Matìù 25
25
Èngà̧teme ane bɔɔ̀zi ko èghem
1“Àlia mbɔŋ aa li nkùꞋ, ànəa kèfɔ̧̀ Mbɔ̧ɔ̧mà a wu mbɨ̀Ꞌɨ̀ àyea bɔɔ̀zi ko èghem bɔ li nɨ mèkàꞋà mɔb nga esèè lu̧ ndzà la. 2Bɔɔ̀zi batà̧â̧ ane yɔb li ngu bòt kà bɔ èyì, èbeko batà̧â̧ wu bòt bɔ èyì la. 3È bu ka bɔ èyì la e me nɨ mèkàꞋà mɔb nɨa ngà bɔ̀ ka nɨ mèleb èkaꞋà a èbem èghɨ ko tsa, 4ka è bu bɔ bɔ èyì la enɨ mèkàꞋà mɔb mbɔ̂ mbèa àbəꞋa mèleb a èbem èghɨ ko tsa. 5Bɔ gha ale lu̧ ndzà yu ka yaŋe nkɨ̀Ꞌɨ̂, ale, kèlɔ ke baãaã wɔb bàgème bɔ nɔ̀ŋkè me li.
6“È tseke tè me wu a èntɨ̧ɨ̧ ètsəꞋ, wòt kǒ letè èngùŋ nê ‘Lu̧ ndzà yu kɨꞋɨ̀; Bɨ̀ dzəa àbȩ sèè atò.’
7“Bɔɔ̀zi bu e lɔ̀Ꞌtè a si bàgème nèètè mèkàꞋà mɔb nkɔ̀ktê. 8È bu kà bɔ èyì la e shu abua ebe èyì bu nê ‘Bɨ̀ ŋa adziꞋ mèleb èkaꞋà mɨ̧ kǒ abua ya, è ma nê mèkàꞋà tsiꞋa ndèma lema.’ ”
9Bɔ bɨ̀ɨ̀lè nê, “ ‘Mèleb èkaꞋà ma ka kuꞋu abua ya ba nɨ̧̀ baa, è wu ale bɨ ghǎ abua bòt bu bɔ̀ɔ fɨ̧̀ɨ̧̀nà la njû̧ mɨ̧.’
10“Bɔ me ghà ale, lu̧ ndzà yu kɨꞋɨ, è bu be yaã ntàŋke tè ndɔ̀Ꞌ la e nyi a lob a èpǎ̧ ndzɔꞋa yu bɔ̂ tò ba, ngèbà ètsələèꞋ.
11“Bɔɔ̀zi ko bu e tseke tê nkɨ̀Ꞌɨ̂ nê ‘Tê, Tê, tsɔꞋɔ lob abua ya.’
12“Lu̧ ndzà yu bɨ̀ɨ̀lè nê ‘Ane nkûŋ, tsiꞋ è shua wɨ̧ nê e mbakà ko awɨ̧.’
13“Yesò lìà nê, bɨ̀ tseke me lȩ̂ ntsɔ̧̀ nkàà nê bɨ bakà ko àlia, kò àfɨꞋa màa mě kɨꞋɨ la.
Èngà̧teme ane ànəa bɔfàꞋ ko batat
(Lk 19:11-27)
14“Ànəê yaa a wu mbɨ̀Ꞌɨ̀ wòt kǒ tà li me dzəa nga à lèghȩ̀ȩ̀nè ntɔ bɔfàꞋ bi ndzì èghɨ bi abua yɔb la. 15Tà li ŋà bètɔsì batà̧â̧ abua wekǒ, ŋà bètɔsì babe abua wekǒ, mè ŋà tɔsì wemɔ̀Ꞌ abua wekǒ, mbɔ̂ ŋa ndɨ mètàŋ wòt ègème ane yɔb nyɨꞋte la. Mbɔ̂ ndzəè ngà à lèghȩ̀ȩ̀nè wu. 16WafàꞋ wu bɔ yaã ŋà bètɔsì batà̧â̧ abua tò la, ghà ndzì ane èwen, bètɔsì batà̧â̧ e mè nyî a ègwet. 17È wu nè wòt nè bètɔsì babe la ghà ndzì è vi ane èwen mɨ̧̂, àbȩ̀ a nyî a ègwet ane bètɔsì babe. 18Ka wu bɔ yaã ŋǎ atò tɔsì wemɔ̀Ꞌ la, ghà ntu si ndò̧ èkab tǎt àfàꞋ vi wu.
19“Àfɨ̀Ꞌ a tseke tè me wu tǎt bɔfàꞋ bu kua nê bɔ̂ tò ba è tseke a si nkwàꞋtè èkab wu. 20WafàꞋ wu bɔ yaã ŋǎ tò bètɔsì batà̧â̧ la kɨꞋɨ nè beko batà̧â̧ be kwèꞋne a ègwet la nê, ‘Tê, à li ŋà bètɔsì batà̧â̧ abua am, mâ ta èwen tè beko batà̧â̧ be nyi a ègwet.’
21“Tǎt àfàꞋ wu shu abua tò nê ‘E wu la, à wu ngule wafàꞋ àa ngɨ̀à àfàꞋ àyê ntsɔ̧̀ la. Mbɨ̀Ꞌɨ̀ à baãaãte àdziꞋ èkab wàa ntsɔ̧̀ la, maa tsia wê àtsəa èghɨ nyaŋ. Nyi a lob ba nè è fɔte ngùꞋtè àwa.’
22“È wu bɔ yaã ŋǎ atò bètɔsì babe la kɨꞋɨ nê ‘Tê, à li ŋà bètɔsì babe abua am, mâ ta èwen tè beko babe be nyi a ègwet.’
23“Tǎt àfàꞋ wu shu abua tò nê ‘E wu la, à wu ngule wafàꞋ àa ngɨ̀à àfàꞋ àyê ntsɔ̧̀ la. Mbɨ̀Ꞌɨ̀ à baãaãte àdziꞋ èkab wàa ntsɔ̧̀ la maa tsia wê àtsəa èghɨ nyaŋ. Nyi a lob ba nè efɔte ngùꞋtè àwa.’
24“È wu bɔ yaã ŋǎ tò tɔsì wemɔ̀Ꞌ la kɨꞋɨ̀ nê ‘Tê, mâ ko nê àbu àyê a kweelè nge, à mè me fùꞋu àdziꞋa kà liꞋ, mè nɨa àdziꞋa kà nɔ̀ŋè. 25Ale, e ndi ngà ntu si ndò̧ èkab wê, maà mbɔ̀a wê la. Ye èkab wê mbɔŋ ye wu.’
26“Tǎt àfàꞋ tò wu bɨ̀ɨ̀lè nê, ‘Ye àlȩȩta wafàꞋ kǒ kà ye àtsə ànəê àzi. À li nko nê maa fuꞋa àdziꞋa kà liꞋ, mè nɨ̀a àdziꞋa kà nɔ̀ŋè, 27à kà wu nɨ èkab am e ghǎ nɔ̀ŋe a lob èkab? Ko mâ kua ale nɨ èkab am wu nè àbȩ̀ a ègwet.
28“ ‘Ale, bɨ̀ nɨ tɔsì wu abua tò la ŋa abua wòt wu nè bètɔsì èghem la. 29Nkàà nê wòt tà bɔ àbȩ̀ nyaŋ la, bɔɔ kwèꞋne aa taꞋa yaãaã, ka è me wu wu kà bɔ àghɨ la, ko bɔɔ paa kàyaã wu tà bɔ la enɨ. 30È me wu wafàꞋ wu kà ye àtsəa ànəê àzi la ko bɨ̀ baãaã atò maꞋa àbȩ a èbem kèbìꞋà, àdziꞋa tàa me dɨ̀a mè nkwèla àsɔŋ zi la.’
ÈsaꞋa ndìa ngɔ̀ŋ
31“Naa li ngu àfɨꞋa Waã Wòt kɨꞋɨ ane ènɨ̧ tǎt vi, nè bɔntu̧ Mbɔ̧ɔ̧mà bàgème la, tà tseke a ègwet àtɨ̧a Kèfɔ̧̀ Mbɔ̧ɔ̧mà. 32ÀfɨꞋa mbɔŋ bòt èlaꞋ ègème a sitsǎꞋ e bù̧ù̧te a mbì tò tà ghàbtè àwɔb mbɨ̀Ꞌɨ̀ mbaabà njɨ̀ nàa ngɨ̀ tà ghàbtè njɨ̀tsə ntsi ane dzətsə la, 33mbɔ̂ ntsà njɨ̀ tu àbâ àbualu̧ zi, ntsà dzə tu àbâ àbuantoŋ zi.
34“ÀfɨꞋa mbɔŋ ko fɔ̧̀ wu naa shu abua bòt bu àbâ àbualu̧ zi la nê ‘Bɨ̀ kɨꞋɨ, bɨ̀a wu Tǎt am èlɔ̀ɔ̀lè àwɨ̧ la, njɨ̀a kèfɔ̧̀ wu bɔ li ntàŋke abua yɨ̧ a me mbùꞋu ngɔ̀ŋ la. 35Bɨ jɨ̀ nkàà nê ndzìtsə te li me ku am, bɨ ŋa èghɨjɨ e njɨ, àtɔŋ am a yu̧, bɨ ŋa mèleb e nu, e nkɨꞋɨ mbɨ̀Ꞌɨ̀ gɨ̧̀ bɨ sèe am, 36e me ghȩȩne mbɨ̧̀ fəâ, bɨ ŋa ndǐ e nkwaã, me ghɔ̧̀ɔ̧̀ne, bɨ kɨꞋɨ̀ ntsàꞋtè am, bɔ zi am a lob tèfȩ, bɨ kɨꞋɨ̀ ndȩ̀ am.’
37“ÀfɨꞋa mbɔŋ ko bòt ntsɔ̧̀ baa aa biite atò nê ‘Tê, ba li nchɨɨmè ndzè àwê nè ŋǎ ndzìtsə tèa nkua wê la, ŋǎ èghɨjɨ à jɨ, kò ndzè àwê nè ŋǎ àtɔŋ yê a yu̧u̧ la ŋà mèleb à nu à? 38Ba li ndzè àwê nè ŋǎ à wu gɨ̧̀ la sèe wê kò ngȩ̀ȩ̀nà kà kwaãaã ndǐ la ŋǎ ndǐ à kwaãaã à? 39Ba li mè ndzè àwê nè ŋǎ ngò̧ò̧nà kò a lob tèfȩ leꞋ nkɨ̀Ꞌɨ̂ ntsàꞋtè àwê à?’
40“Bɔ biite ale ko fɔ̧̀ wu naa bɨ̀ɨ̀le èngǎ̧ wɔb laꞋnê ‘Ane nkûŋ, tsiꞋ è shua wɨ̧ nê mbɨ̀Ꞌɨ̀ bɨ li ngɨ̀ ane we tà lìa à kwèn ane bɔnyɨ bɔ̧ baa la, bɨ li ngua ngɨ̀à abua am’.
41“Taa shu ale, e gheble avi è shu abua bòt bu àbâ àbuantoŋ zi la nê ‘Bɨ̀ lɔꞋɔ a ngèt yaã, bɨ̀a wu Mbɔ̧ɔ̧mà zi ndɔ̀ àtsəa yɨ̧ la ngà a èbem èwet kà wu li elìa Mbɔ̧ɔ̧mà taŋke abua Satàn bɔ̂ bɔntu̧ bi la. 42Bɨ̀ gha nkàà nê ndzìtsə te li me ku am, bɨ̀ ka ŋa èghɨjɨ maa jɨ, àtɔŋ am a yu̧, bɨ̀ ka ŋa mèleb maa nu, 43e nkɨꞋɨ mbɨ̀Ꞌɨ̀ gɨ̧̀, bɨ̀ ka sèe am, e me ghȩ̀ȩ̀nè ka kwaãaã ndǐ, bɨ̀ ka ŋa ndǐ maa kwaãaã, e me ghɔ̧̀ɔ̧̀ne bɔ mè ndzì am a lob tèfȩ, bɨ̀ ka kɨꞋɨ e lȩ̀ am.’
44“Ko bɔɔ biite atò mɨ̧̂ nê, ‘Tê, bà li ndzè àwê a ka àfɨꞋa ndzìtsə tèa nku àwê, kò àtɔŋ yê a yu̧ la, kò à wu gɨ̧̀ la, kò àa ngȩ̀ȩ̀nà kà kwaãaã ndǐ, kò ngò̧ò̧nà, kò a lob tèfȩ la bà ka tɨŋe àwê à?’
45“Ko tàa bɨ̀ɨ̀le nê ‘Ane nkûŋ, tsiꞋ è shua wɨ̧ nê mbɨ̀Ꞌɨ̀ bɨ li kaꞋa ghɨ̌ ane we tà lìa a kwèn ane bɔnyɨ bɔ̧ baa la, a wu nê bɨ li kaꞋa wua ngɨa abua am.’
46“ÀfɨꞋa mbɔŋ ko bòt kàbɔ̀ŋ bu aa gha àdziꞋa kà ngoꞋ wu li elìa, èbe ntsɔ̧̀ bu e egha àdziꞋa mèmpème kàlìà.”
Currently Selected:
Matìù 25: mnf
Highlight
Share
Copy
Want to have your highlights saved across all your devices? Sign up or sign in
© 2006, Cameroon Association for Bible Translation and Literacy
