Genesis 30
30
1Pero si Raquel wala makapamata sa kay Jacob, gani nangimon sia sa iya utod, kag nagsiling sia kay Jacob, “Hatagi ako sing mga kabataan, kon indi gani mapatay ako.”
2Si Jacob naakig kay Raquel kag nagsiling, “Indi ako makatal-os sa Dios. Sia ang nagbuot nga indi ka magpamata.”
3Nagsiling si Raquel, “Yari ang akon ulipon nga si Bilha. Huliri sia, agod magbata sia para sa akon. Sa sini nga paagi mangin-iloy ako sang isa ka bata.” 4Gani ginhatag niya ang iya ulipon nga si Bilha sa iya bana, kag ang iya bana nagpakighirop sa iya. 5Si Bilha nagbusong kag nagbata para kay Jacob sing isa ka lalaki. 6Si Raquel nagsiling, “Ang Dios nag-apin sa akon sa iya paghukom. Ginpamatian niya ang akon pangamuyo kag ginhatagan niya ako sing isa ka anak nga lalaki.” Gani ginhingalanan niya sia kay Dan.#30:6 DAN: Ini nga ngalan pareho sang Hebreo nga pulong nga kon sayuron pabor nga paghukom. 7Ang ulipon ni Raquel nga si Bilha nagbusong liwat kag nagbata para kay Jacob sing isa ka lalaki. 8Si Raquel nagsiling, “Nagpakig-away ako sing mabudlay nga pagpakig-away batok sa akon utod nga babayi, kag nagdaog ako.” Gani ginhingalanan niya sia kay Neftali.#30:8 NEFTALI: Ini nga ngalan pareho sang Hebreo nga pulong nga kon sayuron pakig-away.
9Sang pagkatalupangod ni Lea nga nag-untat na sia sa pagpamata, ginpaasawa niya ang iya ulipon nga si Zilpa kay Jacob. 10Dayon si Zilpa nagbata para kay Jacob sing isa ka lalaki. 11Si Lea nagsiling, “Mapalaron ako.” Gani ginhingalanan niya sia kay Gad.#30:11 GAD: Ini nga ngalan sa Hebreo nagakahulogan mapalaron. 12Ang ulipon ni Lea nga si Zilpa nagbata para kay Jacob sing ikaduha nga anak nga lalaki, 13kag si Lea nagsiling, “Daw ano ka malipayon sa akon! Karon ang mga babayi magatawag sa akon nga malipayon.” Gani ginhingalanan niya sia kay Aser.#30:13 ASER: Ini nga ngalan sa Hebreo nagakahulogan malipayon.
14Sang tion sang tig-alani sang trigo, si Ruben nagkadto sa uma kag nakakita sia sing mga mandragora.#30:14 MANDRAGORA: Ini nga tanom ginapatihan nga nagapabata sang baw-as kag ginagamit nga lumay. Nagpanguha sia sini kag gindala niya sa iya iloy nga si Lea. Si Raquel nagsiling kay Lea, “Hatagi man ako sang mandragora sang imo anak.”
15Si Lea nagsabat sa iya, “Indi pa bala tuman nga ginkuha mo ang akon bana? Karon nagatinguha ka pa sa pagkuha sang mandragora sang akon anak?”
Si Raquel nagsiling, “Kon ihatag mo sa akon ang mandragora sang imo anak, sarang ikaw makahulid kay Jacob karon sa gab-i.”
16Sang pag-abot ni Jacob sang hapon halin sa uma, si Lea nagsugata sa iya kag nagsiling, “Dapat ka maghulid sa akon karon nga gab-i, tungod kay nagbayad ako para sa imo sang mga mandragora sang akon anak.” Gani naghulid sia sa iya sadto nga gab-i.
17Ang Dios nagsabat sang pangamuyo ni Lea, kag nagbusong sia, kag nagbata sia sang ikalima nga anak nga lalaki para kay Jacob. 18Si Lea nagsiling, “Ang Dios naghatag sa akon sing padya, tungod kay ginhatag ko ang akon ulipon sa akon bana.” Gani ginhingalanan niya sia kay Isacar.#30:18 ISACAR: Ini nga ngalan kon ihambal daw pareho sang Hebreo nga pulong nga kon sayuron ang tawo ginbaton sa pag-obra kag may padya. 19Si Lea nagbusong liwat kag nagbata sia sing ikan-om nga bata nga lalaki para kay Jacob. 20Nagsiling sia, “Ang Dios naghatag sa akon sing maayo nga regalo. Karon ang akon bana magapasidungog sa akon, tungod kay nagbata ako sa iya sing anom ka lalaki.” Gani ginhingalanan niya sia kay Zabulon.#30:20 ZABULON: Ini nga ngalan pareho sang Hebreo nga pulong nga kon sayuron baton kag regalo. 21Sang ulihi nagbata sia sing anak nga babayi nga iya ginhingalanan kay Dina.
22Karon ang Dios nagdumdom kay Raquel. Ginpamatian niya ang pangamuyo ni Raquel kag ginbuot niya nga makapamata sia. 23Nagbusong sia kag nagbata sing isa ka anak nga lalaki. Nagsiling sia, “Ginkuha sang Dios ang akon kahuloy-an paagi sa paghatag sa akon sang anak nga lalaki. 24Kabay nga ang Ginoo maghatag sa akon sing isa pa ka anak nga lalaki.” Gani ginhingalanan niya sia kay Jose.#30:24 JOSE: Ini nga ngalan pareho sang Hebreo nga pulong nga kon sayuron kabay nga maghatag sia sing isa pakag ginkuha niya.
Ang Kasugtanan ni Jacob kag ni Laban
25Sang matawo na si Jose, si Jacob nagsiling kay Laban, “Tugoti ako sa paglakat, agod makapauli ako sa amon. 26Ihatag sa akon ang akon mga asawa nga akon ginpangalagaran sa imo, kag ang akon mga kabataan, kag malakat ako. Nakahibalo gid ikaw kon daw ano ang akon pagpangalagad sa imo.”
27Si Laban nagsiling sa iya, “Kon mahimo tugoti ako sa paghambal sini: nakatuon ako magpanghimalad kag nakahibalo ako nga ang Ginoo naghatag sa akon sing mga kaayuhan tungod sa imo. 28Isiling lang kon pila ang isuhol ko kag ihatag ko ini sa imo.”
29Si Jacob nagsabat, “Nakahibalo ikaw kon daw ano ang pagpangalagad ko sa imo kag kon daw ano ang pagdamo sang imo mga hayop sa idalom sang akon pagtatap. 30Sang pag-abot ko diutay pa lang ang mga hayop mo, pero karon madamo na gid, kag ang Ginoo naghatag sa imo sing mga kaayuhan bisan diin ako magkadto.#30:30 bisan diin ako magkadto: ukontungod sa akon. Karon dapat na man ako magpaninguha para sa akon kaugalingon nga panimalay.”
31Si Laban nagpamangkot, “Ano bala ang ibayad ko sa imo?”
Si Jacob nagsabat, “Wala ako nagapangayo sing suhol. Magapadayon ako sa pagbantay sang imo mga hayop, kon sugot ikaw sa ginasiling ko: 32tugoti ako sa pagtan-aw sang imo tanan nga mga panong kag sa pagkuha sang tanan nga itom nga kordero#30:32 Ang isa ka dumaan nga pagbadbadtanan nga itom nga kordero; sa Hebreotanan nga may pintukpintok kag ang tanan nga may gurayguray nga kordero, kag ang tanan nga itom nga kordero. kag sang tanan nga kambang kag may pintukpintok nga mga tinday sang kanding. Amo lang ini nga suhol ang luyag ko. 33Sa ulihi mahapos mo mahibal-an kon nagdaya ako sa imo. Kon mag-usisa ka sang akon suhol, kon may kanding ako nga indi kambang ukon wala sang pintukpintok ukon karnero nga indi itom, dayon makasiling ka nga ina kinawatan ko.”
34Si Laban nagsabat, “Sugot ako. Himuon ta ang ginasiling mo.” 35Pero sadto nga adlaw ginpain ni Laban ang lalaki nga mga kanding nga may gurayguray ukon pintukpintok kag ang tanan nga babayi nga mga kanding nga may pintukpintok kag kambang ukon ang may puti. Ginpain man niya ang tanan nga mga karnero nga itom. Ginpaatipan niya ini sa iya mga anak nga lalaki. 36Dayon naglakat sia palayo halin kay Jacob upod sa sining mga panong sa sulod sing tatlo ka adlaw. Si Jacob nag-atipan sang nabilin nga mga panong ni Laban.
37Si Jacob nagkuha sing hilaw nga mga sanga sang alamo, abelyano, kag kastanyo kag ginkuha niya ang iban nga mga panit agod ang mga sanga may gurayguray nga puti. 38Ginbutang niya ini nga mga sanga sa atubangan sang mga panong sa ila ilimnan. Ginbutang niya ini didto tungod kay ang mga hayop nagakastahanay kon mag-inom sila. 39Gani kon magkastahanay ang mga kanding sa atubangan sang mga sanga, nagabata sila sing may mga gurayguray, mga pintukpintok, kag mga kambang.
40Ginpain ni Jacob ang mga karnero sa mga kanding kag ginpaatubang niya sila sa mga guraygurayon kag itom nga mga hayop ni Laban. Sa sini nga paagi nagdamo ang iya mga hayop kag wala niya pag-isimpon ini sa iya ni Laban.
41Kon magpahigal gani ang maayo sing lawas nga mga hayop, ginabutang ni Jacob ang mga sanga sa atubangan nila sa ila ilimnan, agod magkastahanay sila sa tunga sang mga sanga. 42Pero wala niya pag-ibutang ang mga sanga sa atubangan sang maluya nga mga hayop. Gani ang mga maluya iya ni Laban, kag ang mga mabakod iya ni Jacob. 43Sa sini nga paagi nagmanggaranon gid katama si Jacob. Madamo ang iya mga panong nga mga karnero kag mga kanding, mga ulipon, mga kamelyo, kag mga asno.
Currently Selected:
Genesis 30: MBBHIL12
Highlight
Share
Copy
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
