Lúka 9

Yíésu gállé tomon a naamaká alb fie

1Yíésu gállé tomon a naamaká hol ˈdu gáá vie, mu gáál fargogint gaalí aryáán lulle yé ki ˈdeđuoká ubaa fargogint gaalí basham yiem ki ˈdeđuoká shie. 2Aalé mu gáál alb fie, giri gaal seseen-, fayam Guch Waaˈgiet hogodho-, tá gál basham ˈguoká bibisuoká. 3Mu gáál geey, kieye, Hí seseennoká haí hé mare éen, haí ˈgulo, orgom, ˈguom, bíre úba shúúnan. Tá đafaraam nanam úba haí shúúnan. 4ˈBíl hí hilloká, ál kinaallá ˈdaab hí ény kinaal ma gáá kíinyká taalle gaa yíéđía. 5Gaal har hí rokoˈd ki gogoloká điidheka, ény kinaallá hí gaa kekeennoká ˈgaskícho shére gaa ˈdodhdhíe. Hát kinaallá in hát gaalí he ki ˈdeeneyká gaalí kiimita, yie. 6Aalé gaal sedhe, ˈjien gaa naanadhe, Fayam Midhab Waaˈgietká ˈdiiyime, ˈjien lulle gállé basham ˈgieká bisie.

7Aalé Heróˈde giri kansichká he lullé Yíésu hí eekemeyká maaleká neey, ˈdaa giri gáál ˈdáá tikiˈd kieye, Yuána hé uushich yé gáá ˈdie, 8gáál ˈdáá tikiˈd kieye, Elíya hé gáál yé ˈdu gáá ˈdie, tá gáál ˈdáá tikiˈd kieye, Gál héle Waag hí ˈdéé ka shigicheká mú tikiˈd hé uushich yé gáá ˈdie, gaalí yegieká. 9Heróˈde íín kieye, Yuána mé ha yú gaa mure, tá máá yú fayamle maaléél mááya? yie. Heróˈde ˈgíérích mú ki aargiroká hol gaa ˈgeˈgedhe.

Yíésu gáál shíí chen gololie

10Aalé Yíésu gállé tomon a naama he alb fieká hol ká nadheká he lullé eekemeyká fayamle mú shie. Yíésu gáál gáál gaa eedhdhe, gaal tákámle ˈdaa ény Beđesaida mé nie. 11Gál ilishká mu sienylé Beđesáída sesemeká maaleká mú el gaa veere. Gaal mú hileká muí les iđie, gáál muí Guch Waaˈgiet fayamle shie, gál bím fedeká muí bisie.

12Aadh gaanateká Yíésu gállé tomon a naamaká hí ˈdú sedhe, gaal kieye, Gáál hash, gaal hí eiy kie, hí ˈjien ubaa forim ka ˈjooˈjobká ˈguom ubaa alb iifietká ˈdú ˈgeˈgedho, múún ˈbakate ki gaa ija, gaalí mú yie. 13Yíésu gáál geey, kieye, Itín gáál hé geere shía, yie. Gaal kieye, Nyáá hé níínní nyí ˈgayyaká mán, balashá chen ubaa béé naama tákáma nyí ˈgayya, har múún tuuˈdkúnno ki kie-, ki gálallá lulle ˈguom kí hidhdheka tákáma, gaalí Yíésu yie. 14Gál yááb ál kinaal gaa ijeká tákámle hé shíí chen nyuoro.

Aalé Yíésu lalille geey, kieye, Gáál geeyyíe, gaalí tomon chien chene ká yíéđuo, muí gáál yie. 15Gál láliká hát muí geeyká ˈdie, gálaat alb iiđimie. 16Aalé Yíésu balasha giri chenká ubaa beeny giri naamaká eedhdhe, úr gaa dhaay, Waag ˈgielmít hol ˈdú nie. Mu balashá ubaa béé eiy mumure, gál giri láliká shie, giri gaalí gálaat af fafuoká. 17Aalé gaal lulle gololte, heyie. ˈGuom giri gaalí ˈdú heyie-, ka naate-, gaalí hol ˈdu gáá sisidheká illam tomon tikiˈde a naama koch koch.

Bétiro Yíésu hát Messíyaká kimite

18Kulich tikiˈd Yíésu tákámle Waag viviteká, mú lalille hé mú hol ˈgie. Aalé mu gáál heete, kieye, Gálaat mááya ye yegedhe? yie. 19Gaal mú ˈdéé hol ˈdú nie, kieye, Gáál ˈdáá tikiˈd kúún Yuána giri gálaat bie gim nannieká ko yegedhe. Gáál ˈdáá tikiˈd kúún Elíya ko yegedhe. Gáál ˈdáá tikiˈd kúún gál héle Waag hí ˈdéé ka shigicheká mú tikiˈde uushich yé gáá ˈdie, ko yegedhe, gaalí yie. 20Yíésu gáál heete, kieye, Tá itín mááya hí ye chegedhe? yie. Aalé Bétiro kieye, Kúún he Messíya#9:20 Messíya hélle kieye, Máá Waag hí salab mé ki liiyye-, Waag hí kansím koyyeká. giri Waaˈgietká, yie.

21Aalé Yíésu gáál il gíl gaa helie, gaal hai máádhat hééllá géeny, yie. 22Mu kieye, Iny Máádhat manyjasiny guđoká gon il haí aargiˈda. Gál káruká, ubaa gál guguđo-, suoryoká, tá gállé nyatalaamká haí điidhma, ha gaalí yeese, tá kúlích ki seđeká Waag uushich yé haí gáá ˈdeđicha, Yíésu hí lalille yie.

23Aalé Yíésu gáál lulle geey, kieye, Máádhat ye el gáá verenoká fedoka, hí hol điidho, hí ˈgórlé đarám yaalká aadh lulle ˈgáár ki siisidho, hí ye el gáá veero.#9:23 ˈDeenyééllá hélle kieye, Har máádhat ye el gáá verenoka, hí hol điidho, hí sídhlé ye ˈdú silmuoká bar lúl gíl ká ˈguo, hí ye el gáá veero. 24Máá sídhle tág chichirat-, fedoká sídhle hai baađisia. Tá máá sídhle ˈdaachú ˈdugaka bađisuoká sídhle hai riima. 25Máádhat he les lulle liledhe-, tá Waag điidhe-, sídhle Waag gaa ˈgisateka, mu in hé ˈdúwa-, yé ˈdú ˈdeˈdeenká hé ˈgúo? 26Máá yú ubaa ˈdeenychú ˈdaalle ˈdugaka kern hí ˈgidhoká, yáá Iny Máádhátallá bár édhúmchú ubaa édhúm ˈJaachú, tá gál ˈgasso-, urru-, Waaˈgietká édhúmle kí yiimetká máá kinaallá ˈdaalle ˈdugaka kern úba ha ye ˈgiidha. 27Hé ˈdúwaká yú hí geeye, gál állá ˈgíéllá ˈdáá tikiˈd ˈdaab Guch Waaˈgiet ma árginyká hé ma kufuminy, Yíésu hí gáál yie.

Yíésu bis hí hol gaa suoy

28Aalé Yíésu hé kinaal lulle beete. Ram amú síet chieká mu Bétiro, Yuána, tá Yákob eedhdhe, gúm feˈjie, giri Waag vivisatká. 29Mu Waag viviteká, mú innum bis hí hol gaa suoy, mú đafaraamle súm édh yie, ˈjiimiˈde. 30Toomareka gál naama mare ali ˈgee, mú hol geđia. Gál kinaallá he Móshe ubaa Elíya. 31Gáál édhúm Waaˈgiet hí gaa veere, gaal Yíésu kúfáchlé Yerúsalem ki kufunanká yaalmitle mú hol geey. 32Bétiro ubaa gállé hol ˈgie kinaal ram hí eete, gaal les gaa kieká gaal Yíésu édhúmle ubaa gál naama mú hol a ˈgieká arge.

33Aalé gál giri naamaká Yíésu ˈgas in ka babadheká Bétiro Yíésu geey, kieye, Máá Guđo, hát ke állá gaa ijóóllá hé tág midhab. Ebá kí hí lokoolom seđ kí ˈdisso, lokóól tikiˈd hí lokoolkú cheet, lokóól tikiˈd hí lokool Moshe cheet, lokóól tikiˈd hí lokool Eliya cheet, Bétiro hí Yíésu yie. Bétiro hééllá mé ˈdaa gáá hodheká hé muog.

34Aalé Bétiro hátle ˈdéé af ká ˈgaa, nyáˈdow yé ká ˈdiiyye, gáál buanne. Nyáˈdow gáál buanneká Bétiro ubaa gállé hol ˈgie kinaal súm biiy gaa kiadhe. 35Waag nyáˈdow hurt ˈdéé gáá hote, kieye, Hééllá Iny chia yáálle hí galayká, mú a nee kóo, Waag hí chie. 36Aalé gaal ˈdéé hótal maaleká Yíésu tákámle ali yaal gaalí arge. Gaal hé arge kinaal fayamle lulle shab ki yie. Gaal hé máá níínní bár kinaal úba hééllá geeyká mán.

Yíésu veel aryáán ˈgieká bisie

37Bííy eiy ka biˈdeká gaal gúm gáá leedhe, nyésébích guđoká Yíésu hol met kí ˈdoy. 38Nyésébích kinaal hurtle mú tikiˈd af gaa guđoká ˈdéé ki hodhe, mu kieye, Máá gáál he oonisúóllo, gillo yú ko ki efe, inychú a kí ˈdé, veelchú tákámle hé kinaallá. 39Bá dháash, veel álká aryáán hí kí kiisateka, veel đo kóˈdam hai ˈdaaˈdie. Aryáán haí muotisiche, ˈjíig af oshom hai gáá laalame. Aryáán veel súmo maanyjasicha, hé véel tala yé ma gaa ˈdeˈdeminy. 40Yáá lalikú gil ki efe, giri véel aryáán yé gaa ˈdeđuoká. Kor hé kinaal gaalí fargogintle mán, muí Yíésu yie. 41Aalé Yíésu kieye, It hí iiy yeen mán-, hí tág ma ˈgiinyal! Yú in ˈdáb aake ke hol af yíéđima, tá yú hol gaa tataa? yie. Yíésu đo véel ˈjaalle geey, kieye, Ebá inykú állá kí éeb, mú yie.

42Aalé veel hátlé Yíésu ˈdu gáá yiimieká aryáán đo véel les ki ˈdoyye, véel muotisiche. Yíésu aryáán ki ˈday, aryáán đo véel yé gaa ˈdiiyye, veel đo midhandhe, véel ˈjaalle gíl gaa kaay. 43Gálaat lullé ál kinaal ˈgieká fargogint guđo-, Waaˈgietká a ˈdabe.

Yíésu geđi kúfáchle ˈdeenyle hodhe

Gaal lulle hátle hé Yíésu hí ekeyká a ˈdaˈdabeká Yíésu lalille geey, kieye, 44ˈDeenyééllá hí nee hilo: Iny Máádhat gálaat gíl geer ha gaalí gaa kakaa, muí gáál yie. 45Kor mú lalille ˈdeeny muí hodhéél hé hélle ma kimísan. ˈDeenyéél hélle Waag hí gáál kimisan ká riate. Gaal Yíésu ˈdéé yaalmitle hegesetká kiadhe.

Mááya guđo?

46Gál láliká hol ki falme, kieye, Múún mááya guđo? yie. 47Yíésu hé tawuny gaalí gerka ˈgieká onnoy. Mu veel ninni mare láá kodhdhe, 48gáál geey, kieye, ˈDaa meenychú ˈdugaka, máá veel ninnííllá rokoˈd ki goloká, yaa ye rokoˈd kí gole. Máá ye rokoˈd kí goloká, Máá ye ali gáá kaayká he rokoˈd ki gole. Máá lulkícho hí ˈdú ninniká, máá kinaallá in lulkícho hí ˈdú guđo, gáál yie.

49Yuána mú geey, kieye, Máá Guđo, nyíín nyáá nyí máá gálaat ˈdaa meenykú aryáán yé ki ˈdeđieká argiyye. Tá ˈdaa giri mú ko hol ˈgar ma seseminyká in nyí mú hé kinaal ká riate, yie. 50Yíésu mú geey, kieye, Haí mú hé kinaallá ka rían. Máá ˈdeenykícho ma điinká he máákícho, yie.

Gál Samaria hé Yíésu mé guđáan ma yéen

51Yíésu aflé giri úratí mé nannieká ka ˈjobonteká, mu Yerúsalem sienyle ˈdú guofe. 52Aalé mu gálaat hol met nie. Gaal sedhe, ˈjien Samaria mare ki fame, giri mú met les ˈdiđianká. 53Aalé ˈdaa giri Yíésu Yerúsalem mé nannieká, gál al kinaalloká hé mú mé guđáan ma yéen.#9:53 Gál Samaria ubaa gál Yuuˈdi af kinaal hé hol nebeney. Aalé ˈdaa giri Yíésu he máá Yuuˈdi-, kor ˈjien Yerusalem Yuuˈdiká sesemeká, in gaalí mé guđáan ma yéen. 54Mú lalillé Yuána ubaa Yákob héél argeká kieye, Máá Guđo, ˈjiet nyí he ki muuˈdo-, úr gáá leeto-, gálal af ki shugunatká kó feˈdô? gaalí yie. 55Yíésu gáál bala ˈdú nie, gáál ki lole. [Mu kieye, It hé hí hogotóóllá muog. Yáá Iny Máádhátallá yáá gálaat af ki beesenle ma ˈdu gáá yímen, yú gáál ha ˈdú gáá riebe, muí gáál yie.]#9:55 Gárallá hé warˈgasam hele-, kissoká gaa mán. 56Aalé gaal ál kinaal gaa kie, ény eiy mé nie.

Gál láli yegetká fedoká

57Aalé gaal ˈgíéríchlé he gaa igireká, mú tikiˈd Yíésu geey, kieye, Alb lulle kuun hí seseennoká taalle ello yú ko gaa igira, mú yie. 58Yíésu mú geey, kieye, Mana godollé he gaa ija, hurum hé ényle ˈguo, tá yáá Iny Máádhátallá yáá ál ˈguo-, mé les ˈdú igifuoká mán, mú yie.

59Aalé mu máá éíy taaka geey, kieye, Ye el gáá véer, yie. Máá giriká kieye, Máá Guđo, er ye síé shíish, yú see, ˈjaa chia karsichallá sídhle met esse, mú ˈgodho, yie. 60Yíésu mú geey, kieye, Gál kufeká hash, gállé kufeká hí gaagalio. Kúún íín sí, Guch Waaˈgiet ˈdiiyímo, mú yie.#9:60 Yíésu ˈdeenyléél kálmaréél hélle kieye, He naasan gálaat hé gállé guđo aađaká ˈgayyo-, kúún íín sí, Guch Waaˈgiet ˈdiiyímo, he chie.

61Máá éíy taaka úba mú geey, kieye, El ha yú ko gáá verene, tá er ye síé shíish, yú gálchú a kí ˈdee, gáál nyí hol Waag ki viiyya, yie. 62Yíésu mú geey, kieye, Máá arlóngʼoˈd gíl ká ˈguo-, les guguso-, biiy el gaa dhaˈgasanká, hé Guch Waaˈgiet hol ma ki ˈgîn, yie.

Currently Selected:

Lúka 9: dsh

Highlight

Copy