Johana 7

Jeso na nduguze a chilume

1Gariphochira gago, Jeso waenenda kuzunguluka mumo jimbo ra Galilaya. Yiye kʼahenzere kwenda jimbo ra Judea kwakukala, vilongozi a Ayahudi kuko ákala anamutsakula kwa amuulage. 2#Alaw 23:34; Kʼumb 16:13Ela tsʼikukʼuu ya Ayahudi ya kulala miwekani yiriphokala yifika phephi, 3nduguze Jeso a chilume ámwamba vivi, “Uwe unawirya wuke phapha wende jimbo ra Judea, kwa hata anafunzio kuko akaone kazizo uzihendazo. 4Maana, mutʼu achikala unahenza amanyikane kʼahenda utʼu chisirisiri. Ndo kwahivira uwe unaidima kuhenda maneno gaga, dzilavye kwa atʼu a dunia akagaone.” 5(Ao ágomba vivyo, mana, hata o nduguze nao ákala kʼaamukuluphira vivyo!)

6Ela Jeso yiye achiaamba, “Ukati wangu opangirwa ni Mulungu kʼaudzangwe kufika. Ela mwimwi ukati wosi kwenu u sawa. 7Atʼu a dunia kʼaaidima kumumena mwimwi, ela mino ananimena, mana, ninaambira kukala, mahendo gao ni mai. 8Kwa vivyo, mwimwi endani kuko tsʼikukʼuuni. Ela mino vivi tsʼimi mucharo, mana, ukati wangu opangirwa ni Mulungu kʼaudzangwe kufikatʼo.”

9Jeso ariphogomba vivyo, ao nduguze a chilume áanza charo chao cha kwenda tsʼikukʼuuni, naye achisala ko Galilaya. 10Ela ao nduguze a chilume ariphouka kwenda kuko tsʼikukʼuuni, yiye naye wakwenda, ela chisirisiri, kʼadzilavire jamani.

Jeso kuko tsʼikukʼuuni ya kulala miwekani

11Vilongozi a Ayahudi ákala adzanza kumutsakula Jeso hangu mwanzo wa yiyo tsʼikukʼuu, na ákala anaenderera kumuuzira kumba phana mutʼu yedzimona.

12Atʼu phapho duuni ákala anagomba dzuluye, ela chinjama-njama. Anjine ao áamba, “Ni mutʼu mudzo.” Ela anjine ao ákala anaamba, “Hʼa-a, unaayaza atʼu yiye.” 13Ela hata vivyo, kʼaphana mutʼu yesubutu kuhadza ngumaze jamani kwa kogopha vilongozi a Ayahudi.

14Tsʼikukʼuu yiriphofika kati-kati, Jeso wakwenda Hekaluni, na achendaanza kufunza. 15Ayahudi phapho achangalala, na achiamba, “Mutʼu yuno umanyadze maneno vino na hata kʼagasomerere?”

16Jeso achiaudzidza phapho kare achiaamba, “Mafunzo gangu nigafunzago tsʼi gangu, ela galaa kwa yenihuma. 17Mutʼu yeyosi ahenzaye kuhenda henzo ra Mulungu, bee undaidima kumanya kumba gaga mafunzo gangu galaa kwa Mulungu, hebu ni ninagomba gangu mwenye. 18Mutʼu adzigomberaye manenoge mwenye tu, unadzitsakulira nguma yiye mwenye. Ela amutsakuliraye nguma yemuhuma, ni mujeri, na mwakwe ndani kʼamuna ulongo wowosi. 19Mwimwi Musa wamupʼa Shariya, ela kʼaphana hata mumwenga wenu ayituwaye yo Shariya. Hʼa heka munahenza muniulage, na Shariya ya Musa yinaamba, mutsʼiulage?”

20O achimuudzidza achimwamba, “Una pʼepʼo uwe! Hʼa ni ani yiye ahenzaye akuulage?” 21Jeso achiaamba, “Mimi niriphohenda yiyatʼu kazi mwenga ya kumuphoza mutʼu yo tsʼiku ya Sabato, yiyo yamwangalaza mosi, na yichimutsukiza. 22#Alaw 12:3; Mwa 17:10Mwimwi Musa wamwamba mwabitʼetsʼi ana enu, ela ujeri ni kwamba, kuko kwanzwa ni akare, hata Musa yiye wakudzakwika dza shariya tu. Na vivi mudziima munabitʼatsʼi mwana mutsanga hata tsʼiku ya Sabato, na vivyo munadzona kʼamuhenda kazi. 23#Joh 5:9Ndo chikala mwana mutsanga sambi unabitwʼatsʼi hata tsʼiku ya Sabato kwa hata Shariya ya Musa yitsʼivunzwe, kwadze munanitsukirirwa mino kwakukala, námuphoza mutʼu mwiri wosi kamare tsʼiku ya Sabato? 24Hebu richani kulamula maneno chidzulu-dzulu, lamulani haki.”

Mauzanouzano dzulu ya Kʼirisito

25Kufikira phapho, achina Jerusalemu anjine achiamba, “Vidze, chisha yuno tsʼiye mutʼu ariye vilongozi a Ayahudi anamutsakula amuulage? 26Lolani vino! Heka hiye unafunza jamani, na kʼaamwamba utʼu! Phanjine ao vilongozi amanya kukala, yuyu ndiye yiye Kʼirisito? 27Hʼa-a, yiye Kʼirisito mwenye achidza, kʼaphana mutʼu yendamumanya kutʼu alaako, ela sino hunamumanya kolaa mutʼu yuyu!”

28Jeso wakala ucheri kufunza mumo Hekaluni, na achigomba kwa laka ra dzulu achiamba, “Ni vivyo, munanimanya jeri, na hata ko nilaako munakumanya nako! Ela mimi tsʼidzire na gangu mwenye, nákudza na ga yenihuma, ariye ni mujeri hata mwimwi ni kʼamumumanya. 29Ela mino ninamumanya kwakukala, nálaa kwakwe, na yiye ndiye yenihuma.”

30Jeso ariphogomba vivyo, ao vilongozi a Ayahudi áheza kumulinga, ela kʼaphana mutʼu yemugwira kwakukala, ukatiwe opangirwa ni Mulungu wakala kʼaudzangwe kufika. 31Ela atʼu anji phapho duuni ámukuluphira, na achiamba, “Hata yiye Kʼirisito akadza, chisha kʼandahenda dalili nyinji za kwangalaza, kuchira zizi zodzihendwa ni mutʼu yuyu!”

32Afarisayo árisikira riro duu ra atʼu rinatsunirana maneno gago dzulu ya Jeso. Ndo ao na makuhani abomu achihuma arinzi a Hekalu akamugwire.

33Ela Jeso yiye achiamba, “Nicheri namwi kwa tsʼiku chʼachʼe, na chisha nindakwenda kwa yenihuma. 34Na mwimwi mundanitsakula, ela kʼamundanona, mana, phondakala mimi, mwimwi kʼamwidima kudza.”

35Ao vilongozi a Ayahudi achigomba ao kwa ao achiamba, “Mutʼu yuno upanga kwendaphi kuko ariko kʼahundamona? Vidze, akale upanga kwenda kwa Ayahudi anziehu otsamukana kati ya Ayunani, na akafunze ao Ayunani? 36Una lwaphi yuno achiamba vino, ‘Mundanitsakula, ela kʼamundanona,’ na achiamba, ‘Phatʼu phondakala mimi, mwimwi kʼamwidima kudza’?”

Myuho ya madzi ga uzima

37 # Alaw 23:36 Tsʼiku ya musindikizo wa tsʼikukʼuu yiyo, yakala ya chilwakwe. Tsʼiku yiyo Jeso waima, na achigomba kwa laka ra dzulu achiamba, “Mwenye chʼiru naadze kwangu anwe. 38#Ezek 47:1; Zak 14:8Dza gaambavyo Maandiko ga Mulungu kukala, ‘Anikuluphiraye mimi, mwakwe moyoni mundakala muchilaa madzi ga uzima!’ ” 39(Yiye wagomba gago dzulu ya Roho wa Mulungu, ariye aratʼu okala anamukuluphira Jeso, ákala andamuphokera. Maana, ukati uo Roho wa Mulungu wakala kʼadzangwe kuhumwa kwa atʼu kwakukala, Jeso wakala kʼadzangwe kuhewa ubomuwe.)

40Atʼu ágasikira gago maneno gogombwa ni Jeso. Ndo anjine kati ya ao atʼu achiamba, “Mutʼu yuyu ndiye yiye mugomvi wa Mulungu vyenye!” 41Anjine ao achiamba, “Yuyu ndiye yiye Kʼirisito!” Ela atʼu anjine ao achiamba, “Kwani yiye Kʼirisito undalaa Galilaya? 42#2 Sam 7:12; Mik 5:2Samba gago Maandiko ga Mulungu ganaamba kukala, yiye Kʼirisito undalaa murere wa mufalume Daudi, na undavyalwa Betelehemu, mudzi okala achisagala yiye Daudi!” 43Ndo ao atʼu maazo gao gákala kʼaga sawa dzulu ya Jeso. 44Atʼu anjine ákala anahenza amugwire, ela kʼaphana mutʼu yeheza kumugwira.

45Arinzi a Hekalu ariphouya kwa ao makuhani abomu na Afarisayo, áuzwa vivi, “Heka kʼamumurehere yiye Jeso?” 46Ao arinzi a Hekalu achiamba, “Siswi kʼahudzangwe kona mutʼu wa kugomba maneno dza godzikala unagagomba yiye!” 47Afarisayo achiaudzidza achiaamba, “Mwimwi namwi mudzilembwa vivyo? 48Kuko mukale mudzimona mumwenga wa vilongozi a atʼu, hebu mumwenga wa Afarisayo yedzimukuluphira? 49Gago madzitʼu godzigaona gakuluphira kuko, bee kʼagamanya Shariya, na galaniwa.”

50 # Joh 3:1, 2 Mumwenga wao wakala ni Nikodemo, ariye phapho mwanzo wakala ukwenda kwa Jeso. Ndo yiye achiaamba, 51“Munamanya asena, kutuwirizana na shariya yehu, kʼahuhenzwa hulamule mutʼu photsʼimusikiza mwanzo, na kumumanya gakwe ahendago.”

52Ela ao vilongozi achiamba, “Uwe nawe ulaa Galilaya hebudze? Hebu tsakula mumo Maandikoni ga Mulungu, na undaona kukala, kʼakuna mugomvi wa Mulungu alaaye Galilaya!” 53Vilongozi a Ayahudi ariphokala kʼaana ra kumuhenda Jeso, chila mutʼu wagwira njira achenda kwakwe mudzini.

Currently Selected:

Johana 7: CHIDUR

Highlight

Copy