Mariko 5
5
Jeso unamuphoza mutʼu wa pʼepʼo
(Matayo 8:28-34; Luka 8:26-39)
1Jeso na anafunzie ávuka ziya ra Galilaya, achiphenya itsʼi ya Agerasa. 2Jeso aripholaa mumo mashuwani tu, mutʼu mumwenga yekala una mapepo, walaa mabirani achenda kwakwe. 3Mutʼu yiye wakala usagala kuko mabirani, na kwakala kʼakuna aidimaye kumufunga hata na minyororo kahiri. 4Atʼu ákala adzimufunga kʼano nyinji na pʼingu, na minyororo ya magulu. Ela zizo pʼingu wakala achizivunza, na yiyo minyororo ya magulu wakala achiyitosa, na kʼakuna mutʼu yekala unaidima kumuumija. 5Yiye wakala uchesa choo, na usinda dii, kupiga kʼululu kuko mabirani na myangoni, na kudziyula-yula na mawe.
6Ndo ariphomona Jeso kwa kure, wamukazira achendamitʼa mavindi mbereze. 7-8Jeso achimwamba, “Pʼepʼo muchafu, mulae mutʼu yuyu.” Phapho, yiye mutʼu achigomba kwa laka ra dzulu achiamba, “Unamini we Jeso Mwana wa Mulungu Ariye Dzulu kuchira osi? Ninakuvoya ulaphe Mulungu kukala, kʼundaniturisa!” 9Chisha Jeso achimuuza achimwamba, “Kwani we dzinaro ndiwe ani?” Yiye mutʼu achiudzidza achiamba, “Dzina rangu mino, ndimi ‘Jeshi,’ kwakukala, siswi hu anji.” 10Chisha achimulombera muno Jeso kukala, atsʼiavuguze kulaa upande uo ao pʼepʼo.
11Ndo kwakala kuna duu bomu ra nguluwe a kufuga okala anarisa jemajema ra mwango, phephi na phapho. 12Ndo ao pʼepʼo achimulombera Jeso achimwamba, “Huhenzeze na uhuphirike kwa ara nguluwe hukaaphenye.” 13Jeso achiahenzeza, na ao pʼepʼo achimulaa yiye mutʼu, achendaaphenya ao nguluwe. Duu rosi ra nguluwe rokala rinatapira helufu mbiri, richivoromoka hata ziyani richihoha.
14Arisa a ao nguluwe ariphoona gago, ákaza mairo achendaambira atʼu nguma zizo kuko midzini na mindani, na atʼu achendalola gokala galairira. 15Ao ariphofika phokala Jeso, ámona yiye mutʼu yekala ulaviwa jeshi ra pʼepʼo, usegere phapho uvala nguwo, na akilize zidziuyatʼo kamare. Atʼu phapho, achogopha muno. 16Aratʼu atʼu arioona maneno gago gachihendeka, áambira atʼu anjine jisi mutʼu yiye arivyokala ulaviwa pʼepʼo ni Jeso, na achiaambira dzulu ya ao nguluwe. 17Atʼu a jimbo riro achanza kumuvoya Jeso auke phapho phao.
18Jeso ariphokala unaphenya mashuwani, yuyatʼu mutʼu yekala udzimulavya pʼepʼo, wamuvoya ende osi. 19Ela Jeso kʼamuhenzezere, itsʼiphokala wamwamba, “Uya mudzini ukaseme higo maneno mabomu godzihenderwa ni Bwana Mulungu, na jisi vyodzikonera mbazi.” 20Ndo yiye mutʼu achenda vyakwe, na achendaanza kusema kuko Dekapoli, gago maneno mabomu gokala uhenderwa ni Jeso, na atʼu osi achangalala.
Mwanache wa chiche na muchetʼu anaphozwa
(Matayo 9:18-26; Luka 8:40-50)
21Jeso aripholaa kuko Gerasa, wavuka kahiri riro ziya na mashuwa, achiuya uo upande unjine. Achiima kʼanda-kʼanda ya riro ziya, na duu bomu ra atʼu richirundikana mbereze. 22Mubomu mumwenga wa sinagogi, aihiwaye Jairo achidza phapho, na ariphomona Jeso, wamitʼa mavindi mbereze 23na achimuvoya achimwamba, “Mwanangu mudide wa chiche ni mukongo yupwi. Ninakuvoya, hinde ukamwikire mikonoyo umuvoyere kwa hata aphole, na akale moyo.” 24Jeso achikubali, na achiuka phamwenga naye.
Atʼu anji muno achimutuwa, na achikala anamufyeha kosi-kosi. 25Ndo phapho duuni, phákala phana muchetʼu mumwenga yekala ugaya na ukongo wa muruwo myaka kumi na miri. 26Muchetʼu yiye wakala umala aganga anji, na wakala umala miyoye yosi, ela kʼahendere baha, hata haliye yakaza kukala mbii. 27Ndo wakala usikira nguma mbidzo za Jeso, na kwa vivyo achiphyurira mumo duuni mwa atʼu achimutuwa Jeso nyuma hata achikumba valore. 28Wahenda vivyo, kwakukala, maazoge gákala ni, “Mimi nichirikumba valore tu, nindaphola kare.” 29Ndo ariphokumba tu, kuruwakwe kuchituma phapho kare, na achidzisikira mwiriwe uphola.
30Jeso achimanya kukala, mukotsewe udzimulaa. Ndo achirigalukira maruru riratʼu duu ra atʼu, na achiuza vivi, “Ni ani yedzirikumba valo rangu?” 31Anafunzie achimuudzidza achimwamba, “Wuzadze, ‘Ni ani yedzinikumba?’ Na hata uwe mwenye unaona ao atʼu vivyo akufyehavyo?” 32Ela Jeso yiye waenderera kulola kwa amone yekala uhenda vivyo. 33Phapho, yiye muchetʼu kwahivira wakala unagamanya godzihenderwa, wadzilavya na kuno unatetema kwa woga, mana, wakala unamanya udziatiya najisi atʼu.#5:33 Chishariya, vyakala muchetʼu achikala una ukongo wa muruwo, kʼahenzwa agwirikane na atʼu, hebu kukumba mutʼu kwa unaambwa una najisi. Achidzitsupha mbere za Jeso, na achimwambira ujeri wosi. 34Jeso yiye achimwamba, “Mayo, kuluphiroro ridzikuphoza. Enda na reri, na ukavugukwe kamare.”
35Jeso ariphokala ucheri kugomba gago, atʼu fulani ákudza kulaa mudzini kwa yiye Jairo, mubomu wa sinagogi na achimwamba vivi Jairo, “Mwanao kuratʼu udzefa. Kwa vivyo, tsʼimutsose bule yiye mwalimu.” 36Ela Jeso yiye kʼagatuwire mijali garatʼu gogomba ao, hata yiye wamwamba yiye mubomu wa sinagogi vivi, “Utsʼibabaike, kuluphira tu.” 37Na chisha, phapho Jeso kʼamuhenzezere mutʼu yeyosi amutuwe, atsʼiphokala Pʼetero, Jakobo na Johana nduguye yiye Jakobo tu.
38Ariphofika kuko mudzini kwa yiye mubomu wa sinagogi, Jeso waaona atʼu anapiga jembe, na anjine anarira muno kwa shenene. 39Jeso achiphenya mumo nyumbani, na achiauza vivi, “Kwadze munarira muno vino na yuno mwanache kʼafire, hata ni urere tu?” 40Ela ao atʼu achimona Jeso dza kwamba tsʼiye muzima. Ndo Jeso achialavya osi konze, achiahwala abaye na ameye yiye mwanache, na aratʼu anafunzie achiphenya kuko chumbani kokala yiye mwanache. 41Jeso achendamugwira mukono achimwamba, “Talita kumi!” Yiriyo maanaye ni, “Musichana, ninakwamba lamuka!” 42Ndo yiye musichana achiunuka phapho kare, na achanza kwenenda. (Yiye wakala una myaka kumi na miri.) Phapho atʼu achangalala muno. 43Jeso achiaamba atsʼimwambire mutʼu yeyosi kamare gago, chisha achiaamba amupʼe leu yiye musichana.
Currently Selected:
Mariko 5: CHIDUR
Highlight
Share
Copy
Want to have your highlights saved across all your devices? Sign up or sign in
Mariko 5
5
Jeso unamuphoza mutʼu wa pʼepʼo
(Matayo 8:28-34; Luka 8:26-39)
1Jeso na anafunzie ávuka ziya ra Galilaya, achiphenya itsʼi ya Agerasa. 2Jeso aripholaa mumo mashuwani tu, mutʼu mumwenga yekala una mapepo, walaa mabirani achenda kwakwe. 3Mutʼu yiye wakala usagala kuko mabirani, na kwakala kʼakuna aidimaye kumufunga hata na minyororo kahiri. 4Atʼu ákala adzimufunga kʼano nyinji na pʼingu, na minyororo ya magulu. Ela zizo pʼingu wakala achizivunza, na yiyo minyororo ya magulu wakala achiyitosa, na kʼakuna mutʼu yekala unaidima kumuumija. 5Yiye wakala uchesa choo, na usinda dii, kupiga kʼululu kuko mabirani na myangoni, na kudziyula-yula na mawe.
6Ndo ariphomona Jeso kwa kure, wamukazira achendamitʼa mavindi mbereze. 7-8Jeso achimwamba, “Pʼepʼo muchafu, mulae mutʼu yuyu.” Phapho, yiye mutʼu achigomba kwa laka ra dzulu achiamba, “Unamini we Jeso Mwana wa Mulungu Ariye Dzulu kuchira osi? Ninakuvoya ulaphe Mulungu kukala, kʼundaniturisa!” 9Chisha Jeso achimuuza achimwamba, “Kwani we dzinaro ndiwe ani?” Yiye mutʼu achiudzidza achiamba, “Dzina rangu mino, ndimi ‘Jeshi,’ kwakukala, siswi hu anji.” 10Chisha achimulombera muno Jeso kukala, atsʼiavuguze kulaa upande uo ao pʼepʼo.
11Ndo kwakala kuna duu bomu ra nguluwe a kufuga okala anarisa jemajema ra mwango, phephi na phapho. 12Ndo ao pʼepʼo achimulombera Jeso achimwamba, “Huhenzeze na uhuphirike kwa ara nguluwe hukaaphenye.” 13Jeso achiahenzeza, na ao pʼepʼo achimulaa yiye mutʼu, achendaaphenya ao nguluwe. Duu rosi ra nguluwe rokala rinatapira helufu mbiri, richivoromoka hata ziyani richihoha.
14Arisa a ao nguluwe ariphoona gago, ákaza mairo achendaambira atʼu nguma zizo kuko midzini na mindani, na atʼu achendalola gokala galairira. 15Ao ariphofika phokala Jeso, ámona yiye mutʼu yekala ulaviwa jeshi ra pʼepʼo, usegere phapho uvala nguwo, na akilize zidziuyatʼo kamare. Atʼu phapho, achogopha muno. 16Aratʼu atʼu arioona maneno gago gachihendeka, áambira atʼu anjine jisi mutʼu yiye arivyokala ulaviwa pʼepʼo ni Jeso, na achiaambira dzulu ya ao nguluwe. 17Atʼu a jimbo riro achanza kumuvoya Jeso auke phapho phao.
18Jeso ariphokala unaphenya mashuwani, yuyatʼu mutʼu yekala udzimulavya pʼepʼo, wamuvoya ende osi. 19Ela Jeso kʼamuhenzezere, itsʼiphokala wamwamba, “Uya mudzini ukaseme higo maneno mabomu godzihenderwa ni Bwana Mulungu, na jisi vyodzikonera mbazi.” 20Ndo yiye mutʼu achenda vyakwe, na achendaanza kusema kuko Dekapoli, gago maneno mabomu gokala uhenderwa ni Jeso, na atʼu osi achangalala.
Mwanache wa chiche na muchetʼu anaphozwa
(Matayo 9:18-26; Luka 8:40-50)
21Jeso aripholaa kuko Gerasa, wavuka kahiri riro ziya na mashuwa, achiuya uo upande unjine. Achiima kʼanda-kʼanda ya riro ziya, na duu bomu ra atʼu richirundikana mbereze. 22Mubomu mumwenga wa sinagogi, aihiwaye Jairo achidza phapho, na ariphomona Jeso, wamitʼa mavindi mbereze 23na achimuvoya achimwamba, “Mwanangu mudide wa chiche ni mukongo yupwi. Ninakuvoya, hinde ukamwikire mikonoyo umuvoyere kwa hata aphole, na akale moyo.” 24Jeso achikubali, na achiuka phamwenga naye.
Atʼu anji muno achimutuwa, na achikala anamufyeha kosi-kosi. 25Ndo phapho duuni, phákala phana muchetʼu mumwenga yekala ugaya na ukongo wa muruwo myaka kumi na miri. 26Muchetʼu yiye wakala umala aganga anji, na wakala umala miyoye yosi, ela kʼahendere baha, hata haliye yakaza kukala mbii. 27Ndo wakala usikira nguma mbidzo za Jeso, na kwa vivyo achiphyurira mumo duuni mwa atʼu achimutuwa Jeso nyuma hata achikumba valore. 28Wahenda vivyo, kwakukala, maazoge gákala ni, “Mimi nichirikumba valore tu, nindaphola kare.” 29Ndo ariphokumba tu, kuruwakwe kuchituma phapho kare, na achidzisikira mwiriwe uphola.
30Jeso achimanya kukala, mukotsewe udzimulaa. Ndo achirigalukira maruru riratʼu duu ra atʼu, na achiuza vivi, “Ni ani yedzirikumba valo rangu?” 31Anafunzie achimuudzidza achimwamba, “Wuzadze, ‘Ni ani yedzinikumba?’ Na hata uwe mwenye unaona ao atʼu vivyo akufyehavyo?” 32Ela Jeso yiye waenderera kulola kwa amone yekala uhenda vivyo. 33Phapho, yiye muchetʼu kwahivira wakala unagamanya godzihenderwa, wadzilavya na kuno unatetema kwa woga, mana, wakala unamanya udziatiya najisi atʼu.#5:33 Chishariya, vyakala muchetʼu achikala una ukongo wa muruwo, kʼahenzwa agwirikane na atʼu, hebu kukumba mutʼu kwa unaambwa una najisi. Achidzitsupha mbere za Jeso, na achimwambira ujeri wosi. 34Jeso yiye achimwamba, “Mayo, kuluphiroro ridzikuphoza. Enda na reri, na ukavugukwe kamare.”
35Jeso ariphokala ucheri kugomba gago, atʼu fulani ákudza kulaa mudzini kwa yiye Jairo, mubomu wa sinagogi na achimwamba vivi Jairo, “Mwanao kuratʼu udzefa. Kwa vivyo, tsʼimutsose bule yiye mwalimu.” 36Ela Jeso yiye kʼagatuwire mijali garatʼu gogomba ao, hata yiye wamwamba yiye mubomu wa sinagogi vivi, “Utsʼibabaike, kuluphira tu.” 37Na chisha, phapho Jeso kʼamuhenzezere mutʼu yeyosi amutuwe, atsʼiphokala Pʼetero, Jakobo na Johana nduguye yiye Jakobo tu.
38Ariphofika kuko mudzini kwa yiye mubomu wa sinagogi, Jeso waaona atʼu anapiga jembe, na anjine anarira muno kwa shenene. 39Jeso achiphenya mumo nyumbani, na achiauza vivi, “Kwadze munarira muno vino na yuno mwanache kʼafire, hata ni urere tu?” 40Ela ao atʼu achimona Jeso dza kwamba tsʼiye muzima. Ndo Jeso achialavya osi konze, achiahwala abaye na ameye yiye mwanache, na aratʼu anafunzie achiphenya kuko chumbani kokala yiye mwanache. 41Jeso achendamugwira mukono achimwamba, “Talita kumi!” Yiriyo maanaye ni, “Musichana, ninakwamba lamuka!” 42Ndo yiye musichana achiunuka phapho kare, na achanza kwenenda. (Yiye wakala una myaka kumi na miri.) Phapho atʼu achangalala muno. 43Jeso achiaamba atsʼimwambire mutʼu yeyosi kamare gago, chisha achiaamba amupʼe leu yiye musichana.
Currently Selected:
:
Highlight
Share
Copy
Want to have your highlights saved across all your devices? Sign up or sign in