Lûk 13
13
Bɨ̀ waꞋa mènəè kàbɔ̀ŋ mɨ̧
1Bòt ko bɔ wu abot la, e tseke tê ndɔ̀kè ànəa Pȩlèt ndɨ tà li mbùŋè bòt Galìlî ko àfɨꞋa bɔ li ngua nkɨ̧̀ɨ̧̀ma banyà̧ ŋǎ abua Mbɔ̧ɔ̧mà la. 2Yesò bɨ̀ɨ̀lè nê, “Bɨ mɨɨtè nê bòt Galìlî baa bɔ li mpfəèꞋtê la e li ngɨ a kàbɔ̀ŋ tè ntsè àbəꞋa bòt Galìlî à ko? 3A ntsě ale! Ka e ngu a si shua wɨ̧ nê, bɨ bakà kùbte mèntɨ̧ɨ̧ mɨ̧ ewaꞋa mènəè kàbɔ̀ŋ mɨ̧, ko bɨa li pfəꞋte bàgème mbɨ̀Ꞌɨ̀ bɔ̀ɔ̀ba. 4Kò bɨa laꞋnê ghǎ ane ànəa bòt bu èghem ntsɔ̀b bafà̧aã a Silòàm, lob li nkwen a ègwet lɔb bɔ pfəꞋtè la à? Bɨ mɨɨtè nê bɔ li ngɨa kàbɔ̀ŋ tè ntsè bòt bàgème a Jèlusalèm? 5A ntsè ale! E ngu a si shua wɨ̧ nê, bɨ bakà kùbte mèntɨ̧ɨ̧ mɨ̧ ewaꞋa mènəè kàbɔ̀ŋ mɨ̧, ko bɨa li pfəꞋte bàgème mbɨ̀Ꞌɨ̀ bɔ̀ɔ̀ba.”
Èngà̧teme adù̧ àyɨt a Fik
6Yesò ghɨ̀ ale, mè shu awɔb èngà̧teme wàa, nê, “Wòt ko le lɔ̂Ꞌ mbɔ̀ àyɨt a fik a mbȩ zi. Tà lɔ̀Ꞌ ane àli ako nga kaabe tètaãaãte fik, ka tà kà ye. 7Ale, tà shu abua wɔ̀fàꞋ vi nê, àfɨ̀Ꞌ yaa wu èngùꞋ yetat, mbɨ̀Ꞌɨ̀ mâ bùꞋ me kɨꞋɨ àdzìꞋ yaa abàꞋa tètaãaãte fik, ka è nka ye ka kemɔꞋ la. ‘Nê, tà kòꞋò àyɨt a ngaa màꞋa a si, a bakà bɔ̂ ndɨ àa me jɨ si àku la.’
8“Wòt àfàꞋ wu mè shu abua tǎt vi nê, ‘Tê, sa àyɨt a mbɔŋ ane èngùꞋ waa wemɔꞋ la. Maa nyàꞋà èten egheebe, ebɔ zì ètsaꞋ ntsɔ̧̀ tè èbɨ ngaa aa lu̧u̧. 9È me wu ane èngùꞋebȩ e kɔɔlè, ko aa wu ane ntsɔ̧̀, mbə è baka kɔ̀ɔ̀lê, à ghɨ̀ bɔ kòꞋ maꞋa a si.’ ”
Yesò bəâ àvi kǒ tàa ŋɔ̧̀ɔ̧̀mà la àliapfəèa Bèjuê
10È li ngu ane àliapfəèa Bèjuê àko, Yesò me nyɨꞋte èngǎ̧ Mbɔ̧ɔ̧mà a lob Mbɔ̧ɔ̧mà yɔb kǒ. 11Àvi kǒ wuê abot fo kàbɔ̀ŋ ghɨ̂ tà ghɔ̧̀ɔ̧̀nè ane èngùꞋebȩ èghem ntsɔ̀b yefà̧aã la. Tà ko nê, ye ŋɔꞋɔ tè mèndɔ̀Ꞌɔ ka tsi nguê. 12Mbɨ̀Ꞌɨ̀ Yesò ye atò la, tà tɔ atò nê, “Mê, àghɔ̧ ayê a sà àwê.” 13Yesò ghɨ̀ ale, nɔ̀ŋè àbu azi àtsə atò, kɔ̧̀ tò yu bê ndɔ̀Ꞌ tè àvi wu tɨ̧ɨ̧ ndɨŋndɨ̀ŋ, mbɔ̂ ngùꞋtè a Mbɔ̧ɔ̧mà.
14Wòt tà wu àtsəa lob Mbɔ̧ɔ̧mà yu la bùꞋ me tsoo nê, Yesò bə wòt àliapfəèa Bèjuê. Wòt wu ghɨ̀ ale, shu abua bòt bu bàgème abot la nê, “Ba bɔ èli bentùa ba bɔ̂ ndɨ bàa ghɨ̌ àfàꞋ la, bɨ̀ kɨꞋɨ ane èli ngaa bɔ̀ bə awɨ̧, bɨ̀ ka nkɨ̀Ꞌɨ̂ ane àliapfəè.”
15Yesò bɨ̀ɨ̀lè èngǎ̧ tò nê, “Ye awɨ̧, bɨ̀a bòt ko, bɨ̀a ngɨ̀ bɨ me shu ànəê, mbɔ̂ ngɨ̀à àyea tsa la. Wòt wu ane yɨ̧ tàa sǎ mpɔ̀ŋ zi, kò loà vi leꞋ a èbem àkàt àliapfəèa Bèjuê kà yaa enɨ ghǎ ŋa mèleb abua tò la wu wàà? 16Tè bɔ̀ ka ndzaa àvi wàà, è wuê wòt àndǎ̧ Abàlàghâm Satàn kuule atò ane èngùꞋebȩ èghem ntsɔ̀b yefà̧aã la, àliapfəèa Bèjuê ngɨ̀ tà pem?”
17Èngà̧ waa Yesò làꞋà la e ghɨ̀ ètsə bɔmbù̧ tò bàgème e kɔꞋ kwàꞋ abot, mbɔ̂ ebeko nè bòt e me wùꞋtè àwɔb ane ènəê nɨ̧ baa tà ghɨ̀à la.
Èngà̧teme adù̧ èsaãaãme èwuu mankaŋa kǒ
(Mat 13:31-32; Mk 4:30-32)
18Yesò mè mbììtê nê, “Kèfɔ̧̀ Mbɔ̧ɔ̧mà wu mbɨꞋɨ̀ ghàà? Màa nɨ ghǎ efɨ̀Ꞌne adù̧ à? 19Nàà mbɨ̀Ꞌɨ̀ èsaãaãme èwuu maŋkaŋa kǒ wòt kǒ sǎ a mbȩ zi la. Èsaãaãme mbɔŋ e koo te ntsè èsaãaãme ègème, ka àa ngɨ̀ ètsə, e faŋ ntsè èghɨjɨ ègème bɔ liꞋi a mbȩ la, tè ntsìꞋi mbɨ̀Ꞌɨ̀ àyɨt, tè banɨ̧̀ bu bèa ndèa la e me kɨꞋa nkùùla tèjî tɔb adù̧ mèntaãaã tò.”
Èngà̧teme adù̧ yis
(Mat 13:33)
20Yesò mè nê, “Màa nɨ ghǎ nɨ efɨ̀Ꞌɨ ane Kèfɔ̧̀ Mbɔ̧ɔ̧mà à? 21Kèfɔ̧̀ Mbɔ̧ɔ̧mà wu mbɨ̀Ꞌɨ̀ yis wu naa ngɨ̀à ka bled kɔ̀Ꞌa la. Àvi nàa ngɨ̀ tà nɨ̀ adzìꞋ ntɔ̀bte ane bapfəèꞋ fàlawà batat è tsekè tè ngȩȩne a èbem fàlawà wu ègème ngɨ̀ è kɔꞋ.”
ÈtsələèꞋ techɨɨle
(Mat 7:13-14, 21-23)
22Yesò le lɔ̂Ꞌ me tse èpfəè nɨ̧ nè bɔbɔpfəè nyɨ̀Ꞌta èngǎ̧ Mbɔ̧ɔ̧mà, ntsèà ngà a Jèlusalèm. 23Wòt kǒ kɨꞋɨ̀ mbììte atò nê, “Tê, wu wuê ndàꞋà bòt mpiꞋa bɔ̀ɔ li bɔ mèmpème kàlìà la à?”
Yesò bɨ̀ɨ̀lè nê, 24“Nyɔ̀Ꞌta a mànyia ane ètsələèꞋ techɨɨle, nkàà nê bòt nyaŋ aa li me nùa nyɔ̀Ꞌtà nkɨ enyi ka èlu̧ è ka wu wu abua yɔb. 25ÀfɨꞋa tǎt lob lɔ̀Ꞌɔ a si tè nkȩ̀ lob la, bɨa tɨ̧ɨ̧ àbȩ me lùꞋte ètsələèꞋ è shua nê, ‘Tê, tsɔꞋ lob abua ya.’
“Ka tà bɔ ngu shu abua yɨ̧ nê ‘E mbakà ko awɨ̧, e nka ko àdziꞋa bɨ dzəè la’.
26“NdàꞋ ale ko bɨa bɨ̀ɨ̀lè nê, ‘Ba li njɨ èghɨjɨ mè nu mèlùꞋ ba nɨ̧̀ ba, à mè nyɨ̀Ꞌte awa mènəè mê a kètsìà àpfəè aya.’
27“Ko taa mě tse a lob e shu nê, ‘E mbakà ko awɨ̧, bɨ̀ lɔ̀Ꞌɔ a mbì ètsələèꞋ am, bɨ̀a wu bɨ̀a ngɨ̀à mènəè kàbɔ̀ŋ la.’
28“Bɨa me dɨ̀a nkwèla àsɔŋ yɨ̧ abot àfɨꞋa bɨ̀a ye Abàlàghâm bɔ̂ Asàk nè Jàkɔ̂b, nè bèndàꞋàtɔŋ Mbɔ̧ɔ̧mà bàgème, a èbem kèfɔ̧̀ tò, mbɔ̂ bɨ̀ambɔŋ e wu àbȩ bɔ màꞋà la. 29Bòt aa li dzəâ a bètɔꞋɔ ngɔ̀ŋ ekɨꞋɨ bɔɔ jɨ èpǎ̧ wu Mbɔ̧ɔ̧mà nàa taŋke abua yɔb a kèfɔ̧̀ vi la. 30Ane nkûŋ, àfɨ̀Ꞌ a ngaa bòt ko bɔ wua kwèn la bɔɔ li tsiꞋi a mbì, èbeko bè wu a mbì la be tsiꞋi akwèn.”
Èkɔŋ Yesò ane bòt Jèlusalèm
(Mat 23:37-39)
31Yesò bèla ndàꞋà, Bèfalèsiì ko e kɨꞋɨ shu abua tò nê, “À bɔ̂ ndɨ àa sa àdziꞋ yaa e ghǎ àbâ ako la, nkàà nè Fɔ̧̀ Elɔ̀d nàà kɨ baãaã awê ebùŋe.”
32Yesò shu abua yɔb nê, “Bɨ̀ gha shu abua tǎt eŋɔꞋte mènəè ngaa nê, e ngua fəèà fote kàbɔ̀ŋ tèa ŋǎ bòt ngoꞋ la, mè mbəèa bòt àghɔ̧ laane bɔ̂ tètsɔꞋ, ka atetsɔꞋ vìa maa paate àfàꞋ am. 33Ka la mâ bɔ̂ ndɨ màa ghà wuê àdziꞋa e ngà la, laane bɔ̂ tetsɔꞋ, nè tètsɔꞋ vìa la. Maa ghɨ̀ ale, nkàà nê a bakà bɔ̀ŋ nê bɔ̀ buŋa ndàꞋàtɔŋ Mbɔ̧ɔ̧mà àdziꞋ ako tsa kà wua Jèlusalèm.
34“Bòt Jèlusalèm, bòt Jèlusalèm leꞋ, èghǎ ghɨ̂ ka àfɨ̀Ꞌ àgème Mbɔ̧ɔ̧mà tsàà bèndàꞋàtɔŋ bi abua yɨ̧ la, bɨ me temte awɔb ane àti mbùŋè àwɔb à? Mâ laꞋnê e nkɨ efete awɨ̧ ngò̧ nyaŋ ebaabe awɨ̧ mbɨ̀Ꞌɨ̀ nyɨ̌nkɔ̀Ꞌ nàa ngɨ̀ efete bɔ̧ bi a èten tèbààbè ti la, ka bɨ̀ ka bɨ̧ɨ̧nè. 35Bɨ̀ zə! Mbɔ̧ɔ̧mà tsì èsi vi ane àpfəè ayɨ̧ tè ndɔ̀Ꞌ. TsiꞋ è shu awɨ̧ nê, bɨ̀ ka tsi e ye am a, tè àli yu bɨ̀a li lete ngùŋ nê, ‘TsiꞋ Mbɔ̧ɔ̧mà lɔ̀ɔ̀le wòt wu nkɨ̀Ꞌa ane èlen tò la’, a kùꞋ.”
Currently Selected:
Lûk 13: mnf
Highlight
Share
Copy
Want to have your highlights saved across all your devices? Sign up or sign in
© 2006, Cameroon Association for Bible Translation and Literacy
