Luka 19

Zakayo unativywa ni Jeso phamwenga na atʼue

1-2Jeso waenderera na charoche hata achiphenya mudzi wa Jeriko, okala uchisagala mutʼu aihiwaye Zakayo. Zakayo wakala ni mubomu wa atosi a kodi, na wakala ni dzumbe muno. Ndo Jeso ariphokala unachira na mudzi uo, 3Zakayo wahenza kumona, ela kwakukala, atʼu ákala ni anji, na hata chisha kwakukala, wakala ni mwiphi, kʼaidimire kumona. 4Ndo sambi achilongola mbere mairo, achendakwera dzulu ya mukuyu kwa hata amone Jeso, mana, wakala undachira na phapho. 5Ndo Jeso ariphofika phatʼu phapho, achilola dzulu na achimwamba vivi, “Zakayo, tserera maruru, mimi rero ni mujenio.” 6Zakayo achitserera maruru na achihamirwa muno hata achimupiga karibu Jeso na nyemi ende kwakwe nyumbani. 7Ela atʼu osi ariphoona gago, áanza kunungʼunika achiamba, “Ukwendakala mujeni wa mutʼu mwenye dambi.” 8Ndo Jeso ariphokala u nyumbani mwa Zakayo, Zakayo waima achimwamba, “Bwana, mimi nindaapʼa achiya nusu ya miyo yangu, na nichikala námuzulumu mutʼu, nindamuripha chasi chicho chenye, bee chisha kʼano ne.” 9Jeso achiudzidza achiamba, “Rero yuyu utivywa phamwenga na atʼue, mana, kwa kuluphirore, udzonyesa ni mutʼu wa mudzungu wa Burahemu naye. 10Na mimi Mutʼu yelaa dzulu, nákudzaatsakula adambi dza yuyu niativye.”

Tʼadi ya pʼesa

(Matayo 25:14-30)

11Atʼu áenderera kusirikisa maneno ga Jeso, na yiye achiaambira tʼadi yiyi, mana, wakala umirimira ya Jerusalemu, na kwakukala, atʼu ákala anaona Ufalume wa Mulungu kʼauna pʼindi kahiri undalairira tu. 12Ndo yiye waamba, “Kwakala mutʼu mumwenga yekala unamanyikana muno. Mutʼu yiye wafunga charo kwenda itsʼi ya kure, kwa hata akahewe ufalume na auye kwao. 13Ela ariphokala kʼadzangwe kuuka, waaiha ahendikazie kumi achiapʼa helufu kumi-kumi chila mumwenga, na achiaamba vivi, ‘Zichuzireni vivi hata niuye.’ Chidzako hiye achenda vyakwe. 14Ela achina kuko kwao ákala kʼaamwenzi, na ndo hata achihuma adzumbe ende akamwambire yiye chilongozi wa yiyo itsʼi ya kure yokala unenda kukala, ‘Kʼahumwenzi mutʼu yuyu akale mufalume wehu.’

15“Ela yiye mutʼu wa kumanyikana wakwendahewa vivyo uo ufalume, na achiuya kwao. Ariphouya tu, achialagizira aihiwe aratʼu ahendikazi okala udziapʼa ziratʼu pʼesa, kwa hata amanye chila mumwenga wapata faida chasi chani. 16Ndo muhendikazi wa kwanza wakudza achiamba, ‘Mutumia, faida niriyopata bee ni kʼano kumi ya ziratʼu pʼesa zonipʼa.’ 17Naye achimwamba, ‘Vyohenda uwe ni vidzo, na uwe u muhendikazi mudzo. Na kwakukala udzikala mwaminifu na neno dide, nindakupʼa ulongozi wa midzi kumi!’ 18Muhendikazi wa phiri achidza naye, na achiamba, ‘Mutumia, faida niriyopata bee ni kʼano tsʼano ya ziratʼu pʼesa zonipʼa.’ 19Yiye achimwamba, ‘Uwe nawe nindakupʼa ulongozi vivyo wa midzi mitsano.’

20“Ela yiye wa hahu achidza achiamba, ‘Mwabaye, hwala pʼesazo hizi. Mino nákala nidzizifunga chitambaani chividzo, na nichizifitsa. 21Mino náhenda vivyo, kwakukala, uwe u musiru muno, na u mutʼu uhenzaye kudzipatira faida ya bule yotsʼiyihendera kazi.’ 22Ndo phapho yiye mufalume achimwamba, ‘Ninakulamula kutuwirizana na manenogo mwenye godzigomba, uwe u muhendikazi mui! Hʼaya nawe wamanya kukala mino ni musiru, na ni mutʼu nihenzaye kudzipatira faida ya bule photsʼiyihendera kazi, 23heka sambi kʼwendereziika bengi pʼesa zangu zikatsuma hata vino vyouya nikazihwala na faidaye?’

24“Ndo yiye mufalume achiaamba aratʼu okala a phapho, ‘Muphokeni yiye zizo pʼesa mukamupʼe yepata faida mara kumi.’ 25Ela ao achimwamba, ‘Mutumia, samba yiye una mara kumi ya zizo kare!’ 26#Mat 13:12; Mar 4:25; Luk 8:18Ela yiye mufalume achiudzidza naye achiamba, ‘Ahumiraye chicho aricho nacho, undaonjezwa akale na vinji, ela yuyatʼu yetsʼichihumira, undaphokwa hata chicho aricho nacho. 27#Mat 25:14-30Ndo vivi agwireni adawa angu okala kʼaaenzi nikale mufalume wao mwarehe phapha, ninahenza mwaulage phapha nami ninalola.’ ”

Jeso unaphokerwa Jerusalemu dza mufalume

(Matayo 21:1-11; Mariko 11:1-11; Johana 12:12-19)

28Jeso wagomba gago, chisha achialongolera anafunzie achenda Jerusalemu. 29Ariphokala unatapira vidzidzi vya Betifage na Betania kʼanda-kʼanda ya mulima wa Mizeituni, waahuma ahumwae airi 30achiaamba, “Endani kadzidzi kara kodzikalozera mbavu, na muchendaphenya tu phapho kadzidzini, mundamona mwana pʼunda, ariye kʼadzangwe kutsukula mutʼu. Muchendamona, muvuguleni mumurehe phapha. 31Na mutʼu yeyosi achimuuza, ‘Kwadze munamuvugula?’ Mwambeni, ‘Bwana una haja naye.’ ”

32Ndo ao ahumwa airi achenda, na achendaona dza vyokala Jeso udziaambira. 33Ariphokala anamuvugula yuyatʼu mwana pʼunda, enye yiye mwana pʼunda áauza achiaamba, “Kwadze munamuvugula yiye mwana pʼunda?” 34Ao achiaudzidza kukala, “Bwana unaye haja.” 35Na achimurehera Jeso yiye mwana pʼunda. Chisha, achiika mavalo gao dzulu-dzulu ya yiye mwana pʼunda, na Jeso achikwera dzuluye. 36Jeso achenderera na charo cha kwenda Jerusalemu dzulu ya yiye mwana pʼunda, na atʼu achichachasa mavalo gao kwenye yiyo njira bomu.

37Ariphokala unatapira Jerusalemu, phenye muteremuko wa mulima wa Mizeituni, anafunzie na duu bomu ra atʼu achanza kupiga njerejere kwa raha, na kumulika Mulungu kʼululu kwa maneno mabomu gokala adzigaona. 38#Zab 118:26Ao ágomba kʼululu kwamba,

“Waajaliwa ni Mwenyezi Mulungu yiye mufalume adzaye kwa dzina ra Bwana.

Reri mulunguni, na nguma kwa Mulungu!”

39Ndo anjine a Afarisayo okala a kati ya riro duu ra atʼu achimwamba Jeso, “Mwalimu, anyamaze aa anafunzio!” 40Ela Jeso yiye achiaudzidza achiaamba, “Ninamwambira jeri, aa achinyamala tu, gaga mawe gandapiga kʼululu.”

Jeso unaushononekera mudzi wa Jerusalemu

41Jeso ariphofika phephi kamare na Jerusalemu hata kuno achikala unawona, wauririra 42achiamba, “Vingari kukala ni baha hata kala ngawa mudziumanya rero udzumbe wa Mulungu urio ungari kumurehera reri! Ela vino kʼau lwazu kwenu. 43Maana, ukati undafika urio adawa enu andamulingira dzikuta amulinge kwa hata amuphenyerere kulaa kosi-kosi, 44na uu mudzi wenu undavunzwa, na atʼu osi aulagwe. Ao kʼaandaricha hata dziwe mwenga rikale dzulu ya rinjine, mana, kʼamuumanyire uratʼu ukati okala Mulungu ukudza kwa amutivye.”

Jeso unenda Hekaluni

(Matayo 21:12-17; Mariko 11:15-19; Johana 2:13-22)

45Jeso wakwendaphenya boma ra Hekalu. Mumo achiona achuzi, na achanza kwavuguza alae konze. 46#Isa 56:7; Jer 7:11Yiye waamba, “Gaandikwa Maandikoni ga Mulungu kukala, ‘Nyumba yangu yindakala nyumba ya mavoyo.’ Ela mwimwi, ninaona mudziyihenda ni pʼanga ya aivi!”

47 # Luk 21:37 Jeso wakala achifunza Hekaluni chila tsʼiku. Makuhani abomu, alimu a shariya na vilongozi a Ayahudi ákala anahenza amuulage Jeso, 48ela kʼaapatire njira ya kumuulagira, mana, atʼu osi ákala anamusirikisa chividzo, kʼaahenzere achirwe hata ni neno mwenga.

Currently Selected:

Luka 19: CHIDUR

Highlight

Copy