Крар 22

Ярусалимдин чувудрин вилик

1– Бубаяр, стхаяр, куьне заз жув хуьн паталай кьве гаф лугьудай ихтияр це, – лагьана Павела.

2Ам чувуд чӀалал рахаз акурла, абур вири михьиз кис хьана. Ада давамарна:

3– Зун чувуд я, зун Киликатда авай ТӀарасда хана. И Ярусалим шегьерда заз тербия гана. Чи бубайрин Къанун Гамалила заз лап хъсандиз чирна. Инал акъвазнавай куьн хьиз, зунни Аллагьдин весияр рикӀивай кьилиз акъудиз алахъна. 4Зун Исадин рекьел атайбур хурук кутаз ва абур рекьидай рекьер жагъуриз хьана. За, итимарни, папарни кьаз, къазаматриз вегьидай. 5Кьилин хахамдивайни Меслягьатдивай а крарин шагьидвал ийиз жеда. За абурувай Шамдиз фин патал стхайриз кхьенвай чарни къачунай. Аниз фейила, вири иманияр кьаз ва Ярусалимдиз хкана абуруз жаза гуз кӀанзавай.

6Физвай рекье, нисинриз хьиз Шамдиз агакьзавайла, садлагьана цаварай атай къати рапрапди зун экуь авуна. 7Зун чилел ярх хьана, заз захъ элкъвена рахазвай са ван хьана: «Шаул! Я Шаул! Вуна Зун вучиз хурук кутазва?» 8«Вун вуж я, я Агъа?» – хабар кьуна за. «Зун вуна хурук кутазвай Назаретдай тир Иса я», – жаваб гана Ада заз.

9Захъ галай юлдашриз экв акунай, амма заз атай ван абуруз атанач. 10За хабар кьуна: «Я Ребби, за вуч авун лазим я?» «Къарагъна Шамдиз алад, – жаваб гана Реббиди, – Аллагьди ваз ая лагьанвай вуна авуна кӀандай крарикай ваз ана лугьуда».

11Аллагьдин баркалладин экуьни зун буьркьуь авуниз килигна, юлдашри гъил кьуна, зун Шамдиз гъана. 12Ана Гьанани лугьудай са кас зи патав атана. Ам Аллагь рикӀел алай, Мусадин Къанундал амалзавай инсан тир, ана авай вири чувудрин арада адаз зурба гьуьрмет авай. 13Зи патав атана, зи вилик акъвазна, ада лагьана: «Шаул стха, ви вилериз экв хтурай!» Зи вилер гьасятда ахъа хъхьана, заз ам акуна.

14«Чи бубайрин Аллагьди вун хкяна, ви гьакъиндай Вичин къаст ваз къалурна, – лагьана ада. – Ваз Гьахъ-Михьиди акуна, ваз Адан Гафар ван хьана, 15вучиз лагьайтӀа акурдакайни ван хьайидакай вавай шагьидди хьиз виридан вилик ихтилат ийиз жеда. 16Вучиз вуна гежарзава? Къарагъ, цик акахьун къачу, жув гунагьрикай михьи авуна, Адан ТӀвар яхъ».

17Элкъвена Ярусалимдиз хтана, за Аллагьдин КӀвале дуьаяр ийидайла, заз зун ахварал алай хьиз хьана. 18Заз Ребби акуна. Ада заз лагьана: «Тадиз Ярусалимдай ахлад, ина авайбуру вуна Закай авур шагьидвал кьабулдач». 19«Я Ребби, – жаваб гана за, – вахъ иман ийизвай вири ксар кьаз, синагугра гатай ва абур къазаматда тваз хьайи кас зун тирди и инсанриз хабар ава. 20Ви шагьид хьайи Истефас кьиникьиз акъудайлани зун гьанал алай, за къван гайибурун пад кьунай. За ам кьейибурун пекер хуьзвай». 21Инал Реббиди лагьана: «Алад, За вун яргъал уьлквейрин халкьарин патав ракъурзава».

Кьушундин кьилевайдан патав

22И гафарал къведалди халкьди Павелаз яб гузвай, амма и гафар лугьунни кумаз, абур гьарайиз эгечӀна:

– Ам дуьньядилай терг ая, адал чан туна виже къведач!

23Абуру гьарайиз, чпин абаяр гадариз, руг хчализ цавуз ахъайдайла, 24кьушундин кьилевайда Павел къеледиз твах лагьана эмирна. Вучиз халкьди адаз икьван гьарайзаватӀа чириз кӀанз ада ам гатана силис твах лагьана. 25Гатун патал Павел кутӀунзавайла, патав акъвазнавай эфсердиз ада лагьана:

– Римдин къанунди гьахъ-дуван тавунвай Римдин ватанэгьли гатадай ихтияр гузвани?

26И гафар ван хьайила, эфсерди фена кьушундин кьилевайдаз лагьана:

– Куьне вуч ийизва? А инсан Римдин ватанэгьли я.

27Павелан патав фена, кьушундин кьилевайда адавай хабар кьуна:

– Лагь кван заз, вун рикӀивайни Римдин ватанэгьли яни?

– Эхь, – лагьана жаваб гана Павела.

28– Римдин ватанэгьли хьун патал за гзаф пул гайиди тир, – лагьана кьушундин кьилевайда.

– Зун Римдин ватанэгьли яз хайиди я, – лагьана жаваб гана Павела.

29Адавай силис кьаз кӀанзавайбур садлагьана кьулухъ хьана. Вичи Римдин ватанэгьли зунжурра турди кьатӀайла, кьушундин кьилевайдакни къалабулух акатна.

30Чувудри адан хиве вуч тахсир твазватӀа, авайвал чирун патал ада пакад юкъуз вири чӀехи хахамар ва Меслягьат кӀватӀун эмирна. Ада Павел азадна ва аниз гъана, гьабурун вилик акъвазарна.

Currently Selected:

Крар 22: ЛезПК

Highlight

Copy