Matìù 2

Bègɨ̧̀ ko e kɨꞋɨ̀ eye waã wu

1Bɔ li mbia Yesò a Betèlèghêm àbâ àlaꞋ a Jùdià àfɨꞋa Elɔ̀d lè wu fɔ̧̀ la. Àfɨ̀Ꞌ a me wu bòt èyì ko bɔ dzə àbâ yu nyèm nàa sàꞋa la e kɨꞋɨ̀ a Jèlusalèm. 2Bɔ kɨꞋɨ ale, me biite nê, “Waã wu bɔ bi, tàa wu Fɔ̧̀ Bèjuê la nàa wa à? Baa ye kěnto̧ tò àbâ yu nyèm nàa sàꞋa la ka nkɨ̀Ꞌɨ̂ ewùꞋte atò.”

3Mbɨ̀Ꞌɨ̀ Elɔ̀d zə ànəê yaa la, àtsəa tò a bɨ, tà taꞋa bɔa tè bòt Jèlusalèm bàgème e mè mbɔ̀a àyɔb mɨ̧̂. 4Ale, tà ghɨ̀ bètǎt bèntsìà mèpɨ̧̀ Mbɔ̧ɔ̧mà nè bènyɨꞋtà mbɨ̧te Musì e bù̧ù̧tè. Tà bììte awɔb nê, “ÀdziꞋ yu bɔ li mbɔ̌ ndɨ bɔ̌ bi a Fɔ̧̀ wu Mbɔ̧ɔ̧mà nàa yɔꞋɔ etsàà la à wu neŋàà?” 5Bɔ bɨ̀ɨ̀lè nê, “Àbot à wu a Betèlèghêm a èbem àlaꞋ a Jùdià, mbɨ̀Ꞌɨ̀ ndɨ ndàꞋàtɔŋ Mbɔ̧ɔ̧mà li shɨŋ la. 6Nê,

‘KwàꞋ àwɔ̀ Betèlèghêm,

à ntsě àpfəa techɨɨle

ayɔɔ èpfəè bòt Judà, ngu nê,

Fɔ̧̀ naa li dzə abua yê

ewua àtsəa bòt bɔ̧,

bòt Izəèlȩê.’ ”

7Elɔ̀d zə ale, ntɔ bòt èyì bu à ntsèm, mbììte awɔb ngule àfɨ̀Ꞌ yu kěnto̧ fu ke ghɨ̂ saꞋ la. 8Tà ghɨ̀ ale, ntsàà àwɔb à Betèlèghêm, bɔ me ghǎ tà nê, “Bɨa ghǎ, bɨ nèètè nkɨ waã wu, bɨ yea tò, bɨ tsè shu am, mbɨ̀Ꞌɨ̀ maa ghǎ ewùꞋte atò mɨ̧̂.”

9-10Fɔ̧̀ wu làꞋ ale, bɔ dzəè mbà̧à̧ èlu̧. Mbɨ̀Ꞌɨ̀ bɔ̌ ngà la, kěnto̧ fu bɔ ghɨ̂ ndze àlaꞋ ayɔb la, ke me ghǎ a mbì lɔb, ènyit yɔb e bɔ̀ŋ, bɔ wùꞋtè àwɔb kwàꞋ ànyaꞋne. Ke ghà ale, ntɨ̧̀ɨ̧̀ a ègwet àdzìꞋ yu waã wu wu la. 11Ale, bɔ nyi a lob ndzè waã wu bɔ̂ nyɨ̌ vi Màlià, ŋɔ̀Ꞌne a si, ngùꞋtè atò, mbɔ̂ ngàꞋte bambě bɔb ntsì a goêl, bɔ̂ èwuu èlȩê #2:11 Bɔɔ ntɔ èwuu “Èlȩê waa” ane ndɨk nê frankincense. ko e bɔ àghaa ntsɔ̧̀ la, nè èghɨbə ko bɔ̀ɔ ntɔ nê məə #2:11 Bɔɔ ntɔ “Məə” ane ndɨk nê myrrh. la ŋǎ abua tò. 12Bɔ ghɨ̀ ale, bɔ̀ nɔ̀ŋke a si, Mbɔ̧ɔ̧mà kɨ̀Ꞌɨ̂ a ndzò̧ səèŋkè ètû̧ bɔb nê bɔ̀ ka tsi ngà abua Elɔ̀d. Mbɨ̀Ꞌɨ̀ bɔ zə ale la, bɔ tsiꞋi nɨ èlu̧ tsa ngwènè àlaꞋ ayɔb.

13ÀfɨꞋa bòt èyì bu e ghà la, wantu̧ Mbɔ̧ɔ̧mà kɨ̀Ꞌɨ̂ abua Jòsêb a ndzò̧ shu abua tò nê, “Lɔ̀Ꞌɔ a si nɨ̀ waã wu bɔ̂ nyɨ̌ vi ndùùlà ngà a Ejìb. Bɨa ghǎ bɨ tseke abàꞋ və tè àfɨꞋa mâ shu nê bɨ dzəa la. E shua anè nkàà nê Elɔ̀d nàà me kɨ waã wu ebùŋe.”

14Jòsêb zə ale, ndɔ̀Ꞌ a si nɨ̀ waã wu bɔ nyɨ̌ vi ètsəꞋ wu mbà̧à̧ èlu̧ Ejìb. 15Bɔ ghǎ abàꞋ və ale ntsèke tè Elɔ̀d li mpfə. A li ngua anè mbɨ̀Ꞌɨ̀ àghɨa Mbɔ̧ɔ̧mà li ngɨ̀ ndàꞋàtɔŋ vi shu la aa wu nkûŋ nê, “Mâ tɔ waã am nê tà dzə a Ejìb.”

16Mbɨ̀Ꞌɨ̀ Elɔ̀d tseke te ndze nê bòt èyì bu e fɨte avi la, ànəa mbɔŋ a lu̧u̧me atò kwàꞋ ànyaꞋne. Ale, tà tsà bòt nê bɔ̀ ghǎ a Betèlèghêm nè èdziꞋ ègème a ngèt və mbùŋè bɔmbâ̧ bàgème be lu̧u̧ èngùꞋebȩ yebe la, nè ebe kà zìꞋ ndù̧ èngùꞋebȩ yebe. Tà le me shu ale, nko laꞋ nê ye kwaꞋtè ebuꞋu ane àfɨ̀Ꞌ yu bòt èyì bu e le shua vi nê bɔ ye kěnto̧ fu la. 17A li ngɨ̀ anè, ànəa ndàꞋàtɔŋ Mbɔ̧ɔ̧mà, Jèlèmìà li shu la a wu nkûŋ. 18Tà li nê,

“Bɔ zə àtɔŋ ko a Lamà ndɨ̀à kwàꞋ ànyaꞋne,

wu Lachèl ndɨ̀à bɔ̧ bi bɔ pfəꞋte la.

Tà tu̧ nê wòt ka mbɔ̀te avi,

nkàà nê bɔ̧ bu e pfəꞋte bàgème.”

Bɔ lɔꞋa Ejìb ngwènè a Nazàlet

19ÀfɨꞋa Elɔ̀d li mpfə la, wantu̧ Mbɔ̧ɔ̧mà kɨ̀Ꞌɨ̂ a ndzò̧ abua Jòsêb mbɨ̀Ꞌɨ̀ tà bele a Ejìb la shu abua tò nê, 20“Lɔ̀Ꞌɔ a si nɨ̀ waã wu bɔ nyɨ̌ vi nɨŋ ngwènè a Izəèlȩê, nkàà nè bòt bu bɔ le wua nkɨ ebùŋe atò la e pfəꞋte.”

21Tà lɔ̀Ꞌɔ a si nɨ waã wu bɔ nyɨ̌ vi me ghǎ a Izəèlȩê. 22Ka àfɨꞋa Jòsêb zə nê Akèlaɔ̀ jɨ lob tǎt vi Elɔ̀d tè ntsiꞋi fɔ̧̀ Jùdià la, tà me bɔa e ghǎ abàꞋ və. Tà ghɨ̀ ale, Mbɔ̧ɔ̧mà mè nkɨ̀Ꞌɨ̂ a ndzò̧ ŋǎ tò nkɨ̀a, tà tsiꞋi e ghǎ ne àbâ àlaꞋ a Galìlî, 23me tseke àpfəa ko bɔ̀ɔ ntɔ nê Nazàlet la. À li ngɨ̀ anè mbɨ̀Ꞌɨ̀ àghɨa bèndàꞋàtɔŋ Mbɔ̧ɔ̧mà e li shu ane Fɔ̧̀ wu Mbɔ̧ɔ̧mà li ndzɔꞋ etsàà la, aa wu nkûŋ, nê, “Bɔɔ li tɔ atò nê wòt Nazàlet.”

Currently Selected:

Matìù 2: mnf

Highlight

Copy