Хьунухь 31
31
Якьубни адан хизан Лабанакай катун
1Якьубаз Лабанан рухвайри вичикай икӀ лугьузвайди малум хьана: «Якьуба чи бубадивай вири къакъудна! Чи бубадин гьисабдай ада вичин девлетар гъилиз гъана».
2Якьуба гьеле вичини кьатӀанвай хьи, Лабанан патай адаз авай рафтарвални виликанди ваъ, масад я. 3Реббидини Якьубаз лагьана: «Элкъвена мукьва-кьилийрин патав, бубайрин чилел ахлад. Зун вахъ галаз я».
4Якьуба Рахиланни Лиядин гуьгъуьниз, абур ада лапагар хуьзвай чуьлдиз атун патал кас ракъурна, 5ва лагьана: «Заз аквазва хьи, куь бубадин патай заз авай рафтарвал виликанди туш. Амма зи бубадин Аллагь захъ галаз я. 6Квезни чида хьи, за куь бубадиз къуватрин гьайиф татана кӀвалахна, 7ада лагьайтӀа, зун алцурарзавай ва тайинарнавай гьакъи датӀана дегишзавай. Анжах Аллагьди адав заз писвал ийиз тазвачир.
8Куь бубади заз: „Ви гьакъи жуьреба-жуьре рангар квайбур я“, – лагьанайтӀа, вири гьайванар гьа ихьтинбур яз хазвай. Амма „ви гьакъи цӀарубур я“, – лагьанайтӀа – вири гьайванар цӀарубур яз хазвай. 9Гьа икӀ Аллагьди куь бубадин суьруьяр адавай къакъудна зи гъиле вахкана.
10Са гъилера, гьайванар гьалдардай девирда, заз ахварай акуна хьи, цӀегьериз язавай вири кьунар цӀарубур, лекеяр, я тушни тӀвехер квайбур тир. 11„Якьуб!“ – эверна заз ахварай Аллагьдин малаикди. За: „Гьай“, – лагьана жаваб гана, 12ва Ада заз лагьана: „Килиг, цӀегьериз язавай вири кьунар я цӀарубур, я лекеяр, я тӀвехер квайбур я. Вучиз лагьайтӀа Лабана ваз вуч ийизватӀа, Заз вири аквазва. 13Зун вуна, къванцел зейтундин гъери экъична, Заз вяд авур Бет-Элдин Аллагь я.
Гила, къарагъ, экъечӀ и уьлкведай, хайи чилел ахлад“».
14Рахилани Лияди Якьубаз жаваб гана: «Бубадин мал-девлетдик, я тушни ирсиник чи пай квай затӀ амани кьван? 15Ада чун чарабур яз гьисабзава: ада чун маса гана, амма чахъ гайи гьар вуч аватӀани, вичиз кьуна ацукьна. 16АкӀ хьайила, Аллагьди чи бубадивай къакъудай вири мал-девлет чидини чи рухвайринди я. Гьавиляй ваз Аллагьди гьикӀ къалурнаватӀа, гьакӀ кьилизни акъуд».
17Якьуба аяларни папар девейрал ацукьарна, 18гъилиз гъанвай вири девлет кӀватӀна, ва вичи Падан-Арамда маса къачур вири маларни къахчуна Къенандиз, вичин буба Исакьан патав, рекье гьатна. 19Лабан и вахтунда лапагрилай сар тваз фенвай, ва Рахила вичин бубадихъ авай кӀвале эцигдай бутар чуьнуьхна. 20Гьа икӀ Якьуба арамви Лабан алцурна: адаз чуькьни тавуна, 21вичин вири мал-девлетни гваз адан патавай катна хъфена. ВацӀалай элячӀна, Якьуб Гилеаддин дагълар галай патахъ фена.
Якьубанни Лабанан икьрар
22Пуд лагьай юкъуз Лабаназ Якьуб катна хъфена лагьана хабар ганай. 23Лабан вичин мукьвабурни кӀватӀна адан гуьгъуьниз галтугна. Ирид йикъалай ам Гилеаддин дагълара адав агакьна. 24Амма гьа йифиз, ахварай, Аллагьди атана, арамви Лабаназ лагьана:
«Килиг гьа, Якьубаз са чӀуру гаф лугьумир!»
25Лабан Якьубав лап мукьва хьанвай: Якьуб Гилеаддин дагълара акъваз хьанвай ва гьа ина вичин мукьвабурни галаз Лабанни акъвазнавай. 26Лабана Якьубахъ элкъвена икӀ лагьана: «Вуна вуч ийизва? Вуна зун алцурна. Зи рушар, дяведа кьунвай есирар хьиз, вилик кутуна хутахна! 27Вучиз вун зи патавай чинеба хъфена, закай таб авуна ва заз чуькьни авунач? За вун шад манийралди, тафтунинни чуьнгуьрдин авазралди рекье хутадай, 28вуна лагьайтӀа, чара хъижедайла, зав рушаризни хтулриз теменни гуз тунач! Вуна ахмакь кӀвалах авуна.
29Завай квез идай хъсан кар кьаз жедай, амма къенин йифиз куь бубадин Аллагьди заз лагьана: „Килиг гьа, Якьубаз са чӀуру гаф лугьумир!“»
30«Хъсан я, – давамарна Лабана, – вун хайи кӀвалихъ вил хьана зи патавай хъфена. Амма вуна зи аллагьар вучиз чуьнуьхна?» 31«Заз кичӀезвай, – жаваб гана Якьуба Лабаназ, – вуна ви рушар къахчуда лагьана фикирнай. 32Амма ви аллагьар нивай жагъайтӀа, ам чан алаз амукьдач! Чи мукьва-кьилияр шагьидар хьурай: зав вуч гватӀа, вири тупӀалай ая. Види вуч ятӀа – къахчу!» Якьубаз Рахила аллагьар чуьнуьхнавайди чизвачир.
33Лабан Якьубан, Лиядин, кьве къаравушдин алачухра виринриз килигна, амма са затӀни жагъанач. Лиядин алачухдай экъечӀна, ам Рахилан алачухдиз гьахьна. 34Рахила и вахтунда кӀвалин аллагьар къачуна, абур деведиз ядай пурарин къене туна, вични винел ацукьна. Лабан адан алачухдин виринра къекъвена, амма затӀни жагъанач, 35Рахила лагьайтӀа адаз лагьана: «Зи агъадиз, завай вичин вилик къарагъ жезвач лагьана, закай хъел татурай: захъ папарихъ адет яз жедай къайдада кефи авач».
Лабан виринра къекъвена, амма аллагьар жагъанач. 36Гила вичин нубатда Якьубак хъел акатна ва Лабанак тахсир кутаз хьана: «Гила лагь кван, зи батӀулвал, зи гунагь вуч ятӀа, вун зи гуьгъуьниз галтугдайвал? 37Вуна зи вири шейэр гъилелай авуна – де ваз ви вуч анай жагъана? Ша, къалура, зинни ви мукьвабуру чи гьахъ дуван авурай.
38Къад йисуз за ваз къуллугъ авуна. Вири и вахтунда я хипери, я цӀегьери кьерех вегьенач. За ви суьруьдик квай гьерер тӀуьнач. 39Лапагар вагьши гьайванри кукӀварай дуьшуьшар хьанайтӀа, за абур ви вилик хканач, амма зарар жува, вуна тӀалабайвал, эвезна. Юкъуз хьайитӀани, йифиз хьайитӀани хкатунар хьайитӀа – ваз завай кӀан хьана. 40Юкъуз заз зегьемди азаб гана, йифиз – мекьивили. Гзаф вахтара завай гьич вил акьализ хьанач. 41Къад йисуз зун ви къуллугъда хьана. ЦӀукьуд йисуз за ваз ви рушарихъ кӀвалахна, ругуд йисуз – мал-къара патал, вуна лагьайтӀа, тайинарнавай гьакъи датӀана дегишиз хьана. 42Зи бубадин Аллагь – Ибрагьиман Аллагь ва Исакьан КичӀевал – захъ галаз туширтӀа – вуна зун затӀни гвачиз рахкурдай. Амма Аллагьдиз зи азият ва зи зегьметар аквазва: и йифиз Ам Вич зи тереф хуьз экъечӀна!»
43Лабана Якьубаз жаваб гана: «Бес ибур зи рушар, зи хтулар, зи малар тушни? Ваз инал аквазвай вири затӀар – зибур тушни? За зи рушарин хатур хадани кьван? Я тушни хтулрин?
44Ша икьрар кутӀунин, ва чахъ шагьид хьурай».
45И чӀавуз Якьуба са чӀехи къван, гуьмбет хьиз къяна акъвазарна 46ва вичин муькьвабуруз лагьана: «Къванер кӀватӀа».
Абуру къванерикай са зурба кӀунтӀ арадал гъана ва адан патав тӀуьн-хъун гьазурна. 47Лабана и кӀунтӀаз Ягар-Сагьадута#31:47 Ягар-Сагьадута – арам чӀалалди «чун рикӀел хкизвай къванерин тепе». тӀвар гана, Якьуба – Галед#31:47 Галед – чувуд чӀалалди «чун рикӀел хкизвай къванерин тепе». тӀвар эцигна. 48Лабана лагьана: «И кӀунтӀ – чи арада авай икьрардин шагьид хьурай».
Гьавиляй и чкадиз Галедни лугьузва. 49Идахъ галаз сад хьиз – Мицпани#31:49 Мицпа – чувуд чӀалалди «къаравулдин чка»., вучиз лагьайтӀа Лабана алава авуна: «Чун сад садан вилерикай къакъатай чӀавуз, Ребби чун кьведни кьил акъудна чириз килиграй. 50Вуна зи рушарин хатур хаз хьайитӀа, я тушни абурулай гъейри жуваз маса папар къачуз хьайитӀа, рикӀел хуьх: чи шагьид инсан ваъ, Аллагь я!»
51«Килиг, – лагьана Лабана Якьубаз, – и къванерин кӀунтӀ ва за абурун арада эцигнавай и гуьмбетдин къван, – 52ибур чи икьрардин шагьидар я. Зун рикӀе чӀуру ният аваз кӀунтӀалай ви патахъ элячӀдач, ва вунни чӀуру ният гваз кӀунтӀалай ва къванцелай зун галай патахъ элячӀмир. 53Чи бубайрин – Ибрагьиман ва Нахаран Аллагьди чун кьет авурай».
Якьуба вичин бубадин КичӀевилел кьин кьуна. 54Ахпа Якьуба Дагъдал къурбандар авуна ва мукьвабуруз фу-яд теклифна. Фу тӀуьрдалай кьулухъ абур дагъда йиф акъудиз амукьна. 55Пакамахъ Лабана хтулриз ва рушариз теменар гана, абуруз хийир-дуьа авуна ва элкъвена вичин кӀвал галай патахъ рекье гьат хъувуна.
Currently Selected:
Хьунухь 31: ЛезПК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010-2024
