Lk 16

Ənû ə mɨgɨ ɨmbə̀ʼ wə̀d ɨwe nɨ nyaʼə nəŋgɨ ɨghɨ

1Yeso nyaʼa bə̀ yì ghà əmbɨ mbi mə̀mə̀ə̀nɨ̀-ɨnû ni, “Wə̀d mbɔ̂n mɔʼɔ wɨə nyaʼə əŋgu nɨ nyaʼa berɨ wə̀d nɨə nəŋgɨ ɨghɨ məd. Bə̂d mɔʼɔ nyaʼa wò ghà əmbɨ wə̀d mbɔ̂n we ni wə̀d we wɨə chə̀kɨ̀ ɨghɨ məd. 2Wə̀d mbɔ̂n we nyaʼa zu əne, tɔŋ əməd biirɨ ɨ bɔ ni, 'À kɨ ənû ə ye nɨ mɨə zu ɨmbə̀ʼ əwe ə? Nɨŋ mbe ɨ̀ŋwàʼnɨ̀ yeʼe chwi ɨchî nɨ àwɔ̀ ə nəŋgɨ mbɨ ɨghɨ, ɨmbə̀ʼ ɨghəm nɨ chəi à bɨrɨ wɨrɨ nəŋgɨ mbɨ ɨghɨ.' 3Wə̀d we nɨ nyaʼə nəŋgɨ ɨghɨ mbe nyaʼa ghà ɨŋga i fîŋ ni, 'Mə kɨə wò ghɨ ye ɨchî nɨ mɨ mbǎʼ ə̀fàʼì ə wo nɨŋ ə̀fàʼì zɔ̂ rɨ num ə? Chəi mə berɨ ɨka nɨ toŋ rɨbɨgɨ, mɨ ətu ə zɨə bə̀ nìd nɨ nɔn ɨghɨ. 4Tɨ̀nîn mə kyerɨ ənû ze nɨ mə bɨrɨ ghɨ̀ ɨmbə̀ʼ bə̂d nɨŋ əmɨ ɨŋga tə nəb ənɨ mbɨ chɨ əmɨ rɨ ə̀fàʼì.' 5Wɨ̀ nyaʼa kɔndɨ əne, tɔŋ bə̂d mɨjìm mbe nɨ nyaʼə yimə mbǎʼ ə̀fàʼì məd ɨ mɔʼ mɔʼ. Wɨ̀ nyaʼa biirɨ əmbɨ wɨ rɨtu ni, 'À yim ye əmbɨ mɨ mbǎʼ ə̀fàʼì ə?' 6Wɨ̀ nyaʼa wììrɨ̀ ni, 'Mə yim kàʼ tɨ mɨwud ɨkɨ fibɨ̀.' Wə̀d we nyaʼa ghà ɨ bɔ ni, 'Nɨŋ e ə̀ŋwàʼnɨ̀ chub ə si əmad əmad ŋwàʼnɨ̀ ni à yɨ ɨwum tân.' 7Wɨ̀ nyaʼa biirɨ əmbɨ wɨ cherə ni, 'À yim ye ə?' We nyaʼa wììrɨ̀ ni, 'Mə yim kàʼ kywɨ̀ ɨkɨ fibɨ̀.' Əne wɨ̀ nyaʼa ghà ɨ bɔ ni, 'Nɨŋ e ə̀ŋwàʼnɨ̀ ŋwàʼnɨ̀ ni à yɨ ɨwum famɨ.'

8“Mbǎʼ ə̀fàʼì we nyaʼa yiirɨ wə̀d kòb we nɨ nyaʼə nəŋgɨ ɨghɨ məd. Wɨ̀ nyaʼa yiirɨ əməd ɨmbə̀ʼ ɨchî nɨ wɨ̀ nyaʼa berɨ ɨwe, ɨmbə̀ʼ ɨghəm nɨ bə̂d rɨŋga ɨsɨg wɔ̂ ə berɨ ɨwe əku nɨ fàʼ mbɨ ə bə̂d mbe nɨ yeʼ ɨghabɨ mɨ̀mə̌d chè mbe nɨ yeʼ ɨŋga ɨzeŋɨ zeŋɨ.”

9Yeso nyaʼa wò ɨmbì ghà ni, “Mə ghà ɨ nən ni mbə̀ nɨŋ mbɔ̂n ze nɨ mbə̀ berɨ ɨchî rɨbɔ̀ŋ ghɨ̀ mbə mɨ̀sə̀ʼ əŋgu, ɨmbə̀ʼ ənɨ mbɔ̂n ze mi i, mbɨ nɨŋ əwən ɨŋga ɨkwɨ mbe nɨ tən i koŋ. 10Wə̀d we nɨə fàʼ ənɨ i fîŋ jìm mbɨ ɨghɨ mbe nɨ kə, ə kyerɨ ɨchî nɨ fàʼ ənɨ i fîŋ jìm mbɨ mbe nɨ nɔʼɔ. Ka we nɨ chəi wɨə fàʼ ənɨ i fîŋ jìm mbɨ ɨghɨ mbe nɨ kə bɨrɨ bɨ faʼi ənɨ i fîŋ jìm mbɨ mbe nɨ nɔʼɔ. 11À mɨ yeʼ nɨ chəi mbə̀ə fàʼ ənɨ tə fîŋ rɨjìm nɨ yim mbɔ̂n rɨŋga ɨsɨg, njɨ à kɨə we bɨrɨ naʼ mbɔ̂n rəsìʼ ɨ nən ə? 12À mɨ yeʼ nɨ chəi mbə̀ə fàʼ ənɨ tə fîŋ rɨjìm mbɨ ɨghɨ mbe ni yeʼ mbɨ wə̀d cherə, njɨ à kɨə we bɨrɨ naʼ mbe nɨ yeʼ mbən ɨ nən ə?

13“Chəi wə̀d ə̀fàʼì mɔʼɔ nɨ tɨ̀ wɨ̀ fàʼ əmbɨ mɨ̀mbǎʼ ə̀fàʼì mɨ̀be, ɨmbə̀ʼ ɨghəm nɨ wɨ̀ bɨrɨ ban wɨ fibɨ̀ ghaʼ wɨ cherə, kɨ wɨ̀ fàʼ ənɨ i fîŋ jìm əmbɨ wɨ fibɨ̀ tə̀ə̀nɨ̀ wɨ cherə. Chəi ənɨ tɨ̀ à fàʼ əmbɨ ə Ŋwiə̀ bə̀ fàʼ nɨ berɨ mbɔ̂n əwu əwən.”

Mɨŋgam Yeso mɔʼɔ

(Mt 11.12-13; 5.31-32; Mk 10.11-12)

14Ənɨ mɨ̀Farisiî nyaʼa zu ɨnû mbɔ̂ jìm, mbɨ nyaʼa chəʼ əməd ɨmbə̀ʼ ɨghəm nɨ mbɨ nyaʼa ghaʼ ɨkab əku. 15Àyɨə Yeso nyaʼa ghà əmbɨ mɨ̀mə̌d ni, “Mbə yɨə bə̂d mbe nɨə chwi ɨfě bə̂d ni mbə̀ mbɨə ghɨ̀ ɨnû nɨ kuʼnɨ, àyɨə Ŋwìə̀ ə kyerɨ tə fîŋ. Mbə̀ zə rəŋgu ni ɨnû mbe nɨ Ŋwiə̀ ə bànə̀ yɨ mbe nɨ bə̂d ə kɔndɨə ni mbɨ yɨ ɨnû kyeŋ.

16“Tɨkə rɨ Mose mbɨ ɨnû mbe nɨ bə̂d ɨ̀kə̀n Ŋwiə̀ nyaʼa ŋwàʼnɨ̀ mbɨə nyaʼə saʼə bə̂d wò pè ənɨ ə nyùmə̀ Jɔ̌n we nɨ nyaʼə nàʼ mɨnib. Ɨ kɔ rɨ ənɨ ə nyùmə̀ we, ɨ mbɨə ghà ɨkə̂n chɔ̀m ɨmbə̀ʼ ənû ɨfɔ̀n ə Ŋwiə̀, əne wə̀d jìm wɨə kəb nyɨ ə ɨŋga ənû ɨfɔ̀n ze ənɨ ɨka. 17Zɨə zàm əmbɨ ɨkaŋ fɔrɨ əmbɨ si nɨ chè, chè ɨchî nɨ tɨ̀ ɨghə ə̀ŋwàʼnɨ̀ mɔʼ rɨŋga tɨkə rɨ Ŋwiə̀ bɨrɨ nim.

18“Mbaŋə̀ mɔʼɔ mɨ saanɨ ɨnamɨ mbɨ i ɨwi, nam əyi cherə, njɨ wɨ̀ fə ni əyi cherə. Mbaŋə̀ mɔʼɔ ze nɨ nam əyi nɨ saanɨ ɨnamɨ mbɨ i nom, fə bə̀ ni əyi cherə.”

Wə̀d mbɔ̂n mbɨ Lazarɔ̀s

19“Wə̀d mbɔ̂n mɔʼɔ wɨə nyaʼə əŋgu, nɨ nyaʼə zɨ̀ə̀ ngywɨ̌ əka ɨnùn bə̀ fɔ̀ɔ̀nɨ̀ ɨŋga mbɔ̂n ɨni jìm. 20Wə̀d ɨkwaŋ mɔʼɔ wɨə nyaʼə bə̀ əŋgu nɨ ɨkum məd nyaʼə Lazarɔ̀s. Mɨchɔʼɔ nyaʼa swi ɨgwɨ ɨnyod məd. Ɨ wɨə nyaʼə kɨə wo chub ɨchû ɨkam wə̀d mbɔ̂n we. 21Ɨ wɨə nyaʼə kə̀bə̀ ni njɨ tə jɨg ɨghɨ mbe nɨə feŋgɨ rɨ ɨgun ə tebrə̀ wə̀d mbɔ̂n we. Bu rɨ nyaʼə wò nerə mɨchɔʼɔ məd mbe. 22Wə̀d ɨkwaŋ we nyaʼa kwɨ, əne mbɨ̀aŋgɨrə̀ nyaʼa beʼ əməd wò nùŋ ɨban ə Abràham. Wə̀d mbɔ̂n we nyaʼa bə kwɨ mbɨ tweŋɨ. 23Ənɨ wɨ̀ nyaʼa əbeŋ ɨvɨ bə̂d, wɨ̀ nyaʼa nɔ̀ɔ̀rɨ̀ əghə zə ə Abràham əsa əgha mbɨ Lazarɔ̀s ɨban məd. 24Wɨ̀ nyaʼa zə əne tɔŋ əməd ni, 'Mɨ mbǎʼ Abràham, dììrɨ əmɨ chà ə Lazarɔ̀s ni wɨ̀ chub ətu ə fi ɨŋga mɨnib zùtɨ̀ mɨ ɨnemɨ, ɨmbə̀ʼ ɨghəm nɨ mə wɨə kàŋə̀ zəə ŋgəʼ ɨŋga ɨwid wɔ̂.' 25Àyɨə Abràham nyaʼa ghà ni, 'Wân, kɔndɨ ni ənɨ à nyaʼa ɨkǎ, à nyaʼa berɨ ɨghɨ chɔ̀m, àyɨə Lazarɔ̀s nyaʼa berɨ ɨghɨ rɨbɔ̀ŋ. Tɨ̀nîn məd wɨ ɨŋga chɔ̀m əgha, àyɨə àwɔ̀ wɨ əŋgəʼ. 26Kaʼi ɨnû jìm mbe. Əkən ə kyeŋ ə ghabrɨ əwa mbɨ nən, ɨmbə̀ʼ tɨ bə̂d nɔ̀ʼ ə rɨ əgha baanɨ yeʼe əsɨ nən, fɔrɨ ni tɨ wə̀d mɔʼɔ baanɨ i rɨ əwɔ yeʼe əsɨ na.' 27Wə̀d mbɔ̂n we nyaʼa zu əne ghà ni, 'A nɨə yeʼ əne, njɨ mə buʼ ɨbɔ ɨ ne ni à tom ə Lazarɔ̀s əkwɨ mɨ mbǎʼ, 28ɨmbə̀ʼ ɨghəm nɨ mə berɨ bɔŋgɔb mɨ̀tân. Wɨ̀ wo patɨ mɨ̀mə̌d, njɨ mbɨ bɨrɨ bɨ yeʼe ɨŋga əsɨ ə ŋgəʼ zɔ̂.' 29Àyɨə Abràham nyaʼa ghà ni, 'Mose mbɨ ə bə̂d ɨ̀kə̀n Ŋwiə̀ cherə mbɨ əŋgu. Mbɨ zu ɨnû mbe nɨ mbɨə ghàə̀.' 30Wə̀d mbɔ̂n we nyaʼa ghà ni, 'Chə̂, kyɨə Abràham mɨ mbǎʼ, àyɨə wə̀d mɔʼɔ mɨ nɔ̀ʼ rɨ əbɔʼ bə̂d mbe nɨ fə kwɨ wò əsɨ mɨ̀mə̌d, mbɨ bɨrɨ beŋ tə fîŋ.' 31Abràham nyaʼa ghà ɨ bɔ ni, 'À mɨ yeʼ ni chəi mbɨ zu ɨnû mbe nɨ Mose mbɨ ə bə̂d ɨ̀kə̀n Ŋwiə̀ ə ghàə̀, njɨ ka wə̀d mɔʼɔ bè zwemə wò ghàm əmbɨ mɨ̀mə̌d, chəi mbɨ bɨrɨ benɨ.'”

Currently Selected:

Lk 16: mgo

Highlight

Copy