Yokana 10
10
Lusimo lw'omwaayi ni kamasheese keewe
1Yesu waaloma ari, “Ilala, ilala, imbaboolela ndi, umuundu ukhabirira mu mulyaango nga enjila mu litaala lye kamasheese, ne waniinila ahandi busa, uyo aba umwiifwi, naluundi umunuuli. 2Ne umuundu uwingilila mu mulyaango, uyo aba niye umwaayi uwe kamasheese. 3Umweene uyo, umuliindi amwikulilawo kumulyaango, ni kamasheese kawulila likono lyeewe. Alaanga kamasina ke kamasheese keewe, wakarusa ibulafu wakayisa. 4N'amala khuuba nga waarusile kamasheese keewe koosi ibulafu, akaraangilila, nako kamulondelela, khulwekhuuba kaamanya likono lyeewe. 5Ne umuundu umukyeni busa sikamulondelela ta. Akhali kamwilukha, lwekhuuba sikamanya likono ly'omukyeni ta.”
6Yesu araambisa lusimo luno, ne nibo balekha khumanya byeesi aba nga ababoolela, ni bili ta.
Yesu Umwaayi Umulayi
7Aryo lwanyuma Yesu waloma luundi ari: “Ilala, ilala, imbaboolela ndi, ise niye kumulyaango kwe kamasheese. 8Abo boosi babaanyoowa ise khukhwiitsa, baaba babiifwi, naluundi baanuuli. Ni kamasheese sikaabawulila ta. 9Ise niye kumulyaango. Umuundu yeesi ni enjilila mus'iise, aliwonesebwa. Alinjila, luundi arure anyoole kamaayilo.
10“Umwiifwi s'etsa khu lwe shishiindu shishiindi ta, ne njeeba eetsa khukhwiiba, ni khukhwiira, ni khuuhesa bibiiliwo. Ne ise neetsa khuubawa inywe buulamu, naluundi ndi mube ni nabwo mu bwitsufu.
11“Ise ndi umwaayi umulayi. Umwaayi umulayi awaanayo bulamu bweewe khulwe kamasheese keewe. 12Ne umuraambi uwaayisa ari afune kumukheemba, ukhali umweene uwe kamasheese ta, n'abona khatsuutse nga kheetsa, alekha kamasheese waatima waatsya, khatsuutse khaluumba kamasheese, khaakasalanisa. 13Umwaayi uli umuraambi uwe kumukheemba atima waatsya, khulwekhuuba ayila kumukheemba, ne kamasheese s'akenaanakho ta.
14 #
Mat 11.27; Luka 10.22 “Ise ndi umwaayi umulayi, namanya kamasheese kaase, ni kakaase nako kaayimanya samweene. 15Nga Paapa n'amanya ise, ni nase nga ni namanya Paapa, nawaanayo bulamu bwase khulwe kamasheese. 16Ne ndi ni kamasheese kakaandi kakakhali mu litaala lino ta; ni nako naakha khukareera. Nako kaliwulila likono lyase, kabe ke mwitaala litweela, n'umwaayi abe mutweela.
17“Paapa angana ise khulwekhuuba imbaanayo bulamu bwase, nio lwanyuma imbufune luundi. 18Mbaawo umuundu uwundusakho bulamu bwase ta; ne ise imbuwaanayo samweene khu bwase. Indi ni bunyala bwe khubuwaanayo, naluundi ndi ni bunyala bwe khubufuna luundi. Shino nisho sheesi Paapa andakiile khukhola.”
19Khulwe bilomo bino, luundi ndi abawo khukhwawukhana mu Bayudaaya. 20Bakali khu nibo baloma bari, “Alikho shisaambwa, naluundi wakwiile tsintsoli. Lwashiina mumurekeeresa?”
21Ne babaandi baloma bari, “Mbaawo umuundu uli ni kimisaambwa unyala khukanikha ari taawe. Shisaambwa shinyala khubimbula tsimoni tsye baabofu?”
Bayudaaya baloba Yesu
22Byaba bifukhu bye bunyifu, ni Kamayiiya ke Khuwaanayo i Yerusalemu kaaba katsya mu moni. 23Yesu aba akyeenda mu Lisaayilo Likhulu, mwitikiiyi lya Solomoni. 24Babaandu babuusana, bamwibotokhelela bamureeba bari, “Ulyoolisa ena khukhulekha ifwe nga khwikanakana? Noola iwe niye Kristo, khuboolele lubuula.”
25Yesu wabeelamo ari, “Ise nababoolela, ne inywe simufukiilila ta. Buuraambi bwase bweesi inaamba mu lisiina lya Paapa, nibwo bubunganikhakho. 26Ne simufukiilila ta, khulwekhuuba simuli kamasheese kakaase ta. 27Kamasheese kakaase kawulila likono lyase, nase nakamanya, luundi nako kanondelela. 28Ise ingawa buulamu bubukhawawo ta. Shikalihela ta, luundi mbaawo ulikawutula khukhwaama mu mukhono kwase ta. 29Paapa wase niye uwakaamba ise, niye uminyisa bibiindu byoosi, nashiryo mbaawo umuundu yeesi unyala khuwutula shishiindu shoosi khukhwaama mu mukhono kwa Paapa ta. 30Ise ni Paapa khuli umuundu mutweela.”
31Luundi ndi Bayudaaya bawaamba kamabaale bari bamukhupe. 32Ne Yesu wabeelamo ari, “Nabookesana kimilimo kimilayi khukhwaama isi Paapa, khu milimo kino kyoosi, milimo shiina khu nikyo kikila mwakhupa kamabaale?”
33 #
Lev 24.16
Bayudaaya bamwiilamo bari, “Sikhuli khuutsya khukhupa kamabaale khulwe kimilimo kimilayi ta, ne khulwe khufwotsola Wele. Iwe umuundu busa, ate wilaanga khuuba Wele.”
34 #
Zab 82.6
Yesu wabeelamo ari, “Sisharonebwa mu makaambila keenywe shiri, ‘Ise inoma ndi muli ba wele’ ta? 35Babeene abo babalaangibwa bari ba wele, nga nibo beesi Ilomo ya Wele yeetsila, ni bibyaronebwa bikhosefu sibinyala khuufuniaakibwa ta. 36Kale inywe munyala muryeena khukhuunomakho ise, isi Paapa abiitakho tsikhabi, waarumana mu shiibala, muri ifwotsola Wele, bari khulwekhuuba ise naalomile ndi, ‘Ise indi umukhosefu khukhwaama isi Wele?’ 37Ne ni imba nga sinaamba kimilimo kya Paapa, mukhaafukiilila ta. 38Ne ikhaba nga injiraamba, mwakhalekha khufukiilila, ne ni mufukiilile buraambi, nio mumanye muri Paapa ali mus'iise, ni nase ndi mu Paapa.”
39Luundi ndi bakhakakho khumuwaamba, ne Yesu wabebisakho waatsya. 40#Yok 1.28Aryo Yesu waatsya injelekha we luluutsi Yorudaani, mu shifwo esi Yokana makiboole anyoowa khubatisila, waba ibweene iyo. 41Babaandu bakali beetsa is'ali baloma bari, “Akhaba nga Yokana s'akhola khabonelo khe kamakaanga khoosi ta, ne byoosi byeesi aloma khu muundu yuno, byaba bya ŋali.” 42Ibweene iyo, babaandu bakali bafukiilila mu Yesu.
Currently Selected:
Yokana 10: LPE
Highlight
Share
Copy
Want to have your highlights saved across all your devices? Sign up or sign in
The Bible in Lumasaaba © Bible Society of Uganda, 2016.
