MAARIKO 11

Yiesû aakinya Njerusaremu akeneereetwe mûno

(Math. 21:1-11; Ruka 19:28-40; Njo. 12:12-19)

1Yiesû na arutwa baake baakara gûkinya Njerusaremu. Barî akubî gûkinya gataûni geetagwa Bethipage na kangî geetagwa Bethania, Karîmaani ka Mîceituuni, Yiesû aatûma arutwa baake baîrî bathiyaga. 2Abeera, “Îthiini gataûni gaka karî mbere aaga, na bwakinya ûgu bûkoona kayaû ka îng'ooi gataakamata muntû kathaîkîîtwe. Bûthaûre ko bûreete. 3Ûra akaabûûria i kî n'ûntû bûgûkathaûra, bûmwîre, ‘I Mwathani arî bata na ko na agagacookia waaga, atiikarakara na ko.’ ”

4Arutwa babu bakûthi beethîra kayaû gaku ka îng'ooi kathaîkîîtwe mûrangooni wa nyomba, akubî na barabara, bakathaûra. 5Antû bamwe baarûngi waagu babaûria, “I kî n'ûntû bûkûthaûra kayaû gaku?” 6Arutwa babu babacookeria babeera wabûra Yiesû aabeerîîte bacookie bauge. Antû babu babarekeeria baathi na ko 7baareetera Yiesû. Baarîra Yiesû tûbuuti twao mûgongo wa ko, Yiesû aakarîra. 8Antû bara baingî baara tûbuuti twao barabaraani. Na bamwe baatema mathîgî baara barabaraani. 9Bonthe bara baarî mûtongoria na bara baumîîte Yiesû nyuma baugîîria bauga,

“Ocana! N'ûmûthaarime ûra aayîîte

kwa riîtwa rîa Mwathani!

10Ûnene bûra bûûyîîte,

bwa kîûyûyû gîetû, Ndaundi, i bûûthaarime.

Ocana kîrî ûra arî îgûrû mûno mûno!”

11Yiesû aakinya Njerusaremu. Aathi nyomba ya Ngai, oona bûra bunthe gwakari gûku ndeni. Na n'ûntû ikwarî gûkwanjîîria gûtuga, auma Njerusaremu aacooka Bethania na arutwa bara baake îkûmi na baîrî.

Yiesû aarîrîka mûkûyû

(Math. 21:18-19)

12Rûûni baumîîte Bethania, Yiesû eegua yûûra. 13Arî kûraaya oona mûkûyû ûmûririmu. Aathi kwona kana nwarî na nkûyû. Akûthi oona i mathangû monka maarî n'ûntû gataarî kagiita ga nkûyû gûciarwa. 14Yiesû eera mûkûyû ûyu, “Gûtirî muntû akaarîa nkûyû ciaku kaîrî! Woû ûtikooro ûciara kaîrî!” Arutwa baake ibeegiirue akiuga ûgu.

Yiesû eengatia antû nyomba ya Ngai

(Math. 21:12-17; Ruka 19:45-48; Njo. 2:13-22)

15Bagûkinya Njerusaremu, Yiesû aathi nyomba ya Ngai aanjîîria kwîngatia antû ku bara baagûranagîra na bara beendanagîria. Aakuûrania meetha cia bara baakûûranagia mbia na tûkongoro twa bara beendagia macea ma mîciî. 16Aaregeera bara aatuîkîîrie baayîîte kwendia biao, kûbikûrûkia nyomba ya Ngai. 17Yiesû eera babu eengatagia, “Anga *Maandîkooni Maatheru gûtiandîkîîtwe, ‘Nyomba yakwa îgeetwa nyomba ya mîgongo yonthe kûra îkaandombera’? Îndî biû bûmîtuîkithîîtie ‘îkurungu rîa kwîbithaga aamba’!”#Isaaya 56:7; Njeremia 7:11

18*Athînjîri bara banene ba Ngai na aarimû ba watho bakwîgua Yiesû auga ûgu, baanjîîria gûcûa njîra ya kûmûûraga. Îndî ibaamûkuthûkaga n'ûntû antû ibaakeneete n'ûrutani bwake. 19Gûgûkinya ûgoro Yiesû aathi na arutwa baake.

Ûrutani kuumania na mûkûyû ûra Yiesû aarumire

(Math. 21:20-22)

20Rûûni rûkîîrî, Yiesû na arutwa baake bathiîte baakûrûkîîra akubî na mûkûyû ûra Yiesû aarumîîte. Boona ûûmîîte na mîri mîene. 21Petûrû aaririkana. Eera Yiesû, “Mwarimû, ene mûkûyû ûra ûrarumire nûraûmire!”

22Yiesû eera arutwa baake, “Karagaani bwîtîgîîtie Ngai. 23Na mma ga nkûbwîra, ûkeegua muntû atarî na nkanja nkorooni yake, ûkeegua eetîgîîtie bûra akuuga bûgaatuîkîka, akeera kîrîma ta gîkî, ‘Kûûka ûkagwe îriani,’ gûkarîka woogu auga. 24Kwoogu bûra nkuuga n'atî kîonthe kîra bûkaûria marombaani meenu, îgaguani bwîtîgîîtie bûkeewa kîo. 25Na rîonthe bûkîromba, îgaguani bûrekanîrîte bûra bunthe muntû aûmba kwîgua abîtîrîtie ûra ûngî na bu, kaingo Abaagu ûra arî îgûrû n'we akaabûrekera mabîtia meenu. [26Bûkarega kûrekanagîra, wana Abaagu ûra arî îgûrû atibûrekera na biû.]”#11:26 Mabuku mamwe ma Kîîngiriki matirî mûstaarî ûyû.

Yiesû aûrua ara arutîîte watho

(Math. 21:23-27; Ruka 20:1-8)

27Yiesû aacooka Njerusaremu kaîrî. Akîriûngariûnga agu nja ya nyomba ya Ngai, *athînjîri bara banene ba Ngai, aarimû ba watho, na akûrû baaya. 28Bamûûria, “I kû ûrutîîte watho bwa kûrûtha mantû mama ûkûrûtha? Na n'ûû akwete bu?”

29Yiesû abeera, “Wana niû ka mbûûrieni. Bwaûmba gûncookeria, wana niû nkabwîra ara ndutîîte watho bwa kûrûtha mantû mama nkûrûtha.” 30Abaûria, “I kû Njoana aarutîîte watho bwa kûbaatithania? I kuuma kîrî Ngai, kana i kuuma kîrî muntû? Ncookeriani.”

31Baanjîîria kwîrana, “Twamwîra, ‘I kuuma kîrî Ngai,’ agaatûûria, ‘Aabu i kî n'ûntû bûtaamwîtîgia?’ 32Na twamwîra, ‘I kuuma kîrî muntû,’ ... arî, tiga!” Ibaakuthûkaga kîrîndî n'ûntû antû beetîgîîtie wabu Njoana aarî kîroria. 33Kwoogu beera Yiesû, “Tûtiiyî.”

Yiesû abeera, “Wana niû ntibwîra ara ndutîîte watho bwa kûrûtha mantû mama nkûrûtha.”

Currently Selected:

MAARIKO 11: thk

Highlight

Copy