Jn 19

Bə̂d kyeŋ mɨ̀Jû nyaʼa ghà ni mbɨ zwiirɨ ə Yeso

1Pailèt nyaʼa ghɨ̀ əne, nɨŋ ə Yeso, ghà mɨ̀sɔgyɨ̀ te əməd ənɨ ŋgwad. 2Mɨ̀sɔgyɨ̀ mbe nyaʼa nɨŋ ɨ̀jə̀ŋɨ̀ kad ɨghabɨ ɨdəm ɨfɔ̀n zɨ ətu ɨ bɔ. Mbɨ nyaʼa bə̀ zɨ ngywɨ̌ ɨfɔ̀n ɨgwɨ məd. 3Mbɨ nyaʼə wò əsɨ məd pè nìbrɨ̀ əməd ghàə̀ ni, “Mbèè! Ŋgə̀ə̀! Tɨ̀ ə chàʼrɨ̀ əwe, kyɨ ɨfɔ̂n mɨ̀Jû!”

4Pailèt nyaʼa wɨrɨ jwɨ̀ wò ɨsɨg pè ghà əmbɨ ə bə̂d mbe nɨ nyaʼə tekɨ ɨnû ɨŋga əbeŋ mɨ̀Jû ni, “Mbə̀ zə, mə yɨ əni nɨŋ əməd yeʼe ɨsɨg əsɨ nən ɨmbə̀ʼ mbə̀ kyerɨ ni chəi mə̀ zə ənû ə mɔʼɔ ze nɨ wɨ̀ gǔ.” 5Əne Yeso nyaʼa jwɨ̀ ɨsɨg mbɨ ɨdəm we nɨ mbɨ nyaʼa nɨŋ ɨ̀jə̀ŋɨ̀ kad ɨghabɨ ɨdəm ɨfɔ̀n zɨ ətu ɨ bɔ fɔrɨ mbɨ ə ngywɨ̌ ɨfɔ̀n ze. Pailèt nyaʼa ghà əmbɨ mɨ̀mə̌d ni, “Mbə̀ zə, à yɨə mbaŋə̀ ze zɔ̂!”

6Ənɨ bə̂d kyeŋ mbe rɨ ə mbàn Ŋwìə̀ mbɨ ə bə̂d mbe nɨ nyaʼə nəŋgɨ ə mbàn Ŋwìə̀ nyaʼa zə əməd, mbɨ nyaʼa kyeŋ rɨ̀kǎ ghà ni, “Kombɨ əməd əzed ə baʼnɨ! Kombɨ əməd əzed ə baʼnɨ!”

Pailèt nyaʼa ghà əmbɨ mɨ̀mə̌d ni, “Mbə nɨŋ əməd mbənə mbənə wo kombɨ, ɨmbə̀ʼ ɨghəm nɨ chəi mə̀ zə ənû ə mɔʼɔ ze nɨ wɨ̀ gǔ.”

7Bə̂d mbe nɨ nyaʼə tekɨ ɨnû ɨŋga əbeŋ mɨ̀Jû nyaʼa ghà ɨ bɔ ni, “Tɨ̀ berɨ ɨkə nɨ chwi ni wɨ̀ berɨ kwɨ, ɨmbə̀ʼ ɨghəm nɨ ɨ wɨə ghàə̀ ni tə yɨə Wan Ŋwìə̀.” 8Ənɨ Pailèt nyaʼa zu ɨŋgam wɔ̂, wɨ̀ nyaʼa bɔ kwàʼ rɨŋgəʼ. 9Əne wɨ̀ nyaʼa wɨrɨ wò nyɨ ɨŋga tɔʼ mbɨ Yeso, pè biirɨ ɨ bɔ ni, “À kɨ rɨ ə yi?”

Chəi Yeso nyaʼa wiirɨ. 10Əne Pailèt nyaʼa biirɨ ɨ bɔ ni, “Kaʼ à bɨrɨ gham əwe ɨ num ə? Chəi à kyerɨ ni mə berɨ ɨka nɨ chɨ əwe saŋɨ bə̀ berɨ ɨka nɨ kombɨ əwe əzed ə baʼnɨ ə?”

11Yeso nyaʼa wììrɨ̀ ɨ bɔ ni, “À berɨ ɨka ɨgwɨ num àmei ɨmbə̀ʼ ɨghəm nɨ à yɨə Ŋwìə̀ naʼ ɨka we ɨ ne. Əne wə̀d we nɨ naʼ əmɨ ɨ ne fə ghɨ̀ ənû rɨbɔ̀ŋ ze nɨ bə̌ chè.”

12Ənɨ Pailèt nyaʼa zu ənû zɔ̂, wɨ̀ nyaʼa kə̀b ni njɨ tə chɨ̀ əməd sàŋɨ̀, àyɨə bə̂d mbe nɨ nyaʼə tekɨ ɨnû ɨŋga əbeŋ mɨ̀Jû nyaʼa kyeŋ rɨ̀kǎ ghà ni, “À mɨ tɔ chɨ̀ mbaŋə̀ zɔ̂ sàŋɨ̀, kaʼ àwɔ̀ yɨ e sə̀ʼ Kaisà! Wə̀d we nɨə nɨŋ i ɨnyod ni tə yɨ ɨfɔ̂n yɨə wə̀d pə̀n Kaisà.”

13Ənɨ Pailèt nyaʼa zu ɨŋgam we, wɨ̀ nyaʼa nɨŋ ə Yeso jwɨ̀ ɨsɨg pè chub ɨgun ətən ze nɨ wɨə chubə saʼə mɨsaʼi. Ətən ze nyaʼa əsɨ ze nɨ mbɨ nyaʼə tɔŋ ənɨ Ɨkye ɨkam əti. Mbɨ nyaʼə tɔŋ əsɨ ze ənɨ ɨŋgam Hibrù ni Gàbatà. 14À nyaʼa ɨghabɨ əzi ə ka əni ze nɨ mbɨ nyaʼə tekɨ ɨnyod bɔŋ jɨg Əchwɨ̂ ə Che-ɨgun, Pailèt nyaʼa ghà əmbɨ ə bə̂d mbe nɨ nyaʼə tekɨ ɨnû ɨŋga əbeŋ mɨ̀Jû ni, “Mbə̀ zə, à yɨ ə ɨfɔ̀n wɔ̂!”

15Mbɨ nyaʼa kyeŋ rɨ̀kǎ ghà ni, “Zwiirɨ əməd! Zwiirɨ əməd! Kombɨ əməd əzed ə baʼnɨ!”

Wɨ̀ nyaʼa biirɨ əmbɨ mɨ̀mə̌d ni, “Mbə wa kə̀b ni mə̀ kombɨ ə ɨfɔ̀n əzed ə baʼnɨ ə?”

Bə̂d kyeŋ mbe rɨ ə mbàn Ŋwìə̀ nyaʼa wììrɨ̀ ni, “Chəi tɨ̀ berɨ ɨfɔ̂n cherə chè rɨ ənɨ Kaisà.” 16Pailèt nyaʼa ghɨ̀ əne nàʼ ə Yeso əmbɨ mɨ̀mə̌d ni mbɨ wo kòmbɨ̀ əzed ə baʼnɨ.

Mɨ̀sɔgyɨ̀ nyaʼa kòmbɨ̀ ə Yeso əzed ə baʼnɨ

(Mt 27.32-44; Mk 15.21-32; Lk 23.26-43)

Əne mɨ̀sɔgyɨ̀ nyaʼa nɨŋ ə Yeso wò mbɨ wɨwən. 17Yeso nyaʼa bèʼ e əzed ə baʼnɨ ziə. Əne mbɨ nyaʼa jwɨ̀ wò əsɨ ze nɨ mbɨ nyaʼə tɔŋ ənɨ Tɨmbin Ɨwɔʼ-ətu. Ɨ mbɨə nyaʼə tɔŋ əsɨ ze ənɨ ɨŋgam Hibrù ni Golgotà. 18Mbɨ nyaʼa kòmbɨ̀ əməd əŋgu, bə̀ kòmbɨ̀ mbaŋə̀ cherə rɨbe əbɔʼ əməd. Mbɨ nyaʼa kòmbɨ̀ wɨ̀ fibɨ̀ əbà əbɔ ə jɨgɨ, bə̀ kòmbɨ̀ wɨ̀ fibɨ̀ əbà əbɔ ə tweŋ. Yeso nyaʼa ɨŋga mɨgharə̀ mɨ̀mə̌d. 19Pailèt nyaʼa ŋwàʼnɨ̀ ə̀ŋwàʼnɨ̀ ə mɔʼɔ nɨ mbɨ nyaʼa kombɨ ətu əzed ə baʼnɨ ze. Wɨ̀ nyaʼa ŋwàʼnɨ̀ ni, “Yeso rɨ ə Nazàret, Ɨfɔ̂n mɨ̀Jû.” 20Bə̂d mɨ̀nɔnɔʼ nyaʼa foŋ ə̀ŋwàʼnɨ̀ ze ɨmbə̀ʼ ɨghəm nɨ əsɨ ze nɨ mbɨ nyaʼa kombɨ Yeso yɨə nyaʼa ɨban ə Jèrusalèm. Pailèt nyaʼa ŋwaʼnɨ ə̀ŋwàʼnɨ̀ ze ənɨ ɨŋgam Hibrù, ənɨ ɨŋgam Latìn bə̀ fɔrɨ ənɨ ɨŋgam Grik. 21Bə̂d kyeŋ mbe rɨ ə mbàn Ŋwìə̀ nyaʼa ghà ɨ bɔ ni, “Tɨrə̀ ŋwaʼnɨ e ni, 'Ɨfɔ̂n mɨ̀Jû'. Ŋwaʼnɨ yeʼ ni, 'Mbaŋə̀ zɔ̂ ə ghà ni tə yɨ Ɨfɔ̂n mɨ̀Jû.'”

22Pailèt nyaʼa wììrɨ̀ ni, “Ənû ze nɨ mə̀ ŋwaʼnɨ, mə fə ŋwàʼnɨ̀.”

23Ənɨ mɨ̀sɔgyɨ̀ mbe nyaʼa fə kombɨ ə Yeso, mbɨ nyaʼa nɨŋ ngywɨ̌ rɨ məd ghàpɨ̀ ɨba kwè. Sɔgyɨ̀ fibɨ̀ nyaʼa nɨŋ əbà ə fibɨ̀. Mbɨ nyaʼa bə̀ nɨŋ ngywɨ̌ məd ze rɨŋga, nɨ nyaʼa zɨ sè, nɨ mbɨ nyaʼa baʼ rɨ ətu wò pè əton nɨ chəi ɨnaanɨ. 24Mbɨ nyaʼa nɨŋ əne ghà mbənə mbənə ni, “Tɨ rɨ seerɨ a ngywɨ̌ zɔ̂, àyɨə tɨ̀ sɔŋ mbaŋ zə wə̀d we nɨ bɨrɨ jɨg. Ənû zɔ̂ ə nyaʼa ghɨ̀ ɨmbə̀ʼ ɨŋgam Ŋwiə̀ we nɨ mbɨ nyaʼa ŋwaʼnɨ jwɨ ənɨ rəsìʼ ni,

Mbɨ nyaʼa ghàpɨ̀ tɨ ngywɨ̌ əkaʼ mɨ̀mə̌d,

bə̀ sɔ̀ŋ mbaŋ ɨmbə̀ʼ jɨg mɨ ngywɨ̌ ze rɨŋga.”

À yɨ ənû nɨ mɨ̀sɔgyɨ̀ mbe nyaʼa ghɨ̌.

25Bə̂d mɔʼɔ rəbɔʼ mbe nɨ nyaʼa təmbɨ ɨban əzed ə baʼnɨ ze nɨ mbɨ nyaʼa kòmbɨ̀ ə Yeso yɨ ɨŋgɔb məd, aŋgɔb ɨŋgɔb məd, Mèri ɨwi Klopàs mbɨ Mèri Màgdàlen. 26Ənɨ Yeso nyaʼa zə ɨŋgɔb məd bə̀ zə ə̀mə̀ə̀nɨ̀-ɨnû we nɨ wɨ̀ nyaʼa ghaʼi nɨ mbɨ nyaʼa təm əŋgu, wɨ̀ nyaʼa ghà əmbɨ ɨŋgɔb məd ni, “Əyî, zə, wɔ̂ yɨ e wan!” 27Wɨ̀ nyaʼa bə̀ ghà əmbɨ ə̀mə̀ə̀nɨ̀-ɨnû we ni, “Zə, wɔ̂ yɨ e nɨŋ!” Ɨ kɔ rɨ ənɨ ə nyùmə̀ we, ə̀mə̀ə̀nɨ̀-ɨnû we nyaʼa nɨŋ ɨŋgɔb Yeso wò əkwɨ ni mbɨ məd.

Ɨchî nɨ Yeso nyaʼa kwɨ

(Mt 27.45-56; Mk 15.33-41; Lk 23.44-49)

28Yeso nyaʼa kyerɨ ni ɨnû jìm fə mì i, əne ɨ ghɨ ni ənû ze nɨ mbɨ nyaʼa ŋwaʼnɨ ɨŋga Ə̀ŋwàʼnɨ̀ ə Ŋwiə̀ ə jwɨ ənɨ rəsìʼ, wɨ̀ nyaʼa ghà ni, “Ədɔʼ ə zɨə ne əmɨ.” 29Ənjaŋ ə mɔʼɔ ə nyaʼa əŋgu mbɨ twàŋ tɨ mɨnoʼ ɨŋga ɨ swi. Əne wə̀d mɔʼɔ nyaʼa nɨŋ jûʼ, chùb ɨŋga mɨnoʼ mbe, faanɨ ətu ɨtɔŋ ɨnaŋ, zɨ̀ ɨchû ɨ bɔ ni wɨ̀ sɔɔrɨ. 30Ənɨ Yeso nyaʼa sɔɔrɨ mɨnoʼ mbe, wɨ̀ nyaʼa ghà ni, “Zɨə fə mì i!”

Wɨ̀ nyaʼa ghà əne, tuŋ ətu ə si, Ŋwìə̀ nɨŋ əzwî əməd.

Sɔgyɨ̀ nyaʼa zum ɨban ɨbeŋ Yeso

31Əni ze yɨə nyaʼə əni nɨ mɨ̀Jû nyaʼə tekɨ ɨnyod ɨmbə̀ʼ jɨg əni əkwɨ. Əne chəi bə̂d mbe nɨ nyaʼə tekɨ ɨnû ɨŋga əbeŋ mɨ̀Jû nyaʼa kəb ni ɨvɨ mbe tən ɨgun ɨzed baʼnɨ mbe əni əkwɨ, màànɨ̀ ɨmbə̀ʼ ɨchî nɨ əni əkwɨ ze yɨə nyaʼə əni əkwɨ ə kyeŋ əmbɨ mɨ̀mə̌d. Əne mbɨ nyaʼa wò biirɨ əmbɨ Pailèt ni wɨ̀ ben mbə̀ buʼrɨ ɨwu bə̂d mbe ɨmbə̀ʼ mbɨ zambɨ kwɨ, mbɨ swi ɨvɨ mɨ̀mə̌d. 32Əne mɨ̀sɔgyɨ̀ mbe nyaʼa wò buʼrɨ ɨwu wə̀d rɨtu fɔrɨ mbɨ wɨ̀ cherə we nɨ mbɨ nyaʼa kombɨ mbɨ məd. 33Àyɨə ənɨ mbɨ nyaʼa pè ənɨ Yeso, mbɨ nyaʼa zə ni wɨ̀ fə kwɨ i, əne chəi mbɨ nyaʼa buʼrɨ ɨwu məd. 34Àyɨə sɔgyɨ̀ fibɨ̀ nyaʼa zum ɨban ɨbeŋ məd ənɨ i ɨwɔŋ. Àmei əwu əwən, ənəm mbɨ mɨnib nyaʼa jwɨ̀ rəŋgu. 35Wə̀d we nɨ nyaʼa zə ənû zɔ̂ fə ghà ɨmbə̀ʼ əzɨ əwən, ɨmbə̀ʼ mbə̀n bə̂ bə̀ benɨ. Məd ziə ə kyerɨ ni ənû ze nɨ wɨ̀ ghǎ yɨ ənû rəsìʼ. 36Ɨnû mbɔ̂ nyaʼa ghɨ̀ ɨmbə̀ʼ ənû ze nɨ mbɨ nyaʼa ŋwaʼnɨ ɨŋga Ə̀ŋwàʼnɨ̀ ə Ŋwiə̀ ə jwɨ ənɨ rəsìʼ ni, “Chəi mbɨ bɨrɨ buʼrɨ əwu əməd ə mɔʼɔ.” 37Mbɨ ŋwàʼnɨ̀ ɨŋga əsɨ Ə̀ŋwàʼnɨ̀ ə Ŋwiə̀ ə cherə ni, “Mbɨ bɨrɨ neŋ əməd we nɨ mbɨ nyaʼa zum ənɨ ɨwɔŋ.”

Ɨchî nɨ mbɨ nyaʼa tweŋ ə Yeso

(Mt 27.57-61; Mk 15.42-47; Lk 23.50-56)

38Ənɨ ənû ze ə nyaʼa chě, Jòsêf rɨ ə Àrimàtiyà nyaʼa wò biirɨ əmbɨ Pailèt ni wɨ̀ saŋ i tə wò swi əvɨ ə Yeso nɨŋ wò. Pailèt nyaʼa benɨ. Əne wɨ̀ nyaʼa wò swi əvɨ ze nɨŋ wò. (Jòsêf yɨ nyaʼə ə̀mə̀ə̀nɨ̀-ɨnû Yeso ənjìm ənjìm ɨmbə̀ʼ ɨghəm nɨ ɨ wɨ̀ nyaʼə bɔə bə̂d mbe nɨ nyaʼə tekɨ ɨnû ɨŋga əbeŋ mɨ̀Jû.) 39Nikodemùs, nɨ nyaʼa kweʼ wò əsɨ Yeso ɨzɨmɨ, nyaʼa bə̀ wò mbɨ məd. Wɨ̀ nyaʼa nɨŋ ə myrrh nɨ mbɨ nyaʼa nyamɨ mbɨ mɨ̀-aloe, #19.39Ɨ mbɨə nyaʼə nɨŋə myrrh mbɨ mɨ̀-aloe tekɨ ɨvɨ bə̂d əŋgu bɔŋ tweŋɨ. Ɨghɨ mbɔ̂ nyaʼa berɨ ɨfɔ chɔ̀m. nɨ nyaʼa ɨghabɨ mɨkirə̀ ɨwum tad wò mbɨ wɨwən. 40Mbaŋə̀ tɔ̂ rɨ̀be nyaʼa swi əvɨ ə Yeso, nib ɨŋga tɨbabɨ ngywɨ̌ linen əka ɨnun. Mbɨ nyaʼa fə zɔʼ ngywɨ̌ ze ənɨ tɨtiirɨ te ɨchî nɨ tɨkə tɨ mɨ̀Jû nɨ tweŋ wə̀d nyaʼa chwiə. 41Mbeŋ mɔʼɔ nyaʼa ɨban əsɨ ze nɨ mbɨ nyaʼa kombɨ ə Yeso əŋgu. Ɨsî nɨ mbɨ nyaʼa chəb ɨŋga ɨwɔ̌ wɨə nyaʼa ɨŋga mbeŋ ze. Chəi mbɨ nyaʼa kweʼ boŋ əvɨ ə wə̀d ɨŋga ɨ̀sì we. 42Ɨchî nɨ mɨ̀Jû nyaʼə tekɨ ɨnyod ɨmbə̀ʼ jɨg əni əkwɨ, chəi mbɨ nyaʼa berɨ beʼ ɨghɨ wò əsa əgha, bə̀ fɔrɨ ɨchî nɨ ɨsî we nyaʼa ɨban ɨban, mbɨ nyaʼa wò boŋ əvɨ ə Yeso ɨŋga ɨ̀sì we.

Currently Selected:

Jn 19: mgo

Highlight

Copy