Lûk 16
16
Èngà̧teme adù̧ waã àtsəa àfàꞋ bèyuŋ
1Yesò lɔ̀Ꞌ mè shu abua bɔkatè bi nê, “Wòt èkab kǒ le bɔ waã àtsəa àfàꞋ vi kǒ, bòt e nkɨ̀Ꞌɨ̂ è shu abua tò nê wòt àtsəa àfàꞋ tò wu nàa sàbta èghɨ tò. 2Ŋut wu tɔ wòt àtsəa àfàꞋ vi wu mbììte atò nê, ‘Eyaa ka ànəê e ndzəa ane ye à? Ŋa àkatè àfàꞋ àyê, e ndze àghɨa a ghɨ̀ nè èkab am la, na à ka tsi wu wòt àtsəa àfàꞋ am la a.’
3“Wòt àtsəa àfàꞋ wu bììtè àvi zìambɔŋ nê, ‘Tǎt àfàꞋ am nàa tsǐ am anè, maa ghɨ̀ na à? E mbakà bɔ ètɨ̧̂ e tu si. È ngu bɔ àtsəa kɔꞋɔ a màndo̧a àghɨ. 4Mâ ko àghɨa màa ghɨ̌ ka bòt aa tseke kâ wua mpùùbà am afɨꞋa bɔ̂ fəè am àfàꞋ la.’
5“Tà ghɨ̀ ale, ntɔ bòt njûte tǎt àfàꞋ vi wemɔ̀Ꞌ wemɔ̀Ꞌ, mbììte wòt mbì nê, ‘Njû tǎt àfàꞋ am abua yè wu ghà à?’
6“Tà nê, ‘Mâ bɔ atò èpân mèwet ènkɨ̀.’
“Tà shu abua tò nê, ‘Nɨ àkata njû yu, ntsèke a si kwàla ntsiꞋi shɨ èghem yetà̧â̧.’
7“Tà mè ntɔ wekǒ nê, ‘Njû yè wu ghà à?’
“Ŋut wu nê, ‘Mâ bɔ atò bakaŋ ntsəè tɔsì’.
“Wòt àtsəa àfaꞋ wu mè shu abua tò nê, ‘Nɨ àkata njû yu, shɨ bakaŋ ntsəè ènkɨ̀ yefà̧aã’.
8“Tǎt àfàꞋ wu bɨ̧ɨ̧ne ànəa waã àtsəa àfàꞋ bèyuŋ wu è ghɨ̀ la nê tà lâ mbɔ̂ èyì. Nkàà nê, bòt ngɔ̀ŋ yaa aa ngɨ̀à mènəè mɔb ane bèyuŋ tè ntsè bòt Mbɔ̧ɔ̧mà. 9Yesò mè nê tsiꞋ è shu awɨ̧, bɨ̀ nɨ èghɨ ngɔ̀ŋ ngɨ̀ bèshu̧ mbɨ̀Ꞌɨ̀ è baka tsi ngu, ateko bɔ sèè àwɨ̧ adzìꞋa kà wòt wu li tsi epfə.
10“Wòt mènəè tò è tɨ̧ɨ̧ ndɨŋndɨ̀ŋ ane mènəè tèchɨɨle la, wu ndɨ mènəè tò nàa tɨ̧ɨ̧ ndɨŋndɨ̀ŋ ane mènəè nɨ̧ la. Wòt mènəè tò e toŋke ane mènəè tèchɨɨle la, wu ndɨ mènəè tò nàa toŋke ane mènəè nɨ̧ la. 11Ale, tè bɨ bakà ko mbà̧à̧te èghɨ sitsǎꞋ yàa ndɨŋndɨ̀ŋ, ko wàà naa li lɔ̀Ꞌɔ evi àghɨa ko eŋa abua yɨ̧ nê wu àyɨ̧ à? 12Tè bɨ bakà bèà àghɨa wòt tsa ntsɔ̧̀, ko wàà nàa ŋa awɨ̧ àyea wu àyɨ̧ la à?
13“BetsiꞋa wafàꞋ kà ko fàꞋ abua bètǎt àfàꞋ babe, nkàà nê tà bakà wua mpààbà wekǒ, nkɔ̀ŋkà wekǒ, mbə taa me zə wekǒ ngwǎ wekǒ. BetsiꞋa wòt kà me kùŋa Mbɔ̧ɔ̧mà mè nkùŋà èkab.”
Yesò mè nyɨ̀Ꞌte mèngǎ̧ kǒ
(Mat 11:12-13; 5:31-32; Mk 10:11-12)
14Mbɨ̀Ꞌɨ̀ Bèfalèsiì e zə èghɨ bàa Yesò shu la, bɔ̀ bùꞋ me wȩ̀ȩ̀te atò nkàà ndɨ bɔ̀ɔ nkɔ̀ŋkà èkab nyaŋ la. 15Yesò shu abua yɔb nê, “Wu bɨ̀a bɨ̀a ŋèꞋa wɨ̧ a ègwet a mbì bòt nê mènəè mɨ̧ tɨ̧ɨ̧ ndɨŋndɨ̀ŋ la, ka Mbɔ̧ɔ̧mà bɔ̂ ko mèntɨ̧ɨ̧ mɨ̧. Bɨ̀ ko nê àghɨa bòt àa nɨ̀a nê wu taꞋa àghɨ la, a bakà kùꞋ àghɨ a mbì Mbɔ̧ɔ̧mà.
16“Bòt e li ngua ndzəa wuê mènəè mbɨ̧te Musì nè mèngǎ̧ bèndàꞋàtɔŋ Mbɔ̧ɔ̧mà eghǎ edzəâ ane àfɨ̀Ꞌ Jɔ̌n ndzìà èdzî. E bùꞋu àfɨꞋa mbɔŋ Ntu̧ Ntsɔ̧̀ kèfɔ̧̀ Mbɔ̧ɔ̧mà wu a mètsəê bòt bɔ̀ tsɔ̀tà, tè waa waa tà zə la tsiꞋa nùà ane ètɨ̧̂ nkɨ enyi a èbem. 17Ka wu ànəa leyu ègwet bɔ̂ sitsǎꞋ aa tsě, tè ntsè ndɨ àlaata ànəê àko ane mbɨ̧te Musì nàa tsè àku la.
18“Wòt ègème tà tu̧ vi vi ngà ndzɔ̀Ꞌɔ àvi kǒ tsa la, ŋut ko nê ye wua njɨ̀a àbȩ. Wòt tà yɔꞋɔ àvi lu̧ tò tu̧ atò la, wua njɨ̀a àbȩ mɨ̧̂.”
Wòt èkab kǒ bɔ̂ Lazalɔ̀s
19Yesò ghɨ̀ ale, mè shu abua yɔb nê, “Wòt èkab, kǒ lè lɔ̂Ꞌ nguê, ntaꞋa wua nkwà̧aã ndìte èkab ete membaŋ nè te kèfə, mbɔ̂ me tseke a èbem èghɨ ntsɔ̧̀ àli àgème, 20Wòt ntseb kǒ wuê, èlen tò wu Lazalɔ̀s, tà me tseke àtsəa àpfəè atò, mbɔ̂ ntaꞋa bɔ tèfɨŋtsə ane zi. 21Lazalɔ̀s me nɔ̀ŋkè ale ngua nchɨ̀Ꞌà badzìꞋ èghɨjɨ e kwente a ègwet tibàlà wòt èkab wu la, ejɨ. Tà nɔ̀ŋkè ale babə be me kɨꞋa ndààla tèfɨŋke tò tu.
22“Àfɨ̀Ꞌ a me wu, wòt ntseb wu pfə, bɔntu̧ Mbɔ̧ɔ̧mà e kɨꞋɨ̀ ŋèꞋe atò nɨŋ ngà a ngèt Abàlàghâm. Wòt èkab wu tseke tè mpfəè àzi mɨ̧̂, bɔ tu atò. 23Tà gha àlaꞋ a bèmpfəà, me ye ngoꞋ kèkweelè, ntsèkê ndɔ̀kè àvi me ye ndzě Abàlàghâm a endɨ̌, nè Lazalɔ̀s a ngèt tò. 24Tà tɔ nê, ‘Tǎt wa Abàlàghâm, ku tèsȩ taã, ntsàà a Lazalɔ̀s tà chɨꞋɨ̀ wakèti vi a èbem mèleb nɨŋ nkɨ̀Ꞌɨ̂ èfìî èlɨ̧ laã, na e ndâ ngu a èbem ngoꞋ a èbem èwet waa la’.
25“Abàlàghâm nê, ‘Waã am, è li ngu àfɨ̀Ꞌ yu à bele a ngɔ̀ŋ la, à bɔ̀ èghɨ ntsɔ̧̀ ègème, ka Lazalɔ̀s wu ane ngoꞋ. Ka nè àfɨ̀Ꞌ yaa, tà wu ane mèntsèke ntsɔ̧̀, è me wu awê, à wu ane ngoꞋ. 26A màà mbakà wu ale, ko àfuꞋ ànɨ̧ a ghàbtè àwa ba nè ba. BetsiꞋa wòt kà lɔꞋɔ adzìꞋ ya nkɨ̀Ꞌɨ̂ ayɨ̧ ne adzìꞋ yu. Wòt kà meè ngu ko elɔ̀Ꞌɔ ayɨ̧ ne adzìꞋ etu̧ àfuꞋa mbɔŋ ekɨꞋɨ aya mɨ̧̂.’
27“Wòt èkab wu nê ‘Mâ shu̧u̧te awê a Tê, tsaa Lazalɔ̀s tà gha a lob tǎt am, 28na ma bɔ bɔnyɨ bɔ̧ batà̧â̧ la, nkɨ̀ɨ̀te awɔb mbɨ̀Ꞌɨ̀ wòt wɔb kɨꞋɨ̀ àdziꞋa ngoꞋ yàa.’
29“Ka Abàlàghâm nê, ‘Bɔ bɔ a Musì nè bèndàꞋàtɔŋ Mbɔ̧ɔ̧mà, bɔ̀ yute awɔb.’
30“Wòt èkab wu mè nê, ‘ÀwɔꞋ a tè Abàlàghâm, wòt bakà lɔ̀Ꞌɔ adzìꞋa bèmpfəà yaa te gha shu awɔb, ko bɔ ka kubte mènəè kàbɔ̀ŋ mɔb a.’
31“Abàlàghâm tsɔꞋɔ èngǎ̧ tò nê, ‘Bɔ bakà bɨ̧̀ɨ̧̀ne mènəè Musì bɔ̂ bèndàꞋàtɔŋ Mbɔ̧ɔ̧mà e shu la, ko wòt màà ndɔ̀Ꞌ adzìꞋa bèmpfəà nkɨ̀Ꞌâ è shu ànəê àko abua yɔb, ko bɔ̀ ka bɨ̧ɨ̧ne a.’ ”
Currently Selected:
Lûk 16: mnf
Highlight
Share
Copy
Want to have your highlights saved across all your devices? Sign up or sign in
© 2006, Cameroon Association for Bible Translation and Literacy
