Jn 8

Mbɨ nyaʼa gywɨ̀ əyi nɨ nyaʼa ni mbaŋə̀ nɨŋ wò əsɨ Yeso

1Ənɨ bə̂d mbe mɨjìm nyaʼa fə wo əwən, Yeso nyaʼa kɔʼ wò ɨkaŋ Ɨwum mɨ̀Olìf. 2À nyaʼa ɨsɔsɔ əni ze nɨ beenɨ, wɨ̀ nyaʼa wɨrɨ bə̀ndɨ̀ wò ɨŋga mbàn Ŋwìə̀. Bə̂d mɨjìm nyaʼa wò əsɨ məd, əne wɨ̀ nyaʼa chub ə si kɔ chwi ɨnû əmbɨ mɨ̀mə̌d. 3Məchwiə̀ rɨ̀kə̌ mbɨ mɨ̀Farisiî nyaʼa gywɨ̀ əyi mɔʼɔ ənɨ wɨ̀ nyaʼə niə mbaŋə̀. Mbɨ nyaʼa nɨŋ əməd pè nùŋ ni wɨ̀ təm ɨfě mɨ̀mə̌d mɨjìm. 4Mbɨ nyaʼa nùŋ əne ghà əmbɨ Yeso ni, “Əchwiə̀-ɨnû, tɨ̀ kə̀ʼ gywɨ̀ əyi wɔ̂ ənɨ wɨə niə mbaŋə̀. 5Mose nyaʼa ŋwàʼnɨ̀ ɨŋga ta rɨkə ni tɨ̀ tumbɨ ɨkwɨ əyi wɔ̂ ənɨ əti. À ghà əze ni yè ə?” 6Mbɨ nyaʼa ghà ənû zɔ̂ ɨ kwaʼnɨ əməd ɨmbə̀ʼ mbɨ berɨ ənû mɔʼɔ nɨ zɨ ɨgwɨ məd. Ənɨ mbɨ nyaʼa biirɨ əne, Yeso nyaʼa gundɨ ŋwàʼnɨ̀ əghɨ ə mɔʼɔ ə si ənɨ fi fi-əbɔ.

7Ənɨ mbɨ nyaʼa wò ɨmbì rəbə biirɨ ə biirɨ, wɨ̀ nyaʼa nɔ̀ʼ təm ghà əmbɨ mɨ̀mə̌d ni, “Wə̀d mɔʼɔ we nɨ yeʼ əkaʼ nən nɨ chəi wɨ̀ kweʼ gù ənû be gwe ɨti tum əməd.” 8Ənɨ wɨ̀ nyaʼa ghà əne, wɨ̀ nyaʼa yì gundɨ ŋwàʼnɨ̀ əghɨ ə mɔʼɔ ə si ənɨ fi fi-əbɔ. 9Ənɨ mbɨ nyaʼa zu ənû zɔ̂, mbɨ nyaʼa kɔ wo əwən ɨ mɔʼ mɔʼ, kɔ rɨ ənɨ mbɨ kyeŋ wò nwì ənɨ mbɨ kwa. Mbɨ nyaʼa sàŋ ə Yeso tə̀zìʼ wi mbɨ əyi we nɨ nyaʼa kɨrɨ təm ɨfě məd. 10Yeso nyaʼa nɔ̀ʼ təm rətiə ghà əmbɨ əyi we ni, “Əyî, mbaŋə̀ te ti ə? Chəi wɨ mɔʼɔ buʼu nɨ zɨ ɨsaʼi ɨgwɨ ne ə?”

11Əyi we nyaʼa wììrɨ̀ ni, “Chəi wɨ mɔʼɔ, kyɨə Masà.”

Ənɨ wɨ̀ nyaʼa wììrɨ̀ əne, Yeso nyaʼa ghà ɨ bɔ ni, “Chəi mə̀ bə zɨ̀ ɨsaʼi ɨgwɨ ne. Sɨ wo e, àyɨə tɨrə̀ wɨrɨ ghɨ e ənû rɨbɔ̀ŋ.”

Yeso yɨ ɨzeŋɨ zeŋɨ əmbɨ ɨsɨg

12Yeso nyaʼa yì ghà əmbɨ mɨ̀Farisiî ni, “Mɔ̌ yɨ ɨzeŋɨ zeŋɨ əmbɨ ɨsɨg. Mə bɨrɨ naʼ ɨzeŋɨ zeŋɨ we nɨə nàʼ ɨ̀tènɨ̀ əmbɨ wə̀d mɔʼɔ we nɨ beenɨ əbɔʼ num, əne ka məd bɨrɨ nɔ yen i ɨŋga ɨsɨ firɨ.”

13Mɨ̀Farisiî mbe nyaʼa ghà ɨ bɔ ni, “À wɨə ghà ɨnû ɨmbə̀ʼ e ɨnyod àwɔ̀ àwɔ̀, əne ka ənû ze nɨ àwɔ̀ ə ghàə̀ yɨ i ənû rəsìʼ.”

14Yeso nyaʼa wììrɨ̀ ni, “Kaʼ mə bè yeʼə ghà əmɨ ɨmbə̀ʼ mɨ ɨnyod mɔ̌ mɔ̌, ənû ze nɨ mə̀ ghàə̀ yɨ ənû rəsìʼ, ɨmbə̀ʼ ɨghəm nɨ mə kyerɨ əsɨ ze nɨ mə nɔʼ rəŋgu bə̀ kyerɨ əze nɨ mɨə wò əŋgu, àyɨə chəi mbə̀ kyerɨ əsɨ ze nɨ mə̀ nɔʼ rəŋgu kɨ̀ əze nɨ mɨə wò əŋgu. 15Mbə mbɨə saʼə wə̀d ɨchî nɨ bə̂d mɨ̀sɔŋɨchù ə saʼə bə̂d. Àyɨə chəi mɔ̌ ə saʼə wə̀d mɔʼɔ. 16Ka mə be yeʼə saʼə bə̂d, mə wɨə saʼ ɨchî nɨ kùʼnɨ̀, ɨmbə̀ʼ ɨghəm nɨ kaʼ i mɔ̌ rə̀zìʼ ə saʼə. Mə wɨə saʼə mbɨ Mbǎʼ we nɨ nyaʼa tom əmɨ. 17Ə zɨ ɨŋga tə rɨkə ni mɨ̀zərɨmbin mɨbe mɨ ghà ənû, ənû ze nɨ mbɨ gha yɨ ənû rəsìʼ. 18Mə wɨə ghà ɨnû ɨmbə̀ʼ mɨ ɨnyod. Mɨ Mbǎʼ we nɨ nyaʼa tom əmɨ wɨə bə̀ ghà ɨnû ɨmbə̀ʼ əmɨ.”

19Ənɨ wɨ̀ nyaʼa gha əne, mbɨ nyaʼa biirɨ ɨ bɔ ni, “E mbǎʼ kɨ ə yi ə?”

Yeso nyaʼa wììrɨ̀ ni, “Chəi mbə̀ kyerɨ əmɨ kɨ̀ mɨ Mbǎʼ. Mbə mɨ kə̀ʼ kyerɨ əmɨ, njɨ mbə bə̀ kə̀ʼ kyerɨ mɨ Mbǎʼ.” 20Yeso nyaʼa ghà ənû zɔ̂ ənɨ wɨ̀ nyaʼə chwi ɨnû ɨŋga mbàn Ŋwìə̀, əsɨ ze nɨ mbɨ nyaʼə màʼ ɨkab. Chəi wə̀d mɔʼɔ nyaʼa gywɨ əməd, ɨmbə̀ʼ ɨghəm nɨ chəi nyùmə̀ we nɨ njɨ mbɨ nyaʼa gywɨ̀ əməd nyaʼa kɨrɨ kuʼ.

Yeso nyaʼa patɨ mɨ̀Jû mbe nɨ chəi mbɨ nyaʼa ben əməd

21Yeso nyaʼa yì ghà əmbɨ mɨ̀Farisiî mbe ni, “Mə bɨrɨ wo. Mbə bɨrɨ kəb əmɨ təkan, àyɨə mbə ɨnû rɨbɔ̀ŋ bɨrɨ zwiirɨ əwən. Chəi ənɨ tɨ̀ mbə yeʼe əsɨ ze nɨ mɨə wò əŋgu.”

22Bə̂d mbe nɨ nyaʼə tekɨ ɨnû ɨŋga əbeŋ mɨ̀Jû nyaʼa ghà ni, “Wɨ̀ wa bɨrɨ zwiirɨ i ɨnyod ɨchî nɨ wɨ̀ gha ni, 'Chəi ənɨ tɨ̀ mbə yeʼe əsɨ ze nɨ mɨə wò əŋgu ə'?”

23Wɨ̀ nyaʼa wììrɨ̀ əmbɨ mɨ̀mə̌d ni, “Mbə yɨ rɨ ɨgwɨ ə si, mə yɨ rɨkaŋ. Mbə yɨ rɨŋga ɨsɨg wɔ̂, ka mɔ̌ yɨ əmɨ rɨŋga ɨsɨg wɔ̂. 24À yɨ əton nɨ mə̀ ghà ɨ nən ni mbə ɨnû rɨbɔ̀ŋ bɨrɨ zwiirɨ əwən. Mbə ɨnû rɨbɔ̀ŋ bɨrɨ zwiirɨ əwən, kɨrɨ ənɨ mbə̀ ben ni mɔ̌ yɨə wə̀d we nɨ mə̀ gha ni mə yɨ wɨwən.”

25Mbɨ nyaʼa biirɨ ɨ bɔ ni, “Àwɔ̀ kɨə we ə?”

Yeso nyaʼa wììrɨ̀ əmbɨ mɨ̀mə̌d ni, “Mɔ̌ yɨə wə̀d we nɨ mə fə gha ɨ nən tɨ ənɨ ɨkɔ. 26Mə berɨ ɨnû nɔnɔʼ nɨ gha ɨmbə̀ʼ əwən. Mə bə̀ berɨ ɨnû nɔnɔʼ nɨ zɨ ɨsaʼi ɨgwɨ nən. Wə̀d we nɨ nyaʼa tom əmɨ wɨə ghà rəsìʼ, əne ɨnû mbe nɨ mə̀ zu rɨ bɔ, yɨ mbɨwən mbe nɨ mɨə ghà əmbɨ ɨsɨg.”

27Chəi ɨtu mɨ̀mə̌d nyaʼa zeŋɨ ni ɨ wɨə nyaʼə ghà ɨ nən ɨmbə̀ʼ i Mbǎʼ. 28Əne wɨ̀ nyaʼa ghà əmbɨ mɨ̀mə̌d ni, “Ənɨ mbə̀ fə nɔ Wan Wə̀d əzed ə baʼnɨ, mbə bɨrɨ sɨ kyerɨ ni mɔ̌ yɨə wə̀d we nɨ mə̀ gha ni mə yɨ wɨwən, bə̀ kyerɨ ni chəi mɨə ghɨ̀ ənû ə mɔʼɔ ənɨ mɨ ɨghəm. Mə wɨə ghà àmei ənû ze nɨ Mbǎʼ gha ɨ num. 29Məd we nɨ nyaʼa tom əmɨ wɨ i mbɨ num. Chəi wɨ̀ saŋ əmɨ rə̀zìʼ, ɨmbə̀ʼ ɨghəm nɨ mə wɨə ghɨ̀ àmei ɨnû mbe nɨ bɔŋ ɨ bɔ.”

30Ənɨ wɨ̀ nyaʼa gha ənû zɔ̂, bə̂d mɨ̀nɔnɔʼ nyaʼa ben əməd.

Ɨ̀bòʼò mbɨ ə bə̂d nɨ yeʼ ənɨ ə ɨghəm

31Yeso nyaʼa ghà əmbɨ mɨ̀Jû mbe nɨ nyaʼa ben əməd ni, “Mbə mɨ yim mɨ ɨŋgam, əne mbə yɨə kàŋ mbɨ mə̀mə̀ə̀nɨ̀-ɨnû rəsìʼ. 32Mbə bɨrɨ kyerɨ rəsìʼ, əne rəsìʼ we bɨrɨ ghɨ ni mbə̀ yeʼ ənɨ ə ɨghəm.”

33Mbɨ nyaʼa wììrɨ̀ ɨ bɔ ni, “Tɨ̀ yɨə bɔn tɨ ənɨ əghaŋ ə Abràham, əne chəi tɨ̀ kweʼ ben ɨ̀bòʼò əmbɨ wə̀d mɔʼɔ. Zɨə nɨə yeʼ əne, njɨ əton nɨ à ghǎ ni, 'Tɨ̀ bɨrɨ chub ənɨ a ɨghəm' kɨ ni yè ə?”

34Yeso nyaʼa wììrɨ̀ əmbɨ mɨ̀mə̌d ni, “Mə ghà rəsìʼ ɨ nən ni wə̀d jìm we nɨə ghɨ̀ ənû rɨbɔ̀ŋ yɨ ə̀bòʼò əmbɨ ənû rɨbɔ̀ŋ. 35Chəi ə̀bòʼò ə tə̀n ɨŋga nəb koŋ. À yɨə wan mbaŋə̀ ə tə̀n ɨŋga nəb koŋ. 36Wan Ŋwìə̀ mɨ fə chɨ̀ əwən tɨ ənɨ ə̀bòʼò, əne wɨ̀ fə chɨ̀ əwən koŋ. 37Mə kyerɨ ni mbə̀ yɨə bɔn tɨ ənɨ əghaŋ ə Abràham, àyɨə mbə mbɨə kə̀b zwiirɨ əmɨ ɨmbə̀ʼ ɨghəm nɨ chəi ɨnû mbe nɨ mɨə ghàə̀ kɨrɨ nyɨ ɨŋga mbə ɨtu. 38Mə wɨə ghà ɨnû mbe nɨ mə nyaʼa zə ənɨ mə nyaʼa mbɨ mɨ Mbǎʼ, àyɨə mbə̀ mbɨə ghɨ̀ə̀ yeʼ mbe nɨ mbə̀ nyaʼa zu rɨ əmbɨ mbə mɨ̀mbǎʼ.”

39Mbɨ nyaʼa wììrɨ̀ ɨ bɔ ni, “Abràham yɨ a mbǎʼ.”

Yeso nyaʼa ghà əmbɨ mɨ̀mə̌d ni, “Mbə mɨ kàŋ yeʼ bɔn Abràham, njɨ mbə bɨrɨ ghɨ ɨnû mbe nɨ Abràham nyaʼə ghɨ̀ə̀. 40Mə fə ghà rəsìʼ we nɨ mə nyaʼa zu rɨ əmbɨ ə Ŋwiə̀, àyɨə mbə mbɨə kə̀b zwiirɨ əmɨ. Chəi Abràham nyaʼa ghɨ ənû ɨghabɨ ə zɔ̂! 41Mbə mbɨə ghɨ̀ àmei ɨnû mbe nɨ ə mbǎʼ ə ghɨ̀ə̀.”

Mbɨ nyaʼa wììrɨ̀ ni, “Kaʼ tɨ̀ yɨ a bɔn nɨ mbɨ gywɨ əba ə nəb. A mbǎʼ yɨə Ŋwìə̀ ziə.”

42Yeso nyaʼa ghà əmbɨ mɨ̀mə̌d ni, “Ŋwìə̀ mɨ kə̀ʼ yeʼ ə Mbǎʼ, njɨ mbə ghaʼ əmɨ, ɨmbə̀ʼ ɨghəm nɨ mə yɨ rɨ əsɨ ə Ŋwiə̀. Chəi mə̀ nyaʼa yeʼe ənɨ mɨ ɨghəm. À yɨə məd nyaʼa tom əmɨ. 43Chəi mbə ɨtu kɨrɨ zeŋ ɨmbə̀ʼ ɨnû mbe nɨ mɨə ghà ɨmbə̀ʼ ə yè ə? À yɨ ɨmbə̀ʼ ɨghəm nɨ chəi ɨnû mbe kɨrɨ nyɨ ɨŋga mbə ɨtu. 44Mbə yɨə bɔn Debɨ̀rə̀ we nɨ yeʼ ə mbǎʼ. Mbə mbɨə kə̀b ghɨ àmei ɨnû mbe nɨ ə mbǎʼ kəbɨ. Məd yɨə nyaʼə ə̀zwììrɨ̀-bə̂d tɨ ənɨ ɨsɨg nyaʼa kɔ. Chəi wɨ̀ berɨ ənû ə mɔʼɔ nɨ ghɨ̀ mbɨ rəsìʼ, ɨmbə̀ʼ ɨghəm nɨ chəi məd ə ghà rəsìʼ. Ənɨ wɨ̀ gha mɨghab, ɨ wɨə ghɨ̀ àmei ənû ze nɨ yeʼ ɨŋga fîŋ məd, ɨmbə̀ʼ ɨghəm nɨ məd yɨə wə̀d mɨghab fɔrɨ mbǎʼ mɨghab. 45Àyɨə chəi mbə ben ənû ze nɨ mɨə ghàə̀ ɨmbə̀ʼ ɨghəm nɨ mə wɨə ghà rəsìʼ! 46À kɨə we rəbɔʼ nən nɨ tɨ̀ wɨ̀ chwi ənû rɨbɔ̀ŋ ə mɔʼɔ ze nɨ mə̀ ghɨ ə? Mə mɨ yeʼə ghà rəsìʼ, njɨ əton nɨ chəi mbə̀ ben ənû ze nɨ mɨə ghàə̀ kɨ ɨmbə̀ʼ ə yè ə? 47Wə̀d we nɨ yeʼ wə̀d Ŋwìə̀ wɨə zu ənû ze nɨ Ŋwìə̀ ə ghàə̀. Əton nɨ chəi mbə̀ə zuə yɨ ɨmbə̀ʼ ɨghəm nɨ ka mbə yɨ ə bə̂d Ŋwiə̀.”

Yeso nyaʼa be i əŋgu bɔŋ mbɨ nyaʼa sɨə gywɨ ə Abràham

48Bə̂d mbe nyaʼa biirɨ əmbɨ Yeso ni, “Tɨ̀ rɨ wa kùʼ a nɨ gha ni àwɔ̀ yɨ rɨ ə Sàmàriyà fɔrɨ ni əzwî rɨbɔ̀ŋ ə zɨ ɨŋga nè ə?” 49Yeso nyaʼa wììrɨ̀ ni, “Chəi əzwî rɨbɔ̀ŋ ɨŋga num. Mə wɨə wumnɨ mɨ Mbǎʼ, àyɨə mbə mbɨə tìbrɨ̀ əmɨ. 50Chəi mə̀ kəb ni bə̂d wumnɨ əmɨ. Àyɨə wə̀d mɔʼɔ wɨ əŋgu nɨə kə̀b ghɨ ni bə̂d wumnɨ əmɨ. À yɨə məd bɨrɨ sob mɨ ɨsaʼi. 51Mə ghà rəsìʼ ɨ nən ni, wə̀d mɔʼɔ mɨ yeʼə ghɨ̀ ɨnû mbe nɨ mɨə ghàə̀, njɨ ka wɨ̀ bɨrɨ nɔ kwɨ i.”

52Bə̂d mbe nyaʼa ghà ɨ bɔ ni, “Tɨ̀ fə kàŋ kyerɨ tɨ̀nîn ni əzwî rɨbɔ̀ŋ ə zɨ ɨŋga ne. Abràham nyaʼa kwɨ, bə̂d ɨ̀kə̀n Ŋwiə̀ nyaʼa bə̀ kwɨ, àyɨə à wɨə ghàə̀ ni, ka wə̀d we nɨə ghɨ̀ ɨnû mbe nɨ àwɔ̀ ə ghàə̀ bɨrɨ nɔ kwɨ i. 53À wa chè a mbǎʼ Abràham nɨ nyaʼa kwɨ ə? Bə̂d ɨ̀kə̀n Ŋwiə̀ nyaʼa bə̀ kwɨ. Əne à kɨə kəb gha ni tə yɨə we ə?”

54Yeso nyaʼa wììrɨ̀ ni, “Mə mɨ kəb wumnɨ mɨ ɨnyod, njɨ ɨwumnɨ yɨ əghɨ əko. À yɨ mɨ Mbǎʼ we nɨ mbən ə ghàə̀ ni məd yɨ ə Ŋwìə̀ ə ghɨ̀ ni bə̂d wumnɨ əmɨ. 55Chəi mbə̀ be kyerɨ əməd, àyɨə mə kyerɨ əməd. Mə mɨ ghà ni chəi mə̀ kyerɨ əməd əne mɔ̌ yɨə wə̀d mɨ̀ghab ɨghabɨ ə mbə̀nə. Mə kàŋ kyerɨ əməd, əne mə wɨə ghɨ̀ ɨnû mbe nɨ məd ə ghàə̀. 56Ə mbǎʼ Abràham nyaʼa ghaʼ nɨ zə nyùmə̀ we nɨ mə̀ bɨrɨ yeʼe. Wɨ̀ nyaʼa bə̀ zə, əne wɨ̀ nyaʼa ghaʼ kwàʼ rɨŋgəʼ.”

57Bə̂d mbe nyaʼa ghà ɨ bɔ ni, “Chəi à kɨrɨ pe ɨghəm ɨwu ɨwum tân, əne à fə zə ə Abràham ə?”

58Yeso nyaʼa ghà əmbɨ mɨ̀mə̌d ni, “Mə ghà rəsìʼ ɨ nən ni bɔŋ mbɨ nyaʼa sɨə gywɨ ə Abràham, mə nyaʼa fə sɨ əmɨ əŋgu!”

59Ənɨ wɨ̀ nyaʼa gha əne, mbɨ nyaʼa gwe əti ni mbə bɨrɨ tumbɨ əməd əŋgu, àyɨə wɨ̀ nyaʼa nə̀mbɨ̀ i, əne jwɨ̀ i rɨŋga mbàn Ŋwìə̀.

Currently Selected:

Jn 8: mgo

Highlight

Copy