Matááyo 27

Yíésu gaalí Bilááto ˈdú eedhdhe

1Aalé bar fuadheká gál guguđo-, suoryoká ubaa gál káruká lulle ˈgíérích he Yíésu ki yegeská hol af gáá maale. 2Gaal Yíésu gil hiigidhe, mú máá Bilááto lé-, lés kinaal mé ki yielká ˈdú eedhdhe.

Yúúˈdas hol ˈdeente, hol yies

3Aalé Yúúˈdas giri Yíésu gál hí oos ˈgieká Yíésu ˈdú eeyká Yíésu ar hí kúfach muˈde-, argeká, đo hol ˈdeente, gál guguđo-, suoryoká ubaa gál káru-, ˈBíl Waaˈgiet gaa ijeká ˈdú sedhe, giri gáál bíre tomon seđe-, gaalí les ki fieká gáál hol ˈdú nannuoká. 4Mu gáál argeká, gáál geey, kieye, Yáá tág hé ˈdeewká ekey, yáá máá hé níínní konf ka ˈguo mánnal kúfach ˈdu gáá eeyallá, gáál yie. Gál guguđo kinaal mú geey, kieye, Hé kinaal meete kínyaa hí gaa ija? Hé kinaallá kúóllé, gaalí mú yie.

5Yúúˈdas đo bíre ˈBíl Waaˈgiet geerlé kinaal ki lay, yíé ˈdie, sedhe, hol más ki yies.

6Aalé gál guguđo-, suoryoká bíre kinaal eedhdhe, kieye, Bíre gaalí kúfách máádhat ka hidhdhééllá ke sanˈdug bire-, ˈBíl Waaˈgietká fieka, nyátálkúnnoka hé tagle muuniny, gaalí hol yie. 7Aalé gaal hol ˈdéé af gáá maaleká bíre eedhdhe, lés máá ibilaam tagano nannuoká hidhdhe, giri lés kinaal gál kidhdho-, kufunanká ki ˈgoˈgodhoká. 8ˈDaa kinaallá ˈdugaka in lés kinaallá hátle káána úba gaalí Lés Fasiet yegedhe. 9Yaalmitééllá in máá Waag hí ˈdeem ká shigiche-, Yeremía léká ˈdeenylé ˈdiiyimeká ˈduway, giri kieye, Gál Yisirayel hím ˈdáb he hol af gáá maale-, mú hidhdhe-, bírelle tomon seđeká hé geđi eedhdhe, 10hé bíre lés máá ibilaam tagano nannuoká hidhdhe. Hééllá in Máá Guđo Waag hí ye kí mure, yú hogodho,#27:9-10 Sakaría 11:12-13 chieká.

Yíésu Bilááto hí heegete

11Aalé Yíésu gaalí Bilááto met ká koy. Bilááto Yíésu heete, kieye, Kúún in he kánsích gál Yuuˈdi? yie. Yíésu mú ˈdéé hol ˈdú nie, kieye, Hát kuuní hogotóóllá, yie. 12Aalé gál guguđo-, suoryoká ubaa gál káruká hé kerka Yíésu ˈdú ˈdeenteká huogodheká Yíésu hé ˈdeeny hol nieká mán.

13Aalé Bilááto Yíésu heete, kieye, Hé burnay-, gaalí ko ˈdú ˈdeente-, gaalí hogodhóóllá in kó maallo? yie. 14Tá Yíésu hé ˈdeenyééllá ˈdéé umut tikiˈd úba hol ma gaa níiny. Aalé Bilááto mú shab yeenléél af ˈdabe.

15Warram lulle ˈjila máá ˈgasso-, urru-, Waaˈgietká hí gáál ˈdug gaa nadheká ali kí ˈdiiyyeka, máá guđo les mé ki yaal kinaal gál gaalí hiigidheká máá gálaat hí fedoká đo gáál hai kí fure. 16Af kinaallá máá gaalí súm óg-, gaalí Baráábas yegie mare hé hiigin gaa ije. 17Aalé nyésébích hol ˈdú tuutume-, ali ˈgieká Bilááto hí heete, mu kieye, Mááya hí feˈde, yú hí kí fuura? He Baráábasso? Ebá he Yíésu gaalí Messíya yegetká? gáál yie. 18Bilááto íín gaal hát Yíésu hinaafle hí faanne-, gaalí mú ˈdu gáá eeyká hé óg.

19Aalé Bilááto hátlé karallé hemuritiká ˈdú ijeká, minle hí máádhat ali ˈdú kaayye, kieye, Máá ˈdúwáállá ˈdeenyle ha hurt híliny. Amadh maallo kisare yú amadheká hé tág ye hawul ˈgeˈgeto, chie.

20Aalé gál guguđo-, suoryoká ubaa gál káruká nyesebich af ˈdú naate, giri gaal Bilááto rogonon-, Baráábas gaalí gáál kí fuuro-, Yíésu íín gaalí yegeská. 21Aalé Bilááto geđi nyesebich heete, kieye, Gál naamáállá mááya hí feˈde, yú hí kí fuura? gáál yie. Gaal kieye, Baráábas! gaalí yie.

22Bilááto gáál heete, kieye, Tá Yíésu gaalí Messíya yegetallá íín háte yú kokoo? muí gáál yie. Gálaat lulle kieye, Mú gaalí ˈgór đarám yaalká ˈdug ˈdú yees! gaalí yie. 23Bilááto gáál heete, kieye, Háteka? Mu meete ˈdeew he ekey? yie. Gaal đo súm kúóˈd ˈdoy, kieye, Mú gaalí ˈgór đarám yaalká ˈdug ˈdú yees! gaalí yie.

24Aalé Bilááto ˈdee hí af kí ˈdabe-, nyesebich íín shalal ˈdisie-, argeká đo bie eedhdhe, nyesebich metle gil gaa ˈjidhdhe, kieye, Máállá ooslé hí chegeseká fásle yáá gil ka mán, itlé hí gil ká ˈgayya, muí gáál yie. 25Gálaat lulle kieye, Taglé! Mú fásle nyíín ubaa um kínyaa nyí gil ká ˈgayya, gaalí yie.

26Bilááto đo gáál Baráábas ki fure. Mu yuoy ˈdéé ki mure, giri gaal Yíésu anakoto gaalí sibilaam met ki higidheká ki tuunoká. Aalé Yíésu gaalí tuneká Bilááto đo Yíésu yuoy gíl gaa kaay, giri yuoy mú ˈgór đarám yaalká ˈdug ˈdú ˈdaraannoká.

Yíésu yuoy hí eesheyche, hí he gaa ˈdeeyche

27Aalé yuoy Bilaato erkob Yíésu ushúm geer ˈdú eete, yuoy lulle Yíésu ki maˈde. 28Yuoy Yíésu đafaraam gaa fuˈde, mú đafar gielle-, búr mare kaayye. 29Gaal shóte híí tág gaa nie, mú mé kaay, mú hóch gasar ki hoy, mú gíl ˈdaa naanietká gaa kaay. Gaal mú met les kurram gaa ˈdoy, mú eeshey, kieye, Kó ˈdúwa-, Kánsích Yuuˈdííllo! yiegie. 30Gaal mú sillam ki tune, mú hóch gíl gaa eedhdhe, mú hóch mé ki tune. 31Aalé yuoy mú eesheny hí gaa đuyyeká, mú đafar búr kaayyeká gaa fuˈde, mú đafaraamle geđi fiiyye, giri mú egeeto-, mú ˈgór đarám yaalká ˈdú ˈdaraannoká.

Yíésu gaalí ˈgór đarám yaalká ˈdú ˈdoy

32Gaal ˈgíéríchlé gaa igireká, gaal máá gaalí Símon yeget-, máá ˈjien Kurene mare hol ˈdu gáá fame. Yuoy ˈgór đarám yaal-, Yíésu hí ˈgieká mú ˈdú moyche, giri muí siidhoká. 33Aalé gaal sedhe, ál gaalí Golgóta yegetká nyuore. Ál Golgota hélle kieye, Ál Me ˈgonte. 34Aalé gaal ˈduuny vinna-, gaalí hímit hol fieká Yíésu shie, Yíésu ˈdúú meeteká ˈdúú điidhe.

35Aalé yuoy Yíésu ˈgór đarám yaalká ˈdú ˈdoyyeká, mú đafaraamle koiy ki ˈdoote, eiy shuunate.#27:35 Warˈgát Arram 22:18 36Yuoy mú lag yíéđiyye, mú ˈdeeyye. 37Yuoy hé gaalí mú ˈdú ˈgiliˈgay-, gaalí ˈgór ˈdug gaa veere-, kieye,hééllá yíésu, kánsích yuuˈdi, chieká, ˈgór đarám yaal-, mú ˈdú ˈdoyyeká mé ˈdug ki ˈdoyye.

38Aalé gál naama gálaat shokodaam gaa ugunme mare úba gaalí ˈguor đarám ˈgieká ˈdug ki ˈdane. Mú tikiˈd gaalí Yíésu gíl ˈdaa naaniet koy, máátí gaalí Yíésu gíl ˈdaa ˈjíbach koy. 39Aalé gál ál kinaal ka nanadheká mú chaachare, met gaa muotie, 40kieye, Kuun he máá hol ˈdabe-, ˈBíl Waaˈgiet ˈgieˈgie-, tá ˈBíl aadh seđ gaa ˈdiˈdiseká muunîny? ˈDaa! Ebá káána har kúún Iny Waaˈgiet kátaka, hol rig, hol ˈgór đarám yaal kinaallá gáá léésish! he mú yiegie. 41Hát tikiˈdéél gál guguđo-, suoryoká ubaa gál gálaat nyatalaam oonisuoká, tá gál káruká úba Yíésu eeshey, 42kieye, Mu gálaat riiríme, tá íín har káána hol má ririana! Héél kín Kánsích gál Yuuˈdi? Ebá mu hé káánallá ˈgór đarám yaalallá gáá leedho! Máállá ká leedheka gon iiy ha ke yeedhe. 43Máállá kieye, Yú Iny Waaˈgieto, he hol yie. Ebá Waag muí ˈdúúw ki onnoyká har mú feˈdoka, hí mú riiyyo, gaalí yie. 44Gál giri gálaat shokodaam gaa ugunme-, gaalí ˈguor ˈdug ki ˈdane-, Yíésu ˈdinnam ˈgie kinaal úba Yíésu chaachare.

Yíésu kúfáchlé

45Aalé aadh ˈgas le kulichká biiy lulle đo chuurayye, ˈjíig aadh ˈgas saal đig. 46Aadh ˈgas saal ka chieká Yíésu af gaa guđoká ki buoy, Éli, Éli, lema sabak-dháni?#27:46 Warˈgat Arram 22:1 yie. Hé kinaallá hélle kieye, Waagchú, Waagchú! Háteka ye haychéel? 47Gál ál kinaal ˈgieká ˈbaal mú af maaleká kieye, Máá giriká Elíya veveme, hol yie.

48Gál kinaal mú tikiˈd hí gaa ˈdodhdhe, ˈgúl gaalí đafar gaa nyuro mare mé ki hidheká ˈduuny bírigká ki tie, úr ki helie, giri Yíésu hí ˈbuˈbusatká. 49Aalé gál muí in ka ˈdodhdheká mú ki ˈday, kieye, Ebá mú hash! Elíya har ká yiimet-, mú ririanka kí ká argo! gaalí yie.

50Aalé Yíésu geđi af gaa guđoká kúóˈd ki ˈdoy, đo sidh hí yé gaa ˈdiiyye.

51Tíkíˈdé kinaal đafar ˈBíl Waaˈgiet-, ˈbíllé geereká af gaa tielká eiy lođuđugul fuate, mé đig, el đig. Les motiyye, nyataabano eiy baabame, 52uushim ˈdáá tikiˈd af hí eiy ˈdie, Waag gállé burnay-, kufeká Waag hí loolnoyche, 53gaal uushim yé gáá ˈdie. Af giri Yíésu uushich yé gáá ˈdieká el ˈdaal gálallá ˈjien Yerusalem hile, gál burnayká hí arge.

54Aalé máá yuoy kúˈd mé ki yiel mare ubaa yuoylé he Yíésu hol ˈgar ˈdeˈdemeká les motinyle ubaa he lullé yiem ká ˈdeˈdeme-, argeká birge, neey, kieye, Hé ˈdúwa, máállá gon he Iny Waaˈgiet, yie.

55Ál kinaallá hé gál ˈdiet burnay-, Yíésu dhaˈgame-, tagéétí ˈgieká hí ˈgie. ˈDeg kinaallá he ˈdeg Yíésu ˈgar ká kiiyye-, mú Galilááya hol gáá eedhdhe-, mú gállé gillo-, onnoyyeká. 56ˈDeg kinaallá ˈdeg hí igiˈdeká he María Magaˈdalaká ubaa María giri Yákob ubaa Yúósef ˈjielléká, tá hele Dhebeˈdaya ˈjiellé.

Yíésu gaalí galie

57Aalé aadh gaanateká, máá ˈjien Arimataya-, kamúrut-, gaalí Yúósef yegetká ká yimie. Mu íínííllá úba máá lali Yiesu. 58Aalé mu Bilááto ˈdú sedhe, Bilááto ruogone, giri Yíésu gónle egeet-, gon gagaluoká. Bilááto đo yuoyle geey, giri gaal Yíésu gónle Yúósef shiguoká. 59Aalé Yúósef Yíésu eedhdhe, mú đafaraam édh-, kaanaká ki ˈdane, 60liish waariet-, káána-, he hol met tág koy-, íín he mán yieka gaalí ki gagalioká mú ki galie. Mu nyátáábá giri ilishká gaalgalsie, liish af gaa koy, đo gale. 61Af kinaallá María Magaˈdalaká ubaa María giri hol ˈgieká ˈguoˈd af tagéétí ki ije.

Yuoy úúshích Yiesu ˈdeeyye

62Aalé bííy éíy taaka ka biˈdeká he Kúlích Hef ˈGisanká. Kúlích kinaallá gál guguđo-, suoryoká ubaa gál Farisaay hol eedhdhe, Bilááto ˈdú sedhe, 63kieye, Máá guđo, he tikiˈd hé nyí táb ká ˈjie, máá giri hódho lé-, Yíésu léká hé urgúa hogodhoká kieye, Yú kufeka, kúlích ki seđeká uushich yé ha gáá ˈdeeme, he yegie. 64Aalé yuoykú géesh, gaalí rám seđééllá mú úúshíchle gaa ˈdeew, mú lalille hai chúúre ka chímen, mú buráany, gálaat géeny, kieye, Mu hé uushich yé gaa ˈdie, chéen. Har uushich gál hí ˈdeˈdeenká manítaka, ónnob! Hodho biiy ello-, yé ka ˈdeˈdeenká hé hodho erká súm ˈdú ˈdeew, gaalí mú yie.

65Bilááto đo gáál geey, kieye, Yuoyééllá hol eedhdhíe, sedhíe, hát hí ógká uushich ˈdée, muí gáál yie. 66Aalé gál guguđo-, suoryóká ubaa gál Farisaayká yuoy hol eedhdhe, sedhe, nyátáábá ˈguoˈd liishká af gaa tielká af yies, gál yuoyóká ál kinaal ki hay, giri gaal uushich ˈdeˈdeenká.

Currently Selected:

Matááyo 27: dsh

Highlight

Copy