Хьунухь 24
24
Исакьаз паб жагъурун
1Ибрагьим лап агьил яшара авай кьуьзек тир, ва Реббиди вири кӀвалахра адаз хийир-дуьани ийизвай.
2-4Ибрагьима вичин чӀехи лукӀраз – вичин кӀвал ва майишат идара ийизвайдаз – лагьана: «Зи хциз пабвиле чкадин руш, къенанви къачудач, зи уьлкведиз, зи багърийрин кьилив фена ва гьанай Исакьаз паб хкида лагьана, зи ятурдик гъил хкӀурна, Реббидалди, цаварин Аллагьдалди ва чилерин Аллагьдалди, кьин яхъ». 5«Бес рушаз захъ галаз иниз къвез кӀан тахьайтӀа гьикӀ хьурай? – хабар кьуна лукӀра. – За ви хва вун атай уьлкведиз рахкурун лазим жедани?» 6«Гьич садрани! – жаваб гана адаз Ибрагьима. – Зи хва аниз рахкурмир! 7Реббиди, цаварин Аллагьди вичи зун бубадин кӀваляй ва зи ватандай акъудна, захъ галаз ихтилат авурда, и чилер зи несилриз гуда лагьана заз кьин кьурда, – Гьада вичи, вуна зи хциз паб хкун патал, Вичин малаик вилик кваз ракъурда. 8Рушаз вахъ галаз къвез кӀан тахьайтӀа, вун кьунвай кьинекай азад я, амма зи хва аниз рахкурмир!»
9ЛукӀра вичин агъадин ятурдик гъил хкӀурна ва кьин кьуна. 10Ахпа вичин агъадин девейрикай цӀуд деве, адан патай лап хъсан савкьватар къачуна ва Арам-Нагьарайимдиз – Нахара уьмуьр тухузвай шегьердиз, – рекье гьатна.
11Ада вичин девеяр къуйдин патав шегьердин вилик акъвазарай чӀавуз, югъ няни хьанвай, – рушар яд тухуз шегьердай экъечӀдай вахт тир. 12Ибрагьиман лукӀра лагьана: «Ребби, зи агъа Ибрагьиман Аллагь! Къе зи кар туькӀуьрдайвал ая, зи агъадиз жуван регьим ая! 13Ингье зун рушари шегьердай атана яд тухудай къуйдин патав акъвазнава. 14За абурукай садаз лугьуда: „Заз ви кварцяй яд хъвадай ихтияр це“. Ада: „Хъухъ, за гьакӀ ви девейризни яд гуда“, – лагьайтӀа, им вуна ви лукӀ тир Исакьаз ам пабвиле хкянава лагьай чӀал я. Им Вуна зи агъадиз регьим авунин лишан хьуй».
15Ада и гафар лагьана куьтягь тахьанмаз, къуьнел кварни алаз Ибрагьиман стха Нахаранни Милкадин хва Бетуэлан руш Рефикъа атана акъатна. 16Ам гзаф гуьрчегди тир, гьеле руш – итим вуч ятӀа чин тийизвай. Ада, къуй галайвал агъуз эвичӀна, вичин квар ацӀурна. Ам элкъвена хъфидай чӀавуз 17Ибрагьиман лукӀра адан патав зверна ва тӀалабна: «Заз ви кварцяй са тӀимил яд це!»
18«Хъухъ, зи агъа», – жаваб гана ада, ва гьасятда квар къуьнуьхъай галудна, Ибрагьиман лукӀраз яд гана, 19ахпани лагьана: «Исятда за девейризни яд гъида, тухдалди хъурай».
20Ада малариз яд гудай латаз тадиз яд цана, мадни къуй галайнихъ зверна – ва икӀ вири девейри хъвадалди яд гъиз хьана. 21ЛукӀра, кисна, Реббиди вичин рекьиз хийир-дуьа авунвайдахъ чӀалахъ хьунин мураддалди, ам кьил акъудна чирзавай. 22Девеяр цикай тух хьайи чӀавуз ада рушаз нера твадай зур шекъелдин заланвал авай къизилдин сиргъа, цӀуд шекъелдин заланвал авай къизилдин кьве цам гана ва жузуна: 23«Лагь кван, вун нин руш я? Ва ви бубадин кӀвале йиф акъуддай чка жагъидани?» 24«Зун Милкадинни Нахаран хва Бетуэлан руш я», – жаваб гана ада. 25Ва алава хъувуна: «Самар ва гьайванриз гудай ем чаз гзаф ава. Йиф акъуддай чкани жагъида».
26И чӀавуз Ибрагьиман лукӀра, метӀерал аватна Реббидиз икрам авуна, 27лагьана: «Шукур хьурай Реббидиз, зи агъа Ибрагьиман Аллагьдиз, зи агъадиз датӀана регьим ва вафа ийизвай. Реббиди зун чӀугуна зи агъадин стхадин кӀвализ гъана!»
28Рефикъади кӀвализ, дидедин кьилив, чукурна, ва мугьман атуникай хабар гана. 29-30Рефикъадин стха Лабана, вахан сиргъа ва цамар акурла, ва рекьин мугьман адахъ галаз квекай раханатӀа чир хьайила, къуй галайвал тади авуна, Ибрагьиман лукӀран мукьув атана – ам вичин девеярни гваз гилани къуйдин патав акъвазнавай – 31ва лагьана: «Буюр, илиф, Реббидин хийир-дуьадик квайди! За кӀвале гьазурвилерни акуна, девеяр патал чкани туькӀуьрнавайла, вун инал акъвазун квез герек я?»
32Ибрагьиман лукӀ кӀвалив агакьна. Девейрилай пар алуднай, абур патал самарни ем гъанай, мугьмандивни адахъ галайбурув кӀвачер чуьхуьдай яд вуганай. 33Вилик тӀуьнар гъана, амма Ибрагьиман лукӀра лагьана: «Зун иниз вуч мураддалди ракъурнавайди ятӀа ихтилат тавунмаз, зун тӀуьнрив эгечӀдач». «Ая жуван ихтилат», – жаваб ганай адаз.
34Адани вичин рахунар гатӀунна: «Зун Ибрагьиман лукӀ я. 35Реббиди гъилин ачухвилелди зи агъадиз хийир-дуьа авунва ва адаз девлетар ганва: лапагар ва малар, гимиш ва къизил, лукӀар ва къаравушар, девеяр ва ламар. 36Сарради, зи агъадин папа, лап кьуьзуь кьилихъ адаз хва хана, ва зи агъадихъ авай мал-девлет ада вичин хцив вахканва. 37-38Агъади зав, вичин хциз пабвиле чкадин руш, къенанви къачудач, адан багърийрин патав фена ва гьанай адаз паб хкида лагьана, кьин кьаз тунва.
39За иесидивай хабар кьуна: „Бес руш захъ галаз татун хьайитӀа, вуч ийин?“ 40Ада заз жаваб гана: „Реббиди, зи вири уьмуьр Вичин вилик кваз фейида, – Ада Вичи вахъ галаз Вичин малаик ракъуруналди, вуна зи хциз паб зи тухумдай, зи хизандай гъун патал, ви рекьиз хийир-дуьа ийида. 41Амма вун зи багърийрин патав агакьна, ва абуру ваз руш тагайтӀа, вун кьунвай кьинекай азад я“.
42Къенин юкъузни къуйдив агакьайла, за лагьанай: „Я Ребби, зи агъа Ибрагьиман Аллагь, ваз зи рекьиз хийир-дуьа ийиз кӀандатӀа, 43ингье килиг, зун исятда къуйдин къвалав акъвазнава. Инал яд гъиз руш атайла, за адаз лугьуда: ‹Заз ви кварцяй са тӀимил яд це›. 44Ада жаваб гайитӀа: ‹Хъухъ. За гьакӀ ви девейризни яд гъида›, – им лагьай чӀал я хьи, гьа ам Реббиди зи агъадин хциз свас яз хкянава“.
45Зун гьич зи дуьа ийизни агакьнач, акуна хьи, къуьнел кварни алаз Рефикъа яд гъиз къвезва, къуй галайвал эвичӀзава ва кварциз яд кьазва. За адавай яд тӀалабна. 46Ада гьасятда квар къуьнуьхъай галудна ва лагьана: „Хъухъ. За гьакӀ ви девейризни яд гуда“. Зани хъвана, ахпа ада девейризни яд гъана. 47За хабар кьуна: „Вун нин руш я?“ „Нахаранни Милкадин хва Бетуэлан руш“, – жаваб гана ада. И чӀавуз за адаз нера твадай сиргъа ва цамар гана, 48жув лагьайтӀа, метӀерал аватна Реббидиз икрам авуна. Ада зун жуван агъадин хциз пабвиле зи агъадин тухумдай руш къачун патал чӀугуна иниз гъунай за Реббидиз, зи агъа Ибрагьиман Аллагьдиз, шукур авуна. 49Гьа икӀ куьне регьим ва вафа авуна, зун зи агъадив вахкудатӀа, заз авайвал лагь. ИйидачтӀани, заз лагь, заз за вуч авуна кӀандатӀа, чир жедайвал».
50Лабанани Бетуэла жаваб гана: «Им Реббидилай аслу кӀвалах я, чна инал „эхь“ я тушни „ваъ“ лугьун кутугнавач. 51Ингье Рефикъа – ам жувахъ галаз твах. Реббидин къаст кьилиз акъатрай, ва ви агъадин хци ам пабвиле къачурай».
52И гафарин ван хьайи Ибрагьиман лукӀ пел чилив агакьдайвал Реббидиз икрам авуна. 53Ахпа ада Рефикъадиз къизилдин ва гимишдин безекарни парталар ва гьакӀни адан стхадиз ва дидедиз багьа пишкешар акъудна гана. 54Идалай кьулухъ амни адахъ галайбур фу-затӀ тӀуьна ксана, пакамахъ къарагъна Ибрагьиман лукӀра лагьана: «Гила заз жуван агъадин патав хъфидай ихтияр це». 55Рефикъадин стхадини дидеди лагьана: «Ам са цӀуд юкъуз кьванни чи кӀвале амукьрай, ахпа фирай». 56«Зун эглеш ийимир, – лагьана Ибрагьиман лукӀра. – Нагагь Реббиди зи рекьиз хийир-дуьа авунватӀа, заз жуван агъадин кьилив хъфидай ихтияр це!» 57«Чна рушаз эверин, – теклифнай абуру, – вичи гьялрай». 58Абуру Рефикъадиз эверна ва хабар кьуна: «И касдихъ галаз фидани?» Ада лагьана: «Фида». 59И чӀавуз Рефикъадихъ, адаз нек гайи папахъ, Ибрагьиман лукӀрахъ ва адан рекьин юлдашрихъ галаз чара жедайла, 60абуру Рефикъадиз ихьтин гафаралди хийир-дуьа авуна:
«Ви несилрин кьадар, чан вах,
агъзурар хьурай, цӀуд агъзурар!
Ви несилрин вилик ярх хьурай
душмандин варар!»
61Рефикъани адан къаравушар девейрал акьахна ва Ибрагьиман лукӀран гуьгъуьна аваз рекье гьатна. Ам кӀвализ хъфизвай ва Рефикъани вичихъ галаз хутахзавай. 62А чӀавуз Негевда уьмуьр тухузвай Исакь Беэр-Лахай-Руидай анжах хтанвай. 63Няниз дуьа авун патал ам чуьлдиз экъечӀна, килигайтӀа – къвез-къвез мукьвал жезвай девейрин карван акуна. 64Рефикъадизни Исакь акуна. Ада деведилай хкадарна 65ва Ибрагьиман лукӀравай жузуна: «Чи вилик экъечӀнавай кас вуж я?» «Ам зи агъа я», – жаваб гана лукӀра. И чӀавуз Рефикъади шаршав къачуна вичихъ галчукна. 66ЛукӀра вичин сиягьатдикай Исакьаз суьгьбет авурдалай гуьгъуьниз, 67Исакьа Рефикъа вичин диде Саррадин алачухдик тухвана, ва Рефикъадикай адан паб хьана, адаз ам кӀан хьана ва кьенвай дидедихъ ада чӀугвазвай гъам секин хьана.
Currently Selected:
Хьунухь 24: ЛезПК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010-2024
