Luka 23

Yesu nga ali mu moni tsa Pilato

(Matayo 27.1-2,11-14; Mako 15.1-5; Yokana 18.28-38)

1Baryo, babaandu boosi babaaba mu lubusano, benyukha bayila Yesu wa Pilato. 2Ibweene iyo barakikha khumuwabila nga baloma bari, “Umusaani yuno khwamunyoolele nga akosaasa babaandu be linaambo lyeefwe, nga abareesa khuuwanda kumusolo isi Kayisaali, naluundi nga elaanga khuuba niye Kristo Umuyiinga.”

3Kila Pilato waamureeba ari, “Iwe uli Umuyiinga we Bayudaaya?”

Yesu wamwiilamo ari, “Shili nga iwe n'ulomele.”

4Aryo Pilato waloma basaayi bakhulu ni lituuli lye babaandu boosi ari, “Ise simbona ilomo iye kumusaango khu muundu yuno ta.”

5Ne nibo beloosela khutsuntsumilisa bari, “Niye asasamasa babaandu ni indeekela yeewe mu Yuda mwoosi. Anyoowela mu Galilaaya, ni aluno woolile ni neeno yoosi.”

Yesu bamwakaanisa wa Herode

6Ne Pilato nga wawuliile shino, wareeba ari, “Umuundu yuno umu Galilaaya?” 7Naye n'ashimanyakho ari Yesu ama mu shisiintsa shishiwuliwa ni Herode, wamwakaanisayo isi Herode, uwaba nga naye ali mu Yerusalemu mu bifukhu ibyo.

8Ne Herode n'abona Yesu, wekhoya naabi, lwekhuuba awulilatsakakho busa bilomo byeewe, ne nga khukhwaama khaale aba akana khu mubonakho, nga asuubila khubonakho nga akhola she kamakaanga shoosi. 9Herode wareeba Yesu bireebo bikali, ne Yesu walekha khumwiilamo ni lomo yoosi ta. 10Basaayi bakhulu ni baleekeli be kamakaambila ka Musa, bemikhawo nga bamutsuntsumilisa naabi. 11Aryo Herode ni basilikhale beewe, bakhomyaasaka Yesu nga bamutyabila. Bamukwaarisa ingubo imelamela, lwanyuma bamukobosayo isi Pilato. 12Khukhwaama ni khu shifukhu sheenesho, Herode ni Pilato bekyela be busaale, ne nga abe mataayi baaba babiiyanila.

Yesu akhalilwa kumusaango kwe Khuufwa

(Matayo 25.15-26; Mako 15.6-15; Yokana 18.39; 19.16)

13Pilato walaanga atweela basaayi bakhulu, ni bawuli ni babaandu, 14waabaloma ari, “Inywe mundereere ano umuundu yuno nga muloma muri akoraanisaka babaandu. Ne bona ise namureebelesile mu moni tseenywe, ne nakhunyoolakho ilomo yoosi ikila mwamuwabila ta. 15Ikhaba ni Herode naye wakhunyoolakho ilomo yoosi isi mumufunisa ta, lwekhuuba wamukhukoboseele fwabeene nga ni mumubona. Umuundu yuno mbaawo sheesi akholile shishaakhila khumwiirisa ta. 16Ni nashiryo, ni ngane imale khumulatsakakho, kane imulekhuule.” 17Ne khu buli mayiiya ke Khuubirakho, abe Pilato ali ni khulekhuulakho umubowe mutweela esi babaandu bakanatsaka bari alekhuulibwe.

18Ne lituuli lye babaandu bayokesela angaaki bari, “Uyo n'umwiire, ne ifwe ukhulekhuulile Baraba.” 19(Ne Baraba uyo aba wabowebwa mu mapuusu lwe khureera shishitulungu shishaba mu shiriimba isho, nilwe bubwiiri.)

20Ne Pilato wakanikha luundi isi bali nga akana khulekhuula Yesu. 21Ne nibo beloosela khuyokesela angaaki bari, “Mutsaangilile khu musalaba, mutsaangilile khu musalaba.”

22Aryo Pilato waabakanikhayo luundi ifuunda iye khataru ari, “Ne lwashiina? Shiina shisheene sheesi akholile? Ise simbona ilomo yoosi khu niye ikila yamwiirisa ta. Aso ni kane imale khumulatsakakho, kane imulekhuule.”

23Ne nibo beloosela khuyokesela angaaki lukali lweene bari, Yesu aakha atsaangililwe khu musalaba, ni khuuyokesa khwaabwe khwaabiramo. 24Aryo kila Pilato akhalawo ari, sheesi bakana shibakholewele. 25Aryo waabalekhuulila umuundu isi baakana, uwaba waabowebwa lwe shishitulungu ni bubwiiri. Ne waawayo Yesu khuumukhola nga ni bakana.

Bakhasi be Yerusalemu balilila Yesu

26Ulwo basilikhale ni baaba nga bayila Yesu, bawaamba Simoni Umu Kurene, uwaba ama mu shaalo nga etsa mu shiriimba, bamutwikhisa kumusalaba khukusuta nga alondelela Yesu.

27Lituuli lye babaandu bakali bamuloondakho, ni mu nibo mwabamo bakhasi babaaba balila luundi nga bamwantsuyila. 28Ne Yesu weshebukha, waabaloma ari, “Bakhasi be Yerusalemu, mukhaandilila ise ta, ne ni mwililile mwabeene ni babaana beenywe. 29Lwekhuuba bifukhu bilyoola lweesi babaandu baliloma bari, ‘Nga bali ni tsikhabi bakhasi bakuumba, ni bisoombo bibikhasaalatsakakho ta, ni kamabeele kakakhanunisatsakakho ta.’ 30#Hos 10.8; Bimb 6.16Lwanyuma balilakikha khuloma tsinjiinji bari, ‘Ni mukhukwekho,’ ni tsingoongo bari, ‘Ni mukhubiimbilile.’ 31Lwekhuuba babaandu ni bakhola shino khu kusaala kubisi, ne khu kusaala kukwoomu, shiliiba shiryeena?”

Yesu atsaangililwa khu musalaba

32Aabawo basaani babaandi babili, bafuniaaki be kamakaambila, nabo bayilibwa khukhwiiribwila atweela ni Yesu. 33Ne ni boola mu shifwo sheesi balaanga bari “Shihaanga,” baamutsaangilila abweene awo, atweela ni baafuniaaki be kamakaambila tsana, mutweela khu mukhono kwa Yesu kumulayi, n'ukuundi khu mukhono kumunyeletsi. 34#Zab 22.18Yesu waaloma ari, “Paapa, n'ubeyakhile, lwekhuuba sibaamanyile byeesi bali khuukhola ta.”

Baryo baakabanana bikwaaro byeewe nga babikhupilakho buukokha.

35 # Zab 22.7 Babaandu bemikha balolelela, ni bawuli be Bayudaaya bamwoonela nga baloma bari, “Awonesatsaka babaandi, ari ne yiwonese umweene, noola niye ali Kristo, Umurobole wa Wele.”

36 # Zab 69.21 Ni basilikhale nabo beetsa bamutsekhelela, beetsa is'ali bamuwa iviini indulutse, nga baloma bari, 37“Iwe noola uli Umuyiinga we Bayudaaya, ni wiwonese wamweene.”

38Ne angaaki khu musalaba kweewe abaawo burone bubuloma buri, “YUNO NIYE UMUYIINGA WE BAYUDAAYA.”

39Mutweela khu beesi kumusaango kwafuura, abe uwatsaangililwa atweela ni Yesu warakikha khufwotsola Yesu nga aloma ari, “Iwe s'uli niye Kristo ta? Ni wiwonese wamweene, ni nafwe nafwe ukhuwonese.”

40Ne ukuundi uyo wamwikiitsa, nga aloma ari, “Iwe ni khuurya, s'urya Wele ta? Bona ifwe khuli khu shitaambiso shitweela busa ni naye. 41Ne ifwe, iwe ni nase, kumusaango kwakhufuurire lweebyo byeesi khwakholile. Ne umusaani uyu, mbaawo shiibi shoosi sheesi akholile ta.”

42Lwanyuma waloma Yesu ari, “Yesu, ushebulilatsaka lweesi uliitsila mu shiriifwa she buyiinga bwoowo.”

43Yesu wamwiilamo ari, “Ilala, ikhuboolela ndi, shaleelo kane ube ni nase mu shifwo she sangaalo mwikulu.”

Khuufwa khwa Yesu

(Matayo 27.45-56; Mako 15.33-41; Yokana 19.28-30)

44 # Luky 26.31-33 Ulwo tsisaawa tsaba nga tsisesaba tse mwihangilwe, shishiilima shakwawo khu shiibala shoosi, khukhwoolesa khu saawa nga syeenda tse angoloobe, 45lwekhuuba inyaanga yakamisa khukhwaburukha. Ni ingubo iyatiimbibwa mu Lisaayilo Likhulu yonuukhamo khabili akari. 46#Zab 31.5Yesu waalomela angaaki ni likono likali ari, “Paapa, mu mikhono kyoowo indamo bulamu bwase.” Aryo nga n'amala khuloma aryo, wikhisa kumwoyo kweewe wafwa.

47Umukhulu we kamaye n'abona ibyo byoosi bibibeelewo, waabuyila Wele nga aloma ari, “Ilala umusaani yuno abeele umuundu umukwalaafu.”

48Ni kamatuuli ke babaandu babaabawo nga baabusaane, ni baabona bibibeelewo bino, bekhupaka mu shifuba nga beelayo ingo waabwe. 49#Luka 8.2,3Ne abo boosi abe babaamanya Yesu, ni bakhasi babaamuloondelela khukhwaama i Galilaaya, beemikha aleeyikho, nga balolelela bibiindu bino byoosi.

Khusiikhiwa khwa Yesu

(Matayo 27.57-61; Mako 15.42-47; Yokana 19.38-42)

50-51Aabawo umusaani lisiina lyeewe Yusufu, uwaba umukhulu mu shiriimba she Yuda shishilaangibwa bari Alimaseya. Abe ali umusaani umulayi, nga naye abe aliindilila khukhwiitsa khwe Buyiinga bwa Wele. Ne abe ikhaba nga aba mutweela khu bakhulu be mu lukhobo, ne niye s'afukiilisana ni neesho sheesi baakhalawo ni sheesi baakhola ta. 52Yusufu yuno waatsya isi Pilato, wamuloomba kumulaambo kwa Yesu. 53Aryo wakuwanulayo, wakubowelela musuukha iwaanga, wakura mu ŋani iyabeetsebwa mu lwaanda, nga yakhusiikhiwatsakamo umuundu yeesi ta. 54Shifukhu shaba she khukhwiŋoonaŋoona, lwekhuuba Sabato yaba ili aambi khurakikha.

55Ne bakhasi babaloondelela Yesu khukhwaama i Galilaaya, baatsya ni Yusufu, babona iŋani, ni kumulaambo kwa Yesu nga ni kwareebwamo. 56#Luky 20.10; Maka 5.14Lwanyuma bakobolayo ingo, baŋoonaŋoona bibiwunya bulayi ni kamafura. Ne khu shifukhu sha Sabato bawola, nga likaambila ni liloma.

Currently Selected:

Luka 23: LPE

Highlight

Copy