Lûk 12

Kɨni kum kamanì

(Mat 10.26-27)

1À ndùku mô te Jisòs lo afû, ghɨta hi yûŋtè bê ha wûn nâ hidù ghɨ mô hi tè jèlè ale a chyə̂, wù yîmì hi tè jìs ha jùmtìbàmsu wunsu na, “Ghàn hi tôknè nì ghɨt a Falàsî ghɨ̂n ghɨ kama nê gha ni, chyəna ghɨna mò te fùshìk atɨ̂n à ban a kwaŋa.” 2Ghàn hi khə na shyə ale wijə a ghe ghɨ baŋa, ghɨ bè faŋa hi ŋakhî, kəbi we ghɨ lete ghɨ bè khɨlelò. 3Kum ni, nâbi yìni gha te ghàn nyamte jîsà, yi bè fwolò a ndan, ghɨ bè taŋa fòktèlò gha ye ghàn nyamte jîsà wu wən.

Jisòs fôktì wùt we a ghɨ kəta hi tè fàn

(Mat 10.28-31)

4“Sun samsu, mu jìsà ha ghàn na, kə ghàn hi fânà ghɨt ghe ghɨ mô hi ywi kə chyak a wùna, biyani fê kəta wi gha yile hi nì yi bàm atɨ̂n.” 5Mu tè fòktèlò we ghàn kəta hi tè fàn. Ghàn hi fânà kə Yènfù. A wun we wù kəta jyaka hi ywe ghàn, fê kəta a jyak hi lèm a ghàn a wu wùs. Mu jìsà ha ghàn na, ghàn hi fânà kə wûn!

6“Ba ghàn bəkle mbwu mù tân kə fu katà ni, biyani ma Yènfù wi hi yìtà nâ fù mòk. 7Nâbi nyuŋ sasu tusu mò, Yènfù khə te su mô. Kə ghàn hi fânà beka ghàn kokne chyâlò, mbwu mù nâ hidù.”

(Mat 10.32-33; 12.32; 10.19-20)

8“Mu jìsà ha ghàn na, a chwùtì nâbi nde a ghɨta ashyə̂ na yi mò wut à mù, ma Wâ Wùt bê boŋà timi anjèlsù Fùyènsu ashyə̂, ma wù jis na wù mò wut à wûn.” 9Biyani à mana nâbi nde mu a ghɨta ashyə̂, ma Wâ Wùt bê boŋà mana wûn a anjèlsù Fùyènsù ashyə̂.

10“Yènfù bè lehèfo lò nâbi nde we wù jìsa gha be kum Wâ Wùt, biyani ma wù bê tè lehèfo jə̀ wùt we wù jìsa gha be kum Yohnà Yulena.”

11“Ghɨ bè khɨte yênàlò nì ghàn a ghɨt a saka ndâ yùŋtì, kə ghàn nê hi kana mbyî kum nì gha ye ghàn nè jîsà, kə ghàn hi kana na ghàn nè jîsà nâ ghə agha, 12beka Yohnà Yulena nè fòktèlò gha ye ghàn nè jîsà kə yu afû.”

Ngàn kum ngwòna wùt wù chìk

13Wùt lè atɨ̂n à nòn afû jis ha Jisòs na, “Chichà, jìs ha wâ nôm na wù jyati mwə̀ me bom tì de ha ghàh ma wù fo mâmù.”

14Jisòs fîsì ha wun na, “Ghɨ tà chwôk jə mu na à mò mu wùt we mu nè jyâhè gha yîn ha ghàn,” 15Jisòs fî jis ha nôn ghe na, “Ghàn hi tôknè kum se fwona, beka chyəna wûtà wijə kə kum mwə̀ mù dô me wù kəta, wù kôŋ wù hi kəta nâbi yàni.”

16Chîn, Jisòs ma ngàn yinâ na, “Wùt chìk wùlè ndùku kəta a fûk ma mwə̀lû ti kwok atɨ̂n nâ jûŋ, 17wù buf ha ngɨŋ à wûn na, ‘Mu nè nê ghə nì mwə̀ munâ ni, kəta wi luku hi lèm atɨ̂n agha?’ 18Wù fî kaha jis kə a wun a ngɨŋ na, ‘Mu ti khɨli gha ye mu mò hi nì. Mu nè shàktèlò ndâ sîn ma mu kahà ba su chiksu, ma mu nê lem mwə̀ munâ atɨ̂n, nì nâbi ghə ghe mu kəta. 19Ki jîs ha ngɨŋ à wûn na, Jwòf à tû, wò kəta lò mwə̀ mù jùŋ hi yə nâ wu yu dâ. Wo dɨ̂ŋhè chyə kə yi chyə̂. Wo yə̂, nyô fê saŋlê.’ 20Biyani Yènfù jis ha wun na, ‘Ngwòna shyə ale, wò nè kpo lò lân ntuksu ma à bê yə nde mwə̀ mâ muna a wò bakte lema ha ngɨŋ ya agha?’”

21Jisòs jis mihì jyana, “À mò te yi bè hì mô ha wùt we wù bakte lema mwə̀lû ha ngɨŋ à wûn, bu a shyə ale a Yènfù ashyə̂.”

Yènfù tòknèlò ha wana wùna

(Mat 6.25-34)

22Jisòs jis ni, kaha jis ha jùmtìbàmsù wunsu na, “Mu jìsà ha ghàn na, kə ghàn hi kana mbyî kum nì chyəna ghana. Kə wùt hi kana mbyî na yi nè yə ghə agha nâbi nì wunu, nâ yi nè mâkà ghə agha.” 23Beka yohnà wûtà chyàlò mwə̀ mù yə̂mù, wunu wûtù chyâ njusu. 24Ghàn yen lê ngwòngwòtù. Ghɨna fètà wi mwə̀ mù yə̂mù, kpo wi jìŋ, kəta wi saŋkwàsù nì tantu hi yane mwə̀lû atɨ̂n, biyani Yènfù yəhe ghɨna. Nâbi ghàn tà yen jə na ghàn chyàlò nyɨ̀mû? 25Wùt wi hi dàbhè yu wunu wu kpu nâ hakoh njwo wù kana mbyî. 26Ghàn shìki bu hi nè fu ghalà te fùna ni, ghàn hi kana mbyî kum nì gha ale njwô ghə? 27Ghàn ke yen te flawà ləma kwoka bwuslò. Wù tà yê timi fet jə shyə ale kəbi hi taha sù nju hi màk. Mu jìsà ha ghàn na, nâbi fə̀n Sòlomùn a wun yi ghak nâ yì jɨ̀m ndùku lafa tânà wi te flawà yìna. 28Yènfù shìki tê labhe flawàsu a ghə̀n sîn ni, a se su bè hì mô yi bîs ma ghɨ təm à nyok a wu wùs, ma fu nê labhi yàni ghàn agha, bimî yani tobte ghə ni?

29Kə ghàn hi fumhe kwâk tanitu na ghàn nè yə ghə, ma ghàn nyu ghə agha. 30À nyiŋa ghɨt a mbye yi bàm yi mwə̀ afân, biyani Bì wânù khəlò na ghàn khɨŋalò mwə̀ mù tɨ̂n. 31Ghàn bɨlà mô hi khɨŋa jùŋ à fə̂n wù Fùyènù a nyə̂ ma fu nê fo kpenhi mwə̀ munâ ha ghàn.

(Mat 6.19-21)

32“Kə ghàn hi fânà, kəbi te nôn ghana tobte, beka Bì wânù ti kôŋ ghàn fo luk wu wunu tu fə̀nù ha ghàn. 33Ghàn bəkli mwə̀ mânù ma ghàn fo ka tɨnu ha ghɨt a fufana. Ghàn fati bàlì se su wi hi bêf ma lem nâbi ghə atɨ̂n, a me mù bu hi mì ma lema a nyə̂ afa ghɨt a chwoŋana wi hi yè tàn hi lyì, fulu bu hi yè tàn afû hi kut a bobhî. 34Ghaki wûtì mò nâbi afa, to wuna hi mô kə afû.”

Jùmtìbàmsù Jisòs sù hi chyə yute wûn

35Jisòs fî jis ha jùmtìbàmsù wunsu na, “Ghàn bakti ngɨŋ sanisu hi nì yi fêt, ghàn ndan lâm sanisu ma ghàn hi yutê 36te ghɨt a fetana ghe ghɨna yute bì fèt à ghɨna na wù kahà kolo wu lùk wu malanu ma jimi jwo nda nâbi wùni yu te wù kùmte. 37Bì fèt ki kaha kolô ki yen ghɨt a fetana wuna kə̂kà ma saŋlînì hi mô ha ghɨna. Mu jìsà ha ghàn hamok na, ma wù nê ni ma ghɨna ndoko wu lùk wu yənu ma wù fati ngɨŋ à wûn ma wù chyahi mwə̀ mù yə̂mù ha ghɨna. 38Wù ki bên, ntênàsê makə wu yu afa tuku yula bênà, yen ghɨna kə̂kà ma saŋlî yi chiki nê hi mô ha ghɨna. 39Ghàn hi khə na, bè ndâ shìki khə yu we wùt wù chwoŋana mò hi bèn, wù wi hi dè na wù bê khɨm ndâ wûn. 40Nâ ghàn kəta hi tè mò nâbi wùni yu gbûtè beka Wâ Wùt bè bênà wu yu afa wùt lè kwàktè wi na wù bè kaha bênà atɨ̂n.”

(Mat 24.45-51)

41Bità buf ha Jisòs na, “Bâba, wò ma ngàn yina kə ha ghàh ma, wò ma ha ghɨt à jɨ̀m agha?”

42Bâba fîsì na, “Wùt wù fètana we wù ywo ha bì fèt à wûn fê tofâ mò wùni? À mò we bì fèt à wûn bu hi yèn a yi gbî, wu lem wûn ashyə̂, wù fo a jyak ha wûn shyəma wù nê hi tôknè nì ndâ wûn, fo mwə̀ mù yə̂mù ha ghɨta a wu yu afa ghɨna khɨŋa.” 43Wùt fètana àtɨ̂n hi saŋlê a wu yu afa bì fèt à wûn kaha bena yen wûn, wu nê gha ye wù tì jìsa. 44Mu jìsà ha ghàn hamok na, yi ki gân ni, ma bì fèt à wûn nê lem wûn ma wù hi tôknè nì mwə̀ mù wûn nâ mù jɨ̀m. 45Biyani wùt fètana àtɨ̂n ki ndokò kwàktì a wun a ngɨŋ na, bì fèt à wûn nè chyətelò shyəma wù kahà kolo, ki yîmì hi tè sama mwəlà me mù fètà a ndâ, sama mwəlà mù lɨmà, sama mwəlà mù ywên fê yə chyâhè, nyu mu lûk, mu kwo wûn, 46ma bì fèt a wûn bê kahà ben tuk wule wu yu afa wù kwàktè wi na wù nè kaha bê atɨ̂n, ma wù nê fo ngə̂k ha wûn nâ haŋaŋ, ma wù chinti wûn nì nôn à ghɨ̂t ghe ghɨ tà bimi jə Yènfù.

47Wùt wù fètana we wù khə gha ye bì fèt à wûn khɨŋa, faŋ hi fate wu wun hi nì yini, ma ghɨ nê sam wûn nâ haŋaŋ. 48Biyani wùt we wù khə wi gha ye wù nè na ghɨ nê sam wûn haŋaŋ, “Ma ghɨ nê sam wun kə fùjiti. Ghɨ fo nâ nâbi nde hidù ma ghɨ nê hi kaha khɨŋa kəbi hidù ha wûn, ghɨ ki samhe nâbi nde hidù, ma ghɨ nê hi khɨŋa nâbi hi fye hidù ha wûn.”

Jisòs ben nì jyàhè wùna

49Jisòs jîs ha jùmtìbàmsù wunsu na, “Mu ben hi kpà wu wus a ghɨta fùtɨ̂n. Nde fo na wu hi mô ma wu hì bamê! 50Mu kəta hi khɨte yi lûm a chyə̂. Gha tɨni fo ngə̂k ha mu nâ haŋaŋ, mu jə̂mà na yi bê chya! 51Ghàn kwàktè na mu ben a ghàn a fùtɨ̂n na ghɨta hi chyə a bonà ma? Yi wijə yâ. Mu bɨ̀li ben nì jyàhè wùna. 52Hi yìmì chîn, yi sah yi nda afa yi kəta ghɨt a tân, yi jyàhè ghɨt a tât nô ghɨt à bà, ghɨt a bà nô ghɨt a tât. 53Ghɨna jyàhè bì nô wâ wûn wù lɨmà, nì nô wâ wûn wù ywên, nâ nè lɨm nô ywê wan.”

Hi yena khɨle wu yu

(Mat 16.2-3)

54Jisòs ki jîs ha ghɨt à jɨ̀m na, “Ghàn yen a mbàksù a bàh afa yuchwî lye atɨ̂n, nâbi wùni yu, ghàn jis na wuli yi hì bê, yi ben kə yâ”. 55Fî yu te fufa bènà a bàh a nchwô, nâbi wùni yu, ghàn jyan na tùmà nè hì suktèlò, yi nê hì mô kə yâ. 56Ghàn ghɨt ghɨ̂n a kam kama nê gha ni! Ghàn khə hi fòktì te bɨna nè hì mô, Njwô ghə te ghàn yena khɨle wi gha ye Yènfù nè chin agha?

(Mat 5.25-26)

57“Njwô ghə te ghàn yena khɨle wi a ghàn a sù ngɨŋ gha jûŋ ye Yènfù kəta hi nì chin hi bimî? 58Wùt ki lyê wò hì yèn nì wò a lùk wu saku, wo mômhì na ghàn à wûn fati wu lûm, à hì bu yani, wù lye yen nì wò a wùt sak ashyə̂, ma wù sak wò ma wù fo wò ha ghɨt ghe ghɨ fâ ghɨta a ndâ chyâk, ma ghɨ lem wò a ndâ chyâk. 59Mu jìsà ha wò na, yi ki gân ni, ma wò nê faŋ a ndâ chyâk afû hi tàn wu tuk afa wò bè lâkà mihè ka tɨnu nâ wù jɨ̀m.”

Currently Selected:

Lûk 12: bmv

Highlight

Copy

Want to have your highlights saved across all your devices? Sign up or sign in

Learn More About Ŋwàklù Fùyèn Kàn Mù Fê (Cameron)