Mk 13

Yeso nyaʼa ghà ɨmbə̀ʼ ɨchî nɨ mbɨ bɨrɨ nɨ sàʼ mbàn Ŋwìə̀

(Mt 24.1-2; Lk 21.5-6)

1Ənɨ Yeso nyaʼə jwɨ̀ rɨŋga mbàn Ŋwìə̀, ə̀mə̀ə̀nɨ̀-ɨnû məd mɔʼɔ nyaʼa ghà ɨ bɔ ni, “Əchwiə̀-ɨnû, zə mbɨ̀rɨ̀sɔ̀ʼ əti bə̀ zə mbɨ̀rɨ̀sɔ̀ʼ nəb!” 2Yeso nyaʼa ghà ɨ bɔ ni, “À zə nəb rɨ kyeŋ tɔ ə? Chəi ɨti mɔʼ bɨrɨ chub ɨgun wɨ cherə. Mbɨ bɨrɨ kɔd əti ze əjìm ə si.”

Mə̀mə̀ə̀nɨ̀-ɨnû Yeso bɨrɨ zə ŋgəʼ, mbɨ bə̀ nwèndɨ̀ tɨkyerɨ-ɨwu mɨ̀mə̌d

(Mt 24.3-14; Lk 21.7-19)

3Ənɨ Yeso nyaʼa chub ə si ɨkaŋ Ɨwum mɨ̀Olìf, əne yɨ əbà ze nɨ nyaʼə nèŋ ə mbàn Ŋwìə̀, Pità mbɨ Jems mbɨ Jɔ̌n fɔrɨ ə Andrù nyaʼa biirɨ ɨ bɔ àmei mɨ̀mərə mɨ̀mərə ni, 4“Gha ɨ na, ənû zɔ̂ ə kɨə wo ghɨ̀ əwù zi ə? Ənweenɨ ze nɨ bɨrɨ chwiə ni nyùmə̀ fə kùʼ nɨ ənû zɔ̂ ə bɨrɨ ghɨ̀ kɨ əzi ə?”

5Yeso nyaʼa ghà əmbɨ mɨ̀mə̌d ni, “Mbə̀ we əwən ɨmbə̀ʼ tɨ wə̀d mɔʼɔ ghɨ i ni mbə̀ febə. 6Bə̂d mɨ̀nɔnɔʼ bɨrɨ yeʼe nɨŋ mɨ ɨkum yènə̀ ghàə̀ ni, 'Mɔ̌ yɨə wə̀d we nɨ Ŋwìə̀ zɔʼɔ!' Mbɨ bɨrɨ gha əne fèbrɨ̀ bə̂d mɨ̀nɔnɔʼ. 7Ənɨ mbə̀ zu ni ɨbeŋ mbɨə màʼə̀ bid, bə̀ zu mɨŋgam ɨmbə̀ʼ ɨchî nɨ bə̂d ə kəb maʼ bid, tɨ mbə̀ bɔ ə. Ɨnû mbɔ̂ berɨ ghɨ̀, àyɨə ka àyɨə kɨrɨ i ɨnwǐ ɨsɨg we. 8Ɨbeŋ bɨrɨ maʼ bid mbɨ ɨbeŋ cherə. Ɨbeŋ nɨ mɨfɔ̀n ə tùmbɨ̀ə̀ bə̀ maʼ bid mbɨ mbɨ cherə nɨ mɨfɔ̀n ə tùmbɨ̀ə̀. Si bɨrɨ wùd ɨsɨ ɨsɨ, njì kǎ kǎ bə̀ nyɨ. Ɨnû mbɔ̂ yɨ ɨghabɨ ɨchî nɨ əyi kɔ zu rɨbuʼ ənɨ wɨə nombɨə.

9“Àyɨə mbə̀ we əwən. Mbɨ bɨrɨ gywɨ əwən nàʼ əmbɨ mə̀saʼ ɨbeŋ. Mbɨ bɨrɨ som əwən ɨŋga nəb rɨ ə̀kàtɨ̀. Mbə bɨrɨ təm ɨfě mɨ̀gɔmnà bə̀ təm ɨfě mɨfɔ̂n ənɨ mɨ ɨkum ɨmbə̀ʼ ghà ɨkə̂n chɔ̀m əmbɨ mɨ̀mə̌d. 10Mbə̀ kyerɨ ni mbɨ bɨrɨ be gha ɨkə̂n chɔ̀m ɨŋga ɨbeŋ jìm bɔŋ ɨnwǐ sɨə yeʼe. 11Ənɨ mbɨ gywɨ əwən wò ɨfě mə̀saʼ ɨbeŋ, tɨ mbə̀ nwìʼ ə ɨnyod ɨmbə̀ʼ ənû ze nɨ mbə̀ bɨrɨ ghà. Mbə ghà àmei ənû ze nɨ Ŋwìə̀ gha ɨ nən ənɨ ə nyùmə̀ we, ɨmbə̀ʼ ɨghəm nɨ à yɨ Əzwî ə Zeŋɨ ə ghàmə̀, kaʼi mbə̀nə. 12Aŋgɔb bɨrɨ fen wi aŋgɔb ni mbɨ zwiirɨ, mbǎʼ bə̀ fèn i wan ni mbɨ zwiirɨ. Bɔn bɨrɨ beŋ ətu əbɔʼ mbə mɨ̀mbǎʼ bə̀ beŋ əbɔʼ mbə mɨ̀nɨ̌ŋ, əne ghɨ̀ ni mbɨ zwiirɨ mɨ̀mə̌d. 13Bə̂d mɨ̀jìm bɨrɨ ban əwən ɨmbə̀ʼ əmɨ, àyɨə wə̀d we nɨ nyiʼi wò pè ənɨ ɨnwǐ, Ŋwìə̀ bɨrɨ chɨ əməd rəŋgəʼ.”

Əghɨ ze nɨə ghɨ̀ ni bə̂d tibrɨ mbàn Ŋwìə̀

(Mt 24.15-28; Lk 21.20-24)

14Yeso nyaʼa ghà ni, “Ənɨ mbə̀ zə əghɨ ze nɨə ghɨ̀ ni bə̂d tibrɨ mbàn Ŋwìə̀, nɨ mbɨ nuŋ əsɨ ze nɨ chəi mbɨ kəʼ berɨ nuŋ əŋgu (ətu ə wə̀d we nɨə foŋ ə zeŋ), əne bə̂d mbe nɨ yeʼ ə Jùdeyà mbɨ norə kɔʼ ɨkaŋ tɨwum. 15Tɨ wə̀d we nɨ yeʼ ɨdom nəb swiʼ i, kɨ̀ be nyɨ ɨŋga i nəb ɨmbə̀ʼ nɨŋ əghɨ ə mɔʼɔ. 16Tɨ wə̀d we nɨ yeʼ ə mbeŋ wɨrɨ bəndɨ i rəbɔʼ ɨ wo nɨŋ i ngywɨ̌ maʼi. 17Ŋgəʼ bɨrɨ nyɨ ɨgwɨ məyi mbe nɨ yeʼ rɨ̀bùmə̀, bə̀ nyɨ ɨgwɨ mbe nɨə nyɔŋə bɔn ɨŋga ɨni mbe! 18Mbə̀ kɔŋgɨ ə Ŋwìə̀ ni tɨ ənû ze ə ghɨ i ənɨ ə nyùmə̀ we nɨ ɨfə ə kɔ əku, 19ɨmbə̀ʼ ɨghəm nɨ ŋgəʼ ze nɨ bɨrɨ jwɨ̀ ɨŋga ɨni mbe bɨrɨ chè ŋgəʼ jìm ze nɨ kweʼ jwɨ̀ kɔ rɨ ənɨ ə Ŋwìə̀ nyaʼa tekɨ ɨsɨg yeʼe pè rɨ̀nîn. Chəi ɨkwɨ ŋgəʼ cherə bɨrɨ wɨrɨ nɔ jwɨ̀ ɨghabɨ zɔ̂. 20À kɨ̀ nɨ chəi Ə̀nùŋɨ̀sɨg nyaʼa fə sobrɨ ɨnun ɨni mbe, njɨ chəi wə̀d mɔʼɔ bɨrɨ jwɨ̀ rəŋgəʼ. Wɨ̀ nyaʼa sobrɨ ɨmbə̀ʼ bə̂d məd mbe nɨ wɨ̀ nyaʼa fə chɔʼɔ.

21“Wə̀d mɔʼɔ mɨ ghà ɨ nən ənɨ ə nyùmə̀ we ni, 'Mbə̀ zə, wɔ̂ yɨə Wə̀d we nɨ Ŋwìə̀ zɔʼɔ!' kɨ̀ ni, 'Mbə̀ zə, à yɨə məd wə!' tɨ mbə̀ ben ə. 22Bə̂d mbe nɨ Ŋwìə̀ zɔʼɔ mɨghab, mbɨ ə bə̂d ɨ̀kə̀n Ŋwiə̀ mɨghab bɨrɨ jwɨ̀, əne ghɨ̀ ɨnweenɨ-ɨnû bə̀ ghɨ̀ ɨnû yiirɨ, ɨmbə̀ʼ ɨchî mɨ chwiə, mbɨ fèbrɨ̀ bə̂d mbe nɨ Ŋwìə̀ chɔʼɔ. 23Əne mbə̀ we ə. Mə fə ghà ɨnû jìm ɨ nən bɔŋ nyùmə̀ sɨə kùʼə̀.”

Wan Wə̀d bɨrɨ wɨrɨ yeʼe

(Mt 24.29-31; Lk 21.25-28)

24Yeso yi ghà əmbɨ mbi mə̀mə̀ə̀nɨ̀-ɨnû ni,

“Ɨŋga ɨni mbe, ənɨ ə ŋgəʼ ze fə che i,

nyùmə̀ bɨrɨ fin,

kaʼ ɨmɨg bɨrɨ bɨ te i,

25tɨtəmɨ bɨrɨ nɔʼ rɨ əton ɨkaŋ feŋgɨ ə si.

Ŋwìə̀ bə̀ chɨ ɨzwî jìm mbe nɨ yeʼ ɨkaŋ.

26“Ənɨ ə nyùmə̀ we, bə̂d bɨrɨ zə Wan Wə̀d nɨə yeʼe ɨŋga pàʼ, zə ɨka kyeŋ we nɨ wɨ̀ berɨ bə̀ zə ɨwumnɨ we nɨ wɨ̀ bə̀ berɨ. 27Wɨ̀ bɨrɨ tom mbi mbɨ̀aŋgɨrə̀ ni mbɨ fetɨ bə̂d məd mbe nɨ wɨ̀ chɔʼɔ rɨ ənɨ rɨbu ɨsɨg te rɨ̀kwè. Mbɨ bɨrɨ kɔ fetɨ rɨ ənɨ ɨnwǐ si wò pè ɨnwǐ ɨkaŋ.

Ənû nɨ tɨ̀ bə̂d kwembɨ rɨ ənɨ əzed ə fîg

(Mt 24.32-35; Lk 21.29-33)

28“Mbə̀ kwembɨ ənû ə mɔʼɔ tɨ ənɨ əzed ə fîg. Tɨtəb rɨ bɔd mɨ jwɨ̀ sɨə chə̀ʼə̀, mbə̀ kyerɨ ni ɨchɨ fə tiinɨ. 29À yɨ əndəŋ əndəŋ ni mbə mɨ zə ənɨ ɨnû mbɔ̂ ə ghɨ̀ə̀, mbə̀ kyerɨ ni nyùmə̀ we nɨ Wan wə̀d bɨrɨ wɨrɨ yeʼe fə tiinɨ, əne wɨ̀ fə sɨ i ɨchû ɨkam. 30Mə ghà rəsìʼ ɨ nən ni, kaʼ ɨghə̀m bə̂d wɔ̂ bɨrɨ che i zɨ rɨ tɨ̀ ɨnû mbɔ̂ jìm ghɨ̀. 31Ɨkaŋ fɔrɨ si bɨrɨ chè, àyɨə chəi mɨ ɨŋgam bɨrɨ nɔ che ətu ə̀kǒ.

Chəi wə̀d mɔʼɔ kyerɨ əni ze kɨ̀ nyùmə̀ we nɨ ɨnû mbɔ̂ bɨrɨ ghɨ̀

(Mt 24.36-44)

32“Chəi wə̀d mɔʼɔ kyerɨ əni ze kɨ̀ nyùmə̀ we nɨ ɨnû mbɔ̂ bɨrɨ ghɨ̀, ka àbei mbɨ̀aŋgɨrə̀ mbe nɨ yeʼ ɨkaŋ kɨ̀ bè ə Wan. Àmei Mbǎʼ rə̀zìʼ wi kyerɨ. 33Əne mbə̀ we əwən, chub ɨkyèʼe ɨmbə̀ʼ ɨghəm nɨ chəi mbə̀ kyerɨ nyùmə̀ we nɨ Wan Wə̀d bɨrɨ wɨrɨ yeʼe. 34Ə zɨ ɨghabɨ ɨchî nɨ wə̀d ə wò ɨghanɨ. Bɔŋ wɨ̀ sɨə jwɨ̀ rɨ ə nəb, wɨ̀ bɨrɨ fə nàʼ ə̀fàʼì əmbɨ mbi bə̂d ə̀fàʼì, wə̀d mɔʼ mbɨ e ə̀fàʼì, wɨ cherə mbɨ əzi. Wɨ̀ bɨrɨ bɨ ghà əmbɨ wə̀d we nɨə nəŋgɨ ɨchû nəb ni wɨ̀ chub ɨkyèʼe. 35Əne mbə̀ chub ɨkyèʼe ɨmbə̀ʼ ɨghəm nɨ chəi mbə̀ kyerɨ nyùmə̀ we nɨ wə̀d nəb bɨrɨ yeʼe. Ɨ we tɨ̀ wɨ̀ yeʼe ɨkwirɨ kwirɨ, kɨ̀ ɨzimɨ ka, kɨ̀ ənɨ ənoŋgub ə tɔŋə, kɨ̀ ɨsɔsɔ. 36Tɨ wɨ̀ saʼ yeʼe i pè zə əwən ənɨ mbə̀ə gwenə. 37Əne ənû ze nɨ mə ghà ɨ nən, yɨ mə fə bə̀ ghà əmbɨ ə bə̂d mɨ̀jìm. Ənû ze yɨ ni mbə̀ chub ɨkyèʼe!”

Currently Selected:

Mk 13: mgo

Highlight

Copy