Matìù 23

Yesò làꞋ ànəa bènyɨꞋtà mbɨ̧te Musì nè Bèfalèsiì

(Mk 12:38-39; Lk 11:43, 46; 20:45-46)

1Yesò ghɨ̀ ale, shu abua ènɔ̧̂ bòt bu nè bɔkatè bi nê 2“BènyɨꞋtà mbɨ̧te Musì nè Bèfalèsiì wu bòt bɔ tsià wɔb nê bɔ̀ me yààte mbɨ̧te Musì shua bòt la. 3È wu ale, bɨ̀ me zə awɔb mè ngɨ̀à àghɨa bɔ̀ɔ shua la, ka bɨ̀ ka me ghɨ̀ àghɨa bɔ̀ɔ ngɨ̀à la, nkàà nê bɔɔ kà ghɨ àghɨa bɔ̀ɔ shua la. 4Bɔ̀ɔ ngɨ̀ bɔ zì àbòꞋà leled kà wòt wu ko ŋeꞋe, a kwen wòt, ka wòt ane yɔb ka wu lɔ̀kè àbu azi etɨŋe wòt mbɔŋ.

5“Bɔ̀ɔ ngɨ̀ bɔ̀ me ghɨ àghɨ àgème, bɔ wua nkɨ̀a wuê mbɨ̀Ꞌɨ̀ bòt aa me ye awɔb. Ye ndɨ è bɔb ne bakɔ̂b bu bɔ̀ɔ ndzìà èngǎ̧ Mbɔ̧ɔ̧mà nkùùla a mèsi mɔb la, bèa fàŋka la. Mè ndzì ndɨ bandǐ bu bɔ̀ɔ maꞋa àmî bɔb ntsàꞋte a Mbɔ̧ɔ̧mà la bèa sààtà la. 6Bɔ taꞋa wua nkɔ̀ŋkà èdziꞋi nɨ̧ a èdziꞋi mèpà̧ nè ètɨ̧ ntsɔ̧̀ à lobte Mbɔ̧ɔ̧mà tɔb. 7Mè taꞋa wua nkɔ̀ŋkà bòt aa me nèèta ntsàꞋtè àwɔb àsà̧aã èwen e mě me tɔ awɔb ane bènyɨꞋtà.

8“Ka è me wu awɨ̧, bɨ̀ ka mbɨ̧̀ɨ̧̀ne bòt e me tɔ awɨ̧ ane bènyɨꞋtà, nkàà nê bɨ̀agème bɨ wu bɔnyɨ, mè mbɔ nyɨꞋtà wuê wemɔ̀Ꞌ. 9Bɨ ka ntɔ wòt kǒ a sitsǎꞋ ane tǎt wɨ̧, nkàà nê bɨ bɔ a tǎt wuê wemɔ̀Ꞌ, wu tǎt wɨ̧ wu a ègwet la. 10Bɨ̀ ka mè mbɨ̧̀ɨ̧̀ne bɔ tɔ awɨ̧ ane tàt, nkàà nè bɨ bɔ wuê wòt wemɔ̀Ꞌ bɨ̀a tɔ atò ane tàt la. Wu Fɔ̧̀ wu Mbɔ̧ɔ̧mà li ndzɔꞋ ntsà la. 11Wòt tà tsè awɨ̧ bàgème la bɔ ndɨ tàa wu wafàꞋ wɨ̧ la. 12Wòt ŋèꞋe avi a ègwet ko bɔɔ shuke tò a si, wòt tà shuke avi a si la bɔɔ ŋeꞋe tò a ègwet.

Yesò tsè mpəəte bènyɨꞋtà mbɨ̧te Musì nè Bèfalesiì

(Mk 12:40; Lk 11:39-42, 44, 52; 20:47)

13“Aa li bɨa wɨ̧, bɨ̀a bènyɨꞋtà mbɨ̧te Musì nè Bèfalèsiì, bɨ̀a wu bɨ̀a shua nê bɨ wu àghɨa kà wu yùà la, nkàà nê bɨa nkèla bòt mbɨ̀Ꞌɨ̀ bɔ nyi a Kèfɔ̧̀ Mbɔ̧ɔ̧mà. Bɨ̀a mbɔŋ aà kà kɨ nyi, mbɔ̂ nkèle bòt nkɨ enyi la, mbɨ̀Ꞌɨ̀ bɔ nyi. [ 14Aa li bɨ̀a wɨ̧ bɨ̀a bènyɨꞋtà mbɨ̧te Musì nè Bèfalèsiì, bɨ̀a wu bɨ̀a shua nê bɨ wu àghɨa kà wu yùà la. Bɨ̀a ngɨ̀ bɨ fɨte bènempfə njɨ̀ lob tɔb mbɔ̂ ndɔ̀Ꞌ me tsàꞋta Mbɔ̧ɔ̧mà ndà̧à̧nà mbɨ̀Ꞌɨ̀ enɨ evəèəèlè àghɨ a bòt. Bɨ̀a li bɔ ngoꞋ è tsě ye bòt bàgème la.]

15“Aa li bɨa wɨ̧, bɨ̀a bènyɨꞋtà mbɨ̧te Musì nè Bèfalèsiì, bɨ̀a wu bɨ̀a shua nê bɨ̀ wu àghɨa kà wu yùà la! Bɨ̀a ngɨ̀ bɨ ntu̧ mèdzî, ntsè èlaꞋ mbɨ̀Ꞌɨ̀ bɨ̀ wuê e ghɨ̌ ka wuê wòt wemɔ̀Ꞌ naa kùŋe a Mbɔ̧ɔ̧mà ane wɨ̧ ne alu̧. Bɨ̀ bɔ bɨ̀ ghɨ̀ ale, bɨ tsoke a ŋut kwat tè tà mè mbɨɨ tê ntsiꞋi èwe tàa bɨ̌ nyi a èwet Satàn a mbì lɨ̧ la.

16“Aa li bɨa wɨ̧, bɨ̀a bòt àghɨ àleme bu bɨ baãaã èbu beko me nyɨꞋte awɔb èlu̧ mè shua nê ‘wòt zìa nkà̧ ane lob nɨ̧ Mbɔ̧ɔ̧mà ko è ntsě ànəê, mbə tà zì nkà̧ ane èghɨ bu bɔ nɨ̀a goêl nɨŋ ngɨ̀ nɔ̀ŋe a èbem lob Mbɔ̧ɔ̧mà la, tà ko nê nkà̧ mbɔŋ kuule vi.’ 17Ye èkèghɨ̧̀ àghɨ àleme ko! À yea a tsè àyea ko la wu a yea ŋaà? Wu èghɨ bu bɔ ghɨ̂ ane goêl la, kò wuê lob mbɔŋ yu è ghɨ̂ èghɨ mbɔŋ bu e tsiꞋì èbe Mbɔ̧ɔ̧mà la à? 18Bɨà nyɨ̀Ꞌta nê, wòt zìà nkà̧ àdziꞋa bɔ̀ɔ ŋǎ èghɨ abua Mbɔ̧ɔ̧mà la, àghɨ à ka ghɨ̌, ka tà zǐ nkà̧ àghɨa bɔ nɔ̀ŋe a ègwet àdzìꞋa mbɔŋ la, tà ko nê nkà̧ mbɔŋ kuule avi. 19Bɨ̀a bòt àghɨ àleme! À yea ŋa a tsè a yea ko à? Wu àghɨ yu bɔ ŋa abua Mbɔ̧ɔ̧mà la, kò wuê àdziꞋ yu bɔ nɔ̀ŋè àghɨa abot, à tsiꞋi àyea Mbɔ̧ɔ̧mà la à? 20È wu ale, wòt zìà nkà̧ àdziꞋa bɔ̀ɔ ŋǎ èghɨ abua Mbɔ̧ɔ̧mà la, tà ko nê ye wua nkà̧ àdziꞋa mbɔŋ nè èghɨ ègème bɔ nɔ̀ŋe a ègwet la. 21Èwe tà zǐ nkà̧ lob nɨ̧ Mbɔ̧ɔ̧mà la, tà ko nê ye wua nkà̧ lob mbɔŋ mè ngua nkà̧ a Mbɔ̧ɔ̧mà wu tàa ntsèka a èbèm la. 22Wòt tà kà̧ ègwet la ko nê ye wua kaãaã àtɨ̧a Kèfɔ̧̀ Mbɔ̧ɔ̧mà mè ngua nkà̧ Mbɔ̧ɔ̧mà wu tà tseke a ègwet àtɨ̧ mbɔŋ la.

23“Aa li bɨa wɨ̧ bɨ̀a bènyɨꞋtà mbɨ̧te Musì nè Bèfalèsiì, bɨ̀a wu bɨ̀a shua nê bɨ wu àghɨa kà wu yùà la! Bɨ̀a ngɨ̀ bɨ ghàbtè èghɨ mbȩ bɨ̧ ane èdzìꞋ èghem eghǎ wu ka wuê ane tèfɔbtsə ŋǎ èghab Mbɔ̧ɔ̧mà, #23:23 Wòt Mbɔ̧ɔ̧mà nàa ngàbtà èghɨ bi ane èdzìꞋ èghem, èghab Mbɔ̧ɔ̧mà wu àdziꞋ yeamɔꞋ. ka mbɔ̂ ntû̧ e ghɨ̌ ngule èghɨ bu mbɨ̧te Mbɔ̧ɔ̧mà tèa shua la. Teà shua nê, wòt me ghɨ̀ mènəè ndɨŋndɨ̀ŋ ane bòt ko, nkua tèsȩte bòt mè ndzìà èntɨ̧ɨ̧ vi wuê ane Mbɔ̧ɔ̧mà. Eyaa wu èghɨ bɨ bɔ ndɨ bɨ̀a ghɨ̀ ka waꞋa èbeko bu la. 24Bɨ̀a bòt àghɨ àleme bu bɨ baãaã èbu beko me nyɨꞋte awɔb èlu̧ la, bɨ̀a ngɨ̀ bɨ̀ ye kèdzǐ a èbem ndɔŋ mèlùꞋ yɨ̧, bɨ nɨ àfɨ̀Ꞌ nkàŋkè ntsì, ka mbɔ̂ ngu emɨ̀ɨ̀lè anyà̧ mbɨ̀Ꞌɨ̀ loà kà koê.

25“Àa li bɨa wɨ̧ bɨ̀a bènyɨꞋtà mbɨ̧te Musì nè Bèfalèsiì, Bɨ̀a wu bɨ̀a shua nê bɨ wu àghɨa kà wu yùà la! Bɨ̀a ngɨ̀ bɨ shùù kwènte bapfəèꞋ nè ndɔŋ tɨ̧, ka tèbemtsə te lu̧ ne èghɨ bɨ ghòꞋne bòt ngɨ̀ɨ̀la awɔb nɨŋ la. 26Bɨ̀a Bèfalèsiì, bɨ lâ ngu bòt àghɨ àleme! Bɨ̀ bɨa shùù tèbemte ndɔŋ tɨ̧ nè tèbemte bapfəèꞋ bɨ̧ ko kwèntsə teà nga me fəəte mɨ̧̂.

27“Àa li bɨa wɨ̧, bɨ̀a bènyɨꞋtà mbɨ̧te Musì nè Bèfalèsiì, bɨ̀a wu bɨ̀a shua nê bɨ wu àghɨa kà wu yùà la! Bɨ wu mbɨ̀Ꞌɨ̀ ètsəsì bɔ bɔ̧ ndɔ̀ɔ̀be nè ètsaꞋa kèfə e me bɔ̌ àbȩ la, ka tèbèmtsə te bɔ̂ ndù̧ ne èkwȩ bèmpfəà nè èfi bɔbȩ. 28Wu wuê a èlɨ mbɔŋ bɨ̀a ngɨ̀ bɨ ghɨ̂ bòt e me ye awɨ̧ àbȩ nê bɨ tɨ̧ɨ̧ ndɨŋndɨ̀ŋ e mbì Mbɔ̧ɔ̧mà, ka mèntɨ̧ɨ̧ mɨ̧ bɔ̂ ndù̧ ne kàbɔ̀ŋ, bɨ̀ ka meè ngu àghɨa bɨ̀a shua nê bɨ wu yùà la.

29“Aa li bɨa wɨ̧ bɨ̀a bènyɨꞋtà mbɨ̧te Musì nè Bèfalèsiì, bɨ̀a wu bɨ̀a shua nê bɨ wu àghɨa kà wu yùà la! Bɨ̀a ngɨ̀ bɨ nèète ètsəsì bèndàꞋàtɔŋ Mbɔ̧ɔ̧mà nè bòt bu bɔ li ntɨ̧ɨ̧ ndɨŋndɨ̀ŋ e mbì Mbɔ̧ɔ̧mà la mbɔ̧ ndɔ̀Ꞌ ndɔ̀ɔ̀be. 30Bɨ̀ me ghɨ̀ ale, bɨ me shu nê bɨ li ngɨ̀ ale ngu àlia bètǎt nyaꞋ bɨ̧ ko bɨ̀ le kaꞋa ghɨ mbɨ̀Ꞌɨ̀ bɔ̀ɔ̀ba èbùŋè bèndàꞋàtɔŋ Mbɔ̧ɔ̧mà. 31Ale, bɨ lâ mbɨ̧̀ɨ̧̀ne nê bɨ wu bɔ̧ bòt bu bɔ li bùŋè bèndàꞋàtɔŋ Mbɔ̧ɔ̧mà la. 32È wu ale, bɨ bê mpàa àfaꞋa bètǎt nyaꞋ bɨ̧ ngɨ̀.

33“Bɨ̀a nyà̧tekàbɔ̀ŋ, nè bɔ̧ nyà̧tekàbɔ̀ŋ! Bɨ̀a ghɨ̀ na te lùùla te bɔɔ bakà maꞋa wɨ̧ a èbem èwet Satàn à? 34È wu ale, tsiꞋ è shua wɨ̧ nê maa tsàà bèndàꞋàtɔŋ Mbɔ̧ɔ̧mà a kètsìà wɨ̧ nè bòt èyì, nè bènyɨꞋtà mènəè Mbɔ̧ɔ̧mà, bɨa bùŋè beko, ewu̧u̧te ebeko a mbɨ̧̀ mbasa, e shu̧ beko a èbem lobte Mbɔ̧ɔ̧mà, e mě me nkùŋè àwɔb àpfəè èpfəè, nkɨà àtsəa yɔb enɨ. 35A èlɨ̀ waa, ànyem a bòt bu bàgème bɔ li mbùŋè àwɔb a sitsǎꞋ kà bɔ ko ànəê la aa li nɔ̀ŋke akedû̧tsə fɨ̧. Ànyem a mbɔŋ aa li buꞋu ane ànəa Abèl wòt mènəè ntsɔ̧̀ eghǎ wu ane Zàkàleyà waã Bàlachìà wu bɨ li mbuŋe tò a kètsìà lob nɨ̧ Mbɔ̧ɔ̧mà nè àdzìꞋ yu bɔ̀ɔ ŋa èghɨ abua Mbɔ̧ɔ̧mà la. 36TsiꞋ è shu awɨ̧ ane nkûŋ nê, ànyem bòt baa bàgème aa li nɔ̀ŋke akedû̧tsə bòt laane wàa.

Èkɔŋ Yesò ane bòt Jèlusalèm

(Lk 13:34-35)

37“Àfɨ̀Ꞌ àko a tseke tè me wu, Yesò bùꞋ me ŋȩa shua nê, ‘Bòt Jèlusalèm, bòt Jèlusalèm leꞋ! Bɨà mbùŋà bèndàꞋàtɔŋ Mbɔ̧ɔ̧mà ndɔ̀Ꞌ ŋèꞋnà bɔntu̧ Mbɔ̧ɔ̧mà tà tsàà abua yɨ̧ la, ane àti. Mâ nyɔ̀Ꞌtè a ngo̧ a ngò̧ nê e nkɨ enɨ èbu bɔ̧ efete awɨ̧ mbɨ̀Ꞌɨ̀ nkɔ̀Ꞌ nàa ngɨ̀ tà fète bɔ̧ bi ndzì a èten tèbààbè ti la, ka bɨ̀ ka bɨ̧ɨ̧ne!’ 38Bɨ̀ zə! Mbɔ̧ɔ̧mà tsì èsi vi ane àpfəa yɨ̧ tè ndɔ̀Ꞌ tè wòt kà tsi ngua ntsèka a èbèm. 39TsiꞋ è shua wɨ̧ nê e bùꞋu àfɨ̀Ꞌ yaa nɨ ghà ne mbì bɨ̀ ka tsi ye am a, tè àli yu bɨ̀a li lete èngùŋ nê ‘TsiꞋ Mbɔ̧ɔ̧mà lɔ̀ɔ̀le a wòt wu nkɨ̀Ꞌa ane èlen tò la a kùꞋ.’ ”

Currently Selected:

Matìù 23: mnf

Highlight

Copy