Jon 20

Jisòs lôtì a yi kpû

(Mat 28.1-8; Mâk 16.1-8; Lûk 24.1-12)

1Te tuku yula bênà a tuk wu shyə a ngâm, Mèli wù Màtalà lo bɨn a baha fina kə ni, yen a Jisòs yi jwô yì sì yen ma ghɨ ti bɨŋhi châkhì ti ye yi jwô àtɨ̂n. 2Wù kahi kə nì nyiŋi yen yen Bità nì jùmtìbàm we a wù ndùku kôŋà yâ, jis ha ghɨna na, “Ghɨ ti fihi Bâba a yi sì, ghàh khə wi na ghɨ yen lem afa wun agha!”

3Bità ghê jùmtìbàm yìlè lô hì yênà a jwô yi sì afû, 4ghɨna à jɨ̀m hì gbê nyiŋa kə yi nyîŋ biyani, jùmtìbàm yìlè yê nyiŋ chya Bità yen tan yi jwô yi sì ashyə̂. 5Te wù ye time ni, ngumti ki yi sì, yen bâh wu sùnju we ghɨ tì lima Jisòs atɨ̂n, biyani tê lye jə̀. 6Samùn Bità ben yi bàm chya lyi ki yi lyî atɨ̂n à yi sì yen kə bâh wu sùnju we afû, 7kəbi nì gûm ghe ghɨ tì lima to wuna atɨ̂n, ghɨ mô kə yi ghəl te ghɨ tì limte mô kə hanɨ̂ŋ. 8Jùmtìbàm à Jisòs yê yì ye bena ashyə yâ ki boŋa lyi a yu mefû hi yen, ki bimî. 9Ghɨna hì baha mô teka ghɨna tòkà khɨli luk wu ŋwàklù we wu jîsà na Jisòs ndùku kəta hi lòtè a yi kpû. 10Jùmtìbàmsù Jisòs yen yâ, kahi hì kolê.

Jisòs fwu a Mèli wù Màtalà yì kə̀k

(Mat 28.9, 10; Mâk 16.9-11)

11Biyani, Mèli faŋ ki yi jwô yi sì hi jyê, shihi ki lihi atɨ̂n à yi sì, 12yen anjèlsu Fùyènsu sùbà, ma su ti mak njumù fufamù, su mô a lùk afa ngun yi Jisòs chehì mô atɨ̂n. Anjèl yìlè ndùku mô a lùk afa to wuna ndùku mô, yìlè mô a lùk afa wulu wunu chehì mô. 13Anjèlsu tɨnsu buf ha Mèli na, “Wùt ywen, wò jyè ghə?”

Wù fîsì jis na, “Ghɨ ti lyi lo nì Bâba mù, mu khə wi na ghɨ yen lem afa wûn agha?”

14Mèli jis ni shihi bɨ̀nhì wu wun yen Jisòs, wu boŋa mô afû biyani tê khɨlî jə̀ na à mò wûn. 15Jisòs buf ha wun na, “Wò jyè ghə a wùt ywên? Wò khɨŋa nde?”

Mèli hì kwâktè na à mò wut wù fètana a fùk à mu tama afû, jis ha wun na, “À hì mô ma à lyi lo wò nì wûn, a bèbɨn, wò fôktì luk we wò ye lema wûn atɨ̂n ha mu, ma mu kahè yê lyi.”

16Jisòs fî toŋti kə wun yi yet na, “Mèli!”

Mèli kahi ki wun a yu mefû bwat jis a jìs yi Hibùlùs na, “Làbonì!” Ma wù ya toŋti wun na, ‘Chichà’.

17Jisòs jis ha wun na, “Kə khɨti mu beka mu tà kaha yen jə ha Bì. Bɨ̀li ndù ma wò jis ha wana noma na mu kaha yênà hi yen a Bôm, a mô kəbi Bè à ghɨna, Yèn famfu mô kəbi Fùyèn fu ghɨna fu.”

18Mèli wù Màtalà kahi yen ha jùmtìbàmsù Jisòs su jis ha ghɨna na, yi ti kək Bâba, wù ti fôktì gha mɨ ghɨ̂n ha yi.

Jisòs fwu a jùmtìbàmsu wunsu yi kə̀k

(Mat 28.16-20; Mâk 16.14-18; Lûk 24.36-49)

19À ndùku mô a leŋ a yu kolô, a tuk wu shyə a ngâm, jùmtìbàmsù Jisòs sù mô kə wu luk wù mòk, ma ghɨna ti sen ndâ a ghɨna a tû beka ghɨna ndùku fânà ghɨt a Jûs. Jisòs bûŋhì fwu timi a ghɨna fùtɨ̂n jis na, “Yutìnì mò ha ghàn.” 20Te wù jìsa ni, kahi chwûtì wu wo wunu nì lâ wuni ha ghɨna. Jùmtìbàmsù Jisòs yen wûn hì saŋle nâ haŋaŋ.

21Jisòs fî jis kpenhi ha jùmtìbàmsu wunsu na, “Yutìnì mò ha ghàn! Mu tuma ghàn kəbi te Bom che tuma mu.” 22Wù jis ni, yohnà a ghɨna a tû, jis na, “Ghàn ko Yòhnà Yulena. 23Ghàn ki lêhèfo nâbi be nde, ma Yènfù lêhèfo wûn, ghàn ki faŋ hi lèhèfo wùt, ma Yènfù tê lèhèfo jə̀ wûn.”

Jisòs fwu a Tomòs yi kə̀k

24Te Jisòs tì bèna ha jùmtìbàmsu wunsu, yìlè ye yet yi wuni ndùku mô Tomòs, a mô kəbi wùt wù mòk atɨ̂n à se njwòsù bà ghɨ toŋte kəbi na Didimùs, bu ghê ghɨna. 25Jùmtìsùbàmsu lesu fôktì ha Tomòs na ghɨna ti yen Bâba.

Tomòs jis na, “Mu ki faŋ hi yen bûk wù mbanu a wun a wô nì wulu, hi lihe wana ma ghɨ wo atɨ̂n hi fè mòmtè bî là wuni, ma mu nê tê bimî.”

26À hì mô te ngàm chyàla, jùmtìbàmsu wunsu hì mô a ndâ ghê Tomòs, Jisòs bûŋtì timi a ghɨna fùtɨ̂n, nâbi te jwô ndâ ndùku mô ma ghɨ ti sen falò, wù fî jis na, “Yutìnì mò ha ghàn.” 27Wù jis ha Tomòs na, “Lèm wan à wo wâ a wu lùk afân. À mò wo mu ni. Nàhi bî nì wo gha ma lem a mu yi bi là. Bimî, kə fi kanti yi kantî.”

28Tomòs toŋti wûn jis na, “Bâba mù, Yèn famfu!”

29Jisòs jis ha wun na, “Wò ti bimî chîn beka wò yena mu. Biyani, jùŋ mò ha ghê ghɨna tà yen, bimilò.”

Gha ye ghɨ nyàka ŋwàklù yîn atɨ̂n

30Gha kanana ghɨ le làwû dô kə ni te Jisòs tì nê kə nâ a jùmtìbàmsu wunsu ashyə̂ teka ghɨ nyak a ŋwàklù afân. 31Ghɨ nyak ghɨ̂n ni shyəma ghàn yu, ma ghɨ bimi na Jisòs mò kə nâ Klistù a Wâ Fùyèn, ma bimî mi yîn ni na ghàn khɨti chyəna ghe ghɨ bè mê wi.

Currently Selected:

Jon 20: bmv

Highlight

Copy