Lûk 4

Jisòs ta ghak deblì

(Mat 4.1-11; Mâk 1.12-13)

1Jisòs kahi fwu lo a jwô à Jodàn, ma wù ti lûn nì Yohnà Yulena, ghɨ lyi wûn yen nì wûn a yi lak yi Sùsi. 2Afû deblì mômhì wûn a mu tuk mù kìk. Wù chyə tuk muna ni, teka wù yə shyə ale nâ hakoh, jìŋ hì yafa wûn.

3Deblì ki jîs ha wun na, “Wò hì mò kə nâ wâ Fùyèn, jìs lê ha ti ghɨ̂n ma ghɨ kahi ha mwə̀ mù yə̂mù ma wò yə.”

4Jisòs ki fîsì ha wun na, “Ghɨ ti nyak a ŋwàklù Fùyèn na, ‘Wùt wi hi tè chyə kə kum nì shyə yəna.’”

5Deblì lyi wun afû kwok nì wun a lùk wu ngaŋtenu wule, kə afu yulâ ni, wù chwûtì lak tu mbyi tu ha wun kə tù jɨ̀m, 6ki jîs ha wun na, “Mu nè folò jyaka ha wò na wò sak luk tù jɨ̀m nì dɨ̀ŋ ghe ghɨ mô atɨ̂n, beka ghɨ ti fo ha mu nâ tù jɨ̀m, ma mu ki kôŋ ma mu fo nâbi ha nde. 7Wò ki ngumle mu, ma à nê hi kəta kə wò nâ tù jɨ̀m.”

8Jisòs ki fîsì na, “Ghɨ ti nyak a ŋwàklù Fùyèn na, ‘Wò kəta kə hi ngumle Bâba Yènfù fêtà kə ha wûn.’”

9Wù lyi Jisòs afû yen nì wûn a Jèlusalèm kwok tom wun a fùdòŋndôŋfu ndâ Fùyèn yì chìk, jis ha wun na, “Wò hì mô kə nâ Wâ Fùyèn, chyàkti chwo wu lùk afân ma mu yen, 10beka ghɨ ti nyak kəbi a ŋwàklù Fùyèn na:

‘Wù nè tumalò anjèlsù wunsu a wò yi bàm,

na su nê kina wò;

11su nè kwo njiŋhelò wò a nyə̂

teka wò kun nâbi wulu wa a yi ti.’”

12Biyani, Jisòs jis ha wun na, “Ghɨ ti nyak a ŋwàklù Fùyèn na, ‘Kə wò nè mômhè Bâba Yèn fafu.’”

13À hì mô te deblì mòmhe wun kə lum tù jɨ̀m, wù kahi a Jisòs yi bàm wu tuk afû.

Jisòs yîmì yi fêt a Galìlî

(Mat 4.12-17; Mâk 1.14-15)

14Jisòs kaha kolo yen a Galìlî, baha gbê kə Yohnà Yulena jyak. Gha kum wûn gbî kə yi lak afû yì jɨ̀m. 15Wù hì gbê yike a ghɨna ndasu yuŋtesu, nâbi nde kokhe wûn.

Ghɨ tunhî Jisòs a Nasalì

(Mat 13.53-58; Mâk 6.1-6)

16Jisòs lo yen a Nasalì, a mô yi tèk ye wù tì ləma kwoka atɨ̂n, yen lye a ghɨna ndâ yùŋtì a ghɨna tuk wu laku, kə te wù ndùku nê, wù lôtì chya yen hi taŋa ŋwàklù Fùyèn. 17Ghɨ fo ŋwàklù fòktì Ìsayà ha wûn, wù bəh khɨŋ yen luk we ghɨ tì nyàka atɨ̂n na:

18“Yohnà Bâba mò a mu tû

beka wù ti chwok mu na mu fokti tum yì jùŋ ha ghɨt a fufana.

Wù ti tum mu na mu toŋà laka ha ghɨt ghe ghɨ ndùku mô ma ghɨ ti khɨti ghɨna, na tuku ti kpên shyəma ghɨ yat ghɨna,

fî tum mu na mu laka ha ghɨt a fefana na tuku ti kpên shyəma ghɨna yen luktu,

hi fè fihe a ghe ghɨ nyâblè nì ghɨna a ngə̂k.

19Hi lâkà ha ghɨt mɨ ghɨ̂n na ghɨ̂n

mò a lɨ̂m ghe Bâba nè bônhè ghɨt a wuna atɨ̂n.”

20Te wù taŋa mihe luk mu we, wù kaha baŋ ŋwàklù atɨ̂n, fo ha wùt we wù ndùku lêmà, ki chwo ndòkò. Nâbi nde a ndâ yùŋte afân hì duŋà ke kə wun ni. 21Wù ki jîs ha ghɨna na, “Gha mɨ ghɨ̂n te ghàn ywo te mu taŋa ni, ghɨ ti kpên lân.”

22Nâbi nde yen na wù ti jis a jûŋ hì kana na jîs yi fomani yîn fwo kə nâ a wun yi jwo ni agha? Kə afu metì ghɨna kahi hì bufa na, “Ba wùna ni mò kə nâ wâ Josèf agha?”

23Wù jis ha ghɨna na, “Mu khə na ghàn nè jîsà lò ngàn yinâ ha mu na, ‘Wùt à ngàŋ, chwok lê ngɨŋ yâ.’ Nì lê gha ghe a ghàh ywo na wò chehì nêlò a yi lak yi Kàbanùm chin a wo yi lak.” 24Wù jis na, “Mu jìsà ha ghàn hamok na ghɨ fye wi fòktì yi Fùyèn a luk afa ghɨ bwə wun atɨ̂n. 25Ghàn hi khə hamok na ghàn mò kəbi yi ghəl te ghɨt a Isalì ghe ghɨ ndùku mô a Ìlajà wu tuk, ywena nkwô ndùku dô kə ni a Isalì, Yènfù nî na kə wuli na a wu lɨ̀m wù tât nì beka, jìŋ yì tâ kwo kə lak yì jɨ̀m. 26Biyani, Yènfù tum Ìlajà kə ha ywê nkwû wù mòk yi tèk yi Selafàt a yi lak yi Sidòn. Nâbi te ywena nkwû ndùku dô yi lak yi Isalì. 27Yi mô kəbi yi ghəl te yi ndùku mô a fòktì Èlashà mu tuk, ghɨta ndùku yafa nì kùhù dô kə ni, nâ biyani Yènfù tê chwuk nâ wùt wù mòk, a bu kə Namàn, a mô wùt à tûm ma wù lô ben a Siliyà.”

28À ndùku mô te ghɨta ywo gha ghe wù jìsa a ghɨna ndâ yùŋtena ni, lâ baŋ ghɨna nâ haŋaŋ. 29A afû ghɨna lôtì guf fwo nì wûn yi tèk afû, lyi kwok nì wûn a tô kùn afa yi ndùku mô yi tèk afû hì khɨŋa hi bɨŋhe wun a ba. 30Biyani wù fî kaha tohna kəbi a ghɨna fùtɨ̂n chya yen a wun wu lùk.

Jisòs jum fihi yohnà be

(Mâk 1.21-28)

31Wù chwo yen a yi tèk yile a Galìlî. Ghɨ toŋte na Kàbanùm, hì yike a ghɨna wu tuk wu laku. 32Jwo yim à ghɨ̂t beka yikî wuni ndùku kəta jyaka. 33À ndùku mô a ghɨna ndâ yùŋtì wùt lè mô a ghɨna fùtɨ̂n kəta a yohnà a be. Wù bwat a jyə̂ yì tâ jyâna, 34“Fùshâŋ! Wò khɨŋa ghə a ghàh a fùtɨ̂n a Jisòs, wâ wùt à Nasalì wunâ, wò ben hi bobhe ghàh ma? Mu khəlò shyə ghe wò mò ghɨna. À mò kə nâ wò wùt yulena à Fùyèn.”

35Jisòs kântì Yohnà be ghe jis na, “China moŋ, chyà fwu a wùt wunâ wù wùn!” Yohnà be ghê tum wùt atɨ̂n a chyə̂ a ghɨta ashyə̂, fwu a wun wu wùn teka ghɨ lemhi wûn.

36Ghɨna hì mô nì kani bufa nâ, “Wù jìsà na ghə ni agha? Wù kântè a ghâ yohnù be fwo a ghɨta wu wùn beka jyak ghe wù kəta.” 37Gha ghɨ̂n kum wûn gbî kə luk tù jɨ̀m a bàh à yi lak afû.

Jisòs chwuk ghɨta nâ hidù

(Mat 8.14-17; Mâk 1.29-34)

38Te Jisòs fwo a ndâ yùŋte afa yen a Samùn a ndâ. À ndùku mô ni, nè ywê Samùn kəta gut a ta. Ghɨna jis ha Jisòs na wù gamti wûn. 39Wù timi a wun ashyə̂ wu khɨ̀ kântì a ghâ ha gut atɨna, ghɨ mî. Kə wu yu, wù lôtì chyâhì mwə̀ mù yə̂mù ghɨna yə̂.

40Yuchwî shihì lyî, nâbi nde we wù ndùku kəta wùt yafana, wu yafa nâbi nì ghə, ghɨ lyi bên nì wûn ha Jisòs. Wù lem a wo a ghɨna tû, ghɨna à jɨ̀m tâ. 41Yohnù be fwo a ghɨna fùtɨ̂n, dô kə ni, bwata jîsà na, “Jisòs wò mò Wâ Fùyèn!”

Biyani wù kântì na kə ghɨna fî jis beka ghɨna ndùku khəlò na wù mò wùt we Yènfù chwoka lema.

(Mâk 1.35-39)

42Tuku yû, Jisòs lo yen wu lùk wu letenu kə wù nɨ̂ŋ. Nôn à ghɨ̂tà fwu yi tèk afû, hì gbê khɨŋa wûn, ghɨna yen yen wun hì mômhè hi tàmtè wûn, na kə wù lo de ghɨna. 43Biyani wù jis ha ghɨna na, “Mu kəta kəbi lò hi fòktè tum yì jùŋ kum fə̂n wù Fùyènù a tèk tu letu, beka a mò gha ye a ghɨ tuma mu, na mu bê ni.”

44Ni, wù lô yen hì gbê fôktè tum àtɨ̂n a tu tèk tu Jûs tù ndasu yuŋtesu a Jùdiyà.#4.44 Jùdiyà: À mò ŋwàklù su mwu su lesu ma ghɨ nyak a yi jìs yi Gɨlìs na Galìlî.

Currently Selected:

Lûk 4: bmv

Highlight

Copy