Jon 16

1“Mu jis a gha ghɨ̂n à jɨ̀m ha ghàn ni na kə ghàn nè mâkà bimî yani.” 2Ghɨ nè jûmà fihelò ghàn a ndasu yuŋtesu. Mu jìsà ha ghàn hamok na, yu bakhe bênàlò a wùt nè ywe ghàn ma wù hi kwâktè na yi ni yi fêt ha Yènfù. 3Ghɨta nè hi nê a gha mɨ ghɨ̂n ha ghàn beka ghɨna khə wijə mu, khə wi Bì. 4Mu fòktè a gha ghɨ̂n ha ghàn ni shyəma yu tɨnu nê kpen, ma ghɨ nê shihi nì ha ghàn ma ghàn yɨŋti te mu tì fòkte ha ghàn.

Fêt yi Yohnà Yulena

Mu tà che fôktì jə̂ gha mɨ ghɨ̂n ha ghàn ashyə̂ beka mu ndùku mô ghàhnà amok. 5Chîn mô mu yênà a wùt we wù tuma mu a ngwùŋ, biyani ghàn bufa wi na mu yènà afa agha? 6Mu ti fôktì gha mɨ ghɨ̂n ha ghàn ghɨ hì fo ngə̂k ha ghàn. 7Biyani, mu jìsà ha ghàn hamok na, à mò jùŋ ha ghàn ni te mu lò. Mu ki faŋ hi lò, ma gàmtì tê bènà jə̀ ha ghàn, biyani mu ki lô, ma mu yê tum wûn ha ghàn. 8Wù bènà hi chwùtè a gha ghe ghɨ befa kum nì mbyî ha ghɨt a mbye, hi chwùtè lum te tu mô chilichili nì hi chwùtè lum we Yènfù bè saka ghɨta ha ghàn. 9Ma wù chwùti gha ye yi befa kum mbyî beka ghɨta bime wijə ha mu, 10ma wù fê chwùti lumtu chilichili tu beka mu hì mô a Bom a ngwùŋ, ghàn bu hi fè yen a mu. 11Ma wù chwùti lum we Yènfù bè saka mbyî yìna atɨ̂n beka fə̀n we wù saka mbyî hì mô ma wù ti fen sak.

12Mu baha kəta a gha hidù hi jìs ha ghàn, biyani ma ghàn yu chin ma ghɨ hi fo ngə̂k ha ghàn. 13Biyani Yohnà Yulena ghe ghɨ chwûtè hamok bènàlò ma ghɨ tihi ghàn, ma ghàn hi khə nâbi yìni gha ye yi mô hamok. Wù nè bê ma wù hi jîsà wijə gha wun ghɨ ngɨŋa. Wù nè bênà ma wù hi jîsà gha ghe ghɨ fokte ha wûn, fôktè a ghâ ghɨ baha mô hi bè gàn. 14Wù nè bênà ma wù ni ma ghàn hi khə gha ma, ma ghàn yen koknâ ye mu kəta. 15Nâ mwə̀ mù Bôm mù jɨ̀m mò mâmù. À mò gha ye mu jìsà na, Yohnà Yulena nè bênàlò ma ghɨ lyi gha ma, ma ghɨ ni ma ghàn hi khə.

Kwohi seni nì saŋlînì

16“Ghàn nè motè kə ni ma ghàn tê fê yena jə̀ mu, ma fê motè kə ni ma ghɨ yen mu.”

17Jùmtìbàmsu wunsu lesu hì bufa kə a ghɨna sù ngɨŋ na, “Wù ni jìsà na ‘Ghàn nè motè kə ni ma tê fè yena mu,’ ma fê motè kə ni ma ghɨ yen mu, yi chwûtè na ghə? Wù ni jìsà ni na beka mu yènà a Bì à ngwùŋ, yi chwûtì na ghə” 18Ghɨna hì kwâktè bufa na, “Motì mi yinâ a wù jìsà chwûtè na ghə? Ghàhnà khə wi na wù jìsà na ghə agha.”

19Jisòs khɨli na ghɨna ni khɨŋa hi bufa gha mi yîn ha wûn, ki jîs ha ghɨna na, “A ghàn kante gha ye mu jìsa na ‘Ghàn nè motè kə ni ma ghàn tê fê yena jə̀ mu, ma motè kə ni ma kahà yen mu.’ 20Mu jìsà ha ghàn kə nâ hamok na, ghàn nè hì jyêlò, gûnà, mbyi saŋlê. Ghàn nè hì kwohe yi sên biyani ma seni kwolani tɨni kahi a yi saŋlî.” 21Wùt ywen shihi bwɨ̂, wu hi ywo yi yaf beka yu ti kpên na wù bwɨ, biyani wù bwɨ wu yità yaf mi yê, kum yi saŋlî te wan hì mô a wô. 22Yi ni mò kəbi yi ghəl ha ghàn chin te ghàn kwohe seni, biyani mô hi nè fè yen ghàn na ghàn hì saŋlê, wùt bu hi fè nì na kə ghàn saŋli.

23“Tuk wu tɨnu nè kpenâ ma ghàn tê fè bufa yi gha ha mu. Mu jìsà ha ghàn hamok na, Bì nè folò nâbi ghə ghe ghàn bufa tohne a mu yi yet.” 24Hi tàn chîn ghàn tà buf jə shyə tohne a mu yi yet. Ghàn buf ma ghàn kwoti, ma ghàn hi kəta saŋlînì luneni.

Jisòs fôktì na yi ti sak yə mbyî

25Mu tumle kə a gha ha ghàn yi tumlî, biyani yu mô hi bèn na mu nê hi fê jîsà wi wu lum afân. Mu nè hì fôktè mihè kə yi mihì gha ha ghàn kum Bì. 26Tuk wu tɨnu nè kpenâ ma ghàn nê hi bufa mwə̀lû ha Bôm tohne a mu yi yet kə ghàn a sù ngɨŋ. Mu jìsà na à nè fè bufa wi mu shyə ha Bì a ghàn a wu lùk, 27Beka Bì nâ a wun a ngɨŋ kòŋàlò ghàn beka ghàn kòŋàlò mu, fê bime na mu lo a Bì a ngwùŋ. 28Mu che lo a Bì a ngwùŋ shyəma mu ben a mbyî, kaha yênà a Bì a ngwùŋ.

29Jisòs ndùku jîsà ni, jùmtìbàmsu jis na, “Wò jìsà kə nâ a ndan chîn, fe tumle wijə yi tumlî gha. 30Ghàh ti yen chîn na wò khəlò gha à jɨ̀m, yen na wùt kəta wi hi tè fè buf yi bûf gha ha wò. Yen na yina ti nî na ghàh bimi na wò lo ben a Yènfù a ngwùŋ.”

31Jisòs buf ha ghɨna na, “A ghàn ti bimî chîn! 32Yu nè bènàlò, mu jìsà ma à hì mô kə nâ wù wûn, ghàn mô hi jyàhì na nâbi nde hi kolê. Ghàn nè dêlò mu ma mu hi mô mù nɨ̂ŋ, biyani laha bu mù nɨ̂ŋ beka Bì mò ghàh à wûn. 33Mu fòktè a gha mɨ ghɨ̂n ha ghàn ni, shyəma ghàn faŋ ha mu ma ghɨ hi kəta yutìnì. Ghàn nè kwotelò ngə̂k a mbye afân. Biyani kə wùt nè bota! Mu ti ta chyâ mbyî.”

Currently Selected:

Jon 16: bmv

Highlight

Copy