Lúka 19

Yíésu ubaa Sakááyo

1Yíésu Yeríko ki ˈjieká ˈjien hurt nadhe. 2Máá gaalí Sakááyo yegie mare ény kinaallá he gaa ije. Máá kinaallá gál gibíre gugusatká máállé guđoká, mu úba kamúrut. 3Mu Yíésu máá háte yaallo, he yegie. Aalé mu kár Yíésu ki aargiroká ˈgeˈgedhe. Kor ˈdaa giri nyesebich Yíésu ki made-, tá mu íín hí ki gaawká, mú hát níínní he mú argoká mán. 4Aalé mu gáál met ˈdodhdhe, kínnách ˈgíérích Yíésu hí gaa igireká af gaa yiel mare feˈjie, giri mu Yíésu ál kinaal ká nadheka mú aargiroká.

5Aalé Yíésu kínnách kinaal álle ká ˈdoyká úr ki fuˈjie, mú vie, kieye, Sakááyo! Ebá đo ka léet, yú kúlíchallá dheeˈg ye ˈbílkú, Yíésú hí mú yie. 6Sakááyo đo ká leedhe, geer hí gaa meedhe, mú ényle ˈdú eedhdhe. 7Gálaat lulle héél argeká yiirsam fadhdhe, kieye, Mu hé máá ađááb ˈguoká ˈbílle sedhe, mú máállé dheeˈgo yie, gaalí yie.

8Aalé waaséél Sakááyo les gaa kie, Yíésu geey, kieye, Bá dháash, Máá Guđo, hé chia yú ˈguoká eiy ha yú ˈdarama, ˈdáá tikiˈd gál he maamanká ha yú shigia. Máá yú tág ki ˈdie-, yú he súm gaa guteká he a afurro yú he hol ˈdú nannaa, mú yie. 9Aalé Yíésu kieye, ˈBílallá kúlíchallá hé rubach arge, ˈdaa giri máállá úba iny Abiraayamká.#19:9 Yíésu ˈdaa Sakááyo iny Abiraayam ki yíéllá, he ˈdaa giri Sakááyo kúlích tikiˈde kinaallá hát Abirááyam hí héle Waag iiy yieká, íín úba Waag iiy yieká. 10Tá Iny Máádhat ka yimíéllá, gál bađayká he hol gaa ˈgeˈgedhe, he ririma, Yíésu hí yie.

Minna tomonká hiblé

11Gálaat hátlé ˈdeeny Yíésu hí hogodheká nee kokoyká, Yíésu gáál hibééllá geey. Mu gáál hibééllá geeyallá hé ˈdaa giri mu Yerúsalem ma gaa faganâny-, tá gálaat tawunyleka, Guch Waaˈgiet tíkíˈdé kinaallá yé hai ká ˈdeenne, yegieká. 12Aalé mu gáál geey, kieye, Máá ˈbíl ílle ˈbíl íl kansimo mare kie, lés fág mare mé nie, giri gaalí bííy kinaal kansím gáá shiguo-, tá hol ka naatká. 13Aalé mu hátlé ma kíinyká gedellé tomon mare vie, gáál mínna#19:13 Mínna he bíre bar kinaalloká. Máádhat he ˈguiyam seđ hujich gaa nieka, mínna tikiˈde he aargire. taat eiy shie, gáál geey, kieye, Bírééllá ye nigíˈd kí náa, ˈjíig yú ká ˈjee, gáál yie.

14Kor mú gál lésle íín hé mú nebeney. Aalé gaal mú gálaat el gaa koy, giri ál muí seseme kinaal gállé guguđoká gálal hí ˈdeenyéél ˈdú siidho-, Máállá kánsíchkínyo yegetká nyáá nyí ma fediny, gaalí gáál yeetká. 15Har úba gaal hé kinaal ekeyka, mu kansím arge. Mu hol ká nadheká mu gedellé giri mínna shieká hol ˈdú gáá vie, giri mínna kinaal tírfíllé hí yé gáá ˈdiiyyeká ˈdaable aargiroká.

16Gédéch erká ká yimie, kieye, Máá guđo, mínna tikiˈde giri ye ka shiicheká, tírfí tomonno yú ˈdug gaa arge, yie. 17Mú máállé guđoká kieye, Hé midhab, kúún he gédéch ˈdúwaká. ˈDaa giri kúún hé ninnííllá gáá ˈdúwaká, kuun aalé ˈjien met tomon kánsíchle ha cheedhe, muí mú yie.

18Aalé gédéch ki naamaká ká yimie, kieye, Máá guđo, mínna tikiˈd giri ye ka shiicheká, tírfí chenno yú ˈdug gaa arge, yie. 19Aalé máá guđoká mú geey, kieye, Kúún aaléka ˈjien met chenno kánsíchle cheedhe, muí mú yie.

20Aalé gédéch ki seđeká ká yimie, kieye, Máá guđo, bá dháash, mínna tikiˈde kua ye ka shiicheká sháásha yú af ki hidhe, yú ali iđie. Káána hállia. 21Yú kúúni ko kiadhe, kuun he máá ádum mán, hé ma lilenyká egeet-, héétí ˈguom ma fíinyká shalamánt mumuratká, muí mú yie. 22Aalé mú máállé guđoká mú geey, kieye, Kó gédéch ˈdeewal! Kuun aalé ˈdéé hót kua hotééllá hé ko hiigite! Kúúni ta yú hát máá ádum mán-, hé ma lilenyká egeet-, ubaa ˈguom hé ma fíinyká shalamánt mumuratká ôg? 23Háteka har bírechú ál birm ˈdaˈdalsichoká má sin-, yáálle hol ká nadheka, hí bíre eiy ˈdug má gaa arginya? muí mú yie.

24Aalé máá giri guđoká gál ál kinaal ˈgieká geey, kieye, Máállá mínnallééllá gaa ée, mínna máá mínna tomon ˈgúótíá shía, muí gáál yie. 25Aalé gál giriká kieye, Máá guđo, máá kinaal íín hé mínna tomon ˈgúóllá muuniny? gaalí yie. 26Aalé máá giri guđoká kieye, Yú hí geeye, máá hé gaalí gíl geer gaa kaayká tág chiratká, hé éíy taaka úba ha gaalí shigia. Tá máá hé gaalí gíl geer gaa kaayká tág ma ki yaalinyká héllé gíl ká ˈguo kinaal ha gaalí gaa egedhdhe. 27Aaléka, gál halúgallo ye ka kídh-, yú kánsíchle yegetká ma fedinyallá ka shuunáa, met chiallá ka sidháa, yiesíe, muí yie, Yíésu hí gáál yie.

Yíésu Yerúsalem ki ˈjieká gaalí meey

28Yíésu hib kinaal gáál geeyká đo sienyle mé veere, Yerúsalem mé nie. 29Aalé mu ény Beđefege ubaa ény Bedhene giri gúmle gaalí Gúm Saano Salabká yegetká kí ˈjobondheká, mu lalille naam ali fie, 30gáál geey, kieye, Ény ˈgierich af tól ki ijóóllá sedhíe. É hí hilleka kírífíny gaalí hidhe-, kálta máá hí ˈdiidhe mánká haí aargiˈda. Kírífíny kinaallá ka fuˈdíe. 31Tá har máádhat hí yiete-, mu kieye, Har hí kírífíny fufurataa? muí yieka, itín hí kieye, Kírífíny Máá Guđoká hí fede, yiedhíe, Yíésu hí gáál yie.

32Aalé gál giri muí ali fieká sedheká, hát giri muí geeyká kín ˈdúwa. 33Gaal he kírífíny ka fufuˈdeká, kírífíny máálle kieye, Har hí kírífíny fufurataa? gáál yie. 34Gaal kieye, Kírífíny Máá Guđoká hí fede, gaalí mú yie. 35Aalé gaal kírífíny Yíésu ˈdú gáá ˈdeey. Gaal đafaraamlé ˈdú lalaatká kírífíny ˈdú gole, Yíésu kírífíny ˈdú iđie. 36Aalé ˈgíérích Yíésu hí gaa igireká gálaat hí đafaraam af gaa gole.

37Aalé mu Gúm Saano Salabká ˈgíérích hí gáá leledho-, Yerúsalem seseenká állé kí ˈjobondheká, nyésébích guđo láli mú hol ˈgieká ger hí gaa meedhe, ˈdaa giri gaal hé burnay-, gálaat hí af ˈdaˈdabo-, muí eekemeyká bar lulle aargireká. Gaal Waag af gaa guđoká ki meey, 38kieye,

Kánsích meeny Máá Guđo Waag kí yimíéllá

ebá Waag hí ˈdú ˈguunúánne!#19:38 Warˈgat Arram 118:26

Ur naanná! Waag Úr Iđoká kí meeyo,

gaalí yie.

39Aalé gál Farisaay nyésébích kinaal hol ˈgie mare Yíésu geey, kieye, Máá gálaat he oonisúóllo, lalikú ki ˈdâsh, gaal hí shab yeet, yie. 40Yíésu gáál ˈdéé hol ˈdú nie, kieye, Yú hí geeye, gálallá he shab yieka, waarééllá úba koˈdam hai ˈdarama, muí gáál yie.

41Aalé Yíésu Yerúsalem ki ˈjobondhe-, ˈjien argeká, ˈjien ˈdú buoy, 42kieye, Kúlích ki gaa ijóóllá hé ko naanná shiguoká kuun hí ma onnônyal hemme! Aalé káána kó hé kinaal ma kiimisan. 43Kuun bár gál ko ka kídhká ko đír ki madio-, gálkú ál kar ki ˈduoká ˈdaaboká ali hai kí ˈdeenne. 44Gaal kúún ubaa um kua đírkú geer gaa ijoká les haí ki tuuna. Gaal hé waar gálaat hí é ki ˈditeká hé wár tikiˈde wár eiy ˈdug ˈdú haađuoká mán. Hé kinaallá ˈdaa giri Waag kúlích ko a kí ˈdiiyyeká kuun hí moonnoyyeká, Yíésu hí yie.

Yíésu gál nigiˈdká ˈBíl Waaˈgiet gaa arie

45Aalé Yíésu ˈBíl Waaˈgiet náble hile, mu gál ál kinaal shokodaam gaa mamadieká baaˈd ki arie. 46Mu gáál geey, kieye, Hé gaalí Warˈgat Waaˈgiet gaa veere, ˈBílchú hí ˈbíl Waag visan yeet,#19:46 Yisááya 56:7 Waag hí chie. Tá har hí ál gál buraa léká hóychia!#19:46 Yeremía 7:11 Yíésu hí gáál yie.

47Mu aadh lulle ˈBíl Waaˈgieto gálaat ˈdéé gaa oonisie. Aalé gál guguđo-, suoryoká, ubaa gál nyatalaamká, tá é karulle Yíésu ooslé yegeská hol geey. 48Kor gaal ˈgíérích he mú ki yegeská ˈdabe, ˈdaa giri gálaat lulle mú ki mamade-, mú ˈdeenyle nee kokoyká.

Currently Selected:

Lúka 19: dsh

Highlight

Copy