Matááyo 22
22
Hib gólól een-, máá kansich hí tág koyká
1Yíésu geđi gálaat hát hibiet-, he hol ki ekenyká he onisie, kieye, 2Guch Uratiká yaalmit ki égká he hát máá kansich een inyleka gálaat gólol tág ki koyká he ká taalla. 3Aalé gólol he hí kóony yieká, mu gedelle gál gaalí kiereká ali ˈdú fie, kor gál he kiere kinaal hí gaa điidhe.
4Aaléka, mu geđi gede éíy taaka geey, kieye, Sedhíe, gál gaalí kiereká hatallá geeyyíe, Gólol yáá hí tagano kí koy, yáá aarchú ubaa yier chia gegiyyeká yies, he lulle yáá tagano koy, ka yimedhíe, gololtíe, gáál yiedhíe. 5Kor gál gaalí kiereká hé kiermit gaalí kiereká hol ma héésen, gaal đo hujichaamle met veere, máátí léslé fafaatká bííyle mé nie, máátí shókódíchlé hol gaa mamaduoká hújíchle mé veere. 6Gállé hí gáá ˈgiteká máá kansichká gedellé kinaal ˈgiiliˈgay, gáál manyjasie, gáál yies. 7Aalé máá giri kansichká idhane, yuoyle ali fie, yuoy gál giri mú gedelle yieská beesete, gáál ényle ˈjiet gaa veeˈde.
8Aaléka mu gedellé he hol af ijeká geey, kieye, Golol hé tág ˈdie, kor gál yú kiereká hé ˈdúúw ˈdabe. 9Sedhíe, ˈjien hurt nadhíe, ameeny gál hí argiyyaká geeyyíe, gaal hí gólol ká yimet, yiedhíe, muí gáál yie. 10Aalé gál gédeká kie, ˈjien hurt mé nie, gaal mu mídhab yíekaʼ, mu ˈdéen yíekaʼ he argeká lúl af ká tadhdhe, gólol álle đo gaalí koch yie.
11Aalé máá giri kansichká ál gálaat hí gólol gaa kokoeyká sedhe, giri gáál af kí ˈdeˈdeenká. Mu gáál hurt kí ˈdieká, mu máá đafaraam gálaat hí kúlích eenká gaa fafaatká ma ka fáanká arge. 12Aalé mu máá kinaal geey, kieye, Musó! Kuun gólólallá hát máre álle ká chimie, kor đafaraam kúlích eenká ma ka fáan? yie. Aalé máá kinaal ˈdeeny mú hol ˈdú nannuoká ˈdabe. 13Máá giri kansichká đo gállé gédeká geey, kieye, Máállá gil ubaa ˈgas hiigidháa, mú baaˈd gaa ongʼoˈde-, álle gálaat hí gaa bebeen-, hí kach hol af met gaa ˈginianatíá ki láa, yie, Yíésu hí gáál yie.
14Yíésu hibéél beeteká gáál geey, kieye, Gál ilishká hé Waag hí kieˈde, kor gál muí waaˈdeká hé iraam mánká, gáál yie.
Gúsách gaalí Káísar les ki fafuoká ˈdeenyle gál Farisaay hí Yíésu ˈdú eedhdhe
15Aalé gál Farisaay taak yíé ˈdie, ˈdeeny mú af ki raraat-, mú ˈdú ˈgiiliˈgawká hol af gáá koy. 16Gaal gállé láliká ubaa Heróˈde gállé hí ˈdú ijoká Yíésu ali ˈdú fie, gaal Yíésu geey, kieye, Máá gáál he oonisúóllo! Kuun hát máá hé ˈdúwaká hogodhoká tág nyáá nyí óg, ˈgierim Waaˈgiet hát ˈduwantiká kuuní ˈdiyeenne, kuun kó ˈdeeny gálaat el ma gaa igiriny, gálaat hol eiy ma gaa nanniny. 17Ebá nyí ka géesh, háte dhaayche? Káísar#22:17 Káísar he máá kansich lés Rooma bár kinaal mé ki yielká. ki gibíre ki gugusoká taglée, ebá hé tagle muuniny? gaalí yie.
18Aalé ˈdaa giri Yíésu gáál điđamle ógká, kieye, It hol egeyye-, hí he lúl ógal! Háteka hí ye ka raatéel? 19Ebá bíre gusachiet-, Káísar hí muun gáál gaa gugusatká ye tikiˈd kí helía, yie. Aalé gaal mú bíre tikiˈd ki helie. 20Yíésu gáál heete, kieye, Birééllá gách ubaa hedh hí gaa yaalallá hé mááya? yie. 21Gaal Yíésu ˈdéé hol ˈdú nie, kieye, Hé Kaisar, yie. Aalé Yíésu gáál geey, kieye, Hé Kaisar máállé Káísar shía, hé Waag hí léká Waagle shía, gáál yie.
22Gaal Yíésu ˈdeenyléél maaleká ˈdéé af ˈdabe, đo mú hay, ali gaa sedhe.
Gál Saˈdukaay Yíésu gálaat uushim yé gáá ˈdímle ˈdeenyle heete
23Kúlích tikiˈde kinaallá gál Saˈdukaay giri kieye, Gálaat gál mán yeetká hé sidhamle hí hol ma ˈdú gáá nannaan, uushim yiem ma gáá ˈdeˈdeminy, yegetká Yíésu ˈdéé hót ˈdú gáá eedhdhe. 24Gaal kieye, Máá gáál he oonisúóllo, Móshe kieye, máádhat eedhdhe-, tá hátlé um ma ˈdálinyká mán yieka, mú nyárle hí min kinaallá eet, hí mú um kí ˈdalo, he yie.
25Aaléka, gál yááb hol ki ˈdalidhe mare tiiya. Máá erká min eedhdhe, hátlé ma nyiˈdísinyká mán yie. ˈDaa giri mu um ma ˈdálinyká min mú nyárlé hí elloká kí ˈgisate.#22:25 Gál Yuuˈdi bar kinaalloká nyátálleka, hé ˈdeg nyaaramlé mán yeetká af ma yíéđiminy, ˈdég ˈdeglé he hođite. 26Mú nyárlé kinaal hátlé um ma ˈdálinyká úba mán yie. Máá kinaal nyárlé hí ˈgar yielká min kinaal úba eedhdhe, kor hátlé um ma ˈdálinyká úba mán yie. Yaalmitééllá gaal lullé hol ki ˈdalidhééllá mé gáá ˈjeeˈjeenne, ˈjíig máá ki tiiyaká đig. 27Min íín úba el ˈdaal mán chie. 28Aaléka, ˈdaa giri min gál hol ki ˈdalidhe-, tiiyyáállá lúl hí shuunneká, af giri gál kufeká uushim yiem gáá ˈdeˈdeenká minnééllá gál tiiyyáállá mááya hí le? gaalí yie.
29Aalé Yíésu gáál ˈdéé hol ˈdú nie, kieye, Itín Warˈgat Waaˈgiet ˈdeenyle ubaa Waag fargogintle ˈdaa giri hí muogká in hí hééllá ˈdeeneyche. 30Af giri gálaat uushim yiem gáá ˈdeˈdeenká hé máá níínní egeet-, ubaa gaalí egeetká mán. Af kinaallá gaal hát Waag gállé ˈgasso-, urruká hai yeedhe, gaal hé ma shugunan.
31Itín gálaat uushim yiem gáá ˈdímle ˈdaalleka, it hé Waag hí hoteká Warˈgat Waaˈgiet ma gaa túony? Waag hé kieye, 32Yú he Waag Abiraayam, Waag Yisak, Waag Yakob, ma chéen?#22:32 Yíéˈdími 3:6 Waag gállééllá har úba káána kis kufeka, hé luolmít hí gaa iđo, ˈdaa giri Waag gálle gál kúfach gaa yíéđianká muuniny-, luolmit biiyoká gaa yíéđianká, Yíésu hí gáál yie. 33Nyesebich ˈdeenyéél maaleká, Yíésu he onisinyle af ˈdabe.
Hemurit súm fargogoká
34Gál Farisaay Yíésu hát gál Saˈdukaay a mé ki ˈjie-, maaleká hol shaalle, mú ˈdu gáá kie. 35Aalé gáál máállé súm hemuumurit Waag hí Móshe ka shiicheká óg mare ˈgíérích he Yíésu ki raraatká Yíésu yiete, kieye, 36Máá gáál he oonisúóllo! Hemurit máre súm hemuumurít lulle met iđa? yie.
37Yíésu mú ˈdéé hol ˈdú nie, kieye, Hemurit giri kieye, Máá Guđo Waag kuaká geerkú lulle ki géélneb, hodhinkú lulle ki géélneb, tawunykú lulle ki géélneb,#22:37 Hemuumurít ˈDéé Hótlé 6:5 chieká. 38Hemuritééllá in súm fargogo, hemuumurít lulle met iđa. 39Hemurit ki naamaká ubaa hemurit erkoballá he hol ˈgas ki see. Hemurit ki naamáállá kieye, Máá olkú hát kúún dhúrkú hol gielallá úba géélnebo,#22:39 ˈDeemano Gál Levi 19:18 he chie. 40Hemuumurit naamáállá ííni hemuumurit guđóótíá ubaa hé gál Waag hí ˈdeem ka shigicheká hí huogodheká lúl hí gáá kuonme, Yíésu hí gáál yie.
Hé ˈdaa Messiyaka Yíésu hí gál Farisaay yieteká
41Gál Farisaay hátlé ali ˈgieká Yíésu hí yiete, 42mu kieye, Ebá yú hí heete! Máá Waag hí kansím koyye-, Messíya lééllá he iny mááya? yie. Gaal mú ˈdéé hol ˈdú nie, kieye, Messíya he Iny ˈDawuˈdo,#22:42 Iny ˈDawuˈd hélle kieye, máá ˈbíl íl ˈDawuˈd. gaalí yie. 43Yíésu gáál geey, kieye, Tá háteeye ˈDáwuˈd af giri Hím Naasan Waaˈgiet hí ˈdéé ka shigicheká kieye, Messíya he Máá chia Guđoká, yíel? 44ˈDáwuˈd ˈdaa Messiyaka kieye,
Máá Guđo Waag hé Máá chia Guđoká geey, mu kieye,
ˈDaab gál ko ka kídhká yú ko ˈgas gim ma fíinyká,
ye gíl ˈdaa naanietallá yíéđig,
he mú yie,#22:44 Warˈgat Arram 110:1
ˈDáwuˈd hí yie.
45Aalé ˈDáwuˈd Messíya Máá chia Guđoká in yeedhe háluke, háteeye geđi Messíya hí iny ˈbíl íl ˈDawuˈd cheedhe? Yíésu hí gáál yie. 46Yíésu gáál ˈdeenyéél yieteká, hé máá níínní hí ˈdéé af hol ˈdú nieká mán. Ameeny kinaallá gaal hé máá níínní geđi úba Yíésu yieteká mán.
Currently Selected:
Matááyo 22: dsh
Highlight
Share
Copy
Want to have your highlights saved across all your devices? Sign up or sign in
Bible Translation and Literacy
