Matááyo 8
8
Yíésu máá nyókot ˈguoká bisie
1Yíésu gurmit gáá leedheká nyésébích gálaat ilishká hí el gaa veere. 2Aalé máá nyókot ˈguo mare mú ˈdu gáá yimie, mú ˈgas met les kurram gaa ˈdoy, kieye, Máá Guđo, har feˈdoka, ye faayansichoká kó uˈdo, yie. 3Yíésu đo gíl helie, mú đig yie, mú geey, kieye, Yáá fedo, fayáno, yie. Ál tikiˈde kinaal mú đo nyókot hí yé gaa ˈdiiyye, mu fayandhe. 4Aaléka, Yíésu mú geey, kieye, Hééllá ha máádhat géeny, tá sí, máá suoryoká hol argísish, suor Móshe hí gálaat geey-, máádhat fayandheka máá suoryoká hí ki ˈgaˈgaloká éew, muí ko ki ˈgalo, gálaat kuun hát fayanteká hí argo, mú yie.
Yíésu máá yuoy kúˈd mé ki yiel mare gédéchle bisie
5Yíésu Kafarnáum ki ˈjieká máá yuoy kúˈd mé ki yiel mare hí ˈdu gáá yimie, hí gil ki efe, 6mu kieye, Máá Guđo, gédéchchú lesso he gaa iifa, hé tág kúllaʼ, hé les ma gaa kekeminy, yie. 7Yíésu mú geey, kieye, Yáá ká yiimet, mú ha biisia, yie. 8Máá giri yuoy mé ki yiel kinaal Yíésu geey, kieye, Máá Guđo, yú yáá máá ˈdúwa-, ˈbílle kuun hí higilloká ma ká yaaliny. ˈDéé tákámle hoteka, gédéchchú đo hai bie. 9Yú yáá máá ye ˈdú kansichká ˈguo, yú íín yuoyó mé ki yaalla, he ki mumura. Máá yú sí yeetká, đo hai sedhe, máá yú káde yeetká đo hai ká yimie. Héétí máá chia gedechká yú geey-, Hééllá naʼ, yú yieka, mu đo he hai nie, muí Yíésu yie.
10Yíésu mú ˈdeenyléél af ˈdabe, gál giri hí el gaa igireká geey, kieye, Yú hí hé ˈdúwaká geeye, lés Yisirayel geerle lulle yáá máá iiy yeen guđo hatallóóllá ˈguoká ma gaa árginy! 11Tá yú hí hééllá geeye, gál burnay-, kidhdho-, met hí hol ká eiyyeká ˈdaa baryo ubaa ˈdaa aadho hai gáá keeme, gaal ubaa Abirááyam, Yísak, tá Yákob Guch Waaˈgiet álle ˈgarro hol golmoto. 12Tá gál Yisirayel onnônyka Guch Waaˈgiet lileyká gál gúúđo Waag ál gaa ongʼoˈdeká haí ki lalaanna. Ál kinaallá he ál gálaat hí gaa bebeen-, hí kach hol a met gaa ˈginianká, Yíésu hí gáál yie. 13Aalé Yíésu máá yuoy mé ki yiel kinaal geey, kieye, Énykú hol ˈdú nú, he hí hát iiy chíéllá yeet, yie. Máá giri gedechká tíkíˈdé kinaal đo midhandhe.
Yíésu Bétiro suogle ubaa gál éíy taaka-, burnayká bisie
14Yíésu ˈbíl Betiro ki ˈjieká, Bétiro suoglé les gaa iiyyo-, furs hí ˈgieˈgieká arge. 15Mu đo min gíl chiˈde, min đo furs hí yé gaa ˈdie, les gaa kiiyye, Yíésu gololiche.
16Biiy gelga chieká gálaat gál burnay-, aryáán ˈguoká Yíésu ˈdu gáá eey. Yíésu ˈdéé hótle gáál aryáán yiem ki ˈdeey. Mu gál basham ˈguoká lulle bisie. 17Hé ki af ˈdaˈdabo-, muí ekeyallá he ˈdeeny héle máá Waag hí ˈdeem ka shigiche-, Yisááya hí hodhe-, giri kieye, Mu đalimkúnno eedhdhe, gáál fursam gaa eey,#8:17 Yisááya 53:4 yieká ˈduway.
Gál láli yegetká fedoká
18Yíésu nyesebich ká ilshandhe-, argeká đo lalille geey, giri gaal ílung ˈdaatí yé ki ˈdeˈdeenká. 19Aalé gál gálaat nyatalaam oonisuoká mú tikiˈd Yíésu ˈdu gáá yimie, Yíésu geey, kieye, Máá gálaat he oonisúóllo, yú ello ko gáá verene, alb seseennoká lulle taalle hollo ke hol ˈgaa, yie. 20Aaléka, Yíésu mú geey, kieye, Mana godollé he gaa ija, hurum hé ényle ˈguo, tá yáá Iny Máádhátallá yáá ál ˈguo-, mé les ˈdú igifuoká mán, yie.
21Máá éíy taaka laliká úba Yíésu geey, kieye, Máá Guđo, erkob ye hash, sedhe, ˈjaachú sídhle arga, mú galia, yie. 22Aaléka, Yíésu mú geey, kieye, Ye el gáá véer, gál kufeká hash, gállé kufeká hí gaagalio, yie.
Yíésu huđum ali koy
23Aalé Yíésu kadich hileká lalille hí kadich ˈgar hille. 24Gaal hátle bás hurt see, wááních fargogoká ká kiite, huđum les gaa kie, kadich waawasie, onnônyka hai ˈdiđime. Yíésu íín af kinaallá ramo he gaa iife. 25Gál láliká Yíésu fame, mú kiisie, kieye, Máá Guđo, nyí rig! Ha nyí gaa bebeyye, yie. 26Yíésu gáál ˈdéé hol ˈdú nie, kieye, It iiy yeen hí ninníil! Háteka hí seereyyéel? gáál yie. Mu đo les gaa kie, waanich ubaa huđum ki ˈday, biiy đo ˈgidhiche, ríg chie. 27Mú lalille af gil hí fame, hol heegete, kieye, Máállá máá máre, máá waanich ubaa huđum hí af maalóol? hol yie.
Yíésu gál naama-, aryáán ˈguoká bisie
28Aalé gaal he ílung ˈdaati-, lés Gaˈdaraká ki ˈdieká, gál naama aryáán ˈguo-, uushim ligishamle yé gáá ˈdeˈdeenká arge. Gál naama kinaallá he gál gálaat sierm gaa veere-, ˈgíérích ál kinaal iifoká gálaat naan ká riridhdheká. 29Gaal Yíésu ubaa lalille argeká koˈdam ˈdoy, kieye, Kó Iny Waaˈgietal, meete ke hol ká ˈgaa? Ál kachimíél aleđuđugul hátlé ali ma kí ˈdíinyká nyí maanyjasicha? gaalí yie.
30Inuf kinaallá ˈjobintle golchom ilishká hí gaa ˈdeˈdedhme. 31Aalé aryaan gál kinaal gaa iđeká ˈdéé huogote, Yíésu gil ki efiyye, kieye, Har nyí gálallá yé gaa ˈdeđichoka, nyí hash, nyí golchomééllá hilla, chie. 32Yíésu aryáán geey, kieye, Sedhíe! yie. Aalé aryáán gáál yé gaa ˈdiiyye, golchom giriká hille. Golchom đo gudhdhe, ˈdoˈdodhdhe, sirgit bás ˈdú tielká gáá okoˈde, hol bie ki shuune, gaa beey.
33Gál golchom kinaal ˈdeˈdemeká ˈdoˈdodhdhe, é fame. Gaal he lullé giri il hí argiyyeká ubaa gál aryáán ˈgieká hát bieká huogodhe, gálaat geey. 34Gál eny kinaalloká đo é yiem gáá ˈdie, giri seseen-, Yíésu hol met kí ˈdaraanká. Gaal Yíésu hol met kí ˈdoyká Yíésu gil ki efe, giri muí lésle gaa kekeenká.
Currently Selected:
Matááyo 8: dsh
Highlight
Share
Copy
Want to have your highlights saved across all your devices? Sign up or sign in
Bible Translation and Literacy
