Johana 8

Jeso unamusamehe muchetʼu yegwirwa unazinga

1Jeso ariphomala kufunza atʼu Hekaluni, wakwenda ko mulima wa Mizeituni.

2Kunadzachakwe na chiramuko dani-dani, wauya kahiri ko Hekaluni. Atʼu osi achenda kwakwe, naye achisagala achiafunza. 3Ndo alimu a shariya na Afarisayo, achimureha muchetʼu mumwenga yekala ugwirwa unazinga. Achimwimisa pho mbere za atʼu osi, 4chisha achimwamba Jeso vivi, “Mwalimu! Muchetʼu yuyu ugwirwa unazinga. 5#Alaw 20:10; Kʼumb 22:22-24Na mumo Shariyani, Musa wahulagiza humupige na mawe vivi hata afe chila muchetʼu azingaye. Ndo we mwalimu, unaamba humuhendedze yuno?” 6Áuza neno riro kumuhega Jeso tu, kwa apate chisingwa cha kumulumbira. Ela Jeso achivumbama, achandika photsʼi na chala. 7Ariphokaza kumuuza, Jeso warungarara achiamba, “Mutʼu yetsʼi dambi kati yenu, naakale wa mwanzo kumupiga dziwe.” 8Chisha achivumbama kahiri, achikala unaandika-andika photsʼi. 9O atʼu ariphosikira gago, chila mutʼu wauza moyowe, chidzako achanza kuuka mumwenga-mumwenga, na o atumia ndio olongola kuuka. Achimuricha phapho yiye muchetʼu wimire mbere za Jeso. 10Jeso achirungarara, na achimuuza vivi yiye muchetʼu, “Mayo, a lwaphi vino odzikureha? Vidze, kʼaphana hata mumwenga yedzilamula kukutiya akili?” 11Yiye muchetʼu achimuudzidza achimwamba, “Kʼaphana hata mumwenga baba!” Jeso naye achimwamba, “Hata mimi tsʼilamula kukutiya akili. Enda vyako, na kwanzira vivi utsʼihende dambi kahiri.”#8:11 Nakala zinjine za mwanzo-mwanzo kʼazina mafungu ga 7:53 hata 8:11.

Jeso ni mwanga wa atʼu a dunia

12 # Mat 5:14; Joh 9:5 Jeso waenderera kufunza atʼu mumo Hekaluni. Yiye waamba, “Mimi ni mwanga wa atʼu a dunia. Anituwaye mimi kʼandaenenda dzizani kamare, ela undakala na mwanga urehao uzima.”

13 # Joh 5:31 Ndo Afarisayo achimuuza vivi, “Heka we chila uchigomba maneno dzuluyo, shaidi ni uwe mwenye? Bee uwe chikala u vivyo, uo ushaidio tsʼi wa jeri.” 14Jeso achiaudzidza achiaamba, “Ni vivyo chila nigombapho maneno dzulu yangu, shaidi ni mimi mwenye. Ela hata vivyo, ushaidi wangu ni wa jeri, mana, mimi ninakumanya kolaa, na ko nendako. Ela mwi kʼamunimanya kolaa, hebu ko nendako. 15Mwimwi munanilamula chidamu, ela mino tsʼilamula mutʼu yeyosi. 16Na hata nikalamula, ulamuli wangu ni wa jeri, mana, mimi tsʼilamula hichiyangu, ela nilamula phamwenga na yenihuma. 17#Kʼumb 19:15Mba hata mumo mwenu Shariyani gáandikwa kukala, ushaidi wa atʼu airi ni wa jeri. 18Ndo mimi ni mumwenga wa gago mashaidi galavyago ushaidi dzulu yangu, na hata Baba yenihuma naye, unalavya ushaidi dzulu yangu vivyo.” 19Phapho kare achimuuza vivi, “U lwaphi yiye abayo?” Jeso achiaudzidza achiaamba, “Mwimwi mimi kʼamunimanya, na hata yiye Baba naye kʼamumumanya vivyo. Kala mimi mwanimanya, hata yiye Baba mungari kumumanya naye.” 20Jeso wagomba maneno gago kwenye chumba cha visanduku vya kwikira pʼesa phokala unafunza mumo Hekaluni. Na kʼaphana mutʼu yemugwira, kwakukala, ukatiwe okala upangirwa ni Mulungu wakala kʼaudzangwe kufika.

Atʼu otsʼikuluphira anakanywa ni Jeso

21Jeso waambira atʼu kahiri kukala, “Ninauka mino, na mwimwi mundanitsakula, ela mundafa na dambi zenu vivyo, mana, kuko nendako mwimwi kʼamwidima kudza.” 22Ndo phapho ao Ayahudi achiuzana vivi, “Vidze, akale undadziulaga? Kwadze unaamba, ‘Kuko nendako mwimwi kʼamwidima kudza’?”

23Ela Jeso yiye achiaamba, “Mwimwi mwa phapha photsʼi, ela mino ni wa hiko dzulu. Mwimwi mwa phapha duniani, ela mino tsʼimi wa hipha duniani. 24Gago ndigotuma hata nichimwamba, mundafa na dambi zenu. Na bee muchikala kʼamundanikuluphira kukala, mimi ndimi yiye Kʼirisito, mwimwi bee mundafa na dambi zenu vyenye.”

25Ndo ao achimuuza vivi, “Uwe u ani sambi?” Jeso achiaudzidza achiaamba, “Mwimwi námwambira hangu mwanzo kukala mimi ni ani! 26Nisirikisani wahi, mimi nina manji ga kugomba dzulu yenu, na nina manji ga kumulamulira, ela yenihuma ni mujeri, na atʼu a dunia ninaambira gogasikira kulaa kwakwe.” 27Ao phapho kʼaamanyire kukala, Jeso wakala unagomba nao dzulu ya Abaye Mulungu. 28Ndo Jeso achiamba, “Phondaniunula dzulu mimi Mutʼu yelaa dzulu, bee phapho ndipho mundamanya kukala, mimi ndimi yiye Kʼirisito, na kukala tsʼihenda gangu mwenye, ela ninagomba garatʼu Baba Mulungu arigonifunza. 29Yenihuma u phamwenga nami: yiye kʼanirichire hichiyangu, mana, mimi tsʼiku zosi ninahenda garatʼu gamuhamirago.” 30Na unamarigiza kugomba gago, atʼu anji achimukuluphira.

Utsare na ugulwa uhumiki

31Jeso waamba vivi ao Ayahudi okala adzimukuluphira, “Muchirituwiriza neno rangu, mundakala anafunzi angu a jeri. 32Na mundaumanya ujeri, na uo ujeri undamuhenda mukale tsare.” 33#Mat 3:9; Luk 3:8Ao achimwamba, “Siswi hu atʼu a mudzungu wa Burahemu, na kʼahudzangwe kamare kukala agulwa ahumiki a mutʼu yeyosi. Hʼa uhwambadze we kukala, hundakala tsare?” 34Jeso achiaudzidza achiaamba, “Ninamwambira jeri-jeri, chila ahendaye dambi, ni mugulwa muhumiki wa dambi. 35Na mugulwa muhumiki kʼaenderera hata kare na kare kogulwa, ela mwana wa phapho unaenderera hata kare na kare. 36Ndo yiye Mwana achimuhenda mukale tsare, bee mundakala tsare jeri. 37Ninakubali kukala, mwimwi mu atʼu a mudzungu wa Burahemu! Ela munahenza muniulage kwakukala, neno rangu kʼarimuphenya. 38Mimi ninamwambira garatʼu goonyeswa ni Baba Mulungu, na mwimwi namwi muhenda garatʼu gogasikira kulaa kwa abayenu.”

39Ayahudi achimuudzidza achimwamba, “Baba sino ni Burahemu!”

Jeso achiaamba, “Kala mwimwi mu anangwa a Burahemu jeri, mungari kuhenda maneno dza gokala gachihendwa ni Burahemu. 40Ela vino mwi munahenza muniulage mimi mutʼu yedzimwambira ujeri ousikira kulaa kwa Mulungu. Bee manyani kukala, Burahemu kʼahendere hivyo. 41Kwa vivyo, mwimwi munaonyesa munahenda garatʼu maneno gahendwago ni abayenu.”

Ao achimuudzidza achimwamba, “Sino kʼahu ana a vuweni! Sino abayehu ni mumwenga tu, naye ni Mulungu.” 42Jeso achiaamba, “Kala Mulungu ni abayenu jeri, mimi mungari kunihenza, kwakukala, nálaa kwakwe. Mimi tsʼidzire mwenye, ela yiye Mulungu ndiye yenihuma. 43Hʼaya kwadze kʼamugamanya gano nimwambirago? Ni kwakukala kʼamwenzi kusikira maneno gangu. 44Ndo mwimwi abayenu ni Shetani, na genu muhenzago ni kutuwa zo tʼamaa mbii za yiye abayenu. Yiye wakala ni muulagi hangu mwanzo, na unapinga ujeri, mana, mwakwe ndani kʼamuna ujeri. Shetani kulemba ndiyo kaziye, mana, yiye ni mulongo, na ndiye abaye ulongo. 45Ela mino ninagomba ujeri, na gago ndigo gatumago hata mwimwi kʼamunikuluphira! 46Ndo ni ani kati yenu aidimaye konyesa kukala, nina dambi? Na kwahivira ninagomba ujeri, kwadze sambi kʼamunikuluphira? 47Bee, ariye ni wa Mulungu, unasikiza maneno ga Mulungu. Kwa vivyo, chicho chitumacho hata mwimwi kʼamugasikiza, bee ni kuko kukala, kʼamu a Mulungu.”

Jeso ni mubomu kuchira Burahemu

48Ao Ayahudi achimwamba, “Vivi bee hu ajeri huchikwamba uwe u Musamariya, na una pʼepʼo!”

49Jeso achiaudzidza achiaamba, “Mino bee tsʼina pʼepʼo, hata ni ninamwishima Baba, ela mwimwi kʼamuniishima. 50Na mimi bee tsʼi kwamba ninadzitsakulira ubomu mimi mwenye. Mulungu ndiye anitsakuliraye, na yiye ndiye mulamuli. 51Ninamwambira jeri-jeri, mutʼu yendatuwiriza neno rangu, bee kʼandalamulwa chifo hata kare na kare.”

52Phapho ao Ayahudi achimwamba, “Vivi bee, hudzimanya kukala, uwe una pʼepʼo jeri! Yiye Burahemu na agomvi a Mulungu tu áfa, ela we unaamba hangwe, ‘Yendatuwiriza neno rangu, bee kʼandalamulwa chifo hata kare na kare!’ 53Unadzona uwe u mubomu kuchira abayehu Burahemu? Yiye wakala ni mubomu na achifa, na hata ao agomvi a Mulungu nao áfa vivyo. Hʼaya uwe unadzona u ani sana hata unaamba yendatuwiriza nenoro, kʼandalamulwa chifo hata kare na kare?”

54Ela Jeso yiye achiudzidza achiamba, “Kala bee ao ubomu ninadzipʼa mwenye, ubomu wangu ungari kukala kʼauna tende. Ela vino uo ubomu nihewa ni Baba, ariye mwimwi munaamba, ‘Ni Mulungu wehu,’ 55ela kʼamudzangwe kumumanya. Ela mino ninamumanya, na kala náamba tsʼimumanya, bee ningari nákala ni mulongo dza vivyo mwimwi murivyo. Ela mino ninamumanya, na ninarituwa nenore. 56Abayenu Burahemu watikwatikwa phokala unalolera ukati wangu wa kudzira, naye achiwona, na achihamirwa.”

57Ela ao Ayahudi achimwamba, “Hangwedze? Uwe mwanache wa dzana yenye hata kʼufisa hata myaka mirongo mitsano, hʼaya wamonadze Burahemu na hata wafa pʼindi yenye hiko?”

58Phapho Jeso yiye achiaamba, “Ninamwambira jeri-jeri, hata phokala Burahemu kʼadzangwe kuvyalwa, mino neriko.” 59Phapho kare ao Ayahudi achitsola mawe kwa amupige, ela Jeso achidzifitsa, na chidzako achilaa mumo Hekaluni.

Currently Selected:

Johana 8: CHIDUR

Highlight

Copy