Lûk 15

Jisòs ma ngàn kum nì njyə̀ te yì lə̀hne

(Mat 18.12-14)

1Tuk lefu tuku yû, ghɨt ghe ghɨna ndùku kâtà ŋwàklànà nì ghɨt a be ale, chîntì à jɨ̀m hì yênà a Jisòs a ngwùŋ, hi ywo yikî wuni. 2Ghɨt a Falàsî ale nì chichàsu saksu yen ni hì dùmlè njaŋa jîsà na, “Wùt wunâ bimelò na ghɨt a be hi bênà a wun a ngwùŋ, fê yə nâ nì ghɨna.” 3Jisòs ki mâ ngàn ha ghɨna bufa nâ:

4Wùt ha ghàn shìki kəta njyə̀sù wu wə, yì mòk ki ləhà ma wù ni ghə? Yi gan ni, ma wù de sule se mbulamòk njwò bulamòk a ghə̀n ma wù hi gbê khɨŋa yênà yì mòk shyəma wù nê yen. 5Wù ki yên, ma wù nê hi saŋlê nâ jûŋ, ma wù beka yinì a wûn yi wôm 6ma wù kolò toŋa sunsu wunsu nì ghɨt ale ghe ghɨ khə wûn ma wù jis ha ghɨna na, ‘Ghàn ben ma ghàhnà ghɨ̂n hi saŋlê beka mu ti yên njyə̀ mì ye yì tì lèhne, gha tɨni ti jwôf ha mu nâ jûŋ.’ 7Mu jìsà ha ghàn na, yi mô kəbi ni a nyə̂. Saŋlînì làwû a nyə̂ kum nì wùt wù be wù mòk we wù kahe təm yi wuni, kaha ben ha Yènfù chyâ ghɨt a dona ghe ghɨna chyə chilichili fê kwàktè wi na ghɨna kətalò hi kahe təm a ghɨna.

Jisòs ma ngàn kum wu ka te wu ləhne

8“Nâbi ni, wùt ywên wùlè shìki kəta ka wunu te wù lèma wu ləhà, ma wù ni ghə? Yi gan ni, ma wù ndan lâm, ma wù yah ndâ ma wù fatè khɨŋ hi yè tàn a wu yu afa wù nè yena.” 9Nâbi yini te wù yena ma wù toŋa sunsu wunsu nì ghɨt ghe ghɨ khə wûn, ma wù jis ha ghɨna na, ‘Ghàn ben ma ghàhnà hi saŋlê beka mu ti yen ka mu we wu tì lə̀ha.’ 10“Mu jìsà ha ghàn na, wùt wu be wù mòk ki kahe təm yi wuni kahi yen ha Yènfù ma anjèlsù wunsu nê hi saŋlê kəbi yâ.”

Jisòs ma ngàn à wan wù lə̀hana

11Jisòs tî fî fôktì kəbi na, “Wùt lè ndùku kəta wana wuna à bà, 12wù tetana jis ha bè wûn na, ‘Jyatì mwə̀lû bàba ma wò fo mâmù.’ Bè wûn jyâtì fo mù wûn.” 13Tuk mù tê chyâ jə̀ mù sek, wan wù tetana we bəkli mwə̀ mù wûn nâ mù jɨ̀m yen yi gbî yi lak yile, nâ hadà, te wù ye tana afû, hì chînà chyə kə yi chyə̂, chînà yə kə yi yə̂ ka wunu. 14Wu ghaŋ a ghâ milò. Jìŋ yì tâ kwo lak yi tɨni, wù hì fè kəta wi shyə ale hi yə̂. 15Wù yen chyati hi tè fèt ha wùt lè yi lak afû. Wù tum wûn na wù ye hi kine kùnduku wunu a ngûn. 16Wù yên hì fêtà, wùt lè fo wi shyə na wù yə. Wù hì jyê kə nâ na nde fo ma yi hi mô hi yə mwə̀ mù yə̂mù kùnduk muna agha. 17Tofu wunu kaha bên, wù kwâktì, buf ha ngɨŋ à wun na, ‘Mu kpo yênà nì jìŋ afân ni njwô ghə? Bom kəta ghɨt a fetana, ghɨ dô kə ni, ghɨna yə̂ mwə̀ mù yə̂mù, mu ghakne ghɨna agha? 18Yi jwôfà na mu lo kahà kolo ma mu yê yen bôm ma mu jis ha wun na, Bàba, mu ti ni be ha Yènfù, fî ni be ha wò. 19Mu fè kpene wi ha wo wan. Lyì kə mu te wùt wâ wù fèt.’ 20Wù jis ni, lo kaha kolo yen ha bè wûn.

“Bè wûn yen wûn wu baha bênà hadà, seni kwo wûn, wu nyɨŋ yên baŋli wûn.” 21Wâ wûn wuna jis kə gha ye wù ndùku kwâktè na, ‘Bàba, mu ti ni be ha Yènfù, fî ni ha wò. Mu fè kpene wi ha wo wan.’ 22Bè wûn jis ha ghɨt a wuna ghɨ fètana na, ghàn nyaŋhê ben nì njusu jûŋ sù ma labhi wûn atɨ̂n ma lihi chyakfu a wun a wô, ma tuŋ gwusu wùsu a wun a wù, 23fî jis ha ghɨna na, ‘Ghàn lyê ben nâ nì yaka chik ghe ma ghɨ se, ma ghàhnà yə tuk wu lan nì saŋlînì. 24Wâ mù wuna mò ma mu ndùku khə na wù ti kpû, à mò wûn afan ni, mô wu tâ. Mu chehì jîsà kə na wù ti ləhà yên, wù ti kaha bên.’ Ghɨna yîmì hì yə̂ saŋlê. 25“Gha yîn ndùku gânà ni, wâ wùt wuna wù ləmâ mô a fùk. Te wù ndùku kole bakhe bênà a bɨn, yu te ghɨ yema njàŋsù buka a mwə. 26Wù toŋa wan à bɨn wùlè buf ha wûn nâ, à gànà ghə a bɨn agha? 27Wù jis ha wun na, ‘À kaha ben wâ nâ. Ba wâ ti se nâ yaka chik ghe ha wûn beka wù kaha bena, mô kə nâ wun wu tâ.’ 28Wan wù shyə we bâŋhì wu lâ na yi nè fê lye wi a bɨn. Bè wûn fwu yên hì chyate wûn. 29Wù jis ha bè wûn na, ‘Mu ti fêt ha wò a wu lɨ̀m, wò jîsà yi ghâ ha mu, mu nê kə yì yîn. Biyani wò tà timi fo jə kə nâ wâ bwû na ghàh à sun samsu kut. 30Ma wan wâ wunâ yen hi bèn ma wù tî lyi ka wa yen bobhi ghê kpàlànù, wò wu hì mô chîn ma wò ti se nâ yaka chik ghe ha wûn!’ 31Bè wûn ki jîs ha wun na, ‘Wâ mù, wò jìsà ni mô kə ghàh à wò nâ yu mù jɨ̀m, nâbi ghə ghe a mu kəta, à kəta wò 32Yi yê hì jwôfàlò na ghàhnà yə tuk wu chik wunâ beka yi chehì kə̂kà na wâ nâ wunâ ti kpû, wu mò chîn mò kə nâ wu tâ, mu ndùku mô ma mu ti lem na wù ti ləhà. Wù ti kaha bên. Wo jyâna kə ghàhnà hi saŋlê agha?’”

Currently Selected:

Lûk 15: bmv

Highlight

Copy