MATHAYO 25
25
Ngerekano ya aarî îkûmi beeteereete mûgûrani
1Yiesû auga, “Nwa tûbuanaanie ûnene bwa îgûrû na aarî îkûmi bara ûgoro bûmwe baathûkiirie ntandîka ciao baathi kûthagaana mûgûrani. 2Bataano kîrî bo baarî baataku îndî babu bangî bataano baarî baûme. 3Babu bataku bakûthûkia ntandîka ciao bataakamata maguta ma kûgana. 4Babu baûme baakama maguta marî ntandîkaani na mangî na cûûba. 5Gûgûtuîka mûgûrani agûceererwa ataayîîte, aarî babu bonthe baanoga bagwatwa i toro.
6“Ûtugû gatî kanene kwaugîîrua na inya kweerwa, ‘Yîî, n'ûyu mûgûrani aayîîte! Mûthagaaneeni.’
7“Aarî babu baumbuthûka torooni, beetithia ntambi. 8Bara bataaririkana gûkamata maguta ma kûgana beera babu baarî na mo, ‘Tûkundieni maguta twongeere, ntandîka cietû nikwenda kwora.’
9“Bara baarî na mo babeera, ‘Arî! Tûkabûgaûrîra matitûgana na tiû. Îthiini kîrî bara beendagia bûgûre meenu.’
10“Aarî babu bakûthi kûgûra, mûgûrani aaya baathi wikiini na bara baarî oogo. Bakûthûngîra kûra kîatho kîathuuranîrîtwe, mûrango waingwa. 11Aarî bara baarî bakûthi kûgûra maguta baaya. Beetana, ‘Itû, aba, tûrugûrîre.’
12“Mûgûrani abeera, ‘Arî. Na mma ntibwiyî.’ ”
13Yiesû aarîîkia na kwîra arutwa baake, “Kwoogu rîonthe karagaani bwîmenyeereete n'ûntû bûtiiyî ntugû kana îthaa rîra Mwana wa Muntû akaaya.”
Ngerekano ya aruti ngûgî bathatû bara baanenkeretwe taranta
14Yiesû eera arutwa baake, “Na kaîrî nwa tûbuanaanie ûnene bwa îgûrû na muntû ûmwe aathiîte rûgendo. Mbere ya athi eeta aruti ngûgî baake abeera bamûmenyeere into. 15Abanenkera mbia beetaga taranta.#25:15 Taranta îmwe yarî mbia inyingî mûno. Ûmwe amûnenkera taranta itaano, ûyu ûngî ciîrî, na ûyu ûngî îmwe kûringana na bûra aiyî muntû narutaga ngûgî bûgana. Rîru aathi. 16Ûra aanenkeretwe taranta itaano ataata thaa. Aathiire aaringa biacaara na cio oona baita ya cingî itaano ta cio. 17Ûra eetwe ciîrî wana we aathiire aaringa biacaara na ciake oona baita ya cingî ciîrî. 18Îndî ûra eetwe îmwe, we aathiire eenja karinya bantû nthîgûrû aathika ku.
19“Nyuma ya îgiita rîîraaya, mwene mûciî aacooka. Eera aruti ngûgî babu baake bamwîre bûra baarûthire na mbia ira aabatigîrîte. 20Ûra eetwe taranta itaano, amûreetera cingî itaano. Amwîra, ‘Niû, mûnene, wanenkeere itaano ndathi ndabaitania ciakinya îkûmi. Îka, mûnene.’
21“Mûnene wake amwîra, ‘I bwega mûno, mûrutî ngûgî mwîtîgua! N'ûntû ûgûtuîka mwîtîgua na biikai, ngakwaa biingî. Ncû ûkeneere na woû ngîkeneera.’
22“Ûra n'we eetwe taranta ciîrî aaya. Amwîra, ‘Niû, mûnene, wampeere ciîrî ndathi ndabaitania ciakinya inya. Îka, mûnene.’
23“Mûnene wake amwîra, ‘I bwega mûno, mûruti ngûgî mwîtîgua! N'ûntû ûgûtuîka mwîtîgua na biikai, ngakwaa biingî. Ncû ûkeneere na woû ngîkenera.’
24“Ûra eetwe îmwe aaya. Amwîra, ‘Niû, mûnene, n'ûntû mbiyî ûrî muntû ûmûûmo na ûkethaga ara ûtaanda na ûgaakûra kîra ûtaanîka, 25indakuthûkire. Ndathiire ndeenja karinya ndaitha mbia ciaku ku. Ene n'ino wabûra, ka.’
26“Mûnene amwîra, ‘Woû ûrî mûruti ngûgî ûmûthûûku na ûrî kîthao! Aabu wana ûkeegua nwiyî nkethaga ara ntaanda na ngaakûra kîra ntaanîka 27rî, ûtikîmbaigîra cio mbanki ndaaya nkathûkia mbia ciakwa irî na baita?’
28“Mûnene auga atunywe taranta înu aamwete înenkerwe ûra ooneete baita ya taranta itaano. Auga, 29‘Gîtûmi i kwîgua ûra arî na gîntû nkamwongeera kiingîe nkûrûki ya kîthimi. Îndî ûra gûtarî kîo arî na kîo, wana gîîkai kîra arî na kîo inkaamûtunya 30na mmwingîre ome mwinduuni kûra ûkeegua kûrî na kîrîro na kîeba kîînene mûno.’ ”#25:30 Kîîngiriki kiugîîte: bagîkabakabaga magego.
Ng'ondu na mbûri ikaathûranwa
31Yiesû eera arutwa baake, “Rîra Mwana wa Muntû akaaya arî na mwago wake wa ûnene na arî na araîka bonthe, akaaya akare nthî gîtîîni gîake kîa ûnene. 32Antû bonthe beethîrane mbere yake abaathûrane ta muntû akwathûrana ng'ondu na mbûri. 33Akaathûra ng'ondu bwa ûrîo na mbûri bwa ûmotho.
34“Rîru eere bara ûkeegua barî bwa ûrîo, ‘Ncûûni, biû Baaba athaarimîîte bûthûkie ûnene bûra aabûthuuranîîre bûrî rûgai rwenu kuuma wo nthîgûrû îkûûmbwa. 35Ndarî na yûûra bwangaagûra. Ndarî na bûûta bwankundia rûûyî. Ndarî mûgeni bwangwata ûgeni. 36Ndathirîîtie nguo bwampa imbega. Ndaayiirue bwaya kûndaitha. Ndathaîkîîtwe nceera bwaya kûmbona.’
37“Babu baagîru bamûûrie, ‘Mwathani, i rî warî na yûûra twakûgaagûra na i rî warî na bûûta twagûkundia rûûyî? 38I rî warî mûgeni twakûgwata ûgeni na i rî wathirîîtie nguo twakwaa imbega? 39I rî wayîîtue twaya gûkûraitha na i rî wathaîkîîtwe nceera twaya gûkwona?’
40“Mûnene akaabeera, ‘Na mma ga nkûbwîra, ûntû bunthe bwarûthîra wakîra ûmwe wa antû baakwa bara beegagua bakîenda ûteethio i ta niû bwarûthagîra.’
41“Rîru mûnene acooke eere bara na bo ûkeegua barî bwa ûmotho, ‘Biû bûrî baarume! Umaani aaga ndî bûthi mwankiini ûra ûtooraga rî kana rî, ûra Nkoma na araîka baake bathuuranîrîtwe. 42Ndarî na yûûra na bûtangaagûra. Ndarî na bûûta na bûtankundia rûûyî. 43Ndarî mûgeni na bûtangwata ûgeni. Ndathirîîtie nguo na bûtampa imbega. Ndaayiirue na bûtaaya kûndaitha na ndathaîkîîtwe nceera na bûtaaya kûmbona.’
44“Bamûûrie, ‘Mwathani, i rî warî na yûûra, kana bûûta? I rî warî mûgeni, na i rî wathirîîtie nguo îndî twarega gûgûteethia? I rî wayîîtue, na i rî wathaîkîîtwe nceera îndî tûtaaya gûkwona?’
45“Mûnene akaabacookeria abeere, ‘Na mma ga nkûbwîra, rîra bwaregaga gûteethia antû baakwa nwa bara baniini na bakîendaga ûteethio i ta niû bwaregaga gûteethia.’
46“Bakaathi îkaanûkiani rîtakîthira rî kana rî, îndî bara baagîru bakaathi mwoyooni wa tene na tene.”
Currently Selected:
MATHAYO 25: thk
Highlight
Share
Copy
Want to have your highlights saved across all your devices? Sign up or sign in
© 2019, Bible Translation and Literacy
