Lk 19

Yeso mbɨ Sàkiò

1Yeso nyaʼa nyɨ ə Jerikò chè i che. 2Mbaŋə̀ mɔʼɔ nyaʼə əŋgu nɨ ɨkum məd nyaʼə Sàkiò. Wɨ̀ yɨə nyaʼə ətu ɨgwɨ məfetɨ mɨ̀tagsɨ̀. Wɨ̀ yɨə nyaʼə bə̀ ə wə̀d mbɔ̂n. 3Ɨ wɨə nyaʼə kə̀b zə ə Yeso, àyɨə chəi ənɨ tɨ̀ wɨ̀ nyaʼa zə əməd ɨmbə̀ʼ ɨnɔ̂n bə̂d we nɨ nyaʼə beenɨ əbɔʼ ə Yeso fɔrɨ ɨmbə̀ʼ ɨghəm nɨ wɨ̀ nyaʼa tumnə. 4Əne wɨ̀ nyaʼa nòrə̀ wò ɨmbì kɔʼ əzed ə sikamò ɨmbə̀ʼ zə əməd, ɨmbə̀ʼ ɨghəm nɨ wɨ̀ nyaʼa berɨ che əbà ze. 5Ənɨ Yeso nyaʼa pè əsɨ ze, wɨ̀ nyaʼa neŋ ɨkaŋ zə əməd ghà ɨ bɔ ni, “Sàkiò, zambɨ swiʼi ɨmbə̀ʼ ɨghəm nɨ mə berɨ ni ɨŋga e nəb rə̀chɔ̀ŋ.”

6Sàkiò nyaʼa zàmbɨ̀ swiʼi wò nɨŋ əməd mbɨ ɨghaʼi. 7Bə̂d mɨ̀jìm mbe nɨ nyaʼa zə ənû ze, nyaʼa kɔ dumbɨ ghàə̀ ni, “Wɨ̀ fə wò mò wə̀d nɨə ghɨ̀ ɨnû rɨbɔ̀ŋ!”

8Sàkiò nyaʼa nɔ̀ʼ təm rətiə ghà əmbɨ Ə̀nùŋɨ̀sɨg ni, “Masà, zə, mə bɨrɨ naʼ əba rɨ ənɨ mbɨ ɨghɨ əmbɨ ə bə̂d ɨkwaŋ. Mə mɨ fə fɨ̀g wə̀d mɔʼɔ, mə bɨrɨ wì ɨghəm kwè.”

9Yeso nyaʼa ghà ni, “Tə̀chɔ̀ŋ, ənû nɨ jwɨ rəŋgəʼ fə yeʼe ɨŋga nəb zɔ̂, ɨmbə̀ʼ ɨghəm nɨ mbaŋə̀ zɔ̂ yɨə bə̀ ə wan tɨ ənɨ əghaŋ ə Abràham. 10Wan Wə̀d nyaʼa yeʼe ɨ kəb bə̂d mbe nɨ nyaʼa nimɨ ɨmbə̀ʼ chɨ mɨ̀mə̌d rəŋgəʼ.”

Ənû ə mɨgɨ ɨmbə̀ʼ ɨkab gôl

(Mt 25.14-30)

11Ənɨ bə̂d mbe nyaʼə zwetɨ ənû ze, Yeso nyaʼa wò ɨmbì ghà ənû ə mɨgɨ əmbɨ mɨ̀mə̌d, ɨmbə̀ʼ ɨghəm nɨ mbɨ nyaʼa fə sɨə tiinɨ ɨban ə Jèrusalèm. Wɨ̀ nyaʼa bə̀ ghà ɨmbə̀ʼ ɨghəm nɨ bə̂d mɔʼɔ mbɨə nyaʼə kɔndɨə ni ənû ɨfɔ̀n ə Ŋwiə̀ bɨrɨ yeʼe əwu əwən. 12Wɨ̀ nyaʼa ghà ni, “Kǔm kyeŋ mɔʼɔ nyaʼa wò ɨŋga əbeŋ ə mɔʼɔ əsa əgha ni mbɨ zɔʼ əməd ənɨ ɨfɔ̀n bɔŋ wɨ̀ wɨrɨ bə̀ndɨ̀. 13Bɔŋ wɨ̀ nyaʼə sɨə nɔ̀ʼə̀, wɨ̀ nyaʼa tɔŋ mbi bə̂d ə̀fàʼì wum, ghàpɨ̀ ɨkab gôl #19.13 Gôl mɔʼ yɨ ɨkab nɨ tɨ mbɨ chwɨ wə̀d ə̀fàʼì əmɨg ə tad. wum əmbɨ mɨ̀mə̌d ɨ mɔʼ mɔʼ. Wɨ̀ nyaʼa ghɨ̀ əne ghà əmbɨ mɨ̀mə̌d ni, 'Mbə̀ ghɨ ɨwin ənɨ ɨkab wɔ̂ pè ənɨ mə bəndɨ.' 14Àyɨə bə̂d əbeŋ məd nyaʼa bàn əməd. Əne mbɨ nyaʼa chà bə̂d əbɔʼ məd ni mbɨ ghà ni, 'Chəi tɨ̀ kə̀b ni mbaŋə̀ zɔ̂ yeʼ ɨfɔ̂n ɨgwɨ na.'

15“Ənɨ mbɨ nyaʼa fə zɔʼ əməd ənɨ ɨfɔ̀n, wɨ̀ nyaʼa bə̀ndɨ̀ wò pè ghà ni mbɨ tɔŋ bə̂d ə̀fàʼì mbe nɨ wɨ̀ nyaʼa nàʼ ɨkab we əmbɨ mɨ̀mə̌d. Wɨ̀ nyaʼa tɔŋ əne ɨmbə̀ʼ kyerɨ njìm ze nɨ mbɨ ghɨ ɨwin berɨ. 16Wɨ rɨtu nyaʼa wò pè ghà ɨ bɔ ni, 'Masà, mə fə jɨg njìm mɨ̀gôl cherə wum.' 17Ɨfɔ̂n we nyaʼa ghà ɨ bɔ ni, 'À fə ghɨ ənû ə chɔ̀m, kyɨə wə̀d ə̀fàʼì chɔ̀m! Ɨchî nɨ à fàʼ ənɨ e fîŋ jìm mbɨ akə ɨkab, mə bɨrɨ ghɨ ni à tumbɨ ɨsɨ wum.' 18We nɨ beenɨ nyaʼa wò pè gha ɨ bɔ ni, 'Masà, mə fə jɨg njìm mɨ̀gôl cherə tân.' 19Wɨ̀ nyaʼa ghà ɨ bɔ ni, 'À bɨrɨ tumbɨ ɨsɨ tân.' 20Wə̀d ə̀fàʼì cherə nyaʼa wò pè ghà ni, 'Masà, à yɨ e ɨkab gôl we wɔ̂. Mə kəʼ kod ɨŋga əghɨ ə gywɨ wò nùŋ. 21Mə wɨə nyaʼə bɔ əwe ɨmbə̀ʼ ɨghəm nɨ mbe mɨchî ə kà. À wɨə nɨŋ ɨghɨ mbe ni kaʼi àwɔ̀ nuŋɨ. À wɨə bə̀ kwə̀ŋ ɨghɨ mbe nɨ kaʼi àwɔ̀ konɨ.' 22Ɨfɔ̂n we nyaʼa ghà ɨ bɔ ni, 'Mə bɨrɨ nɨŋ ɨŋgam we nɨ jwɨ̀ rɨŋga e ɨchû, saʼ əwe əŋgu, àwɔ̀ wə̀d ə̀fàʼì rɨbɔ̀ŋ! Ɨmbə̀ʼ à nyaʼa kàŋ kyerɨ e ni mə wɨə nɨŋ ɨghɨ mbe nɨ chəi mə̀ nuŋɨ, fɔrɨ ni mə wɨə kwə̀ŋ ɨghɨ mbe nɨ chəi mə̀ konɨ ə? 23Əne əton nɨ chəi à kə̀ʼ nuŋ mɨ ɨkab ɨŋga nəb nɨ mbɨə nùŋ ɨkab ɨmbə̀ʼ ənɨ mə̀ bəndɨ, mə nɨŋ ɨkab mbɨ ə njìm, kɨ ɨmbə̀ʼ ə ye ə?' 24Wɨ̀ nyaʼa ghɨ̀ əne, ghà əmbɨ ə bə̂d mbe nɨ nyaʼa təmbɨ ɨban ɨban ni, 'Mbə̀ nɨŋ ɨkab we rɨ bɔ nàʼ əmbɨ we nɨ berɨ mɨ̀gôl wum.' 25Mbɨ nyaʼa ghà ɨ bɔ ni, 'Masà, wɨ̀ fə berɨ mɨ̀gôl wum!' 26Wɨ̀ nyaʼa wììrɨ̀ ni, 'Mə ghà ɨ nən ni wə̀d jìm we nɨ berɨ ɨghɨ, mbɨ bɨrɨ naʼ mbɨ cherə ɨ bɔ wɨ̀ sɨ berɨ mbɨ nɔʼ, àyɨə we nɨ chəi wɨ̀ berɨ əghɨ, ka àbei ɨkə we nɨ wɨ̀ berɨ, mbɨ bɨrɨ nɨŋ rɨ bɔ. 27À yeʼ ɨmbə̀ʼ mbɨ bə̂d pə̀n mbɔ̂ nɨ chəi mbɨ nyaʼa kəb ni mə tumbɨ mɨ̀mə̌d, mbə nɨŋ mɨ̀mə̌d yeʼe əgha, zwiirɨ mɨ̀mə̌d ənɨ mɨ ɨfě.'”

Yeso nyaʼa nyɨ ə Jèrusalèm ɨghabɨ ɨfɔ̀n

(Mt 21.1-11; Mk 11.1-11; Jn 12.12-19)

28Yeso nyaʼa ghà əne, chè ɨmbì kɔ kɔʼə wò ə Jèrusalèm. 29Ənɨ wɨ̀ nyaʼa pè ɨban ə Bètfagè mbɨ Betanì nɨ nyaʼa ɨkaŋ Ɨwum mɨ̀Olìf, wɨ̀ nyaʼa tom mbi mə̀mə̀ə̀nɨ̀-ɨnû mɨbe 30ghà ni, “Mbə̀ wo nyɨ ɨŋga əsɨ ze nɨ yeʼ ɨmbì ɨ nən. Mbə mɨ nyɨ ə nyɨ, mbə bɨrɨ zə wan jàkas nɨ mbɨ tiŋɨ, nɨ chəi wə̀d mɔʼɔ kweʼ kɨrɨ kɔʼ ɨgun. Mbə̀ za yeʼe əgha mbɨ zɨwən. 31Wə̀d mɔʼɔ mɨ biirɨ ɨ nən ni, 'Mbə̀ kɨə zàə̀ jàkas we ɨmbə̀ʼ ə ye ə?' Mbə̀ gha ni, 'À yɨ Ə̀nùŋɨ̀sɨg kəb ə jàkas wɔ̂.'”

32Bə̂d mbe nɨ wɨ̀ nyaʼa tom nyaʼa wò pè zə ɨnû mbe àmei ɨchî nɨ wɨ̀ kəʼ ghà əmbɨ mɨ̀mə̌d. 33Ənɨ mbɨ nyaʼə zàə̀ wan jàkas we, bə̂d mbe nɨ nyaʼa berɨ nyaʼa biirɨ əmbɨ mɨ̀mə̌d ni, “Mbə kɨə zàə̀ wan jàkas we ɨmbə̀ʼ ə ye ə?”

34Mbɨ nyaʼa wììrɨ̀ ni, “À yɨ Ə̀nùŋɨ̀sɨg kə̀bɨ.” 35Mbɨ nyaʼa ghà əne, nɨŋ wan jàkas we wò nàʼ əmbɨ Yeso. Ənɨ mbɨ nyaʼa fə maʼrɨ tə ngywɨ̌ ɨgun ə wan jàkas we, mbɨ nyaʼa weerɨ ə Yeso ghɨ̀ ni wɨ̀ kɔʼ ɨgun. 36Ənɨ wɨ̀ nyaʼə wòə̀, mbɨ nyaʼa zì tə ngywɨ̌ ɨgwɨ ɨnə̂njɨ̀. 37Ənɨ wɨ̀ nyaʼa sɨə tiinɨ ɨban ə Jèrusalèm, əsɨ ze nɨ mbɨ nyaʼə swiʼə Ɨwum mɨ̀Olìf, ɨnɔ̂n mə̀mə̀ə̀nɨ̀-ɨnû we ɨjìm nyaʼa kɔ yiirɨ ə Ŋwiə̀ ənɨ ə gɨ̂ kǎ kǎ ɨmbə̀ʼ ɨnû yiirɨ jìm mbe nɨ mbɨ nyaʼa zə. 38Mbɨ nyaʼə yiirɨə ghàə̀ ni,

“Ŋwìə̀ zɨ əbɔrəbɔd ɨgun ɨfɔ̀n we

nɨə yeʼe ənɨ ɨkum Ə̀nùŋɨ̀sɨg!

Əbɔrəbɔd ə zɨ ɨkaŋ,

bə̂d bə wumnɨ ə Ŋwìə̀ we nɨ yeʼ ɨkaŋ!”

39Mɨ̀Farisiî mɔʼɔ nɨ nyaʼa ɨŋga ɨnɔ̂n bə̂d we nyaʼa ghà ɨ bɔ ni, “Əchwiə̀-ɨnû, gham əbɔʼ mbe mə̀mə̀ə̀nɨ̀-ɨnû.”

40Wɨ̀ nyaʼa wììrɨ̀ ni, “Mə ghà ɨ nən ni, bə̂d mbɔ̂ mɨ kəm rəziə, əti zɔ̂ ə bɨrɨ kɔ kyeŋɨ yiirɨ ə Ŋwiə̀.”

Yeso nyaʼa chweŋ mɨsɨ ɨmbə̀ʼ ə Jèrusalèm

41Ənɨ wɨ̀ nyaʼa pe ɨban ə Jèrusalèm, wɨ̀ nyaʼa zə əsɨ ze, əne chweŋ mɨsɨ ɨmbə̀ʼ əzɨ əwən, 42ghàə̀ ni, “Njɨ rə̀chɔ̀ŋ à fə kə̀ʼ kyerɨ əghɨ ze nɨə ghɨ̀ə̀ ni bə̂d chub ənɨ əbɔrəbɔd. Àyɨə tɨ̀nîn mbɨ fə nə̀m rɨ ne! 43Ɨni bɨrɨ yeʼe nɨ mbe bə̂d pə̀n bɨrɨ bɔm ə̀gùʼ kad əwe, əne nyèm əwe ɨŋga ɨba jìm. 44Mbɨ bɨrɨ tum əwe ə si, àwɔ̀ mbɨ mbe bɔn mbe nɨ yeʼ ɨŋga e ɨkam, əne zwiirɨ əwən. Chəi mbɨ bɨrɨ saŋ ɨti ɨgwɨ wɨ cherə, ɨmbə̀ʼ ɨghəm nɨ chəi à nyaʼa kyerɨ nyùmə̀ we nɨ Ŋwìə̀ nyaʼa yeʼe ɨmbə̀ʼ weerɨ əwe.”

Yeso nyaʼa wò nyɨ ɨŋga mbàn Ŋwìə̀.

(Mt 21.12-17; Mk 11.15-19; Jn 2.13-22)

45Yeso nyaʼa wò nyɨ ɨŋga mbàn Ŋwìə̀ pè kɔ kəndɨ bə̂d mbe nɨ nyaʼə fèndɨ̀ ɨghɨ. 46Wɨ̀ nyaʼa ghà əmbɨ mɨ̀mə̌d ni, “Ə zɨ ɨŋga Ə̀ŋwàʼnɨ̀ ə Ŋwiə̀ ni, 'Mɨ nəb bɨrɨ yeʼ nəb ə̀kɔ̀ŋgɨ̀.' Àyɨə mbə fə bèŋ ənɨ əsɨ nɨ mɨjɨ ə nə̀mbɨ̀ əŋgu.”

47Ɨ wɨə nyaʼə chwi ɨnû ɨŋga mbàn Ŋwìə̀ ɨni jìm, àyɨə bə̂d kyeŋ mbe rɨ ə mbàn Ŋwìə̀ mbɨ məchwiə̀ rɨ̀kə̌ fɔrɨ bə̂d mbe nɨ nyaʼə chà mɨ̀Jû nyaʼa kə̀b ni njɨ mbə zwiirɨ əməd, 48àyɨə chəi mbɨ nyaʼa zə ɨnə̂njɨ̀ nɨ zwiirɨ əməd ɨmbə̀ʼ ɨghəm nɨ bə̂d mɨjìm mbɨə nyaʼə kə̀b zu ɨnû jìm mbe nɨ wɨ̀ nyaʼə ghàə̀.

Currently Selected:

Lk 19: mgo

Highlight

Copy