Johana 13

Jeso unaaonyesa ahumwae menzwaye

1Pʼasaka yakala kʼayidzangwe kwanza, na Jeso wakala unamanya kare kukala, ukatiwe wa kuuka duniani kuuya kwa Baba Mulungu, wakala ufika, na atʼue okala nao phapha duniani waahenza hata musindikizo. 2Dziloni yiyo, Jeso na ahumwae ákala asegere anatariza chilaliro. Shetani wakala udzimutiya kare Juda, mwana wa Simoni Isikariyoti, maazo ga kumuguza Jeso. 3Jeso wakala unamanya vivyo kukala, Baba Mulungu wakala udzimupʼa widimi dzulu ya chila chitʼu. Na chisha, wakala unamanya vivyo kukala, walaa kwa Mulungu, na vino wakala unauya kwa yiye Mulungu.

4Ndo Jeso waunuka, achivula valore achiriika kʼanda, achihwala mukumbuuwe achidzifunga chununi. 5Chisha, achitiya madzi kʼaraini, achanza kwaogesa anafunzie magulu, na kwahakusa na uo mukumbuu okala udzidzifunga. 6Ndo achimufikira Simoni Pʼetero, ela Pʼetero yiye achimwamba, “Aa! Bwana, unahenza unogese magulu mimi?” 7Jeso achimuudzidza achimwamba, “Kʼumanya chicho nichihendacho vivi, ela hurira tu uwe undakudzachimanya.” 8Pʼetero achimwamba, “Aa! Bwana, bee kʼundanogesa kamare magulu gangu.” Jeso achimwamba vivi, “Bee nawe nitsʼiphokogesa, kʼuna ushirika na mimi.” 9Simoni Pʼetero achimwamba, “Bwana hʼaya bee chikala ni vivyo, utsʼiniogese magulu hicheye tu, ela niogesa mikono, na hata chitswa changu nacho!” 10Phapho Jeso achimwamba, “Mutʼu yedzoga kare, kʼatakiya koga kahiri hata niaoge magulu tu, mana, mwiriwe wosi utsuka. Na mwimwi mudzitsuka, hata ni tsʼimwi mosi tu.” 11(Jeso wakala unamumanya kare yekala undamuguza. Gago ndigotuma hata achiamba, “Mwimwi mudzitsuka, hata ni tsʼimwi mosi tu.”)

12 # Luk 22:27 Ariphomarigiza kwaogesa magulu, wahwala valore achivala kahiri, chisha achisagala, na achiauza vivi, “Munagamanya gano godzimuhendera? 13Mwimwi munaniiha Mwalimu na Bwana, na mu ahaki, mana, vivyo ndivyo nirivyo. 14Ndo mimi Bwana wenu na Mwalimu wenu, nidzimogesa magulu phapha, na mwimwi namwi bee nimogesane magulu dza vivyo. 15Gaga godzigahenda ni mufano nidzimupʼa kwa hata namwi muhende dza vivi vyodzimuhendera. 16#Mat 10:24; Luk 6:40; Joh 15:20Ninamwambira jeri-jeri, mugulwa muhumiki tsʼiye mubomu kuchira tajiriwe, na ahumwaye tsʼiye mubomu kuchira yiye amuhumaye. 17Baha mwimwi muchikala mundagahenda maneno gago, mana, mudziima munagamanya vivi.”

Jeso unasema chimbere kukala undaguzwa

(Matayo 26:20-25; Mariko 14:17-21; Luka 22:21-23)

18 # Zab 41:9 Jeso waenderera kugomba achiamba, “Gago godzigagomba, kʼaga dzulu yenu mwimwi mosi. Mino ninamumanya mosi mwimwi omutsagula. Ela náhenda vivyo kwa kuchimiza Andiko ra Mulungu rambaro, ‘Yiye ariyearya leu nami, udzinigaluka.’ 19Mino gago nidzimwambira chimbere gachikala kʼagadzangwe hata kulairira, kwa hata phondalairira mwidime kukuluphira kukala, mimi ndimi yiye Kʼirisito. 20#Mat 10:40; Mar 9:37; Luk 9:48; 10:16Ninamwambira jeri-jeri, amupigaye karibu yeyosi nimuhumaye, bee unanipiga karibu hata mimi nami, na anipigaye karibu mimi, bee unamupiga karibu hata yuyatʼu yenihuma.”

21Ariphomarigiza kugomba gago, Jeso wayugika muno rohoni, hata phapho achisema kukala, “Ninamwambira jeri-jeri, mumwenga wenu bee undaniguza.” 22Ahumwae achilolana, ela kʼaamumanyire yekala unamuhadza. 23Muhumwawe mumwenga yekala unamuhenza muno wakala usegere kutuwirizana naye. 24Ndo Simoni Pʼetero achimufinyira dzitso muhumwa yiye kumwamba, “Muuze yiye mwalimu phapho ni ani yendamuguza.” 25Ndo yiye muhumwa achimuvumbamira Jeso, achimuuzira phapho sikironi vivi, “Bwana, yendahenda gago ni ani?” 26Jeso achiudzidza achiamba, “Yendamupʼa chichi chisiku cha mukahe chondachitsʼatsʼa mutsuzini, ndiye.” Ndo achichitsʼatsʼa mutsuzini, na achimupʼa Juda, mwana wa Simoni Isikariyoti. 27Juda ariphochiphokera chisiku chicho, achiphenywa ni Shetani. Ndo Jeso achimwamba, “Riro ririro undarihenda, bee rihende maruru!” 28Ela kʼaphana hata mumwenga wa aratʼu okala asegere phapho yemanya kwadze Jeso wamwamba vivyo. 29Kwahivira Juda wakala ni mwiki wa kasanduku ka pʼesa, anjine ao áona kukala, wakala udzimwamba akagule miyo yokala yinahenzwa phapho tsʼikukʼuuni, hebu akalavye chochosi kwa achiya.

30Ndo Juda ariphochirya chicho chisiku cha mukahe tu, achilaa konze kare, na hata kwakala ni usiku.

Jeso unasema chimbere kukala Pʼetero undamutina

(Matayo 26:31-35; Mariko 14:27-31; Luka 22:31-34)

31Juda aripholaa, Jeso waamba, “Vivi ubomu wangu mimi Mutʼu yelaa dzulu unangʼazwa, na mimi nami ninangʼaza kukala, Mulungu ni mubomu. 32Na nichingʼaza kukala, Mulungu ni mubomu, Mulungu naye undangʼaza ubomu wangu nirio ninao mimi, na gago undagahenda sambi yenye.

33 # Joh 7:34 “Anangu, nicheri na mwimwi kwa ukati uchache tu. Uo uchisira mwimwi mundanitsakula, ela vivi ninamwambira dza vyoaambira Ayahudi kukala, ‘Nendako mwimwi kʼamwidima kudza.’ 34#Joh 15:12, 17; 1 Joh 3:23; 2 Joh 1:5Anangu, ninamupʼa lagizo iphya, naro ni kwamba, mwimwi henzanani. Na henzanani dza nirivyomuhenza mimi. 35Muchihenzana, atʼu osi andamanya kukala, mwimwi mu anafunzi angu.”

36Simoni Pʼetero achimuuza vivi, “Kwani wendaphi Bwana uwe?” Jeso achiudzidza achiamba, “Nendako kʼwidima kunituwa vivi, ela undanituwa chidzakoche.” 37Pʼetero achimwamba, “Bwana, kwadze tsʼiidima kukutuwa vino? Mimi ni kwete hata kufa kwa dzuluyo!” 38Jeso achimuudzidza achimwamba, “Uwe u kwete jeri hata kufa kwa dzulu yangu? Ninakwambira jeri-jeri, usiku wa rero jogolo kʼarindaika, photsʼipho uwe kukala udzinitina kʼano tʼahu!”

Currently Selected:

Johana 13: CHIDUR

Highlight

Copy