Jn 17

Yeso nyaʼa kɔŋgɨ ə Ŋwiə̀ ɨgwɨ mbi mə̀mə̀ə̀nɨ̀-ɨnû bə̀ kɔŋgɨ ɨgwɨ ni

1Ənɨ Yeso nyaʼa fə gha ɨnû mbɔ̂, wɨ̀ nyaʼa nèŋ ɨkaŋ ghà ni, “Mɨ Mbǎʼ, nyùmə̀ fə kuʼi. Wumnɨ e Wan, ɨmbə̀ʼ e Wan bə̀ wumnɨ əwe. 2À fə nàʼ ɨka ɨ bɔ ni wɨ̀ tumbɨ bə̂d mɨjìm rɨŋga ɨsɨg, ɨmbə̀ʼ wɨ̀ naʼ ɨ̀tènɨ̀ rɨ mì əmbɨ ə bə̂d mbe nɨ à naʼ ɨ bɔ. 3Ɨ̀tènɨ̀ rɨ mì yɨ ni bə̂d kyerɨ əwe, àwɔ̀ we nɨ yeʼ mei we mɔʼ nɨ yeʼ Ŋwìə̀ rəsìʼ. Ɨ̀tènɨ̀ rɨ mì yɨə bə ni bə̂d kyerɨ ə Yeso Kristo we nɨ à nyaʼa tomɨ. 4Mə fə wumnɨ əwe ɨgwɨ ə si ɨchî nɨ mə fə maanɨ ə̀fàʼì ze nɨ à nyaʼa naʼ ɨ num. 5Əne tɨ̀nîn, kyɨə Mbǎʼ, wumnɨ əmɨ əsɨ ze nɨ à yeʼ əŋgu. Wumnɨ əmɨ ɨchî nɨ à nyaʼə wumnɨə bɔŋ à nyaʼa sɨə tekɨ ɨsɨg.

6“Mə fə ghɨ̀ ni bə̂d mbe nɨ à nyaʼa chɨ rɨŋga ɨsɨg nàʼ ɨ num kyerɨ əwe. À yɨə nyaʼa mbe bə̂d, əne à nyaʼa fə nàʼ mɨ̀mə̌d ɨ num. Mbɨ fə ghɨ̀ ənû ze nɨ à nyaʼa ghǎ əmbɨ mɨ̀mə̌d. 7Tɨ̀nîn mbɨ fə kyerɨ ni à yɨ àwɔ̀ nyaʼa naʼ ɨghɨjìm ɨ num. 8Mə fə ghà ɨkə̂n we nɨ à nyaʼa ghà ɨ num ni mə̀ gha əmbɨ mɨ̀mə̌d. Mbɨ fə zu bə̀ kyerɨ ənɨ rəsìʼ ni à yɨ àwɔ̀ nyaʼa tom əmɨ. Mbɨ fə bə̀ ben ni à yɨ àwɔ̀ nyaʼa tom əmɨ.

9“Mə wɨə kɔ̀ŋgɨ̀ əwe ɨmbə̀ʼ mɨ̀mə̌d. Chəi mɨə kɔ̀ŋgɨ̀ əwe ɨmbə̀ʼ ɨsɨg. Mə wɨə kɔ̀ŋgɨ̀ əwe yeʼ ɨmbə̀ʼ bə̂d mbe nɨ à nyaʼa naʼ ɨ num ɨmbə̀ʼ ɨghəm nɨ à yɨ mbe bə̂d. 10Bə̂d mɨ̀jìm mbe nɨ mə̀ berɨ yɨ mbe. Bə̂d mɨ̀jìm mbe nɨ à berɨ yɨ mbum. Bə̂d fə chè ənjìm mɨ̀mə̌d wumnɨ əmɨ. 11Tɨ̀nîn mə wɨə sàŋ ɨsɨg sɨə yeʼe əsɨ ne. Àyɨə mɨ̀mə̌d mbɨə kɨrɨ ɨŋga ɨsɨg. Mɨ Mbǎʼ nɨ Zeŋɨ màànɨ̀, nəŋgɨ mɨ̀mə̌d ənɨ ɨka we nɨ yeʼ ənɨ e ɨkum, nɨ yeʼ ɨkum we nɨ à nyaʼa naʼ ɨ num. Nəŋgɨ mɨ̀mə̌d ɨmbə̀ʼ mbɨ yeʼ ənɨ ənû ə mɔʼ, ɨchî nɨ mɔ̌ mbɨ ne tɨ̀ bə̀ yeʼ ənɨ ənû ə mɔʼ. 12Ənɨ mə nyaʼa mbɨ mɨ̀mə̌d, mə wɨə nyaʼə nəŋgɨ mɨ̀mə̌d ni tɨ əghɨ ə mɔʼɔ ə ghɨ i mɨ̀mə̌d. Mə wɨə nyaʼə ghɨ̀ əne ənɨ ɨka we nɨ nyaʼa yeʼ ənɨ e ɨkum, nɨ yeʼ ɨkum we nɨ à nyaʼa naʼ ɨ num. Mə wɨə nyaʼə nəŋgɨ mɨ̀mə̌d, əne chəi wɨ mɔʼɔ rəbɔʼ mɨ̀mə̌d nyaʼa nimɨ kɨrɨ ənɨ we nɨ nyaʼa berɨ nim. Wɨ̀ nyaʼa nim ɨmbə̀ʼ ənû ze nɨ mbɨ nyaʼa ŋwaʼnɨ ɨŋga Ə̀ŋwàʼnɨ̀ ə Ŋwiə̀ ə jwɨ ənɨ rəsìʼ.

13“Tɨ̀nîn mə wɨə yeʼe əsɨ ne. Mə wɨə ghà ɨnû mbɔ̂ ənɨ mə̀ kɨrɨ ɨŋga ɨsɨg ɨmbə̀ʼ ɨghaʼi swi ɨŋga fîŋ tɨ mɨ̀mə̌d, ɨchî nɨ wɨ bə swi ɨŋga mɨ fîŋ. 14Mə fə gha e ɨŋgam əmbɨ mɨ̀mə̌d. Ɨsɨg wɨə bàn mɨ̀mə̌d ɨmbə̀ʼ ɨghəm ni ka mbɨ yɨ ə bə̂d rɨŋga ɨsɨg, ɨchî nɨ ka mɔ̌ yɨ bə̀ əmɨ wə̀d rɨŋga ɨsɨg. 15Chəi mə̀ gha ni à chɨ mɨ̀mə̌d rɨŋga ɨsɨg. Mə ghà yeʼ ni à kən mɨ̀mə̌d tɨ əmbɨ ə wə̀d rɨ̀bɔ̀ŋ. 16Ka mbɨ yɨ ə bə̂d rɨŋga ɨsɨg, ɨchî nɨ ka mɔ̌ yɨ bə̀ əmɨ wə̀d rɨŋga ɨsɨg. 17Ghɨ mbɨ sweŋ ə ɨnyod ɨ ne ənjìm ɨchî nɨ mbɨ kyerɨ rəsìʼ. Wə̀d mɨ kyerɨ e ɨŋgam əne yɨ ni wɨ̀ fə kyerɨ rəsìʼ. 18Ɨchî nɨ à nyaʼa tom əmɨ ɨŋga ɨsɨg, mə fə bə̀ tom mɨ̀mə̌d ɨŋga ɨsɨg. 19Mə fə sweŋ mɨ ɨnyod ɨ ne ɨmbə̀ʼ ɨghəm mɨ̀mə̌d, ɨmbə̀ʼ mbɨ bə kàŋ sweŋ ə ɨnyod ɨ ne ənjìm e ɨŋgam we nɨ yeʼ ɨŋgam rəsìʼ.

20“Mə wɨə kɔ̀ŋgɨ̀ əwe kaʼ àmei ɨmbə̀ʼ mɨ̀mə̌d mbɔ̂. Mə wɨə bə̀ kɔ̀ŋgɨ̀ əwe ɨmbə̀ʼ bə̂d mbe nɨ ben əmɨ ənjìm ɨŋgam we nɨ mbɨ mə̀mə̀ə̀nɨ̀-ɨnû gha əmbɨ mɨ̀mə̌d. 21Mə wɨə kɔ̀ŋgɨ̀ əwe ni mɨ̀mə̌d mɨjìm yeʼ ənɨ ənû ə mɔʼ. Mɨ Mbǎʼ, mə kə̀b mbɨ yeʼ ənɨ ənû ə mɔʼ mbɨ na ɨchî ɨ ni à yeʼ ənɨ ənû ə mɔʼ mbɨ num, mə bə̀ yeʼ ənɨ ənû ə mɔʼ mbɨ ne. Zɨə yeʼ əne ɨmbə̀ʼ ɨsɨg we tɨ̀ wɨ ben ni à yɨ àwɔ̀ nyaʼa tom əmɨ. 22Mə fə bə̀ wumnɨ mɨ̀mə̌d ɨchî à nyaʼa wumnɨ əmɨ, ɨmbə̀ʼ mbɨ yeʼ ənɨ ənû ə mɔʼ, ɨchî nɨ mɔ̌ mbɨ ne tɨ̀ bə yeʼ ənɨ ənû ə mɔʼ: 23mə yeʼ ənɨ ənû ə mɔʼ mbɨ mɨ̀mə̌d, àwɔ̀ bə yeʼ ənɨ ənû ə mɔʼ mbɨ num, ɨmbə̀ʼ mɨ̀mə̌d mɨjìm bə yeʼ ənɨ ənû ə mɔʼ. Mbɨ mɨ ghɨ əne, ɨsɨg we tɨ̀ wɨ kyerɨ ni à yɨ àwɔ̀ nyaʼa tom əmɨ fɔrɨ ni à ghaʼ mɨ̀mə̌d ɨchî nɨ à ghaʼ əmɨ.

24“Mɨ Mbǎʼ, mə kə̀b ni mɨ̀mə̌d mbe nɨ à nyaʼa naʼ ɨ num yeʼ mbɨ num əsɨ ze nɨ mə yeʼ əŋgu, ɨmbə̀ʼ mbɨ zə ɨchî nɨ à nyaʼə wumnɨ əmɨ, ɨmbə̀ʼ ɨghəm nɨ à nyaʼa ghaʼ əmɨ bɔŋ à nyaʼə sɨə tekɨ ɨsɨg. 25Mbǎʼ nɨə ghɨ̀ ɨnû ɨchî nɨ kuʼnɨ, chəi ɨsɨg kyerɨ əwe, àyɨə mə kyerɨ əwe. Bə̂d mbɔ̂ nɨ à nyaʼa naʼ ɨ num kyerɨ ni à yɨ àwɔ̀ nyaʼa tom əmɨ. 26Mə nyaʼa ghɨ̀ ni mbɨ kyerɨ əwe. Mə bɨrɨ kɨrɨ wo ɨmbì ghɨ̀ ni mbɨ jeŋgɨ kyerɨ əwe, ɨmbə̀ʼ ɨchî nɨ à ghaʼ əmɨ bə yeʼ əkaʼ mɨ̀mə̌d, fɔrɨ ni mɔ̌ bə̂ mə̀ bə̀ yeʼ əkaʼ mɨ̀mə̌d.”

Currently Selected:

Jn 17: mgo

Highlight

Copy