Lûk 14
14
Jisòs chwuk wùt kùhana wùlè à ghɨna tuk wu laku
1À ndùku mô wu tuk wu laku wule, Jisòs lo yen a wùt lè ndâ à mô kəbi to ghɨt a Falàsî hi yə̂, ghɨt ghe ghɨ ndùku mô afû lem yi se a wun wu wùn nâ haŋaŋ. 2Wùt lè mô wun ashyə̂ yafa nì kùhà. 3Jisòs ki buf ha chichàsu saksu nì ghɨt a Falàsî na, “Saki bimelò na ghɨ chwuk wùt wu tuk wu laku ma, yi tunhelò?”
4Biyani ghɨna china kə moŋ. Jisòs kum wùt àtɨ̂n, chwuk wûn, jyan na, lô ma wò hi kolê, 5ki kaha buf ha ghɨta na, “À mò nde a ghàn a fùtɨ̂n à wâ wûn makə nyàm à wûn ki fen a yi be yi mòli wu tuk wu laku ma wù faŋ hi fihi kə wu yu agha?”
6Ghɨna hì kəta wi gha hi jìs.
Ngumlînì nì tôknànì ha ghɨt a fufana
7Jisòs ki yen ghɨt ghe ghɨ laka na ghɨ ben a wu lùk wu yənu afû, ghɨna bên hì khɨŋa kə hi ndòkò wu lùk wu ngaŋtenu. Wù tobhi ghɨna na, 8“Wùt ki lâkà wò na wò ben a wu lùk ma ghɨ yə malâ, wò bên, kə wò ndòko a wu lùk wu ngaŋtenu beka à làhi tè mò ma wù ti lâkà wùt lè wu kokne chyâ wò. 9Ma wù lyi ma wù jis ha ghàn à jɨ̀m na, ‘Lòti fo luku ha wùt wunâ.’ Ni, ma wò nê wumi hi lòtì hi ndòko wu lùk wu tetanu. 10Wùt ki lâkà wò, wò yên, wò bɨlì ndokò wu lùk wu tetanu shyəma wù nê lyê jis ha wò na, ‘So mù, kokti bi ndòko wu lùk wu ngaŋtenu afân.’ Ni, ma wò nê hi ngaŋtê ha ghɨt ghe ghɨ mô a wu lùk wu yənu afû. 11Nâbi nde we wù kokhe ngɨŋ à wûn a nyə̂, ma Yènfù nê chwohi wûn a chyə̂, ma nâbi nde we wù lye ngɨŋ à wûn a chyə̂, ma Yènfù nê kokhi wûn a nyə̂.”
12Jisòs kaha jîs ha wùt we tì wù làka wûn na, “Wò hì lâkà à ghɨ̂t na ben a wo lùk wu gha nâbi wùni yu, kə wò làka kə sun sasu nì wana na, nì ghɨt gha ghɨ sah yi nda nì ghɨt a chik ghe ghàn à ghɨna chyə bakhe, beka ghɨna nè boŋa lâkàlò wò a ghɨna gha, ma kahà lak wò. 13Wò lyi gha ya, wò bɨlì lâkà wù fèf nì ghɨt a fufana, nì ghɨt a ngəhana, nì ghɨt a kəblena.” 14“Wò ki nî ni ma bônhìnì ben ha wò beka ghɨna bè kahà lâkà wijə wò. Ma Yènfù bê lak wò wu tuk afa ghɨt ghe a chyə chilichili a wun ashyə̂ bè kahà lôtè a yi kpû.”
Ngàn kum nì ghɨt ghe ghɨ tunhe hi bèn yə chiki
(Mat 22.1-10)
15À hì mô te wùt le atɨ̂n à nòn afû ywo gha ghɨ̂n ni, wù jis ha Jisòs na, “Saŋlînì bè hì mô ha ghɨt ghe ghɨ bè yə wu lùk wu fə̀n wù Fùyènù!”
16Jisòs jis ha wun na, “Wùt lè ndùku kəta bin yi chiki lâkà ghɨta, ghɨ dô kə ni. 17Yu kpên, wù tum wùt à wûn wù fèt na wù gbê fokti ha ghɨt ghe wù tì làka na ghɨna ben beka ghɨ ti fati mihì gha à jɨ̀m. 18Biyani ghɨna yîmì kə wù mòk wù mòk hi lona wu lûm. Wùt ashyə̂ jis na, ‘Mu ti yun fukà kəta hi yè kinâ. Ndù ma chyati ba wâ na kə wù bàŋhi lâ.’ 19Wùt lè jis na, ‘Mu ti yun mbòŋsù ìwûm na su fêt fûk a ma, mu yè hi mòmhè sù sîn. Ndù chyati ba wâ na kə wù bàŋhi lâ ha mu.’ 20Wù yen ha wùt lè, wù jis na, ‘Mu bè wi beka ghàh à ywê mù ti kwuk malâ kə ni.’ 21Wùt fètana wùna kaha yen fôktì gha ghɨ̂n ha bì wûn wù fèt. Lâ baŋ wûn, wù jis ha wan àtɨ̂n na, ‘nyàŋhi fwu ndù a lumtu tatu nì tu tetatu yi tèk ma kumtè ben nì fèfù we wu mô afû nì ghɨt a fufana nì ghɨt a ngəhana nì ghɨt a kəblena.’ 22Wùt fètana àtɨ̂n yen kaha ben jis ha wun na, ‘Bèbɨn, mu ti ni nâbi ghə ghe wò jìsa, biyani ndâ tà lun jə̂.’ 23Ni, bè wûn wù fèt fî jis ha wun na, ‘Fwu ma wò yen a lumtu fùktù nì lumtu tetatu a nki ghɨt ghɨ̂n mò hi tè mò atɨ̂n ma wò laka ghɨna ma ghɨ ben ma ndâ mì tahi lûn. 24Mu jìsà ha wò na, nâ wùt nè mômà wi shyə yəna atɨ̂n à ghɨ̂t afa mu ye laka ghɨna ti têt yâ.’”
Ngə̂k ye wùt kəta hi yên shyəma wu gan jùmtìbàm à Jisòs
(Mat 10.37-38)
25À ndùku mô te wù lo hì gbê yênà, nôn à ghɨ̂tà lô hì jûmtè yênà wûn. Wù kahi bɨnhì wu wun jis ha ghɨna na, 26“Wùt kpene wi hi tè mò jùmtìbàm à mì a bu kə na wù kòŋàlò mu chyâ te wù kòŋà bè wûn nì nè wûn nì ywê wûn nì wana wuna nì wana ne wuna, nâbi nì ngɨŋ à wûn.” 27À faŋ nâbi nde hi bèkà kâkfùtàfù wun fu hi jùmtè mu, wù wi hi tè mò jùmtìbàm à mì. 28Kî, à mò nâbi nde a ghàn a fùtɨ̂n a we wù khɨŋa hi ba ndâ yì chìk ki faŋ hi ndòko hi khɨli na yi nè lyê afa ka hidù hi mìhè ndâ yîn atɨ̂n agha? 29Wù ki faŋ hi nì ni biyani lem a chyə ndâ, faŋ hi ba mìhè ndâ àtɨ̂n ma à nê hi chyâ nâbi nde wu lûm yena chəka yê nì wûn, 30jîsà na, ‘Wùt wunâ ti yîmì ba hì bu hi mìhì.’ 31Bu ni, à mò wùni fə̀n wù bakte hi shika yi woŋ ghê fə̀n wù wùlè kəta kə ghɨta yi wòŋa kam ìwûm, ma wù faŋ hi ndòkò hi yên nâ ghɨt ghɨ̂n ta kpenelò hi nò ghɨt a fə̀n wùlè we kam mbà agha? 32Wù ki yen na wù wi hi mòm, ma wù tum ghɨt a tuma ma ghɨ yê yen fə̀n wùlè we, wu baha yê bè hadà, hi fate gha tɨni. 33Yi mô kəbi yi ghəl te nâbi nde a ghàn a fùtɨ̂n we wù tê faŋ hi dè nâbi ghə te wù kəta ma wù hi bu hi tè mò jùmtè à mì.
Jùmtìbàm se su tà fo jə ngɨŋsu ghɨna su mò te mbaŋ fe fu fê tofa wi
(Mat 5.13; Mâk 9.50)
34“Ghàn hi khə na mbaŋfu jwòfàlò, biyani ma fu shìki fê tofa wi, ma ghɨ nê ni nâ ghə na fu fê tof agha? 35Fu nè hì jwôfà wi na ni gha yile atɨ̂n, bu kə na ghɨ suh à màka. À tofa nâbi nde wù hi tòkà yutê.”
Currently Selected:
Lûk 14: bmv
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.
Lûk 14
14
Jisòs chwuk wùt kùhana wùlè à ghɨna tuk wu laku
1À ndùku mô wu tuk wu laku wule, Jisòs lo yen a wùt lè ndâ à mô kəbi to ghɨt a Falàsî hi yə̂, ghɨt ghe ghɨ ndùku mô afû lem yi se a wun wu wùn nâ haŋaŋ. 2Wùt lè mô wun ashyə̂ yafa nì kùhà. 3Jisòs ki buf ha chichàsu saksu nì ghɨt a Falàsî na, “Saki bimelò na ghɨ chwuk wùt wu tuk wu laku ma, yi tunhelò?”
4Biyani ghɨna china kə moŋ. Jisòs kum wùt àtɨ̂n, chwuk wûn, jyan na, lô ma wò hi kolê, 5ki kaha buf ha ghɨta na, “À mò nde a ghàn a fùtɨ̂n à wâ wûn makə nyàm à wûn ki fen a yi be yi mòli wu tuk wu laku ma wù faŋ hi fihi kə wu yu agha?”
6Ghɨna hì kəta wi gha hi jìs.
Ngumlînì nì tôknànì ha ghɨt a fufana
7Jisòs ki yen ghɨt ghe ghɨ laka na ghɨ ben a wu lùk wu yənu afû, ghɨna bên hì khɨŋa kə hi ndòkò wu lùk wu ngaŋtenu. Wù tobhi ghɨna na, 8“Wùt ki lâkà wò na wò ben a wu lùk ma ghɨ yə malâ, wò bên, kə wò ndòko a wu lùk wu ngaŋtenu beka à làhi tè mò ma wù ti lâkà wùt lè wu kokne chyâ wò. 9Ma wù lyi ma wù jis ha ghàn à jɨ̀m na, ‘Lòti fo luku ha wùt wunâ.’ Ni, ma wò nê wumi hi lòtì hi ndòko wu lùk wu tetanu. 10Wùt ki lâkà wò, wò yên, wò bɨlì ndokò wu lùk wu tetanu shyəma wù nê lyê jis ha wò na, ‘So mù, kokti bi ndòko wu lùk wu ngaŋtenu afân.’ Ni, ma wò nê hi ngaŋtê ha ghɨt ghe ghɨ mô a wu lùk wu yənu afû. 11Nâbi nde we wù kokhe ngɨŋ à wûn a nyə̂, ma Yènfù nê chwohi wûn a chyə̂, ma nâbi nde we wù lye ngɨŋ à wûn a chyə̂, ma Yènfù nê kokhi wûn a nyə̂.”
12Jisòs kaha jîs ha wùt we tì wù làka wûn na, “Wò hì lâkà à ghɨ̂t na ben a wo lùk wu gha nâbi wùni yu, kə wò làka kə sun sasu nì wana na, nì ghɨt gha ghɨ sah yi nda nì ghɨt a chik ghe ghàn à ghɨna chyə bakhe, beka ghɨna nè boŋa lâkàlò wò a ghɨna gha, ma kahà lak wò. 13Wò lyi gha ya, wò bɨlì lâkà wù fèf nì ghɨt a fufana, nì ghɨt a ngəhana, nì ghɨt a kəblena.” 14“Wò ki nî ni ma bônhìnì ben ha wò beka ghɨna bè kahà lâkà wijə wò. Ma Yènfù bê lak wò wu tuk afa ghɨt ghe a chyə chilichili a wun ashyə̂ bè kahà lôtè a yi kpû.”
Ngàn kum nì ghɨt ghe ghɨ tunhe hi bèn yə chiki
(Mat 22.1-10)
15À hì mô te wùt le atɨ̂n à nòn afû ywo gha ghɨ̂n ni, wù jis ha Jisòs na, “Saŋlînì bè hì mô ha ghɨt ghe ghɨ bè yə wu lùk wu fə̀n wù Fùyènù!”
16Jisòs jis ha wun na, “Wùt lè ndùku kəta bin yi chiki lâkà ghɨta, ghɨ dô kə ni. 17Yu kpên, wù tum wùt à wûn wù fèt na wù gbê fokti ha ghɨt ghe wù tì làka na ghɨna ben beka ghɨ ti fati mihì gha à jɨ̀m. 18Biyani ghɨna yîmì kə wù mòk wù mòk hi lona wu lûm. Wùt ashyə̂ jis na, ‘Mu ti yun fukà kəta hi yè kinâ. Ndù ma chyati ba wâ na kə wù bàŋhi lâ.’ 19Wùt lè jis na, ‘Mu ti yun mbòŋsù ìwûm na su fêt fûk a ma, mu yè hi mòmhè sù sîn. Ndù chyati ba wâ na kə wù bàŋhi lâ ha mu.’ 20Wù yen ha wùt lè, wù jis na, ‘Mu bè wi beka ghàh à ywê mù ti kwuk malâ kə ni.’ 21Wùt fètana wùna kaha yen fôktì gha ghɨ̂n ha bì wûn wù fèt. Lâ baŋ wûn, wù jis ha wan àtɨ̂n na, ‘nyàŋhi fwu ndù a lumtu tatu nì tu tetatu yi tèk ma kumtè ben nì fèfù we wu mô afû nì ghɨt a fufana nì ghɨt a ngəhana nì ghɨt a kəblena.’ 22Wùt fètana àtɨ̂n yen kaha ben jis ha wun na, ‘Bèbɨn, mu ti ni nâbi ghə ghe wò jìsa, biyani ndâ tà lun jə̂.’ 23Ni, bè wûn wù fèt fî jis ha wun na, ‘Fwu ma wò yen a lumtu fùktù nì lumtu tetatu a nki ghɨt ghɨ̂n mò hi tè mò atɨ̂n ma wò laka ghɨna ma ghɨ ben ma ndâ mì tahi lûn. 24Mu jìsà ha wò na, nâ wùt nè mômà wi shyə yəna atɨ̂n à ghɨ̂t afa mu ye laka ghɨna ti têt yâ.’”
Ngə̂k ye wùt kəta hi yên shyəma wu gan jùmtìbàm à Jisòs
(Mat 10.37-38)
25À ndùku mô te wù lo hì gbê yênà, nôn à ghɨ̂tà lô hì jûmtè yênà wûn. Wù kahi bɨnhì wu wun jis ha ghɨna na, 26“Wùt kpene wi hi tè mò jùmtìbàm à mì a bu kə na wù kòŋàlò mu chyâ te wù kòŋà bè wûn nì nè wûn nì ywê wûn nì wana wuna nì wana ne wuna, nâbi nì ngɨŋ à wûn.” 27À faŋ nâbi nde hi bèkà kâkfùtàfù wun fu hi jùmtè mu, wù wi hi tè mò jùmtìbàm à mì. 28Kî, à mò nâbi nde a ghàn a fùtɨ̂n a we wù khɨŋa hi ba ndâ yì chìk ki faŋ hi ndòko hi khɨli na yi nè lyê afa ka hidù hi mìhè ndâ yîn atɨ̂n agha? 29Wù ki faŋ hi nì ni biyani lem a chyə ndâ, faŋ hi ba mìhè ndâ àtɨ̂n ma à nê hi chyâ nâbi nde wu lûm yena chəka yê nì wûn, 30jîsà na, ‘Wùt wunâ ti yîmì ba hì bu hi mìhì.’ 31Bu ni, à mò wùni fə̀n wù bakte hi shika yi woŋ ghê fə̀n wù wùlè kəta kə ghɨta yi wòŋa kam ìwûm, ma wù faŋ hi ndòkò hi yên nâ ghɨt ghɨ̂n ta kpenelò hi nò ghɨt a fə̀n wùlè we kam mbà agha? 32Wù ki yen na wù wi hi mòm, ma wù tum ghɨt a tuma ma ghɨ yê yen fə̀n wùlè we, wu baha yê bè hadà, hi fate gha tɨni. 33Yi mô kəbi yi ghəl te nâbi nde a ghàn a fùtɨ̂n we wù tê faŋ hi dè nâbi ghə te wù kəta ma wù hi bu hi tè mò jùmtè à mì.
Jùmtìbàm se su tà fo jə ngɨŋsu ghɨna su mò te mbaŋ fe fu fê tofa wi
(Mat 5.13; Mâk 9.50)
34“Ghàn hi khə na mbaŋfu jwòfàlò, biyani ma fu shìki fê tofa wi, ma ghɨ nê ni nâ ghə na fu fê tof agha? 35Fu nè hì jwôfà wi na ni gha yile atɨ̂n, bu kə na ghɨ suh à màka. À tofa nâbi nde wù hi tòkà yutê.”
Currently Selected:
:
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.