule.”

Jisòs jis ha wun na, “Mu hì bu hi sò wulu wa, ma ghàh wò jyahi.”

9Samùn Bità ki jîs na, “Yi hì mô ni a Bâ, kə su kə wulu mu, wo boŋ su wo mu nì to ma!”

10Jisòs jis na, “À su nâbi nde wunu, wu hi fê kəta wi hi sò wunu wù jɨ̀m beka wun wu wunu hì yulelò. Ghàn à jɨ̀m chin mò nì yulînì a bu kə wùt wù mòk.” 11Jisòs tì jis yâ na ghɨna mò nì yulînì a bu kə wùt wù mòk beka wù ndùku mô ma wù hì khə wùt we wu nè bəkle wûn.

12Jisòs su mihì wulu ghɨna kaha mak njusu wunsu wafa sê yen ndokò a wu lùk afa wù ye ndoko, ki buf ha jùmtìbàmsù wunsu na, “Ghàn ti yen khɨli gha ye mu ne ha ghàn ni agha?” 13Ghàn toŋte mu na chichà fê toŋte mu na Bâba, yi mô kə nâ hamok. 14Mu ti su wulu wanu chîn mô Bâba fê mò chichà. Yi chwûtè na nâbi nde a ghàn a fùtɨ̂n kəta hi tè sò wulu wâ nè wunu. 15Mu ni chwùti a chwena ha ghàn shyəma ghàn nê hi nê kə te mu nè. 16Mu jìsà ha ghàn hamok na, wùt yi fèt tà timi hì chyâ bì yì fèt à wûn, wùt wù tumana chyâ wi wùt we wù tuma wûn. 17Ghàn hì khəlò gha mɨ ghɨ̂n, ma ghàn shìki nî kə ni ma ghàn nê hi kəta yutìnì.

18“Mu jìsà wi ha ghàn à jɨ̀m, mu khəlò ghe a mu chwokte. Biyani gha ye ghɨ nyaka a ŋwàklù Fùyèn na, ‘Wùt yə ghàh à wûn ma wù ti kaha ki mu a yi kə̀k, yi kəta hi kpên. 19Mu fòktè gha mi yin ha ghàn chin ni, yi baha mô teka yi gan shyəma yi nê gan, ma ghàn bimi na à mò kə nâ mu, Mu mò we Mu mò’ 20Mu jìsà ha ghàn kə nâ hamok na, à fyi nâbi nde wùt te mu tuma ma à hi mô na wù ti fyi mu, à fyi nâbi nde mu ma à hi mô na wù ti fyi we wù tuma mu.”

Jisòs fôktì na ghɨ nè bəklelò yi

(Mat 26.20-25; Mâk 14.17-21; Lûk 22.21-23)

21Jisòs tì jis gha mɨ ghɨ̂n ni, kwâktì wuni hì fo ngə̂k ha wûn nâ haŋaŋ. Wù ki jîs à banhî na, “Mu jìsà ha ghàn kə nâ hamok na wùt wù mòk làwû a ghàn a fùtɨ̂n mô hi bəkle mu.”

22Jùmtìbàmsù hì mô nì kani, kante na wù jìsà kum nde agha. 23À ndùku mô ni jùmtìbàm à wûn yê wù ndùku kôŋà hanɨ̂ŋ mô ma wù ti ndokò bakha a wun a ngwùŋ. 24Samùn Bità jis ha jùmtìbàm àtɨ̂n na wù buf ha Jisòs na wù jìsà kum nde agha.

25Wù yikti yen a Jisòs wù wùn buf ha wun na, “Wò jìsà ha nde a Bâ?”

26Jisòs jis na, “Mu ti chukà a ban ghɨ̂n a mbàh ma mu fo ha wùt we mu jìsà kum wûn.” Wù jis ni chuk fo ha Judàs wâ Samùn Ìskaliyòt. 27Te Judàs fye kə a ban ghe ni, satàn lyi a wun wu wùn. Jisòs jis ha wun na, “Nyaŋhi nì gha ye wò khɨŋa hi nì.” 28Biyani wùt tê khɨlî a wu lùk wu yənu afa na wù jìsà kum ghə agha. 29Wù jis ni jùmtìbàmsu Jisòs su lesu hì kwàktè na wù jìsà na Judàs ye yun mwə̀ mù yə̂mù na tuku yu ma ghɨ yə tuk wu yi yə atɨ̂n, à hì bu ni, ma à hi mô na wù jìsà na wù fo ka ha ghɨt a fufana.

30Kə wu yu te Judàs fye ban ghe ha Jisòs fwu yen kə bɨn a finana.

Jisòs fo sak yi fe

31À ndùku mô te Judàs fwo yena yâ, Jisòs ki jîs na, “Yu ti kpên shyəma ghɨ yen jyak a Wâ Wùt, ma fê yen jyak ghe Yènfù fo tohne a wun wu wùn. 32À nè hì mô a wu yu afa ghɨ yena jyak a Fùyènà tohne a wun wu wùn ma Yènfù ni ghɨ boŋa yen jyak a wuna. Yènfù ni ma gha mi yîn nyâŋhè gan. 33Mwəlà mânù mu nè hì mô kə nì ghàn a fu yulâ, hi chwùtè ngɨŋ à mì. Ghàn nè khɨŋalò mu moŋ ma mu ti yen wu lùk, ghàn bu hi bèn afû. Mu fòktè ha ghàn kə yi ghəl te mu mò ma mu ti fôktì ha ghɨt a Jûs. 34Mu fo yi sak yi fe ha ghàn chîn, ghàn hi kôŋà ngɨŋ sanisu, mu ti koŋ ghàn. Ghàn hi kôŋà kəbi ngɨŋ sanisu yâ. 35Nâ ghɨt à jɨ̀m nê yen à khɨli na ghàn mò jùmtìbàm samsu wu lum afa ghàn kòŋà ngɨŋ sanisu.”

Jisòs fôktì na Bità nè manelò yi

(Mat 26.31-35; Mâk 14.27-31; Lûk 22.31-34)

36Jisòs jis ni Samùn Bità buf ha wun na, “Wò yènà afa a Bâ?”

Wù fîsì na “Wò wi hi yèn a wu lùk afa mu yènà atɨ̂n chîn, biyani mô hi bè jùmtè bèn.”

37Bità buf ha wun na, “Mu wi hi yèn chîn njwô ghə a Bâ? Mu mò nì fati wùni hi kpû kum wò.”

38Jisòs kaha buf ha wun na, “Wò mò kə nâ nì fati wùni hi kpû kum mu agha? Mu jìsà ha wò kə nâ hamok na, lɨm à ngwû nè shihi toŋ lan ma wò ti mana mu a ghan à tât.”

Currently Selected:

Jon 13: bmv

Highlight

Copy