Matìù 8

Yesò bəâ wòt àghɔ̧atsɔꞋɔ

(Mk 1:40-45; Lk 5:12-16)

1ÀfɨꞋa Yesò chu a ègwet abȩ wu la, taꞋà ènɔ̧̂ bòt e kuŋe atò. 2Wòt kǒ àghɔ̧atsɔꞋɔ a baãaã atò la kɨꞋɨ̀ a mbì tò ntèm tènjûŋ ti a si shu abua tò nê, “Lefɨ̀Ꞌ, à kɔ̀ŋkà, ko betsiꞋa à ghɨ̀ e pem.”

3Yesò nyààbè àbu azi mbà̧à̧te atò nê, “Oo maà nkɔ̀ŋkà, pem.” KwàꞋ àfɨꞋa mbɔŋ, tà bê mpem ane àghɔ̧atsɔꞋɔ yu. 4Yesò bɔ̂ shu abua tò nê, “Ko mbɨ̀Ꞌɨ̀ à shu wòt àghɨa a ghɨ̀ la, ka ghǎ nyɨ̀Ꞌte awê abua ntsìà mèpɨ̧̀ Mbɔ̧ɔ̧mà. À me ghǎ à nɨ èghɨ àa nɨ kɔ̀ŋke a Mbɔ̧ɔ̧mà mbɨ̀Ꞌɨ̀ Musì li shu la, enɨ ghɨ̌ waa waa naa ko nê à pem.”

Yesò bəâ wafàꞋ tǎt bèshujà Luêm kǒ

(Lk 7:1-10)

5Yesò me nyi a Kàpenàwuêm, tǎt bèshujà Luêm kǒ kɨꞋɨ̀ me shù̧ù̧te atò nê, 6“Lefɨ̀Ꞌ, wafàꞋ am wu a lob tà nɔ̀ŋkè me ghɔ̧̀ɔ̧̀ne la. Àghɔ̧ a ŋèꞋne atò tè tà kà tsi ngua nkoa ngȩ̀ȩ̀nà.”

7Tà làꞋ ale Yesò shu abua tò nê, “Maà kɨꞋɨ ebə atò.”

8Tǎt bèshujà wu mè shu abua tò nê, “Lefɨ̀Ꞌ, e mbakà kuꞋu ewe àa nyi a lob yaã la. Ka làꞋà wuê èngǎ̧ wè ko wafàꞋ am naa kweele. 9Mmɔ̌ mbɔŋ e ngu a èten bètǎt bèshujà ko, mè mbɔ̀ èbeko nè bèshujà a èten laã. Màa ngɨ̀ e shu abua waa nê ‘Ghǎ’, tà ghà, shu abua via nê ‘KɨꞋɨ’, tà kɨ̀Ꞌɨ̂, shu abua àbùꞋ am nê ‘Ghɨ àghɨ yaa’, tà bê ngɨ̀.”

10Mbɨ̀Ꞌɨ̀ Yesò zə èngǎ̧ tò wu la, a bê ntse atò, tà shu abua bòt bu nkùŋà vi la nê, “Ane nkûŋ, e ngua shua wɨ̧ nê, e mbakà ye wòt kǒ ka wuê ayɔɔ bòt Izəèlȩê tà bɔ ngɨŋa ntɨ̀ yaa mbê waa è bɔ ane yaã la. 11TsiꞋ è shua wɨ̧ nê, bòt nyaŋ aa li dzə a bètɔꞋɔ ngɔ̀ŋ ekɨꞋɨ etseke a si bɔ̂ Abàlàghâm ba nè Asàk nè Jàkɔ̂b àdziꞋa èpǎ̧ wu a èbem ngɔ̀ŋ fi a kèfɔ̧̀ Mbɔ̧ɔ̧mà la. 12Ka è me wu bòt bu bɔ wu li ewu a kèfɔ̧̀ və la, bɔ màꞋà wɔb àbȩ a èbem kèbìꞋà, adzìꞋa bɔ̀ɔ me dɨ̀a nkwèla àsɔŋ yɔb la.”

13Yesò làꞋ ale mbɔ shu abua tǎt bèshujà Luêm wu nê, “Dù a lob yê ko aa ye ndɨ a tsè wuê mbɨ̀Ꞌɨ̀ à bɨ̧ɨ̧ne a èntɨ̧ɨ̧ wê nê à wu la.” KwàꞋ àfɨꞋa mbɔŋ, wafàꞋ tò wu bê nkwèèlê.

Yesò bəâ bòt ko nyaŋ

(Mk 1:29-34; Lk 4:38-41)

14Yesò ghɨ̀ ale, ngà a lob Pità, me kɨꞋɨ nyɨ̌ vi tò wu a si ngò̧ò̧na sɔ̧̀ɔ̧̀nà, 15tà bà̧à̧te àbu atò sɔ̧̀ɔ̧̀nà wu bê ntùꞋtè tè tà lɔ̀Ꞌɔ a si me taŋke atò.

16Nyèm è fen, bɔ nɨ bòt nyaŋ fote kàbɔ̀ŋ tèa ane yɔb la, nkɨ̀Ꞌɨ̂ tà làꞋ èngà̧ nɨŋ fəè fote kàbɔ̀ŋ tu, mè mbəâ bòt bàgème bɔ̀ɔ ngò̧ò̧nà la. 17A li ntsè anè mbɨ̀Ꞌɨ̀ e ghɨ̌ àghɨa ndàꞋàtɔŋ Mbɔ̧ɔ̧mà Àsayà li ndàꞋ la aa wu nkûŋ nê, “Tà li ntsì èlɔꞋ ba, mè mbəè èghɔ̧ ba ègème.”

È ntsě ànəa leyu e kùŋe a Yesò

(Lk 9:57-62)

18ÀfɨꞋa Yesò ye ènɔ̧̂ bòt a ngèt zi la, tà shu abua bɔkatè bi nê bɔ̀ ghɨa bɔ̂ tò ba è gha agua èlemè àko zìa. 19NyɨꞋtà mbɨ̧te Musì kǒ kɨꞋɨ nê, “NyɨꞋtà, maà kùŋè awê àdziꞋ àgème àa ngà la.”

20Yesò shu abua tò nê, “Ètsɔ̀b e bɔ tègwòŋ tɔb, banɨ̧̀ bèa ndèa a ègwet la e bɔ tèjî tɔb, ka Waã Wòt kà bɔ àdziꞋa tàa nɔ̀ŋè àtsəa zi eyètè la.”

21Wòt kǒ ane bɔkatè tò mè shu abua tò nê, “Tê, tsiꞋ è nga ntua tǎt am yaꞋ ka nkɨ̀Ꞌɨ̂.”

22Yesò shu abua tò nê, “KɨꞋɨ nkùŋè am, tsiꞋ èpfəꞋte bòt è tu bèmpfəà bɔb.”

Yesò fìi àfeme àkekweelè

(Mk 4:35-41; Lk 8:22-25)

23Yesò nyi a èbem ànkànuꞋ, bɔkatè tò e kùŋè atò. 24KwàꞋ àfɨꞋa mbɔŋ, àfeme àkekweelè a bùꞋ me tsě a èbem èlemè wu tè ntsìꞋa mpàà ànkànuꞋ yu maꞋa àbâ abà, mbɔ̂ Yesò wua ndìa. 25Bɔkatè tò e ghà ndzò̧ atò nê, “Tê, baa pfəꞋtè, tɨŋe awa.”

26Yesò bɨ̀ɨ̀lè nê, “Bɨ̀ bɔa ghàà, bɨ ghɨ̀ na ka bɨ̀ ka zǐ èntɨ̧ɨ̧ wɨ̧ ane yaã ntsɔ̧̀ à?” Tà shu ale, ndɔ̀Ꞌ a si ŋȩ̂ àfeme yu bɔ̂ mèleb, èdziꞋ e fi bɔ̀ɔl.

27Ànəa mbɔŋ a bê ntsè àwɔb tè bɔ tsiꞋi me shu nê “Eyaa chɨɨme ngu wàa, ka àfeme bɔ̂ mèleb e me zə atò à?”

Yesò fəè fote kàbɔ̀ŋ adù̧ bòt ko babe

(Mk 5:1-20; Lk 8:26-39)

28Yesò ghà tê tà wu àlaꞋ a bòt Gàdalìn agua èlemè àko zìa, bòt ko babe nè fote kàbɔ̀ŋ ane yɔb e lɔꞋɔ àtsəasì nkɨ̀Ꞌɨ̂ nkwene ane tò. Bòt ngaa è le wua mbààla tè bòt è ka tsi ngua ntsèà alu̧ və. 29Bòt mbɔŋ e bê ŋȩ nê, “Waã Mbɔ̧ɔ̧mà, à kɨ e ghɨ̀ na ane ya à? À kɨ zi àlɔꞋ ane ya ka àlia yu aa kùꞋuê?”

30Àlaã mèkunyà̧ àko a li ngua njɨ̀a a ngèt abot. 31Fote kàbɔ̀ŋ tu te shu̧u̧te a Yesò nê, “À wu tsì àwa adù̧ bòt baa, à tsàà àwa ane àlaã mèkunyà̧ maa.”

32Yesò shu abua yɔb nê “Bɨ̀ dzəa ndù.” Bɔ bê ndzəè ngà nyi ane mèkunyà̧ mu. KwàꞋ àfɨꞋa mbɔŋ, mèkunyà̧ mu bê nde nchùŋe èku̧u̧nè lu ndème a èbem èlemè wu. 33Bèmbaabà mèkunyà̧ mu e lùùlà ngà a èbem àpfəè ngwȩ̀ȩ̀te ànəê àgème shuê, nè àghɨa a ghɨ ane bòt bu nè fote kàbɔ̀ŋ adù̧ yɔb la. 34Ale, àpfəè yu àgème a dzəè nkɨ̀Ꞌɨ̂ nkwene ane Yesò, shù̧ù̧te atò nê tà dzə àbâ àlaꞋ a yɔb me ghǎ.

Currently Selected:

Matìù 8: mnf

Highlight

Copy