Крар 20

Павел МакӀедандизни Юнандиз фин

1Къалар куьтягь хьайила, Павела, тилмизар кӀватӀна, абурук руьгь кутуна. Абуруз сагърай лагьана, ам МакӀедандиз рекье гьатна. 2Фидай рехъди ада иманияр кӀубанар ийизвай. Юнандиз атайла, 3ада ана пуд варз акъудна. Суьриядиз фидай арада, чувудриз адаз акси яз чӀуру къаст ийиз кӀан хьайила, ада МакӀедандай яна элкъвена хтун кьетӀна. 4Хъфидайла адахъ бериви Пуьран хва УспатӀрус, Саланикдай тир АристӀархни СекӀунд, Дербедай тир Гай, ТӀиматӀей, Асия вилаятдай тир Тирафимни Туьхик галай. 5Абуру, чалай вилик фена, чун Туругьасда вилив хуьзвай. 6Чун ТӀили фарин суварилай кьулухъ ФилипӀрай гимида аваз фена ва вад йикъалай Туругьасда абурук акахьна. Ана чун ирид юкъуз амукьна.

ЭвтӀихал чан хкун

7Гьафтедин сад лагьай юкъуз#20:7 Чувудри гьафтедин сад лагьай югъ гьяд югъ яз гьисабзавай., чун фу атӀуз кӀватӀ хьана. Павела кӀватӀ хьанвайбурухъ галаз ихтилатзавай. Адаз пакад юкъуз хъфиз кӀан хьайивиляй, ихтилатар кьуланфералди давам хьана. 8Чун кӀватӀ хьанвай винел алай кӀвале гзаф чирагъар кузвай. 9ДакӀарда ЭвтӀих лугьудай жегьил гада ацукьнавай. Павел рахазвайла, гада ахварин хиялда гьатзавай. Ахпа, михьиз ахварал фейила, ам пуд лагьай гьавадай аватна. Фена хкажайла, ам кьенваз жагъана. 10Павел кӀаник эвичӀна, жегьил гададин винел ярх хьана, ам къужахда кьуна.

– Архайин хьухь, – лагьана. – Адал чан ала!

11Павел мад кӀвализ хкаж хъхьана. Ада фу атӀуз тӀуьна. Экв жедалди ада суьгьбетар авуна, пакамахъ ам анай хъфена. 12Жегьил гадани саламат яз кӀвализ хкана. И карди виридаз гзаф хвеши авуна.

Туругьасдай Милетдиз

13Гимида аваз чун Асасдиз фена. Ана Павелни чак акахьун лазим тир. Чун ина вичел вил алаз акъвазунин патахъай ада вичи лагьанай, амма адаз вичиз къураматдин рекьяй физ кӀан хьана. 14Асасда ам чи вилик экъечӀна, чи гимидиз акьахна, чун вири Муьтленадиз фена. 15Анай пакагьан юкъуз чун Хигьасдилай алатна фена. Са югъ арадай фейила, чун Самасдиз, мадни са йикъалай Милетдиз агакьна. 16Асия вилаятда геж тахьун патал Павела Эфесда акъваз тавуна фин меслятна. Адаз, агакьиз хьайитӀа, Ярусалимдиз ЯхцӀурни цӀуд лагьай йикъан суварик физ кӀанзавай, гьавиляй адак тадини квай.

Эфесдин агъсакъалрихъ галаз ихтилат

17Эфесдин иманийрин кӀватӀалдин кьиле авайбур атун патал Павела Милетдай инсанар ракъурна. 18Абур атайла, ада абуруз лагьана:

– Асия вилаятдиз атай сифте йикъарилай эгечӀна за ина, куь арада, гьикӀ уьмуьр тухванатӀа, квез чизва. 19Чувудри зи кьилел гъайи еке синагъризни килиг тавуна, за муьтӀуьгъдаказ, вилел нагъв алаз Аллагьдиз къуллугъна. 20Квез хийир гудай са карни за квекай чуьнуьхнач, гьам халкь алай чкайрални, гьам куь кӀвалерани за квез вязер авуна ва чирвилер гана.

21За чувудризни муькуьбуруз абур Аллагьдин рекьел атун ва чи Ребби Исадихъ иман авун лазим тирди малумарзавай. 22Ингье, исятда зун Руьгьдин гуьгъуьнаваз Ярусалимдиз физва, заз ана вуч жедатӀани чизвач. 23Заз анжах чизва хьи, гьар са шегьерда Пак Руьгьди зи кьилел къведай азаб-азиятрикай ва зун къазаматда гьатдайдакай заз виликамаз хабарзава. 24Амма заз жуван уьмуьр са квяйни аквазвач. Заз кӀанзавайди Ребби Иса Месигьди зал Аллагьдин берекетдикай шагьидвал ая лагьана ганвай тапшуругъ кар кьилиз акъудун я.

25Куь арада за Аллагьдин пачагьвиликай малумарнай. Гила заз чизва хьи, квекай садазни мад зун ахквадач. 26ГьакӀ хьайила за квез къе лугьузва: Са вуж ятӀани телеф хьайитӀа, тахсир зиди жедач. 27За квез, са затӀни чуьнуьх тийиз, Аллагьдин вири къастуникай лагьанай. 28Пак Руьгьди Вичи квекай иманийрин суьруьдин чубанар авуна. Жувал ва Аллагьди Вичин Ивидалди кӀватӀай иманийрал вил алаз хьухь, абурув чӀуру крар ийиз тамир.

29Заз чизва хьи, зун инай хъфейла, куь патав пехъи жанавурар къведа, абуру суьруьдиз инсаф ийидач. 30Гьатта куь арадайни тапан несигьатар гудайбур акъатда, абуруз тилмизар чпин рекьел гъиз кӀан жеда. 31ГьакӀ хьайила мукъаят хьухь! За, вилерал нагъв алаз, датӀана пуд йисан къене квез гьар садаз несигьатар гайиди рикӀел хуьх!

32Исятда за куьн Аллагьдал ва Адан берекатдикай лугьузвай Гафунал аманатзава. И Гафунихъ куьн мягькемардай къуват ава, Аллагьди квез, Вичиз талукь виридаз, хиве кьурди гуда. 33Заз гьич садавайни я гимиш, я къизил, я пекер къачуз кӀан хьайиди туш. 34Зи ва зи юлдашрин фу зи жуван гъилерин зегьметдалди гьатнавайди квез чизва. 35Ребби Исадин «Гузвай кас къачузвайдалай бахтлу я» лугьудай гафар датӀана рикӀел хвена, за вири крара ажузбуруз куьмек гана. Гьа икӀ, жуван къуватар гьайиф татана зегьмет чӀугуналди, куьнени гьа икӀ авуна кӀандайди за квез къалурна.

36И гафар лагьана Павела, виридахъ галаз санал метӀер чилиз яна, дуьа авуна. 37Вирида, шехьиз ва ам къужахда кьаз, адаз теменар гузвай. 38Абуруз иллаки «мад квез зун ахквадач» лагьай адан гафари хажалат авунвай. Павел абуру гимидал кьван рекье туна.

Currently Selected:

Крар 20: ЛезПК

Highlight

Copy