Mariko 15

Jeso unaphirikwa kwa Pilato

(Matayo 27:1-2, 11-14; Luka 23:1-5; Johana 18:28-38)

1Chiramukoche dani-dani, makuhani abomu, atumia a Chiyahudi, alimu a shariya na ngambi yosi, áchiza ulamuli wao. Chisha, Jeso achifungwa mikowa, na achiphirikwa kwa Pilato. 2Pilato achimuuza Jeso vivi, “Uwe ndiwe mufalume wa Ayahudi?” Jeso achimuudzidza achimwamba, “Vinahwalana na vivyo wambavyo.”

3Makuhani abomu álumba kukala, Jeso una makosa manji. 4Ndo Pilato achimwamba vivi kahiri, “Kʼuna ra kuudzidza uwe, na ano atʼu anakulumbira maneno manji?” 5Ela Jeso yiye kʼaudzidzire hata mwenga, na gago gachimwangalaza muno yiye Pilato.

Pilato unagaramishwa amulamule Jeso anyongwe

(Matayo 27:15-26; Luka 23:13-25; Johana 18:39; 19:16)

6Chila ukati wa tsʼikukʼuu ya Pʼasaka, Pilato wakala una ada ya kwavugulira atʼu mufungwa mumwenga, yendakala uhadzwa ni duu ra Ayahudi. 7Ndo ukati wa tsʼikukʼuu yiyo, kwakala kuna mutʼu mumwenga aihiwaye Baraba. Yiye wakala ufungwa jela na atʼu anjine ai okala adziulaga atʼu muyuwanoni. 8Atʼu anji achimwendera Pilato, achimuvoya aahendere dza adaye. 9Pilato achiauza vivi, “Munahenza nimuvugulire mufalume wa Ayahudi?” 10Pilato wagomba vivyo, mana, wakala unamanya lwazu-lwazu kukala, makuhani abomu ámuphirika Jeso kwakwe, kwakukala, ákala anamonera chidzitso.

11Ela makuhani abomu achiakalata atʼu amuvoye Pilato aavugulire Baraba. 12Pilato achiauza kahiri achiaamba, “Hʼanga yuno mumwihaye ‘Mufalume wa Ayahudi,’ munahenza nimuhendedze?” 13Ela ao achigomba kʼululu kwamba, “Muulage kwa kumukotʼa misumari musalabani!” 14Pilato achiauza vivi, “Bee kwadze? Kwani wahenda ii rani yuno mutʼungwa?” Ela ao hata achikaza kupiga kʼululu kwamba, “Muulage kwa kumukotʼa misumari musalabani!”

15Pilato wahenza kurihamya riro duu ra atʼu. Ndo achiavugulira Baraba, na achamula Jeso apigwe vibokʼo. Chisha, achimulavya akaulagwe kwa kukotwʼa misumari musalabani.

Shikari anamuhenda chinyago Jeso

(Matayo 27:27-31; Johana 19:2-3)

16Ndo shikari a Chirumi ámuhwala Jeso achenda naye kuko ndani ya boma ra yiye mubomu wao, na gingi yosi ya shikari yichimuzangila. 17Ao phapho achimuvika zurungi ra rangi ya zambarawe, na achilinga chiremba cha vitai vya miya, achimuvika chitswani. 18Ndo achanza kumulamusa vivi, “Hʼaya kʼamuna utʼu baba mufalume wa Ayahudi?” 19Achimupiga chitswani na chidatʼa kwenda-kwenda, achimulatsʼira mahe, na achimumitʼira mavindi dza kwamba anamwabudu. 20Ariphomala kumuhenda chinyago, ámuvula riro zurungi ra zambarawe, achimuvika nguwoze. Chisha, achimulongoza kwendamuulaga kwa kumukotʼa misumari musalabani.

Jeso unaulagwa kwa kukotwʼa misumari musalabani

(Matayo 27:32-44; Luka 23:25-43; Johana 19:17-27)

21 # Arum 16:13 Shikari ámulongoza Jeso kwendamuulaga. Na ariphokala anenda, áonana na mutʼu aihiwaye Simoni muchina Kurene. Yiye wakala ndiye abaye Alekizanda na Rufo, na ukati uo wakala unaloka mudzi wa Jerusalemu kulaa vidzidzini. Ndo achimugaramisha autsukule uratʼu musalaba wa Jeso, 22na achenda hata achifika phatʼu phaihiwapho Goligota kwa Chiburania, na maanaye, ni “Muma wa Chitswa.” 23Achimupʼa Jeso divai yokala yitsanganywa na dawa ya kuusa matsungu anwe, ela Jeso achiyirema. 24#Zab 22:18Ao shikari achimukotʼa misumari musalabani phapho. Chisha, achigavyana mavaloge kwa kupiga kʼura ya kʼamari. 25Ukati uo yakala ni saa tʼahu za chiramuko phapho ariphomukotʼa misumari musalabani. 26Na dzulu ya musalaba wa Jeso, achikotʼa chibao chokala chidzandikwa gotuma hata aulagwe. Nago gákala ni, “yuyu ni mufalume wa ayahudi.” 27#Isa 53:12Chisha, ao shikari achiakotʼa atʼu anjine airi okala ni anyangʼanyi, mumwenga mukonowe wa kulume, na munjine mukonowe wa kumotsʼo, na Jeso yiye achikala adzimwika kati-kati na musalabawe.#15:27 Nakala zinjine zinaonjeza fungu ra 28 dza: Na phapho, richichimira riro Andiko rambaro, “Waikwa duu mwenga na atʼu ai.”

29 # Zab 22:7; 109:25; Mar 14:58; Joh 2:19 Atʼu ochira na phatʼu phapho ariphomona, ámuhakana, achitukusa vitswa vyao kumuzomorera na achimwamba, “Hʼaya, samba waamba unaidima kurivomola Hekalu, na ukarijenga kwa tsʼiku tʼahu tu? 30Amba vino tserera phapho musalabani udzitivye!” 31Makuhani abomu na alimu a shariya nao, ámuhenda chinyago vivyo. Ao áamba, “Waativya atʼu anjine, ela vino yiye mwenye heka, kʼadzitivya? 32Amba yiye Kʼirisito, ariye ni mufalume wa Aiziraeli, vino rero naatserere kulaa phara musalabani kwa hata hwone na hukuluphire ndiye jeri.” Phapho hata okala akotwʼa misumari musalabani dza yiye nao, achimwamba dza gago.

Chifo cha Jeso musalabani

(Matayo 27:45-56; Luka 23:44-49; Johana 19:28-30)

33Dzuwa ririphofika vitswani, raanza kugwirwa, na itsʼi yiyo yosi kuchikala na dziza masaa mahahu. 34#Zab 22:1Ziriphofika saa chenda za mutsana, Jeso warira kwa laka ra dzulu achiamba, “Eloi, Eloi lama sabakitani?” Na maanaye ni, “Mulungu wangu, Mulungu wangu, heka udziniricha?” 35Ela anjine okala aimire phapho phephi ariphosikira vivyo kʼaaelewere, na kwa vivyo achiamba, “Sirikisani, unamwiha Eliya.” 36#Zab 69:21Ndo phapho mumwenga wao achimusengerera maruru, achitsʼatsʼa kasiku ka godoro ndani ya divai ya ngwadu, achikadunga na mudatʼa wa mwanzi, achimulambisa chisha achiamba, “Nahumuloleni yiye kumba Eliya undakudzamutsereza phapho musalabani.” 37Jeso achirira kwa laka ra dzulu, achitosa roho.

38 # Kul 26:31-33 Ndo phapho pʼaziya ya Hekalu yichahuka kati-kati, kulaa dzulu hata photsʼi. 39Na mubomu wa shikari a viha mumwenga yekala wimire mbereze ariphoona Jeso vyorira na vyokala unafa, waamba, “Mutʼu yuyu wakala ni Mwana wa Mulungu jeri.”

40 # Luk 8:2, 3 Phapho phákala phana achetʼu okala aimire kure analolera. Kati yao, wakala ni Maryamu muchina Magidala, Salome phamwenga na Maryamu ameye Jose na ano Jakobo. 41Achetʼu ao ndio okala achimuhikirahikira Jeso, na ákala akudza osini kulaa Galilaya. Na kwakala kuna achetʼu anjine anji okudza Jerusalemu phamwenga naye.

Jeso unazikwa

(Matayo 27:57-61; Luka 23:50-56; Johana 19:38-42)

42-43Tsʼiku youlagwa Jeso, yakala ni ya kudzibambanya, kwa hata kuchidzachakwe ndiyo tsʼiku ya Sabato. Ndo kuko kwakala kuna mutʼu mumwenga aihiwaye Jesefu, muchina Arimataya. Yiye wakala ni mumwenga wa ao atumia a ngambi yekala unamanyikana muno, na wakala unalolera kudza kwa Ufalume wa Mulungu. Ndo kuriphokala kunatswa, yiye wakwenda kwa Pilato photsʼi woga, achendavoya ahewe lulo lufu lwa Jeso. 44Pilato kʼaaminire kukala, Jeso wakala udzefa kare. Ndo achimulagizira yiye mubomu wa shikari a viha achidzamuuza. 45Na ariphoambirwa ni yiye mubomu kukala, Jeso wakala udzefa jeri, achimuhenzeza Jesefu kwendaluhwala lulo lufu. 46Phapho Jesefu achendagula sanza. Achidzalutsereza lulo lufu, achiluvika sanza ya kitani, na achendaluzika ndani ya mbira yokala yitsongwa mwambani. Chisha, achiphimbilisa dziwe achiribinikʼiza phapho muyangoni. 47Ano Maryamu muchina Magidala, na Maryamu ameye Jose, áphaona pharatʼu phatʼu ariphozikwa.

Currently Selected:

Mariko 15: CHIDUR

Highlight

Copy