Хьунухь 42
42
1Мисрида техил авайди чир хьайила, Якьуба вичин рухвайриз лагьана: «Куьн сад садаз килигиз вучиз акъвазнава?» 2Ва давамарна: «Мисрида техил авалда. Аниз алад ва чун чан алаз амукьун патал, кашал атана рекьин тавун патал техил маса къачу».
3Юсуфан цӀуд стхани техил маса къачун патал Мисридиз рекье гьатна. 4Анжах Бунъямин, Юсуфан гъвечӀи стха, Якьуба вичин патавай къакъуднач: адан кьилел са бедбахтвал татун патал.
5Исраилан рухваяр Мисридиз техил къачуз атана кӀватӀ хьанвайбурун арадиз аватна – каш себеб яз вири Къенанди азаб чӀугвазвай эхир! 6Абур атанвай уьлкведин гьаким Юсуф тир – вири халкьдиз техил маса гунин кӀвалахарни гьадан гъиле авай. Стхайри, атана пел чилив агакьдайвал адаз икрам авуна. 7Ам абуруз килигна ва чир хъхьана, амма вич чарадай кьуна ва атӀугъай сесиналди абурувай хабар кьуна: «Гьинай атанвайбур я?» «Къенандай, техил къачуз», – жаваб гана абуру.
8Юсуфаз вичин стхаяр чир хьана, амма абуруз ам чир хъхьанвачир кьван!
9Вичиз абурукай акур ахварар рикӀел хтана ва Юсуфа икӀ лагьана: «Куьн жасусар я. Чи чилин зайиф терефар чир авун патал атанвайбур я». 10«Ваъ, агъа! – жаваб гана абуру, – чун, ви лукӀар, техил къачуз атанвайбур я. 11Чун вири стхаяр я, са бубадин веледар я, чун къени инсанар я! Чакай, ви лукӀарикай, гьич са чӀавузни жасусар хьайиди туш!»
12«Ваъ, – лагьана Юсуфа, – куьн чи чилин зайиф терефар кьил акъудна чирун патал атанвайбур я». 13«Чун, ви лукӀар, цӀикьвед стха ава, – жаваб гана абуру. – Чун вири са бубадин веледар я, Къенандай я. ГъвечӀиди алай вахтунда бубадин патав гва. Сад чавай къакъатнава».
14«Ингье килиг, – лагьана Юсуфа, – за лагьанай эхир: куьн жасусар я. 15Амма чна квяй кьил акъудда. Фиръавандин уьмуьрдал кьин хьуй хьи, куь гъвечӀи стха иниз къведалди, куьн инай ахъайдач. 16Квекай сад адан гуьгъуьниз ракъура, амайбур гьелелиг къазаматда жеда. Ингье и чӀавуз куь гафар керчекбур ятӀа аквада. ТуштӀа – им куьн жасусар я лагьай чӀал я. Фиръавандин уьмуьрдал кьин хьурай!» 17Юсуфа абур пуд юкъуз къазаматда туна.
18Пуд лагьай юкъуз ада абуруз лагьана: «За лагьайвал авуртӀа – куьн чан алаз амукьда, вучиз лагьайтӀа заз Аллагьдихъай кичӀе я. 19Куьн якъин михьи инсанар ятӀа, квекай сад къазаматда амукьрай, муькуьбуру чпин кӀвалера гишила амай хизанар патал ризкьи хутахрай, 20ва зи патав гъвечӀи стхани галаз хтурай. Куь гафар тестикь хьайитӀа, куьн чан алаз амукьда».
Абур муьтӀуьгъ хьана.
21«Им чаз стхадин вилик авур тахсирдай жаза я! – лугьузвай абуру чпин арада. – Чаз адан дерт акунай эхир, амма гьикьван минетар авунайтӀани, чаз адан ван хьаначир. Ингье гила чавни дерт агакьна».
22Рувена алава хъувуна: «Бес за квез лагьаначирни: „Гададиз писвал ийимир“? Амма куьне яб ганачир. Гила чна а ивидин гьакъи вахкузва».
23Стхайриз Юсуф абурун рахунрин гъавурда акьазвайди чизвачир, – Юсуф абурухъ галаз арада таржума ийидайди аваз рахазвай эхир. 24Юсуфни са патахъ къекъечӀна шехьна. Ахпа хтана, мад абурухъ галаз рахана, ахпани Шимун хкяна ва стхайрин вилик ам кутӀунун эмир авуна.
25Ахпа абурун шешелар техилдив ацӀурун, гьардан шешелда вичин гимиш хтун ва рекье недай суьрсет гун патал эмир авуна. Гьа икӀ кьилизни акъуднай. 26Стхайри техил ламарал эхцигна ва рекьиз экъечӀна.
27Йифиз ял ядай чкадал абурукай сада ламраз ем гун патал шешелдин сив ахъайна, ва адаз вичин гимиш акуна – ингье ам, винел ала! 28«Зи гимиш мад зав гва! – лагьана ада стхайриз. – Килиг, шешелдин винелай ала». Абурун рикӀ аватна. Зурзун акатна, абуру сада садавай хабар кьаз хьана: «Им вуч я, Аллагьди чаз ийизвайди?»
29Къенандиз бубадин кьилив хтайла, стхайри адаз чпин кьилел атай кьван агьвалатрикай галай-галайвал ахъайна.
30«А уьлкведа гьакимвал ийизвай кас чахъ галаз атӀугъай къайдада рахана ва жасусар яз гьисабна. 31-32Чна чун михьи инсанар тирди, жасусар туширди, чун цӀикьвед стха авайди, вири са бубадин веледар тирди, са стха чавай къакъатайди, гъвечӀиди исятда Къенанда бубадихъ галаз кӀвале амайди лагьанай. 33Амма ада, Мисридин агъади, чаз лагьана: „За куьне ийизвай ихтилатар керчекбур ятӀа кьил акъудна чирда: квекай сад ина кьада, муькуьбуру чпин кӀвалера гишила амай хизанар патал ризкьи хутахрай, 34ва зи патав гъвечӀи стхани галаз хтурай.
Гьа чӀавуз куьн жасусар туширди – михьи инсанар тирди зун чӀалахъ жеда – ва гьам куь стха квев вахгуда, гьамни квез чи вири сергьятра кӀандайвал къекъведай ихтияр гуда“».
35Абуру шешелрай шейэр акъудиз гатӀунна, ва гьар садан шешелда гимиш авай кисе аваз жагъана. И кар акурла, гьам стхаяр, гьамни буба серсер хьана амукьна. 36«Куьне завай сад садан гуьгъуьнал алаз рухваяр къакъудзава, – лагьана абуруз Якьуба. – Юсуф амач. Шимун амач. Бунъямин къахчузва. Вири бедбахтвилер са зи кьилел къвезва!»
37Рувена бубадиз жаваб гана: «Зи кьве хва яна йикь, за Бунъямин ваз элкъвена хкун тавуртӀа. Ам зал ихтибар ая – за ам хкида».
38«Ваъ, – лагьана Якьуба, – фидач квехъ галаз зи хва. Адан стха кьенва, Бунъямин захъ амай сад я. Рекье адан кьилел са бедбахтвал атайтӀа вуч ийида? Куьн себеб яз зун, рехи кьуьзек, гъамуни агъа дуьньядиз авудда!»
Currently Selected:
Хьунухь 42: ЛезПК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2010-2024
