ลูกา 8
8
มเซียะ ตอน หย่า กัน เยซู มี่ง
1ฆะฮ้า ไม้ เล่า, เยซู เฒว่ย มู้ง เฒว่ย ล์าง เญย มี่ง ฒุ่น ทิน-ฮู่ง โหฒว เฒี้ยว กุ๊น เมี่ยน เญย คู้ เฝียน. นิ่น เญย เหฒียบ เหญ่ย เต้า ไซ-ก๋อ หย่า เหธา เจี๊ยน นิ่น มี่ง. 2แอ๋ง ม่าย เต๋ย มเซียะ ตอน หย่า กัน เจี๊ยน มี่ง. น้าย เต๋ย มเซียะ ตอน ต้ง ฒิ่น ด่าง เยซู หฒุ่น เมี้ยน ธ้วด หย่า หฒ่อ หลง นิ่น บัว เญย แป่ง วั้ว เต๋ย. ม่าย เต้า เห่ว มาลียา, ต้ง เมี่ยน เห่ว, มักดาลา, วั้ว เต้า. เยซู หฒุ่น เสี่ย เต้า เมี้ยน ธ้วด นิ่น เญย ซิน.#มัดทาย 27:55-56; มาโค 15:40-41; ลูกา 23:49 3ม่าย คูซา เญย เอ๊า, โยอันนา. คูซา โหฒว เจียน โก๋ว เหฑ่ง เฮโล้ด ฮู่ง เญย จา-ตี้ง. แอ๋ง ม่าย สุสันนา เหธา มเซียะ ตอน ธั้ม เญย. นิ่น บัว หล่ง กั้น ม่าย เญย กะน้าย จวัง เยซู บัว.
ฮ์า ญิม เญย หว่า-เป๊ย
(เป๊ย หมั่ง มัดทาย 13:1-9; มาโค 4:1-9)
4ม่าย เมี่ยน ธั้ม! เญย กั๊บ ฒุ้น หย่า ม่าย น้าย นอม มู้ง, วั้ว นอม มู้ง เญย เมี่ยน ต้าย ล์อ เยซู. เยซู ฯฒฯ ก๊อง หว่า-เป๊ย ปุน นิ่น บัว หมวัง. 5นิ่น ก๊อง, “ม่าย ล่าน เมี่ยน ธ้วด มี่ง ฮ์า ญิม. ฮ์า เกา ญิม, ม่าย เต๋ย ด๊อด หฒุ เจ๊า, หฒุ เมี่ยน ธ้าย. เหนาะ หย่า ต้าย เฑ์า หญั่น เหฑ่ง. 6ม่าย เต๋ย ด๊อด หฒุ หละเปย๊ย-เดา. ญิม หฒุน ต้าย ไม้ เล่า ฯฒฯ ฆาย หมี่ อ๊ะ, เหว่ย หฒุ ไม้ ลั่ม แปง ววม. 7ม่าย เต๋ย ญิม ด๊อด หฒุ ฌิ้ม-หล่ม, หฒอบ เจี๊ยน ฌิ้ม โฮล ต้าย, ฌิ้ม บย์อง เจี๊ยน. 8ม่าย เต๋ย ญิม ด๊อด หฒุ เดา-หลง. ญิม ธ้วด โฮล ต้าย, เหยียด โก๊ว เซียว ตุ๊ เหยียด แป๊ะ โก๊ว.”
ก๊อง ลิ์ว น้าย เต๋ย หว่า, เยซู เห่ว เฉีย โฮล เญย ก๊อง, “หาย เต้า ม่าย มน่อม อ๋อย หฒุ แปง มน่อม หมวัง หลง.”
เยซู เหว่ย หาย ติ่ว หล่ง หว่า-เป๊ย หฌาว
(เป๊ย หมั่ง มัดทาย 13:10-17; มาโค 4:10-12)
9ไซ- ก๋อ บัว หน่าย เยซู, “น้าย ติ้ว หว่า-เป๊ย, เอ๋ย เล์ย ฮนั้ง หาย นอ?”
10เยซู ก๊อง, “ทิน-ฮู่ง โหฒว เฒี้ยว กุ๊น เมี่ยน น้าย เต๋ย เกม เจี๊ยน เญย สี่, ทิน-ฮู่ง ปุน เม่ย บัว ฮิ้ว หมี่ อ๊ะ, มป่า กะเหญี่ย เญย เมี่ยน ขูง ไฮ์ ก๊อง เป๋น หว่า-เป๊ย ฮนั้ง เหว่ย
‘ปุน นิ่น บัว หมั่ง หย่า ไม้ ปวัด,
ไฮ์ หย่า ไม้ เม่ง แปะ.’#อิสะยา 6:9
เยซู ก๊อง เม่ง ฮ์า ญิม เญย หว่า-เป๊ย
(เป๊ย หมั่ง มัดทาย 13:18-23; มาโค 4:13-20)
11“น้าย ติ้ว หว่า-เป๊ย เญย เอ๋ย เล์ย เซ ฮนั้ง น้าย. วั้ว เต๋ย ญิม เซ ทิน-ฮู่ง เญย คู้ เฝียน.#8:11 ไฟ ทิน-ฮู่ง เญย โต์ ไฟ ทิน-ฮู่ง เญย หว่า. 12ด๊อด หฒุ เจ๊า วั้ว เต๋ย ญิม เป๊ย เมี่ยน หมวัง ไฮ์ ทิน-ฮู่ง เญย คู้ เฝียน. มป่า เมี้ยน เญย ฮู่ง ต้าย ธ้าง ธ้วด เยียม เฮญี้ยว วั้ว เต๋ย คู้ เฝียน, ปุน นิ่น บัว ไม้ ไฮ่ เสียน ฯฒฯ ไม้ ตุ๊ เหฌียว.
13ด๊อด หฒุ หละเปย๊ย-เดา วั้ว เต๋ย ญิม เป๊ย เมี่ยน หมวัง ไฮ์ คู้ เฝียน ฯฒฯ อะเฮน้ย ฒิบ. มป่า เซ ฮนั้ง คู้ เฝียน เหฌี่ย ฑู่ง ไม้ โด. เสียน ไม้ เล่า, ปวั้ง หฒุ เสย เฮญี้ยว เญย สี่ ฯฒฯ ธ้วด หมี่ อ๊ะ.
14ด๊อด หฒุ ฌิ้ม-หล่ม วั้ว เต๋ย ญิม เป๊ย เมี่ยน หมวัง ไฮ์ คู้ เฝียน. โหฒว เกา, หลาย เสย หฒั่ง ขวน เฮญี้ยว เญย สี่, ไฟ หลาย ฮนั้ม ฒิ่น ญ่าน, ไฟ ป้าม เกน เญย เฌียน-โย่ว ดั๊ว นิ่น บัว, น้าย เต๋ย สี่ บย์อง เจี๊ยน นิ่น บัว หธีง ต้าย ฮนั้ง ไม้ ไฮ่ เจ้า เญย ญิม นอ.
15ด๊อด หฒุ เดา-หลง วั้ว เต๋ย ญิม เป๊ย เมี่ยน ไฮ์ ทิน-ฮู่ง เญย คู้ เฝียน, หล่ง เฮญี้ยว เหฒียบ ฒัวะ เญย เสียน, หย่า หล่ง หน่อย เอย เจี๊ยน โหฒว, หธีง ต้าย ฮนั้ง น้าย เต๋ย ญิม นอ, เฒี่ยง ตุ๊ กิ๊ด.
ปั๊ว ตัง, เฒาะ กะน้าย ฆบ เจี๊ยน ไฟ?
(เป๊ย หมั่ง มาโค 4:21-25)
16“ไม้ ม่าย หาย เต้า เตี๊ยม เหฒียะ ตัง แอ๋ง เฒาะ กะน้าย ฆบ เจี๊ยน ไฟ ต้อ มี่ง ตน โหธว-เดี๊ย. ตัง มต้าย ตน ตัง เญย ป้าย เหว่ย ปุน เปียะ เปย๊า เญย เมี่ยน หมั่ง ตุ๊ ปวัด ฌัง.#มัดทาย 5:15; ลูกา 11:33
17“ไม้ ม่าย หาย หญู่ง ปี๋ง เจี๊ยน เญย สี่ ไม้ หฒุ ธ้วด ย่าง. ไม้ ม่าย หาย หญู่ง เกม เจี๊ยน มป่า อ๋อย ม่าย เมี่ยน ฮิ้ว หย่า ปุน บย๋าง ย่าง ธ้วด ต้าย.#มัดทาย 10:26; ลูกา 12:2 18ฮนั้ง หน่าย เม่ย บัว อ๋อย หฒุ หล่ง เฮญี้ยว หมวัง หลง. เหว่ย หฒุ หาย เต้า ม่าย เญย, นิ่น อ๋อย จา ตุ๊ เก้า ธั้ม. หาย เต้า ไม้ ม่าย, เลี่ยม นิ่น ฮนั้ม ต้าย นิ่น ม่าย เญย ติ๊ เตียน, ฒู้ง อ๋อย เฒาะ มี่ง.”#มัดทาย 25:29; ลูกา 19:26
เยซู เญย มา เหธา นิ่น เญย โย์ว
(เป๊ย หมั่ง มัดทาย 12:46-50; มาโค 3:31-35)
19เยซู เญย มา เหธา นิ่น เญย โย์ว บัว มี่ง ล์อ เยซู มป่า เมี่ยน ธั้ม ไห่, นิ่น บัว เปียะ ไม้ เถา นิ่น วั้ว. 20ม่าย เมี่ยน บั๋ว เยซู, “เม่ย เญย มา เหธา เม่ย เญย โย์ว โซ้ว เจี๊ยน กะเหญี่ย แหมง ฒั้ว อ๋อย ปวั้ง เม่ย.”
21เยซู ก๊อง บั๋ว หฒวัง เมี่ยน, “เยีย เญย มา เหธา เยีย เญย โย์ว เซ ต้ง หมวัง ทิน-ฮู่ง เญย หว่า หย่า เอย เจี๊ยน โหฒว วั้ว เต๋ย.”
เยซู หัด ต้ม หฑยาว ตี้ง
(เป๊ย หมั่ง มัดทาย 8:23-27; มาโค 4:35-41)
22ม่าย ฮนอย นอ, เยซู บั๋ว นิ่น เญย ไซ-ก๋อ, “บัว มี่ง วั้ว หง่าน หฒิ ค้อย-ตอน เอาะ?” นิ่น บัว ฯฒฯ เปียะ ฑั้ง แฑง เจี๊ยน มี่ง อ๊ะ. 23มี่ง เกา, เยซู มฌ่อม หมี่ อ๊ะ. เลี่ยม เฒ่ย ป์อง กอง ต้ม หฑยาว, ป่วน ววม เจี์ย หล่าง ฆ์ม เปียะ ฑั้ง. นิ่น บัว เก้ง! กั้ม เหฑีย ไห่. 24ไซ-ก๋อ บัว ฯฒฯ มี่ง เห่ว เยซู เญีย ต้าย. นิ่น บัว ก๊อง, “เฒี้ยว อ้า! เฒี้ยว! บัว ด๊อด ววม ไต่ อ๊ะโล่ะ!”
เยซู เจี์ย ซิน หัด หฑยาว เหธา ววม-หล่าง. ต้ม หฑยาว ฯฒฯ ตี้ง, ววม-หล่าง ฮ้าบ, เซ้ก เหฑ่ง หมี่ อ๊ะ.
25เยซู หน่าย นิ่น เญย ไซ-ก๋อ บัว, “เม่ย บัว เญย เสียน ฟิม เจี๋ย หาย หมี่ อ๊ะ?” มป่า นิ่น บัว กั้ม เหฑีย ไห่, บัวะ ฮ่อง ไห่. ล่าน ฯฒฯ หน่าย ล่าน, “น้าย หาย เต้า เอ้าะ? นิ่น หัด หฑยาว หัด ววม, เลี่ยม หฑยาว เหธา ววม หย่า หมวัง นิ่น เญย หว่า.”
เยซู หฒุ่น เมี้ยน ธ้วด
(เป๊ย หมั่ง มัดทาย 8:28-34; มาโค 5:1-20)
26เยซู เหธา นิ่น เญย ไซ-ก๋อ บัว แฑง ฑั้ง มี่ง เถา เกลาซา เต่ย,#8:26 ม่าย เต๋ย โล์-ฮนอย โซว ก๊อง กาดาลา. กาลิลี ค้อย-ตอน เญย ต๋อย-หง่าน. 27นิ่น บัว ธ้วด ฑั้ง มี่ง ฝาว เบี๋ยน วั้ว หฒั่น, ม่าย เต้า วั้ว นอม มู้ง เญย เมี่ยน ต้าย ปวั้ง หฒุ เยซู. น้าย เต้า เมี่ยน ม่าย เมี้ยน เยียม นิ่น เญย ซิน. เล่า ไห่ ไม้ ฒุ ลุย-โหว หย่า ไม้ เยียม เปย๊า, ขูง เยียม วั้ว โฒ้ว-เก้ม ฮนั้ง.
28น้าย เต้า เมี่ยน เยี้ยด ปวัด เยซู นิ่น เห่ว เฉีย โฮล เญย ฯฒฯ บ๊าบ เหฌี่ย เยซู เญย หฑะเฮมียน เหน่า! เหน่า เญย ก๊อง, “เยียม ฮลัง เจี๋ย เญย ทิน-ฮู่ง เญย ตอน, เยซู อ้า! เม่ย ต้าย เยีย น้าย โหฒว หาย หญู่ง? โท้ ไม้ ตู๋ง เหฒย เยีย.” 29นิ่น ฮนั้ง น้าย นอ ก๊อง เหว่ย หฒุ เยซู หัด เฮยี่ย ไกว๊ เมี้ยน ธ้วด วั้ว เต้า เมี่ยน เญย ซิน. ไม้ กุ๊น ม่าย หลิ่ม โด้ เจี๊ยน ปั์ว-เหฒา แอ๋ง ม่าย เมี่ยน ฒั้ว เจี๊ยน, ตุ๊ เหฒีย หฑุ่น เมี้ยน เธี้ยว ต้าย ปุน นิ่น ธุด ตั๋ง หลิ่ม แอ๋ง หฒุ่น นิ่น มี่ง วั้ว เต่ย-ปูง-ฮวาง.
30เยซู หน่าย นิ่น, “เม่ย เญย บั๋ว เห่ว หาย หญู่ง?”
นิ่น เตา, “บั๋ว เห่ว กวั้น,” เหว่ย หฒุ เมี้ยน ธั้ม เญย เปียะ นิ่น เญย ซิน เยียม. 31วั้ว เต๋ย เมี้ยน โท้ เยซู ไม้ ตู๋ง หฒุ่น นิ่น บัว ด๊อด โด ไห่ เญย ค้วด.#8:31 น้าย นอม ค้วด เซ โด ไห่, ไม้ ม่าย กะเดี๊ย โด๊ะ เญย ค้วด.
32ม่าย เหยียด ต้ม กวั้น ตู์ง เยียม วั้ว เจี๋ย ไบ๊ ล์อ หญั่น. เมี้ยน ฯฒฯ โท้ เยซู ปุน นิ่น บัว เปียะ วั้ว กวั้น ตู์ง. เยซู หย่า ฆอย ฑุ่ย นิ่น บัว.
33เมี้ยน ฯฒฯ ธ้วด วั้ว เต้า เมี่ยน มี่ง เปียะ วั้ว กวั้น ตู์ง หมี่ อ๊ะ. เฒี่ยง กวั้น ตู์ง ฯฒฯ ถิว เหฌี่ย ขัม ด๊อด ค้อย-ตอน เหฒียม ไต่ เหฑ่ง หมี่ อ๊ะ.
34ยู์ง ตู์ง เญย เมี่ยน ปวัด น้าย เต๋ย สี่ ธ้วด, นิ่น บัว ฯฒฯ เปย๋า มี่ง ฒุ่น บั๋ว ฒี่ง กะญั์ว เหธา ฒี่ง กะเหญี่ย เญย ฟิ้ว-ล์าง เญย เมี่ยน หมวัง. 35เมี่ยน ไฮ์ ลิ์ว น้าย เต๋ย สี่, ฯฒฯ ธ้วด มี่ง หมั่ง. มี่ง เถา เยซู วั้ว, นิ่น บัว ปวัด วั้ว เต้า เมี่ยน เฒว์ย เจี๊ยน เยซู เญย เหฒา กะเฮลน, ฒุ เจี๊ยน ลุย-โหว หย่า ฑัง ต้าย อ๊ะ. นิ่น บัว ฯฒฯ กั้ม เหฑีย ไห่. 36ปวัด น้าย เต๋ย สี่ ธ้วด เญย เมี่ยน ก๊อง ปุน หฒวัง เมี่ยน ฮิ้ว ตุ๊ หฒุ เมี้ยน เปียะ วั้ว เต้า เมี่ยน ฮนั้ง หาย นอ ตุ๊ หลง ต้าย.
37เยียม เกลาซา เต่ย#8:37 เป๊ย หมั่ง 8:26. เญย หฒวัง เมี่ยน โท้ เยซู เล่ย ฆอย นิ่น บัว เหว่ย หฒุ นิ่น บัว กั้ม เหฑีย ไห่. เยซู ฯฒฯ เปียะ ฑั้ง มี่ง อ๊ะ. 38ต้ง เมี้ยน ธ้วด ลิ์ว วั้ว เต้า เมี่ยน โท้ เยซู ปุน นิ่น กัน เจี๊ยน มี่ง. มป่า เยซู เห่ว นิ่น หฑวน อ๊ะ, 39ก๊อง บั๋ว นิ่น, “หฑวน กั้น เญย เปย๊า อ๊ะ. หฑวน มี่ง หฒิว ทิน-ฮู่ง เถง เม่ย เญย เจ๊า ก๊อง เหฑ่ง บั๋ว เมี่ยน.” น้าย เต้า เมี่ยน ฯฒฯ หฑวน มี่ง หฒิว เยซู เถง นิ่น เญย เจ๊า ก๊อง เหฑ่ง ปุน เหยียด นอม มู้ง เญย เมี่ยน หมวัง.
เยซู หฒ่อ เต้า มเซียะ ตอน เญย แป่ง หลง หย่า เห่ว เต้า ฝุเจว๊ย นั่ง ต้าย
(เป๊ย หมั่ง มัดทาย 9:18-26; มาโค 5:21-43)
40เยซู เยียม วั้ว หง่าน หฒิ กาลิลี ค้อย-ตอน หฑวน ต้าย, ม่าย เมี่ยน ธั้ม เญย อะเฮน้ย เญย ฒิบ เหว่ย หฒุ นิ่น บัว เยียม วั้ว ฒั้ว เจี๊ยน นิ่น. 41ม่าย เต้า กุ๊น หวุ่ย ต้อง เญย เมี่ยน, บั๋ว เห่ว ไยลัด, ต้าย เถา. นิ่น บ๊าบ เหฌี่ย เยซู เญย เหฒา-เฮลน เหฌี่ย ชะ โท้ เยซู มี่ง นิ่น เญย เปย๊า 42เหว่ย หฒุ นิ่น เญย เซียะ-โดะ ปุ๊ด แป่ง อ๋อย ไต่ ไห่ อ๊ะ. น้าย เต้า เซียะ เญย หฮญัง-เจ๊ย เล่ย ไม้ โก เหฒียบ เหญ่ย หฮญัง.
เยซู กัน ไยลัด มี่ง เกา, เมี่ยน ธั้ม! ไห่ เบ๋ง เจี๊ยน มี่ง. 43หย่า ม่าย เต้า มเซียะ ตอน ปุ๊ด แป่ง-ฮลุด ตุ๊ เหฒียบ เหญ่ย หฮญัง. นิ่น มี่ง ล์อ เดีย-ไซ หฒ่อ เกา นิ่น เญย แป่ง, หฒาว เหฑ่ง นิ่น เญย ฒิ่น ญ่าน, หย่า ไม้ ม่าย หาย เต้า หฒ่อ ตุ๊ นิ่น หลง. 44นิ่น ฯฒฯ เบ๋ง เจี๊ยน มี่ง เถา เยซู เญย ฆะฮ้า ฆาง ฮลัว เยซู เญย ลุย-จั๊วะ. แป่ง-ฮลุด ฯฒฯ เลี่ยม เฒ่ย ตี้ง หมี่ อ๊ะ.
45เยซู หน่าย ก๋า, “หาย เต้า ฮลัว หฒุ เยีย?”
หย่า ไม้ ม่าย หาย เต้า แล์ง. ปีเต ฯฒฯ ก๊อง, “ไซ-เตี๋ย อ้า! เมี่ยน ธั้ม เว่ย เจี๊ยน เม่ย, เบ๋ง หฒุ เม่ย ซ่าะ?”
46มป่า เยซู ก๊อง, “เก้ง ม่าย เมี่ยน ฮลัว หฒุ เยีย เญย เหลาะ. เยีย ฮิ้ว เญย, เหว่ย หฒุ ม่าย เต๋ย เยีย เญย ชะ ธ้วด มี่ง เถง เมี่ยน หฒ่อ แป่ง หมี่ อ๊ะ.”
47วั้ว เต้า มเซียะ ตอน หมวัง ไฮ์ ปี๋ง ไม้ เบว์ย อ๊ะ, ฯฒฯ ซิน หฒิน เจี๊ยน เญย ต้าย บ๊าบ เหฌี่ย เยซู เญย เหฒา-เฮลน. นิ่น ตอง เจี๊ยน หฒวัง เมี่ยน บั๋ว เยซู นิ่น เหว่ย หาย ติ่ว ต้าย ฮลัว เยซู เญย ลุย-จั๊วะ, หย่า ก๊อง นิ่น เญย แป่ง เลี่ยม เฒ่ย หลง เหฑ่ง หมี่ อ๊ะ.
48เยซู บั๋ว นิ่น, “มเต้า มเซียะ ตอน อ้า! เหว่ย หฒุ เม่ย เสียน เยีย, เม่ย เญย แป่ง หลง หมี่ อ๊ะ. กุ๊น แป้ง ออน เญย หฑวน อ๊ะ โอ่.”
49เยซู หธ่อ ก๊อง เจี๊ยน หว่า วั้ว หฒั่น, ม่าย เต้า เมี่ยน เยียม วั้ว เต้า กุ๊น หวุ่ย ต้อง เญย เมี่ยน เญย เปย๊า ต้าย บั๋ว ไยลัด, “เม่ย เญย เซียะ ไต่ หมี่ อ๊ะ. ไม้ หฒุ ต้าย หละเญ้า ฟิน-แซง อ๊ะ โอ่.”
50มป่า เยซู ไฮ์ น้าย เต๋ย หว่า นิ่น ฯฒฯ ก๊อง บั๋ว ไยลัด, “ไม้ ตู๋ง กั้ม เหฑีย โอ่. ขูง อ๋อย หฒุ เสียน ฮนั้ง. เม่ย เญย เซียะ ฯฒฯ หลง ต้าย อ๊ะ.”
51มี่ง เถา ไยลัด เญย เปย๊า, เยซู ไม้ ปุน หาย เต้า เปียะ. ขูง ปุน ปีเต, โยฮัน, ยากอบ เหธา วั้ว เต้า เซียะ เญย เตี๋ย หม่า เปียะ ฮนั้ง. 52หฒวัง เมี่ยน เยียม กะเหญี่ย เบี้ยวๆ เญย เญี้ยม. เยซู ก๊อง, “ไม้ ตู๋ง เญี้ยม อ๊ะ. นิ่น ไม้ ไต่. นิ่น มฌ่อม ฮนั้ง.” 53หฒวัง เมี่ยน ฯฒฯ จั๊ด เยซู, เหว่ย หฒุ นิ่น บัว ฮิ้ว ตุ๊ วั้ว เต้า ฝุเจว๊ย หฒะเก้ง ไต่ หมี่ อ๊ะ.
54มป่า เยซู นั้น เจี๊ยน วั้ว เต้า เซียะ เญย ปั์ว เห่ว, “เซียะ อ้า! เจี์ย ซิน ต้าย ม่าะ!” 55วั้ว เต้า เซียะ ฯฒฯ นั่ง ต้าย, เลี่ยม เฒ่ย เจี์ย ซิน ต้าย อ๊ะ. เยซู ฯฒฯ บั๋ว นิ่น บัว ล์อ กะน้าย ปุน วั้ว เต้า ฝุเจว๊ย หญั่น. 56เซียะ เญย เตี๋ย หม่า บัวะ ฮ่อง ไห่ มป่า เยซู บั๋ว นิ่น บัว, น้าย เต๋ย สี่ ไม้ ตู๋ง ก๊อง บั๋ว หาย เต้า.
Currently Selected:
ลูกา 8: IuMiTH
Highlight
Share
Copy
Want to have your highlights saved across all your devices? Sign up or sign in
Mien Bible (Thai Script) © Thailand Bible Society, 2007
