Matiyò 20
20
Jisòs ma ngàn kum lak ye ghɨt a fetana a fùk à mtama tì lye
1Jisòs tî fî kpenhi yiki wuni jis na, “Fə̂n wù Fùyènù mò kəbi te fù màngân fù bè fùk wùlè wù tì bis a fwo hì khɨŋa yê nì ghɨta na ghɨ shik fêtì a wun a fùk à mtama, 2khɨŋ ni, yen lò, tihi nì ghɨna na yi nè lâkà ghɨna kə ni ka we ghɨ lâkà ghɨta atɨ̂n wu tuk, ki chinhi na ghɨna shik à fet. 3Chwì banti ben kə ni, wù shihi fwo yèn a jwo fàf yen ghɨt ale ma ghɨ ti time afû, nê wi shyə ale.” 4Wù jis ha ghɨna na, ‘Ghàn boŋà shik à yen ma ghàn fet a mu fùk ma ghàn shik ma ghàn nê shihi kolô, ma mu nê lak ghàn nâbi nì ghə ghe ghɨ kpene.’ 5Wù jis yâ, ghɨna shik, chwì bân tâ, wù fî fwu yen yen ghɨt ale fî jis kə yâ, à hì mô a bɨŋlu sù tât, wù fî yen ghɨt ale jis kəbi yâ. 6À hì mô te bɨna bone, wù fî fwu yen a fàf yen ghɨt ale, ma ghɨ ti timî afû kə halô, wù buf ha ghɨna na, ‘Njwô ghə ghàn yusa time afân wu tuk fublù nê wi shyə ale agha?’ 7Ghɨna jis na, ‘À mò beka wùt tà ye ben hi lyè ghàh a yi fèt.’ Wù jis ha ghɨna na ghɨna boŋà shik ma ghɨ hi fêtà a wun a fùk à mu tama afa.
8“À hì mô a leŋ a yu kolô, bè fùk àtɨ̂n jis ha to ghɨt a fetana ghe na, ‘Toŋa ghɨt a fetana ma wò lak ghɨna. Wò shihi làk, wò yimì nì ghe mu ye lye gokhe yi fèt, wò lak ma wò yê mihi nì ghê mu ye lye ashyə̂.’ 9Nâbi nde we ghɨ lye a yi fèt a yi bàm nè lyê ka yi fèt yi tuki. 10Ghe ghɨ ye lye ghɨna a yi fèt ashyə̂ ki bên hi khə kə na ghɨna nè lyê ka chyâ ka fêt yì tuki. 11Ghɨ fo kə ka fèt yì tuki, ghɨna hì dûmlè ngane bè fùk àtɨ̂n, 12jîsà na, ‘Ghɨt ghe ghɨ ye be gokhe ye fet kə fu yulâ ni, wò ti lak ghɨna kəbi te wò làka ghàh, ma ghàh ti yus a chwî ni tuku ti ben jyə̂.’ 13Bè fùk àtɨ̂n jis ha wùt lè a ghɨna fùtɨ̂n na, ‘Yuti a bə, mu tà wò chwôŋ. Ba ghàh wò ye sîhì na mu nè lâkà wò kə nì ka wu tuku agha? 14Lyì ka wa ma wò kolo. À koŋ mu hi làk a wùt we mu ye lye gokhe kəbi te mu làka wò. 15Ba yi mô na mu kəta wi jyaka hi nì gha ye mu kòŋà hi nì nì ka mu agha? Mu khə na wò bè nì ngə̂k yina beka wò ghə̀kà te mu fo ka ha ghɨta bisà wi.’”
16Jisòs fôktì ni ki jîs na, “À mò ni te ghɨt ghe ghɨ mô chin yi bàm bè hì mô ashyə̂, ghɨt ghe ghɨ mô ashyə̂ chin bè hì mô yi bàm bu hi bè kpenâ a yi gha yile a Yènfù ashyə̂. Ghê ghɨta yena na ghɨna kpene wi a yi gha chin mò hi bè tè kokna kpene a Yènfù ashyə̂.”
Jisòs fî jis kum kpu wuni
17Te Jisòs tì shihi kwok a Jèlusalèm lyi jùmtìbàmsù wunsu njwòsù bà hì nyamte jîsà ha ghɨna jyana, 18“Ghàn hi khə na ghàhnà kwoka yênà a Jèlusalèm chin ni, ghɨ kəta hi yè fo Wâ Wùt ha ngàŋsù ndâ Fùyènsu chiksu nì chichàsu saksu na ghɨna chyahi saki na wù kəta hi kpû. 19Ma ghɨ jis ni ma ghɨ lyê fo wûn ha tumu na nyikhi wûn ma sam wûn nì wànsù, ma fê banti wûn a kàkfùtàfù. Ma hi mô a tuk mù tât, ma lohi wûn a yi kpû.”
Ghɨt ghe ghɨ khɨŋa hi tè mò sù chya shyə̂ a lak yi fə̀n à nyə̂ kəta hi te fèt ha ghɨta
(Mâk 10.35-45)
20Ywê Sebedì tî ben ha Jisòs nì wana wuna à bà, tum a lwî a wun ashyə̂ jis ha wun na, wu ni gha ha yi.
21Jisòs buf ha wûn na wù khɨŋa na yi ni ghə ha wun agha?
Wù jis na, “Bimi na à bè hì mô a mu tuk me wò saka fə̂n wa, ma wana ma ghɨ̂n, à bà bê hi mô a wo ngwùŋ, wù mòk mô a wo kpen wu wo ta, wùlè mô a wò kpen wu wo kôwì.”
22Jisòs ki jîs ha ghɨna na, “Ghàn khə wi gha ye ghàn jìsà,” ki fê buf ha ghɨna na, “Ghàn làhi yena ngə̂k ye mu mò hi yena?”
Ghɨna bimî.
23Jisòs jis ha ghɨna na, “Hamok ghàn nè yenalò ngə̂k ye mu mò hi yen, biyani à wijə luk wu mu hi jìs na wùt ndòko a mu kpen wu wo ta makə a mu kpen wu wo kôwì. Luktu tɨntu mò a kəta ghɨt ghê Bom fate lema ha ghɨna.”
24Jùmtìbàmsu wunsu lesu ìwûm yu gha tɨni hì bâŋhè wu lâ ha wana nè ghɨna ghɨ̂n à bà. 25Jisòs yûŋtì ghɨna jis ha ghɨna na, “Ghàn hi khə na fə̂ntu mbyi tu kəta a jyak, saka yikte yi yiktî ghɨt a ghɨna. 26Biyani, yi kəta wi hi tè mò yâ ha ghàn. Nâbi we wù khɨŋa hi tè mò a wùt wù ngaŋtena a ghàn a fùtɨ̂n kəta hi tè mò wùt fètana ha ghɨt ale. 27Nâbi nde we wù mò hi tè mò a tû a ghàn a fùtɨ̂n kəta hi tè bɨlà mò a kwôs ha ghàn. 28Yi mô kəbi yi ghəl te Wâ Wùt tà tì ben jə̂ na ghɨ hi fêtà ha wûn. Wù tì ben hi tè fèt ha ghɨta, hi fè fo ngɨŋ à wûn hi kpû hi yun a tu ghɨt a dona.”
Jisòs chwuk ghɨt a fefana à bà
(Mâk 10.46-52; Lûk 18.35-43)
29Jisòs nì jùmtìbàmsù wunsu tì shihi lò yi tèk yi Jèlikù, ghɨta yen a wun yi bàm, dô kə ni, 30shihi yèn ghɨt a fefana ale mô yi bi lumi. Ghɨna yu na a chyà Jisòs bwat jis na, “Kwohi seni ha ghàh Bâba Wâ Fə̂n Defìt!”
31Ghɨt ghe hì chitè ghɨna jîsà na ghɨna china moŋ, biyani ghɨna hì bwate yênà kə ashyə̂ jîsà kə na, “Bâba Wâ Fə̀n Defìt, kwohi seni ha ghàh!”
32Jisòs timî toŋti ghɨna buf na, “Ghàn khɨŋa na mu nì ghə ha ghàn?”
33Ghɨna jis na, “Bâba, nì ma ghàh hi yena luktu.”
34Jisòs kwohi yi sen ha ghɨna kum se ghɨna. Kə wu yu, ghɨna hì yena tu luk, lô hì jûmtè yênà nì wûn.
Currently Selected:
Matiyò 20: bmv
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.
