NJOANA 13
13
Yiesû aathambia arutwa baake magûrû
1Kîatho gîa *Pasaka kîrî akubî gûkinya, Yiesû naiyî îgiita rîake irîarî rîgûkinya rîa kuuma nthîgûrû îno, athi kîrî Îthe. Rîonthe neendeete bara baarî baake gûkû nthîgûrû, na naabooniirie bûra aabeendeete bûgana.
2Yiesû na arutwa baake ibaarîyaga irio bia ûgoro. Nkoma nîarî îgwîkîra Njundas wa Simioni Mûcikariota îthûgaania rîa gûkunyanîra Yiesû. 3Yiesû naiyî Îthe namwete wathani bunthe. Naiyî aumîîte kîrî Ngai na aacookeete wakîrî we. 4Yiesû aûka ara baarîyagîra. Aaruta nguo îra ndaaya, aathûkia taurû ooga kauna. 5Eekîra rûûyî karaîni, aanjîîria kûthambia arutwa baake mbayo akîbagiragia na taurû.
6Agûkinyîîra Simioni Petûrû, Simioni amûûria, “Mwathani, woû ûnthambie mbayo?”
7Yiesû amwîra, “Îîndî ûtikûmenya bûra nkûrûtha, îndî ûkaamenya nyumaani.”
8Petûrû eera Yiesû, “Gûtirî rîo ûkanthambia mbayo, rî kana rî!”
Yiesû amwîra, “Gûgatuîka ntikûthambia, ûtirî na ngwatanîro naani.”
9Simioni Petûrû i rîo eerire Yiesû, “Mwathani, wana ti mbayo cionka, nthambia kinya njara na kîongo kîene!”
10Yiesû auga, “Gûtirî gîtûmi kîa muntû eerîîtie acooka kwîria kaîrî n'ûntû n'ûmûtheru kunthe, twanga akathamba mbayo cionka. Bwinthe bûrî baatheru, tatiga ûmwe akî.” (11Yiesû naiyî ûra akaamûkunyanîra. I ntûma augire, “Bwinthe bûrî baatheru, tatiga ûmwe akî.”)
12Yiesû akûrîîkia kûthambia arutwa baake mbayo eekîra nguo îra ndaaya kaîrî. Aacooka ara aakari. Aûria arutwa baake, “Anga bûkûmenya bûra ndabûrûtha i ta kwonania ata? 13Biû bûmbîtaga Mwarimû kana Mwathani, na ûtiîgagua bûkîbîtia n'ûntû ndî we. 14Kwoogu ûkaaya kwîgua niû ndî Mwathani na Mwarimû wenu inkûbûthambia mbayo, wana biû ibûbatîîrue bûthambanagia mbayo. 15I ngerekano ndabwonia, kaingo naabi bûrûthanîra ûgu ndabûrûtha.
16“Na mma ga nkûbwîra, nkombo t'yo nene kîrî ûra amîandîkîîte. Na mûtûmwa t'we mûnene kîrî ûra amûtûmîîte. 17N'ata bwîgua bûrî bathaarime bûgana ûkaaya kwîgua bûkaarûthaga ûgu ndabûrutana!
18“Îndî ntikwarîîria îgûrû rîenu bwinthe. Imbiyî bara nthuurîîte. Na nwa mwanka ûroria bûra bûrî *Maandîkooni Maatheru bûûyûre, bûra buugîîte, ‘Ûra twarîyanîîre irio amwe n'we naangarûkire.’#Cabuurî 41:9
19“Ndîbwîra îîndî mbere ya mantû marûthwa, kaingo rîra makaarûthwa bûgeetîgia i niû we. 20Na mma ga nkûbwîra, ûra eetîgagîra mûtûmwa wakwa, i niû eetîgagîra. Na ûra aambîtîgagîra, n'ûra aantûmire eetîgagîra.”
Yiesû naiyî agaakunyanîrwa
(Math. 26:20-25; Mko. 14:17-21; Ruka 22:21-23)
21Yiesû akûrîîkia kuuga ûgu, aatua kwîgua agîtangîka mûno nkorooni yake. Auga atakwitha, “Na mma ga nkûbwîra, ûmwe wenu agaankunyanîra.”
22Arutwa baanjîîria kûraithana barigarîîte, batakûmenya n'ûû we waciao aarî arûthe ûgu. 23Ûmwe wa arutwa, ûra Yiesû eendeete mûno naakari akubî na Yiesû. 24Simioni Petûrû amûûnya, amwîra, “Tamûûrie n'ûû.”
25Mûrutwa ûyu aathiyathiyanga akubî na Yiesû. Amûûria, “N'ûû we, Mwathani?”
26Yiesû auga, “N'ûra nkaanenkera kîng'enyua kîa mûgaate ndagîtombeka mbakûriini.” Aatombeka kîngenyua kîa mûgaate mbakûriini, aanenkera Njundas wa Simioni Mûcikariota.
27Njundas akwewa kîng'enyua gîku, Saitaani aathûngîra nkorooni yake. Yiesû amwîra, “Rûtha bûra ûbatîîrue ûrûtha na mpwî.” 28Gûtirî we kîrî bara baarî agu baarîyagîra aamenya gîtûmi kîa Yiesû kûmwîra ûgu. 29Na n'ûntû Njundas n'we aarî mwaigi wa kîondo kîra beekagîra mbia, bamwe ba arutwa baathûgaaniirie Yiesû naamwîrîîte athi agûre bira biendekanaga n'ûntû bwa kîatho, kana akae nkîa ûteethio. 30Njundas akwewa kîng'enyua gîku aûka warîo, auma aathi. Kwarî ûtugû.
Yathana rîngî
31Njundas akûthi, Yiesû auga, “Îîndî mwago wa Mwana wa Muntû nwengeerie kwonekana. Na kuumania na uu, mwago wa Ngai wana uu ûkoonekana. 32Na mwago wa Ngai wonekana, Ngai akoonania mwago wa Mwana wa Muntû gûkûrûkîîra kîrî we. Na aakara kûrûtha ûgu, akaarûtha ûgu warîmwe.”
33“Aana baakwa, gatigeere kagiita gaakai ga kwîgua ndî amwe naabi. Na ndabûtiga bûgancûa. Na ka mbwîreeni bûra ndeerire atongoria ba Ayaundi. Ndabeerire, ‘Biû bûtiûmba kûthi ara nthiîte.’
34“Na îîndî inkûbwaa yathana rîngî rîîyerû. Na rîo i rîrî: endanagaani. Endanagaani ta bûra naani mbwendeete. 35Weegua bûkeendanaga, gûtirî we atakîmenya bûrî arutwa baakwa.”
Yiesû naiyî Petûrû akamûkaana
(Math. 26:31-35; Mko. 14:27-31; Ruka 22:31-34)
36Simioni Petûrû aûria Yiesû, “I kû ûthiîte, Mwathani?”
Yiesû amûcookeria amwîra, “Kûra nthiîte woû ûtiûmba kûnthingata îîndî, îndî nyumaani ûkaanthingata.”
37Petûrû amûûria, “I mbi n'ûntû ntaûmba gûkûthingata îîndî, Mwathani? Na ûkeegua inkûûragwa nwa mbûragwe n'ûntû bwaku.”
38Yiesû amûûria, “Nûkwîbîtîgia wabu nwa wîrute ûkaûragwa n'ûntû bwakwa? Na mma ga ngûkwîra, mbere ya ngûkû îkurura, ûgaankaana maita mathatû.”
Currently Selected:
NJOANA 13: thk
Highlight
Share
Copy
Want to have your highlights saved across all your devices? Sign up or sign in
© 2019, Bible Translation and Literacy
