Matìù 6

Èngà̧ ane ànəa màntɨŋa bòt mbuŋ

1“Bɨ̀ me ko mbɨ̀Ꞌɨ̀ ka bɨ me ghɨ̀ èghɨ bɨ̀a ngɨa ane èlen Mbɔ̧ɔ̧mà la a kètsìà banɔ̧̀ mbɨ̀Ꞌɨ̀ bɔɔ ye. Bɨ me ghɨ̀ ale, ko bɨ̀ ka bɔ àbȩ̀ abua tǎt wɨ̧ wu a ègwet la a.

2“È wu ale, wòt me ŋa àghɨ abua wòt mbuŋ, tà ka ŋǎ a kètsìà banɔ̧̀ mbɨ̀Ꞌɨ̀ bòt bu bɔ̀ɔ shua nê bɔ wu àghɨa kà wu yùà àa ngɨa a èbem lobte Mbɔ̧ɔ̧mà, mè ngɨa a tèngète balu̧ la. Bɔ̀ɔ ngɨ̀ bɔ me ghɨ̀ ale, bɔ wua nkɨà mbɨ̀Ꞌɨ̀ bòt aa me wùꞋtè àwɔb. Ane nkûŋ, e ngua shua wɨ̧ nê bɔ bɔ àbȩ̀ àyɔb tè ndɔ̀Ꞌ. 3Ka à me ŋa àghɨ abua wòt mbuŋ à ka ngɨ̀ àbuantoŋ ayê a ko àghɨa àbualu̧ ayê a ŋa la. 4Ghɨ̀ ale mbɨ̀Ꞌɨ̀ àghɨa à ghɨ̀à la aa wu a ntsèm, tǎt wè wu tàa ndzèa mènəè nàa ntsea a ntsèm la naa ŋa àbȩ̀ àyê.

Èngà̧ ane màntsaꞋta Mbɔ̧ɔ̧mà

(Lk 11:2-4)

5“Àfɨ̀Ꞌ àgème bɨ̀a ntsàꞋta Mbɔ̧ɔ̧mà la bɨ̀ ka ngɨ̀ mbɨ̀Ꞌɨ̀ bòt bu bɔ̀ɔ shua nê bɔ wu àghɨa kà wu yùà àa ngɨ̀à la. Bɔ̀ɔ ngɨ̀ bɔ̀ me tsàꞋte a Mbɔ̧ɔ̧mà, bɔ me kɔ̀ŋkè etɨ̧ɨ̧ àtatsi a èbem lobte Mbɔ̧ɔ̧mà, mè me kɔ̀ŋkè etɨ̧ɨ̧ a tèngète balu̧ mbɨ̀Ꞌɨ̀ bòt aa me ye awɔb. Ane nkûŋ, tsiꞋ è shua wɨ̧ nê bɔ bɔ àbȩ̀ yɔb tè ndɔ̀Ꞌ. 6Ka wòt me tsàꞋte a Mbɔ̧ɔ̧mà tà nyi a èbem àtsəalob àzi, ngèbà ètsələèꞋ mbɔ̂ ntsaꞋta tǎt vi wu kà bɔ wua ndzèa tò la. Tà ghɨ̀ ale, ko tǎt tò wu tàa ndzèa mènəè nàa ntsea a ntsèm la naa ŋa àbȩ̀ atò.

7“À me tsàꞋte à ka me làꞋà mèngà̧ nyaŋ kà ye lə mbɨ̀Ꞌɨ̀ bòt bu kà ko a Mbɔ̧ɔ̧mà la àa ngɨ̀à la. Bɔ̀ɔ ngɨ̀ bɔ̀ me ghɨ̀ ale, bɔ tanda nê bɔ làꞋà nyaŋ ko ka Mbɔ̧ɔ̧mà naa zə. 8Bɨ̀ ka me ghɨ̀ mbɨ̀Ꞌɨ̀ bòt bàa, nkàà nê àa ngɨ̀ à me laꞋ nê yeà ngàꞋa ètsəê wê elo̧o̧ àghɨ abua tǎt wè, tà yaŋe ko tê ndɔ̀Ꞌ.

9“Ye ndɨ bɨ̀a me tsàꞋte a Mbɔ̧ɔ̧mà la:

‘Tǎt wa wu a ègwet la leꞋ,

Ghɨa bòt è kukte èlen lê.

10Ghɨa kèfɔ̧̀ wê kɨꞋɨ,

bòt è me ghɨ̀ àghɨa àa nkɨà la a sitsǎꞋ

mbɨ̀Ꞌɨ̀ àa ègwet la.

11Ŋa awa èghɨjɨ àa kùꞋ àwa laane la.

12WaꞋa èfaãnəè ba mbɨ̀Ꞌɨ̀ bàambɔŋ

e waꞋa èfaãnəè bɔnyɨ ba la.

13À ka ntsàà àwa a èbem àtaãaãte.

Ka ntsì àwa a èbem kàbɔ̀ŋ.’ #6:13 “Kàbɔ̀ŋ” waa adziꞋ yaa la ane ndɨ̧ GLɨ̂k wua shua mɨ̧̂ nê wòt kàbɔ̀ŋ.

[Ngu nê kèfɔ̧̀ wu wê,

mètàŋ nè mèngùꞋte mè ngu mê

ane àlia nè àlia. Àmèn.]

14À waꞋa èfaãnəè bòt, ko tǎt wè wu a ègwet la naa waꞋa e bê mɨ̧̂. 15Ka à bakà waꞋa èfaãnəè bòt, ko betsiꞋa tǎt wè wu ègwet la ka waꞋa e bê mɨ̧̂.

Èngà̧ ane màntseke kà jɨ àghɨ

16“Bɨ me kɨ etseke kà jɨ àghɨ mbɨ̀Ꞌɨ̀ etsàꞋte a Mbɔ̧ɔ̧mà, bɨ̀ ka màꞋà tèsȩtsə ane yɨ̧ mbɨ̀Ꞌɨ̀ bòt bu bɔ̀ɔ shua nê bɔ wu àghɨa kà wu yùà la àa ngɨ̀à la. Bɔ̀ɔ ngɨ̀ bɔ màꞋà ngɨ̧̀ɨ̧̀nè ane yɔb mbɨ̀Ꞌɨ̀ bòt aa ko nê bɔ wua ntsèka kà jɨ àghɨ. Ane nkûŋ, tsiꞋ è shua wɨ̧ nê bɔ bɔ àbȩ̀ yɔb tè ndɔ̀Ꞌ. 17Ka à me tseke àfɨ̀Ꞌ àko kà jɨ àghɨ, à shùù èsi wê ndzɔꞋ, mpàke àtsəa yê, 18mbɨ̀Ꞌɨ̀ bòt e ko nê à wua ntsèka kà jɨ àghɨ. Wu ndàꞋ tǎt wè wu bòt àa ka ye atò la, ewu tàa ndzèa mènəè nàa ntsea a ntsèm la ka tàa ye ebɔ ŋa àbȩ̀ yê la.

Jandèlè a kèfɔ̧̀ Mbɔ̧ɔ̧mà

(Lk 12:33-34)

19“Bɨ̀ ka nɔ̀ŋè èghɨ èkab bɨ̧ a sitsǎꞋ, adzìꞋa èsoꞋo e bakà kwet ko àwèlàka aa baãaã, mbə bètsɔŋ e bəꞋə lob nyi nɨŋ la. 20È wu ale, bɨ̀ nɔ̀ŋè èghɨ èkab bɨ̧ a ègwet àdzìꞋa betsiꞋa èsoꞋo è ka gha abot, àwèlàka à ka wu baãaã, bètsɔŋ è ka mê ngu ko enyi enɨ la. 21Nkàà nê èntɨ̧ɨ̧ wòt aà ngua àfɨ̀Ꞌ àgème àdziꞋa tà nɔ̀ŋè èghɨ èkab bi la.

22“Àghɨ a wu mbɨ̀Ꞌɨ̀ èkaꞋà a mbɨ̧̀ ènyit. È wu ale, àghɨ a wòt a me bɔ̌ ko mbɨ̧̀ ènyit tò ègème naa lu̧u̧ nè èkaꞋà. 23Ka àghɨ a wòt a bakà wua mbɔ̀ ko taa wu wuê a èbem ndzěm. Ale, àghɨa àa a èntɨ̧ɨ̧ wòt la wu ndzěm, ko mèntsèke tò ègème naa me fene mbɨꞋɨ̀ ndzěm mbɔŋ.

24“BetsiꞋa wòt kà ko fàꞋ abua bètǎt àfàꞋ babe, nkàà nê tà bakà wua mpààbà wekǒ, nkɔ̀ŋkà wekǒ, ko taa me zə wekǒ ngwàa wekǒ. BetsiꞋa wòt kà me kùŋe a Mbɔ̧ɔ̧mà mè nkùŋà èkab.

Èngà̧ adù̧ mèmɨ̀ɨ̀te nyaŋ

25“Ale e ngua shua wɨ̧ nê bɨ̀ ka me mɨ̀ɨ̀te nê bɨ̀a jɨ ghǎ ko nu ghǎ ka etseke leꞋ. Bɨ̀ ka ndem mɨ̀ɨ̀tè nê bɨ̀a kwaã ghǎ a mbɨ̧̀ tɨ̧ leꞋ. Tè mèmpème wɔ̀bȩ̂ bakà tse èghɨjɨ, mbɨ̧̀ tò naa mě tsě ndǐtsə? 26Bɨ̀ lɨ̀ŋkè banɨ̧̀ bu bèa ndèa a ègwet la. Beà kà liꞋ àliꞋ, bè ka wua fùꞋà èghɨjɨ, bè ka wua nɔ̀ŋà èghɨ a ngǒtsə, ka tǎt wɨ̧ wu a ègwet la me jɨɨ awɔb. Tè bɨ bakà taꞋa tsè banɨ̧̀ mbɔŋ a mbì Mbɔ̧ɔ̧mà à? 27Wòt wu ane yɨ̧ tà me dèbè ènyit zi nyaŋ ko taa kwèꞋne àdziꞋa àfɨ̀Ꞌ ane afɨꞋa tà wu tseke a sitsǎꞋ la wu wàà?

28“Bɨ ghɨ̀ na ka me mɨ̀ɨ̀te ànəa ndǐtsə nyaŋ à? Bɨ̀ lɨ̀ŋkè mèfəèꞋ mu a èbemebàꞋ la ndzě ndɨ nàa ntsəèa la. Nàà kà fàꞋ, è ka wua ngɨ̀à ndǐtsə. 29Ka e ngua shua wɨ̧ nê èmàà ngu wuê fɔ̧̀ Sàlemun nè mèkab mi, ko tà lè kaꞋa bɔ ndǐtsə mbɨ̀Ꞌɨ̀ mekǒ ane mèfəèꞋ mbɔŋ. 30Tè Mbɔ̧ɔ̧mà wu ewèè mèfəèꞋ mu a èbemebàꞋ la anè, e mu àa ngɨ̀ à ye laane wàa, ètsəꞋ e me tsi bɔ to̧ maꞋa èwet la, è me wu awɨ̧ tà kà ghɨ̂ ale tè ntsě? Bɨ wu kwàꞋ bòt àlȩ̀ȩ̀tè a màndzia mèntɨ̧ɨ̧ mɨ̧ ane Mbɔ̧ɔ̧mà. 31Ale, bɨ̀ ka me dèbè ènyit yɨ̧ nê, ‘Bàa jɨ ghǎ?’ kò ‘Nu ghǎ?’ kò ‘Kwaã ghǎ leꞋ?’ 32Bòt kà wu bòt Mbɔ̧ɔ̧mà ka bɔ̀ɔ ndèbà ènyit yɔb ane ànəa èghɨ bàa la. Tǎt wɨ̧ wu a ègwet la ko nê bɨà nkɨ̀ŋkà èghɨ mbɔŋ ègème. 33Ale, bɨ̀ bɨa me zə wuê mènəè kèfɔ̧̀ Mbɔ̧ɔ̧mà mè me ghɨ̀ wuê àghɨa tàa nkɨà la, ko taa ŋa èghɨ bàagème bɨ̀a nkɨ̀ŋkà la abua yɨ̧. 34Mbɨ̀Ꞌɨ̀ àa anè la, bɨ̀ ka me mɨ̀ɨ̀te atetsɔꞋ nyaŋ. Bɨa sàꞋa atetsɔꞋ ka bɨ me mɨ̀ɨ̀tè àlia mbɔŋ. TsiꞋ mènəè àliabȩ kùꞋu ane àliabȩ ngaa.

Currently Selected:

Matìù 6: mnf

Highlight

Copy