Хьунухь 33
33
Якьубанни Эсаван туьхкӀуьн
1Кьил хкажна, Якъубаз акуна: адан къаншардай Эсав къвезва, ва адахъ кьуд виш касни гала. Якьуба Лиядин, Рахилан, кьве кьевцӀин аялриз чпин дидейрин патав кьилди акъвазун эмир авуна. 2Ада абур и тегьерда акъвазарна: вилик – чпин аяларни галаз кьевер, абурун гуьгъуьнай – вичин аяларни галаз Лия, абурун гуьгъуьнай – Рахилни Юсуф. 3Якьуб вич вилик экъечӀна ва стхадиз мукьув жедалди, ирид гъилера пел чилив агакьдайвал икрам авуна. 4Амма Эсава тадиз адан вилик зверна, гардан кьуна хурув чуькьвена темен гана – ва кьведни шехьна.
5Папарни аялар акурла, Эсава хабар кьуна: «Бес ибур ви вужар я?» «Ибур Аллагьди ви лукӀраз багъишай аялар я», – жаваб гана Якьуба.
6Кьевери чпин аяларни галаз атана Эсаваз икрам авуна, 7ахпа вичин аяларни галаз атана Лияди икрам авуна, ахпани Юсуфани Рахила.
8«Зал рекье гьалтай а суьруьяр вучтинбур я?» – хабар кьуна Эсава. «Ам ви вилерай заз майил хьун патал я, зи агъа», – жаваб гана Якьуба. 9«Захъ авачир са затӀни авач, стха, – лагьана Эсава. – Ви девлет жуваз тур». 10«Ваъ, – жаваб гана Якьуба, – ви вилерай заз майил аватӀа, зи савкьватар кьабула! Вун акун зун патал чин-чинал Аллагь акурдай я, вунани заз еке регьим авунва. 11Кьабула зи нуьсретар. Аллагьди заз вири булдалди ганва, заз вири авазва». Якьуба Эсав минетралди рекьив гъана, ва адани савкьватар кьабулуниз разивал гана.
12«Рекьиз экъечӀин, – лагьана Эсава Якьубаз. – Зун вахъ галаз фида». 13Амма Якьуба жаваб гана: «Ваз чида хьи, зи агъа, аялар гьикьван зайифбур жедатӀа. Зи лапагарни къарамалар ацазвайбур я: абур гьалайтӀа, вири лапагар са юкъуз гиликьда. 14Вун, зи агъа, вилик акатна фенайтӀа, хъсан жедай, зунни, ви лукӀ, яваш-яваш гуьгъуьна аваз къведа – маларин ва аялрин еришда аваз, ви патав, зи агъадин патав Сеирдив, агакьдалди».
15«Ша за зи инсанрин са пай вахъ галаз тан», – теклиф авуна Эсава. Амма Якьуба жаваб гана: «Квез герек я? Зи агъа, ви вилерай заз майил хьунни бес я».
16Гьа и юкъуз Эсав элкъвена Сеирдиз хъфена, 17амма Якьуб Сукат#33:17 Сукат – чувуд чӀалалди «чардахар». галайвал фена. Анани ада вичиз кӀвалер эцигна, малар патални чардахар туькӀуьрна. Гьавиляй и чкадиз Сукатни лугьузва.
Якьуба Шехемдин патарив пун кутун
18Падан-Арамдай хтай Якьуб Къенанда авай Шехем шегьердив сагъ-саламатдиз агакьна ва адан мукьув акъвазна. 19Вич акъваздай чил ада Шехеман буба Гьамуран рухвайривай виш кеситӀдихъ маса къачуна. 20Ана ада къурбанган туькӀуьрна ва адаз Эл-Элохе-Исраил#33:20 Эл-Элохе-Исраил – чувуд чӀалалди «Аллагь, Исраилдин Аллагь». тӀвар гана.
Currently Selected:
Хьунухь 33: ЛезПК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010-2024
