Mak 15

Bɔ nɨ a Yesò ngà a mbì Pȩlèt

(Mat 27:1-2, 11-14; Lk 23:1-5; Jn 18:28-38)

1ÈtsəꞋ è tsi kwàꞋ a ntɔtetsɔ̌Ꞌ bètǎt bèntsìà mèpɨ̧̀ Mbɔ̧ɔ̧mà bàgème nè bɔɔjuŋ Bèjuê e tseke a si tàŋke ndɨ bɔ̀ɔ ghɨ̌ ka ebuŋe a Yesò la. Bɔ kuule atò ane fȩtsə nɨŋ ngà ndzì a tèkitebu Pȩlèt.

2Pȩlèt bììte a Yesò nê, “À wu Fɔ̧̀ Bèjuê?”

Tà bɨ̀ɨ̀lè nê, “Wuê mbɨ̀Ꞌɨ̀ à shu la.”

3Bètǎt bèntsìà mèpɨ̧̀ Mbɔ̧ɔ̧mà e zì mènəè ànyaꞋne àtsəa Yesò. 4Ale, Pȩlèt mè mbììte atò nê, “À ka laꞋa ànəa à? Zə mènəè bɔ shu àtsəa yê la.”

5Ka Yesò bê mè ntu̧ elaꞋa èngà̧ tè ànəa ngaa a bê ntsè a Pȩlèt.

Bɔ ŋa a Yesò nê bɔ̀ buŋa

(Mat 27:15-26; Lk 23:13-25; Jn 18:39-19:16)

6È li, è ghɨ̀ è wu àlia èpǎ̧ Màntsea a ègwet ègème tè gɔvanɔ̀ sà wòt tèfȩ wemɔ̀Ꞌ bòt naa nkɨà nê tà sa la. 7Wòt kǒ èlen tò wu Bàlabasì la le wu a tèfȩ àfɨꞋa mbɔŋ ayɔɔ bòt bu bɔ li mbùŋè wòt àfɨꞋa ndèm li ndzə la.

8Ènɔ̧̂ bòt è bu̧u̧ta è me biite a Pȩlèt nê tà sǎ wòt tèfȩ mbɨ̀Ꞌɨ̀ tàa ndzìà ngɨ̀à la, 9tà bììte awɔb nê, “Bɨ̀a nkɨà nê e sa fɔ̧̀ Bèjuê waa à?” 10Tàà mbììte ale ngu ndɨ tà ko nê bètǎt bèntsìà mèpɨ̧̀ Mbɔ̧ɔ̧mà e nɨa ghòꞋnà ka mbà̧aã Yesò nkɨ̀Ꞌɨ̂ ndzi a tèkitebu ti la. 11Ka bètǎt bèntsìà mèpɨ̧̀ bu e lutè ènɔ̧̂ bòt bu nê bɔ ghɨa Pȩlèt tsì wuê a Bàlabasì a tèfȩ.

12Pȩlèt mè mbììte nê, “Bɨ̀a nkɨà nê è ngɨ̀ na nè wòt waa bɨ̀a ntɔ nê fɔ̧̀ Bèjuê la à?”

13Bɔ ŋȩ nê, “Wu̧u̧te atò a mbɨ̧̀ mbasa.”

14Pȩlèt mè mbììte nê, “Tà ghɨ kǎ ànəa kàbɔ̀ŋ à?”

Bɔ paà ŋȩ nê “Wu̧u̧te atò a mbɨ̧̀ Mbasa.”

15Ndɨ̀ wu Pȩlèt li ngua nkɨà nê ènɔ̧̂ bòt bu è me kɔ̀ŋkè àvi la, tà sa Bàlabasì. È me wua Yesò, tà ghɨ̀ bèshujà e shu̧u̧ atò mbɔ̂ ŋa atò nê bɔ̀ wu̧u̧te a mbɨ̧̀ mbasa.

Bèshujà e wȩ̀ȩ̀tè a Yesò

(Mat 27:27-31; Jn 19:2-3)

16Bèshujà bu e nɨ a Yesò nɨŋ nga a tsâ̧ ntɔꞋ Gɔvanɔ̀, mbɔ̂ fète àbəèꞋ bèshujà bu. 17Bɔ ghɨ̀ ale, ndzì èmǎ̧ fɔ̧̀ a mbɨ̧̀ tò mbɔ̂ nɨ njɨŋtsə mbàꞋa ntà̧ ndzì àtsəa tò. 18Bɔ ghɨ̀ ale, ŋɔ̀Ꞌne a si a mbì tò me wȩ̀ȩ̀te atò shua nê “Àtsèà bèfɔ̧̀, Fɔ̧̀ Bèjuê!” 19Mbɔ̂ nɨ̀ ayɨ̌t shù̧ àtsəa tò, ntsəètè mattsə ane tò. 20Bɔ̀ wȩ̀ȩ̀te atò tè bɔ̀ lɔꞋa, bɔ mè sɔ̀ɔ̀lè èmǎ̧ wu, mbɔ̂ ndzì ndìte tò a mbɨ̧̀ tò, ka nɨ atò e ghǎ wu̧u̧te a mbɨ̧̀ mbasa.

Bɔ wu̧u̧tè a Yesò a mbɨ̧̀ mbasa

(Mat 27:32-44; Lk 23:26-43; Jn 19:17-27)

21Bɔ li ndzèa Simùn wòt Silenè, tǎt Àlèkzandà bɔ̂ Lufùs alu̧ tà dzəa àbâ àlaꞋ àko me kɨꞋɨ àpfəèà nɨ̧ la. Bèshujà bu e baãaã atò, ŋɨ̀Ꞌa tò tà ŋèꞋe mbasa Yesò. 22Bɔ nɨ atò nkɨ̀Ꞌɨ̂ àdzìꞋa ko bɔ̀ɔ ntɔ nê Golgotà ngua shua nê “ÀdziꞋa àghele àtsə la”, 23bɔ fȩ̀ȩ̀tè mèlùꞋ ane èghɨbə ko bɔ̀ɔ ntɔ nê “Məə” la, ŋa abua tò nê tà nu ka tà tu̧. 24Bɔ wu̧u̧te atò a mbɨ̧̀ mbasa mbɔ̂ màꞋà èbìt enɨ ghàbte ndìte tò.

25Bɔɔ̀ ngu̧u̧te a Yesò a mbɨ̧̀ mbasa ale è wu nyèm tebəèꞋa atetsɔꞋ. 26Bɔ li shɨ èngà̧ wu bɔ nɨŋ fèèlè atò la nê, “Eyaa wu Fɔ̧̀ Bèjuê.” 27Bɔ li ngu̧u̧te bètsɔŋ babe a mbɨ̧̀ bèmbasa a ngèt tò, wemɔ̀Ꞌ àbâ àbualu̧, nè wekǒ àbâ àbuantoŋ. [ 28Bɔ li ngɨ̀ ale, ànəa bɔ shɨ a èbem àkatè a Mbɔ̧ɔ̧mà la a dzəè nkûŋ nê, “Bɔ̀ le zi atò ayɔɔ bòt kàbɔ̀ŋ.” ] 29Bòt bɔɔ ntsea la e me nyiꞋi ètsə bɔb ngwȩ̀ȩ̀tà atò, shua nê “Àghâ̧! Àwɔ̀ wu à li nê yea bùù lob nɨ̧ Mbɔ̧ɔ̧mà e mě bɔ̧ɔ̧ ane èlibȩ betat la, tɨŋe awê àwɔ̀ mbɔŋ ndɔ̀Ꞌ a ègwet mbasa wu nchu a si. 30Tɨŋe awê àwɔ̀ mbɔŋ nchu a ègwet mbasa wu.”

31Bètǎt bèntsìà mèpɨ̧̀ Mbɔ̧ɔ̧mà nè bènyɨꞋtà mbɨ̧tsə e me wȩ̀ȩ̀te atò wuê a èlɨ mbɔŋ mɨ̧̂ shua nê, “Tà li ntɨ̀ŋe bòt ko, ka tà kà wu ko etɨŋe avi zìambɔŋ. 32Tà ntsè Fɔ̧̀ bòt Izəèlȩê, tà nchɨɨmâ nchu a ègwet mbasa àfɨ̀Ꞌ yaa ko baa bɨ̧ɨ̧ne nê Tà wu Fɔ̧̀ wu Mbɔ̧ɔ̧mà li ndzɔꞋ etsàà la.”

Bòt bu babe bɔ wu̧u̧te awɔb a ngèt tò la e wȩ̀ȩ̀tè atò mɨ̧̂.

Èvə Yesò

(Mat 27:45-56; Lk 23:44-49; Jn 19:28-30)

33È me wu a kètsìà nèngû̧ ndzěm kwene a èbem àlaꞋ a mbɔŋ àgème, ngà ndzə ane nyèm tetat. 34È me wu ane nyèm tetat, Yesò ŋȩ ane àtɔŋ nɨ̧ nê, “Èli, Èli, làma sàba tàni?” Ngua shua nê “Tǎt am Mbɔ̧ɔ̧mà, Tǎt am Mbɔ̧ɔ̧mà leꞋ, à ghɨ̀ na ka ngwàꞋ am à?”

35Bòt ko ane bòt bu bɔ tɨ̧ɨ̧te abot la e zə ànəa tà shu la nê, tà wua ntɔa Èlȩjà.

36Wòt kǒ ane yɔb nɨa kùcha ndùùlà ngà ntsèb a èbem àbɨꞋta mèlùꞋ ndzi àtsəa ayɨ̌t, ŋa abua atò, mbɔ̂ nê, “TsiꞋ bà ye nê Èlȩjà naa kɨꞋɨ shuke atò a si leꞋ?”

37Yesò ŋȩ ane àtɔŋ nɨ̧, mbɔ̂ mpfə.

38ÀfɨꞋa mbɔŋ, ndǐ yu bɔ nɨŋ tsòŋâ ngàbtè lob nɨ̧ Mbɔ̧ɔ̧mà la saãaãnà èbâ babe, ebùꞋu àtsə e ghǎ wua lə. 39Mbɨ̀Ꞌɨ̀ tǎt banyà̧ wu tà tɨ̧ɨ̧ me ye atò la, è ye ndɨ Yesò pfə la, tà nê, “Ane nkûŋ, mbê waa li ngu Waã Mbɔ̧ɔ̧mà.”

40Bèzi ko e li ngu abot bɔ tɨ̧ɨ̧ a endɨ̌ me ye àghɨa ngɨ̀à la. Màlià Màdàlin nè Màlià nyɨ̌ Jimsì tèchɨɨle bɔ̂ Jòsêb nè Sàlomè, e li ngu ayɔɔ bèzi mbɔŋ. 41Bèzi bàa e li ngua nkuŋa Yesò tê àfɨꞋa tà li ngu a Galìlî la, ntɨ̀ŋe atò nè bèzi ko nyaŋ bɔ̀ le kuŋe a Yesò nkɨ̀Ꞌɨ̂ a Jèlusalèm la.

Bɔ tu a Yesò

(Mat 27:57-61; Lk 23:50-56; Jn 19:38-42)

42-43Nyèm li me fene, Jòsêb wòt Àlimàtià kǒ tà li ngu wòt kèkweelè a èbem lob èsaꞋa la kɨꞋɨ̀. Tà li ngua nchɨ̀Ꞌà kèfɔ̧̀ Mbɔ̧ɔ̧mà nàa kɨꞋɨ. Àlia mbɔŋ li ngu àlia Màntaŋka (è wù àli yu ètsəꞋ àa tsi naa wu àliapfəèa Bèjuê la.) Ale, tà baãaã èntɨ̧ɨ̧ vi ngà shu abua Pȩlèt nê bɔ̀ ŋa àpfəꞋta Yesò abua zi. 44A taꞋa tsě a Pȩlèt e zə nê Yesò pfə tê ndɔ̀Ꞌ. Tà tɔ tǎt bèshujà mbììte nê Yesò yaŋe pfə leꞋ? 45ÀfɨꞋa tà zə èngǎ̧ tǎt banyà̧ wu la, tà shu abua Jòsêb nê tà ghǎ nɨ̀ àpfəꞋte yu. 46Jòsêb yù̧ù̧ ndǐ, shùke àpfəꞋte yu a si, ndèbte a èbem ndǐ yu, mbɔ̂ ngà ndzi a èbem èsî bɔ̀ le tu a èbem èwu la. Mbɔ̂ mbɨ̀ŋe taꞋà èti nkèba ètsəê. 47Màlià Màdàlin nè Màlià nyɨ̌ Jòsêb e li ngu abot, ndzè àdziꞋa bɔ nɔ̀ŋè àpfəꞋta Yesò la.

Currently Selected:

Mak 15: mnf

Highlight

Copy