Mak 2
2
Yesò bəâ wòt kǒ àbâ ènyit tò a pfə la
(Mat 9:1-8; Lk 5:17-26)
1Èli ko e li nyàꞋa ntsè, Yesò wènè a Kàpenàwuêm. Tà ghà ale, a bê mbùà nê tà kua tê ntsìꞋi àpfəè. 2Ale, bòt nyaŋ e bù̧ù̧te abot tè àdziꞋ à ka bê tsi ngu, ka wuê a mbì ètsələèꞋ. Mbɨ̀Ꞌɨ̀ Yesò nàa ntsɔ̀tà Ntu̧ Ntsɔ̧̀ yu abua yɔb la, 3bòt bakwì e ŋeꞋè wòt kǒ àbâ ènyit tò a pfə la, nɨŋ nkɨ̀Ꞌɨ̂ abua tò. 4Bɔ kɨꞋɨ ale, bɔ̀ ka ye èlu̧ bɔ̀ɔ nɨa ŋut epùùla a mbì Yesò nkàà ènɔ̧̂ bòt bu abot la. Ale, bɔ kɔꞋ a ègwet lob, ntùꞋ èləꞋ kwàꞋ a ègwet àdziꞋ yu Yesò tɨ̧ɨ̧ la, shùke a mbê wu a ègwet àkwàŋkè ntsàà a lob. 5Yesò ye ndɨ bòt ngaa e bɔ ntɨ̀ ane zi la, shu abua mbê ngaa nê, “Waã am, mâ waꞋa a kàbɔ̀ŋ wê.”
6BènyɨꞋtà mbɨ̧te Musì ko e tsekè abot me lèmte a mèntɨ̧ɨ̧ mɔb shua nê, 7“Mbê waa ghɨ̀ na ka me làꞋa anè à? Tàa fɨ̀Ꞌnà àvi ane Mbɔ̧ɔ̧mà! Wàa tsa nàa ngwàꞋa kàbɔ̀ŋ ka nè Mbɔ̧ɔ̧mà à?”
8KwàꞋ àfɨꞋa mbɔŋ, Yesò ko àghɨa bɔ mɨ̀ɨ̀tà la a èntɨ̧ɨ̧ vi mbììte awɔb nê, “Bɨ ghɨ̀ na ka me kwàꞋtè èwuu maa nè mènəè à? 9Àyea ŋa àa njùa à, e shu abua wòt àbâ ènyit tò a pfə la nê ‘Mâ waꞋa kàbɔ̀ŋ wê’, kò wuê nê ‘Lɔ̀Ꞌɔ a si ŋèꞋè àkwàŋkè ye me ghȩ̀ȩ̀ne à?’ 10Maa nyɨꞋte awɨ̧ laꞋnê Waã Wòt bɔ àtɔŋ a sitsǎꞋ à màngwaꞋa kàbɔ̀ŋ.” Ale, tà shu abua wòt wu àbâ ènyit tò a pfə la nê, 11“Mâ laꞋnê, lɔ̀Ꞌɔ a si ŋèꞋe àkwàŋkè àyê me ghǎ àpfəè.” 12Ŋut bê ndɔ̀Ꞌ a si ŋèꞋe àkwàŋkè zi yu me ghà àbȩ a mbì lɔb bàgème. A tsè ènɔ̧̂ bòt bu, bɔ tsiꞋi me wùꞋte a Mbɔ̧ɔ̧mà shua nê, “Ba te bakà ye ànəê àko anè!”
Yesò tɔa Levì
(Mat 9:9-13; Lk 5:27-32)
13Yesò li mè nkua akwèn nga a ngèt èlemè Galìlî, ènɔ̧̂ bòt e kɨꞋɨ̀ nkwene ane tò, tà bùꞋ me laꞋa abua yɔb. 14MbɨꞋɨ tàa ngȩ̀ȩ̀tà la, tà yèa nɨà èkab taksì kǒ èlen to wu Levì, waã Alfeɔ̀ tà tsekè àdzìꞋa àfàꞋ àzi la. Yesò shu abua tò nê, “KɨꞋɨ nkùŋè am.” Levì lɔ̀Ꞌɔ a si nkùŋè atò.
15Mbɨ̀Ꞌɨ̀ Yesò tsekè me jɨ èghɨ a lob Levì la, bòt nyaŋ bɔ̀ɔ nɨ̀a èkab taksì la nè bòt kàbɔ̀ŋ e tsekè a si bɔ̂ Yesò ba nè bɔkatè tò me jɨ èghɨjɨ. A li ngu anè nkàà nê èwuu bòt bàa e li ntàꞋa wua nkuŋa tò. 16BènyɨꞋtà mbɨ̧te Musì ko è wu Bèfalèsiì la e ye ndɨ tà fɔta èghɨjɨ bɔ̂ bènɨa èkab taksì nè bòt kàbɔ̀ŋ la, mbììtè bɔkatè Yesò bu nê, “Tà ghɨ̀ na ka me fɔte èghɨjɨ bɔ̂ èwuu bòt ba à?”
17Yesò zə ale, mbɨ̀ɨ̀lè nê, “Bòt kekweelè aà kà kɨ ngàŋ. Bèngɔ̧̀ ka bɔ̀ɔ nkɨà ngàŋ la. È nka kɨꞋa etɔ bòt bɔ mɨɨtè nê bɔ tɨ̧ɨ̧ ndɨŋndɨ̀ŋ la, e nkɨꞋa etɔ bòt kàbɔ̀ŋ.”
Èngà̧ ane ànəa màntseka kà jɨ àghɨ
(Mat 9:14-17; Lk 5:33-39)
18È li ngu àfɨ̀Ꞌ àko, bɔkatè Jɔ̌n ndzìà èdzî nè Bèfalèsiì e me tseke àfɨ̀Ꞌ àko kà jɨ àghɨ mbɨ̀Ꞌɨ̀ etsàꞋte a Mbɔ̧ɔ̧mà. Bòt ko e kɨꞋɨ̀ mbììte a Yesò nê, “Ghǎ ghɨ̀ ka bɔkatè Jɔ̌n ndzìà èdzî, nè èbe Bèfalèsiì be me tseke àfɨ̀Ꞌ àko kà jɨ àghɨ mbɨ̀Ꞌɨ̀ etsàꞋte a Mbɔ̧ɔ̧mà ka èbê è ka wua ngɨ̀à ale à?”
19Yesò bììte a wɔb nê, “Tè betsiꞋa bègɨ̧̌ ndzɔꞋɔ etɔ̧ɔ̧ èbu bɔb àfɨꞋa lu̧ ndzà bèlè bɔ̂ tò ba la à? 20Àfɨ̀Ꞌ aa ghɨ̌ nkùꞋ bɔ tsì lu̧ ndzà yu ayɔɔ yɔb, e ye wu àfɨꞋa bɔ̀ɔ me tseke kà jɨ àghɨ la.
21“Wòt nàà kà lɔꞋ àlia nɨ̀ àdziꞋa ndǐ fi ntèmte ndǐ èlènè la, nkàà nê ye fi yu naa tseke tê sààlà ndzəè, èləꞋ mbɔŋ e mè mpàa fàŋ tê ntsè ndɨ e ghɨ̂ ngu la. 22Wòt kà meè ngua ndɔ̀Ꞌ àlia ndzìà mèlùꞋ fi a èbem ètetuꞋ gùbnyà̧ e lènè la. Tà ghɨ̀ ale, ko ètetuꞋ gùbnyà̧ bu aa gwele, mèlùꞋ mu naa tsəète, ètetuꞋ bu aa bɨɨ. ChaꞋ bɔ̀ɔ ndzìà mèlùꞋ fi wuê a èbem ètetuꞋ gùbnyà̧ è fi.”
Èngà̧ ane ànəa àliapfəèa Bèjuê
(Mat 12:1-8; Lk 6:1-5)
23È li ngu àliapfəèa Bèjuê àko, Yesò me tsě a èbem mbȩte bɔ liꞋi èwuu ntsəètè ko la. Mbɨ̀Ꞌɨ̀ bɔ̂ bɔkatè bi àa ngȩ̀ȩ̀nà la, bɔ bùꞋ me fààte ntsəè tu. 24Bèfalèsiì e shu abua Yesò nê, “Ye àghɨa bɔkatè bê e ghɨ̀à, è wu àghɨa bɔ̀ɔ ka ghɨ àliapfəèa Bèjuê la.”
25Yesò bɨ̀ɨ̀lè nê “Bɨ te bakà tɔ ezə àghɨa fɔ̧̀ Dàbid bɔ̂ bòt bi e li ngɨ̀ àfɨꞋa ndzìtsə te li ngua nkua awɔb la à? 26Ka tà li nyi a èbem lob nɨ̧ Mbɔ̧ɔ̧mà bɔ̂ bòt bi, àfɨꞋa Àbiatà lè wu àtsəa bèntsìà mèpɨ̧̀ Mbɔ̧ɔ̧mà la, kwèle a bled wu bɔ tɔ èlen Mbɔ̧ɔ̧mà adù̧ la à? Bɔɔ̀ nkwèla ale è kà wu àghɨa mbɨ̧ ta te bɨ̧ɨ̧nè nê wòt tsa kà wu ntsìà mèpɨ̧̀ Mbɔ̧ɔ̧mà ghɨa la.”
27Yesò lìà nê, “Mbɔ̧ɔ̧mà li ngɨ̀ àliapfəè mbɨ̀Ꞌɨ̀ nɨ etɨŋe wɔ̀bȩ̂, tà li tà kà wua ngɨ̀à nê, wɔ̀bȩ̂ ŋà àtsəa zi ane ànəa àliapfəè. 28È wu ale, bɨ̀ ko nê, Waã Wòt wu wòt tà bɔ àtɔŋ a ègwet àliapfəèa Bèjuê la.”
Currently Selected:
Mak 2: mnf
Highlight
Share
Copy
Want to have your highlights saved across all your devices? Sign up or sign in
© 2006, Cameroon Association for Bible Translation and Literacy
Mak 2
2
Yesò bəâ wòt kǒ àbâ ènyit tò a pfə la
(Mat 9:1-8; Lk 5:17-26)
1Èli ko e li nyàꞋa ntsè, Yesò wènè a Kàpenàwuêm. Tà ghà ale, a bê mbùà nê tà kua tê ntsìꞋi àpfəè. 2Ale, bòt nyaŋ e bù̧ù̧te abot tè àdziꞋ à ka bê tsi ngu, ka wuê a mbì ètsələèꞋ. Mbɨ̀Ꞌɨ̀ Yesò nàa ntsɔ̀tà Ntu̧ Ntsɔ̧̀ yu abua yɔb la, 3bòt bakwì e ŋeꞋè wòt kǒ àbâ ènyit tò a pfə la, nɨŋ nkɨ̀Ꞌɨ̂ abua tò. 4Bɔ kɨꞋɨ ale, bɔ̀ ka ye èlu̧ bɔ̀ɔ nɨa ŋut epùùla a mbì Yesò nkàà ènɔ̧̂ bòt bu abot la. Ale, bɔ kɔꞋ a ègwet lob, ntùꞋ èləꞋ kwàꞋ a ègwet àdziꞋ yu Yesò tɨ̧ɨ̧ la, shùke a mbê wu a ègwet àkwàŋkè ntsàà a lob. 5Yesò ye ndɨ bòt ngaa e bɔ ntɨ̀ ane zi la, shu abua mbê ngaa nê, “Waã am, mâ waꞋa a kàbɔ̀ŋ wê.”
6BènyɨꞋtà mbɨ̧te Musì ko e tsekè abot me lèmte a mèntɨ̧ɨ̧ mɔb shua nê, 7“Mbê waa ghɨ̀ na ka me làꞋa anè à? Tàa fɨ̀Ꞌnà àvi ane Mbɔ̧ɔ̧mà! Wàa tsa nàa ngwàꞋa kàbɔ̀ŋ ka nè Mbɔ̧ɔ̧mà à?”
8KwàꞋ àfɨꞋa mbɔŋ, Yesò ko àghɨa bɔ mɨ̀ɨ̀tà la a èntɨ̧ɨ̧ vi mbììte awɔb nê, “Bɨ ghɨ̀ na ka me kwàꞋtè èwuu maa nè mènəè à? 9Àyea ŋa àa njùa à, e shu abua wòt àbâ ènyit tò a pfə la nê ‘Mâ waꞋa kàbɔ̀ŋ wê’, kò wuê nê ‘Lɔ̀Ꞌɔ a si ŋèꞋè àkwàŋkè ye me ghȩ̀ȩ̀ne à?’ 10Maa nyɨꞋte awɨ̧ laꞋnê Waã Wòt bɔ àtɔŋ a sitsǎꞋ à màngwaꞋa kàbɔ̀ŋ.” Ale, tà shu abua wòt wu àbâ ènyit tò a pfə la nê, 11“Mâ laꞋnê, lɔ̀Ꞌɔ a si ŋèꞋe àkwàŋkè àyê me ghǎ àpfəè.” 12Ŋut bê ndɔ̀Ꞌ a si ŋèꞋe àkwàŋkè zi yu me ghà àbȩ a mbì lɔb bàgème. A tsè ènɔ̧̂ bòt bu, bɔ tsiꞋi me wùꞋte a Mbɔ̧ɔ̧mà shua nê, “Ba te bakà ye ànəê àko anè!”
Yesò tɔa Levì
(Mat 9:9-13; Lk 5:27-32)
13Yesò li mè nkua akwèn nga a ngèt èlemè Galìlî, ènɔ̧̂ bòt e kɨꞋɨ̀ nkwene ane tò, tà bùꞋ me laꞋa abua yɔb. 14MbɨꞋɨ tàa ngȩ̀ȩ̀tà la, tà yèa nɨà èkab taksì kǒ èlen to wu Levì, waã Alfeɔ̀ tà tsekè àdzìꞋa àfàꞋ àzi la. Yesò shu abua tò nê, “KɨꞋɨ nkùŋè am.” Levì lɔ̀Ꞌɔ a si nkùŋè atò.
15Mbɨ̀Ꞌɨ̀ Yesò tsekè me jɨ èghɨ a lob Levì la, bòt nyaŋ bɔ̀ɔ nɨ̀a èkab taksì la nè bòt kàbɔ̀ŋ e tsekè a si bɔ̂ Yesò ba nè bɔkatè tò me jɨ èghɨjɨ. A li ngu anè nkàà nê èwuu bòt bàa e li ntàꞋa wua nkuŋa tò. 16BènyɨꞋtà mbɨ̧te Musì ko è wu Bèfalèsiì la e ye ndɨ tà fɔta èghɨjɨ bɔ̂ bènɨa èkab taksì nè bòt kàbɔ̀ŋ la, mbììtè bɔkatè Yesò bu nê, “Tà ghɨ̀ na ka me fɔte èghɨjɨ bɔ̂ èwuu bòt ba à?”
17Yesò zə ale, mbɨ̀ɨ̀lè nê, “Bòt kekweelè aà kà kɨ ngàŋ. Bèngɔ̧̀ ka bɔ̀ɔ nkɨà ngàŋ la. È nka kɨꞋa etɔ bòt bɔ mɨɨtè nê bɔ tɨ̧ɨ̧ ndɨŋndɨ̀ŋ la, e nkɨꞋa etɔ bòt kàbɔ̀ŋ.”
Èngà̧ ane ànəa màntseka kà jɨ àghɨ
(Mat 9:14-17; Lk 5:33-39)
18È li ngu àfɨ̀Ꞌ àko, bɔkatè Jɔ̌n ndzìà èdzî nè Bèfalèsiì e me tseke àfɨ̀Ꞌ àko kà jɨ àghɨ mbɨ̀Ꞌɨ̀ etsàꞋte a Mbɔ̧ɔ̧mà. Bòt ko e kɨꞋɨ̀ mbììte a Yesò nê, “Ghǎ ghɨ̀ ka bɔkatè Jɔ̌n ndzìà èdzî, nè èbe Bèfalèsiì be me tseke àfɨ̀Ꞌ àko kà jɨ àghɨ mbɨ̀Ꞌɨ̀ etsàꞋte a Mbɔ̧ɔ̧mà ka èbê è ka wua ngɨ̀à ale à?”
19Yesò bììte a wɔb nê, “Tè betsiꞋa bègɨ̧̌ ndzɔꞋɔ etɔ̧ɔ̧ èbu bɔb àfɨꞋa lu̧ ndzà bèlè bɔ̂ tò ba la à? 20Àfɨ̀Ꞌ aa ghɨ̌ nkùꞋ bɔ tsì lu̧ ndzà yu ayɔɔ yɔb, e ye wu àfɨꞋa bɔ̀ɔ me tseke kà jɨ àghɨ la.
21“Wòt nàà kà lɔꞋ àlia nɨ̀ àdziꞋa ndǐ fi ntèmte ndǐ èlènè la, nkàà nê ye fi yu naa tseke tê sààlà ndzəè, èləꞋ mbɔŋ e mè mpàa fàŋ tê ntsè ndɨ e ghɨ̂ ngu la. 22Wòt kà meè ngua ndɔ̀Ꞌ àlia ndzìà mèlùꞋ fi a èbem ètetuꞋ gùbnyà̧ e lènè la. Tà ghɨ̀ ale, ko ètetuꞋ gùbnyà̧ bu aa gwele, mèlùꞋ mu naa tsəète, ètetuꞋ bu aa bɨɨ. ChaꞋ bɔ̀ɔ ndzìà mèlùꞋ fi wuê a èbem ètetuꞋ gùbnyà̧ è fi.”
Èngà̧ ane ànəa àliapfəèa Bèjuê
(Mat 12:1-8; Lk 6:1-5)
23È li ngu àliapfəèa Bèjuê àko, Yesò me tsě a èbem mbȩte bɔ liꞋi èwuu ntsəètè ko la. Mbɨ̀Ꞌɨ̀ bɔ̂ bɔkatè bi àa ngȩ̀ȩ̀nà la, bɔ bùꞋ me fààte ntsəè tu. 24Bèfalèsiì e shu abua Yesò nê, “Ye àghɨa bɔkatè bê e ghɨ̀à, è wu àghɨa bɔ̀ɔ ka ghɨ àliapfəèa Bèjuê la.”
25Yesò bɨ̀ɨ̀lè nê “Bɨ te bakà tɔ ezə àghɨa fɔ̧̀ Dàbid bɔ̂ bòt bi e li ngɨ̀ àfɨꞋa ndzìtsə te li ngua nkua awɔb la à? 26Ka tà li nyi a èbem lob nɨ̧ Mbɔ̧ɔ̧mà bɔ̂ bòt bi, àfɨꞋa Àbiatà lè wu àtsəa bèntsìà mèpɨ̧̀ Mbɔ̧ɔ̧mà la, kwèle a bled wu bɔ tɔ èlen Mbɔ̧ɔ̧mà adù̧ la à? Bɔɔ̀ nkwèla ale è kà wu àghɨa mbɨ̧ ta te bɨ̧ɨ̧nè nê wòt tsa kà wu ntsìà mèpɨ̧̀ Mbɔ̧ɔ̧mà ghɨa la.”
27Yesò lìà nê, “Mbɔ̧ɔ̧mà li ngɨ̀ àliapfəè mbɨ̀Ꞌɨ̀ nɨ etɨŋe wɔ̀bȩ̂, tà li tà kà wua ngɨ̀à nê, wɔ̀bȩ̂ ŋà àtsəa zi ane ànəa àliapfəè. 28È wu ale, bɨ̀ ko nê, Waã Wòt wu wòt tà bɔ àtɔŋ a ègwet àliapfəèa Bèjuê la.”
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2006, Cameroon Association for Bible Translation and Literacy