Lúka 7
7
Yíésu máá yuoy kúˈd mé ki yiel mare gédéchle bisie
1Yíésu ˈdeenylé giri gaalí nee kokoyká beeteká Kafarnáum mé nie. 2Ál kinaal hé máá yuoy kúˈd tikiˈd mé ki yiel mare hí gaa ije. Máá kinaal gédéchlé súm geelney mare kulnadhe, mu onnônyka hai kufume. 3Aalé máá guđo kinaal fayam Yiesu maaleká, mu gál káru Yisirayel mare Yíésu ali ˈdú fie, giri gaal mú gil ki egefo-, mu ká yiimet-, mú gédéchle biisuoká.
4Aalé gál muí ali fieká Yíésu af kí ˈdieká mú gil ki efe, giri mu ká yiimet-, máá giri yuoy kúˈd mé ki yiel kinaal gédéchle biisuoká. Gaal kieye, Máá kinaallá onnônyka máá kuun hí ˈdú ˈjeenká. 5Máá kinaallá hé tág é meenykúnno giel, ííni úba gáál ˈbíl ˈdiiyiminyká kí ˈdisse, gaalí mú yie.
6Aalé Yíésu gáál hol eedhdhe. Mu é kí ˈjobondheká máá yuoy kúˈd mé ki yiel kinaal sheelle Yíésu ali ˈdú fie, giri gaal héél Yíésu geđuo-, kieye, Máá Guđo, ha hállééllá hol héf kí chíésiny. Yú yáá máá ˈdúwa-, ˈbílle kuun hí ká higilloká muuniny. 7ˈDaa kinaallá ˈdugaka in yú dhúrchú ko ma ˈdu gáá yímen. ˈDéé tákámle hot, gédéchchú hai miidhandha. 8Yú úba yáá gál ye ˈdú guguđo-, yú el gaa yaalká ˈguo. Yáá úba yuoy mé ki yaalká ˈguo. Máádhat yú geey-, Sí, yú yieka, mu đo met hai ye gaa sedhe. Máá éíy taaka yú geey-, Káde, yú yieka, mu đo hai ká yimie. Gédéchchú yú geey-, Hatallá ˈdé, yú yieka, mu đo hát kinaal hai ˈdie, gaalí Yíésu hatal yegetká.
9Aalé Yíésu ˈdeeny máá yuoy mé ki yiel kinaal gaalí geeyká ˈdéé af ˈdabe, mu nyésébích hí el gaa veereká bala ˈdú nie, kieye, Yú hí geeye, yú yáá gál Yisirayel iiy yeen guđo-, hatallóóllá kálta ma gaa árginy, yie. 10Máá giri yuoy kúˈd mé ki yielká gállé ali fieká é hol ˈdu gáá nadheká, máá giri gedech kulnayká midhándhe!
Yíésu min hiyesidhe mare inylé mán yieká sidh gaa koy
11Waaséél Yíésu ény gaalí Náin yegie mare sedhe. Mú lalille tá ubaa nyésébích guđoká úba mú hol eedhdhe. 12Aalé Yíésu é káráfle kí ˈjobondheká gál máá mán yie mare ˈgieká hol met kí ˈdoy. Min hiyesidhe mare inylé tákámle ˈgayyeká hé kinaallá. Nyésébích guđo-, eny kinaalloká úba hé min hol ˈgie. 13Máá Guđo Yíésu min argeká min geer hí ˈdú gudhdhe, min geey, kieye, Ha búony, yie.
14Aalé Yíésu gál íny ˈgieká ˈdú sedhe, rokoˈd iny hí gaa iifeká đig yie. Gál giri íny ˈgieká ˈgasle koy. Aalé Yíésu kieye, Inyáállo, ha yú ko geey, le gaa keʼ, yie. 15Aalé iny giri mán yieká, đo le gaa kie, ˈdéé huogodhe. Yíésu íny ˈjielle hol ˈdú nie. 16Gaal lulle he a ˈdabe, Waag meey, kieye, Máá Guđo-, Waag hí ˈdéé ka shigichoká hé gáál hurt yé gáá ˈdie. Waag hé ká leete, gálle ˈdú ˈjiiyye, gaalí yie. 17Fayaméél lés gál Yuuˈdi geerle ubaa biiyano éíy taakaká lulle bash ki chie.
Yuána giri gálaat bie gim nannieká lalille Yíésu ali ˈdú fie
18Yuána lalille hí fayaméél lulle shie. Aalé Yuána lalille naam ká vie, 19mu gáál Máá Guđo Yíésu ali ˈdú fie, giri mú gaalí ká hegeset-, kieye, Kúún he máá giri nyí met egete-, ká yiimetkáa, ebá máá éíyyo nyí met egete? gaalí mú hatal ka hegesetká. 20Aalé gál láliká Yíésu af kí ˈdieká mú hatal geey, kieye, Yuána giri gáál bie gim nannuoká kúúni nyí ko ali ˈdu gáá fie, giri nyí ko ká hegesete-, kieye, Kúún he máá giri nyí met egete-, ká yiimetkáa, ebá, máá éíyyo nyí met egete? nyí ko hatal chegetká, gaalí mú yie. 21Ál kinaal Yíésu gál burnay basham ˈgieká ubaa gál aryáán hí hilleká bisie. Mu gál in maaman-, burnayká úba in kaay, gaal biiy gaa arge.
22Aalé Yíésu lali giri Yuanaká ˈdéé hol ˈdú nie, kieye, Hol nadhíe, Yuána hé hí argiyyééllá ubaa hé hí maallééllá fayamle shía. Gál in maamanká hé in kaadhdhe, gál ˈgas maamannayká hé hol gaa seeseme, gál nyókot ˈgieká hé midhandhe, gál nee maamannayká hé he maale, gál kufeká hé sidham kaadhdhe, gál he maamanká hé gaalí Fayam Midhabká shie, yiedhíe. 23Tá máá yú ye ma ki nannaanká Waag haí ˈdú ˈjeenne, Yíésu hí gáál yie.
24Aalé Yuána lalille hol nadheká, Yíésu Yuána ˈduuwle nyesebich geey, gáál yiete, kieye, Lés ˈbakatéétí hí sieteká meete hí aargiˈde hí feˈde? Hóch waanich hí muotisuoká hí aargiˈde? 25Tá meete hí eey, hí aargiˈde? Máá đafar midhabká hiteká hí éey, hí aargíˈde? Bá dhaayyíe, gál đafaraam ˈdabaanká fafaat-, mís gaa ijoká gál kinaallá gál kaansúoká ˈjienlé he gaa ija. 26Tá meete hí ˈdú siete, hí aargiˈde? Máá Waag hí ˈdeem ka shigichokâ? Hé ˈduwa! Tá yú hí geeye, Yuánáállá hé gál Waag hí ˈdeem ka shigicheká lulle ˈdú ˈdúwa. 27Yuánáállá he máá ˈdaalle ˈdugaka gaalí Warˈgat Waaˈgiet gaa veere-, warˈgatle kieye,
Ebá dháash, yú máá chia ˈgassoká ali ha gáá kakaa,
mu met hai ko naadha,
mu ˈgíérích kua ko met tág kokoo,#7:27 Maláki 3:1
warˈgát hí chieká.
28Yú hí geeye, gál gál ˈdiet hí ˈdaleká hé máá níínní Yuána a mé ijoká mán. Tá Guch Waaˈgiet gálle máállé biiy el ˈdaˈdká ííni mú a mé ija.
29Gálaat lulle ubaa gál gibíre gugusat-, Yuána af nee kuokoy-, muí bie gim nieká hé hé Waag hí feˈdeká iiy yie. 30Gál Farisaay ubaa gál nyatalaamká Yuána hí bie gim nannuoká iiy ma yéenká íín hé Waag hí ki feˈdeká điidhe.
31Gál barallóóllá meete yú hol ki ekemeye? Gaal he gál háte ˈgie? 32Gaal hát um nigini-, ál him hí hol gaa higiatká gaa ijo-, um eiy veveen-, kieye,
Itín ke hí geyyiny árle gil kí ˈdoyká
it ma láálan,
ke hí innum ˈdéént árle kí ˈdoyká
it ma shiilmísan,
yegetká he ká ˈgee. 33Yuána ka yimieká hé af higite, hé bersh ma igíminy, in itín hí kieye, mu aryáánno ˈgaa, hí mú cheedhe. 34Tá yáá Iny Máádhátallá ká yimie-, nyí gálaat hol ˈgar gololsote-, nyí gáál he hol ˈgar iyyeká, itín hí kieye, Bá dhaayyíe, máállá ebá he kokoo! Mu ebá bersh igima! Mú sheelle har gál gálaat birm gaa gugusatká ubaa gál ađaabano ˈguokaa! hí ye chegedhe. 35Tá ˈdaalim Waaˈgiet hát ke kiimisatká he hé midhab gál ˈdaalim kinaal el gaa igiroká hí ekemeyoká.
Min ađááb ˈgayyeká Yíésu salab ˈgas met shugudiche
36Aalé máá Farisaay mare Yíésu kiere, giri mú ˈbílle hol ˈgar golmosotká. Yíésu máá Farisaay kinaal ˈbílle hile, gaa gololte.#7:36 Gál Yisirayel bar kinaalloká golmosotká yiiro les verene, tá he golmote. 37Aalé min ađááb ˈgayye-, ény kinaal álle gaa iđe mare fayám maalle-, Yíésu ˈbíl máá Farisaay gaa golmoto, gaalí yieká, đudmit sáláb usiyyo-, him hí ilishká hí gaa iđeká ká eete. 38Aalé ka chimieká Yíésu kí ˈjobonte, mú ˈdaa ˈgas metoká kí ˈdiiyye, imiro ˈjiibiche. Imiro giri Yíésu ˈgas ˈdug ˈdú ˈdaneká meenyle dhúrle ki shugudiche. Min mú ˈgas met ˈduunguanne, mú sáláb giri usiyyoká ˈgas met shugudiche. 39Máá giri Farisaay-, Yíésu kiereká héél argeká geerle ki tawue, kieye, Máállá máá Waag hí ˈdéé ka shigichoká onnônyka, hé minnééllá yaalmitlé he taal-, máálle ađááb ˈgúóllá hé óg, yie.
40Aalé Yíésu máá giri Farisaayká ˈdéé hol ˈdú nie, kieye, Símon, yú ˈdeeny ko ka geđuoká ˈgaa, yie. Aalé Símon kieye, Máá gáál he oonisúóllo, ebá ye ka géesh, yie.
41Aalé Yíésu kieye, Gál naama mare máá gaalí bíre gaa higidhe mare bíre gaa hidhe, mú tikiˈd bíre kúˈd chen mú gaa eedhdhe, máátí mú bíre tomon chen gaa eedhdhe. 42Gáál êw hin hí ka adhateká máá giriká gáál hullaalle êw ki hay. Gál naama kinaallá mááya súm máá hí bíre ki hayká giel? Yíésu hí mú yie. 43Símon Yíésu ˈdéé hol ˈdú nie, kieye, Yúka, máá giri muí ew ilishká ki hayká súm mú giel, yie. Yíésu kieye, Taglé, kó hát ˈdabaanká hote, yie.
44Aalé mu Símon min gíl ki helie, kieye, Kó minnééllá argiyyo? Yú ˈbíl kuallá ka hileká, kuun kó bíé yú ˈgas ˈjiˈjiatká ye ma ka shíiny. Minnééllá íín imirollé ye ˈgas ki ˈjiiyye, in ye meenyle dhúrle ki shugudiche. 45Kuun kó ye aˈdíne ma ˈdúnginy.#7:45 Aˈdíne ˈdunginy he gáál naallé. Tá minnééllá ameeny yú ˈbílallá ka hileká hé ye ˈgas met ˈduunguminy ma hâny. 46Kuun kó ye salab mé ma shugudîny. Minnééllá in ye ˈgas met salab shugudiche. 47Aaléka, yú ko geeye, minnééllá ađaabano guđo-, ˈgayyóóllá hé Waag hí gaa eeyye, in aalé káána gielmit guđoká ˈgayya. Máá ađaab ninniká ˈguo-, kor ađaablé kinaal Waag hí gaa eeyyoká in gielmit ninniká úba ˈgaa.
48Aalé Yíésu min geey, Hé kua ˈdeđew-, eekemeycheká ađaabanolle yáá ko gaa eey, yie. 49Gál mú hol ˈgar golmoteká hol heegete, kieye, Máállá máá máre, máá úba gálaat ađaabano gaa egewal? yie.
50Aalé Yíésu min giriká geey, kieye, Iiy yeen ye iiy chíéllá hé ko riiyye, Waag ki sí, yie.
Currently Selected:
Lúka 7: dsh
Highlight
Share
Copy
Want to have your highlights saved across all your devices? Sign up or sign in
Bible Translation and Literacy
